Lûqa 9
9
Îsa Wezîfe Dano Diwês Hewarîyanê Xwu
(Metta 10:5-15; Marqos 6:7-13)
1Îsayî veng da diwês hewarîyanê xwu, hêz û selahîyetê weşkerdişê nêweşan û însanan ra vetişê cinan da înan. 2Semedê îlankerdişê Hukimranîya Homayî û nêweşan rê dayişê şîfa ê şirawitî. 3Îsayî înan ra va: “Raywanîye de çuwa, tewreyê erzaqî, werd yan zî pere, heta pirêno zêde bîle megêrê xwu het. 4Eke şima şiyî cayêk, heta ke şima uca ra vejîyê, eynî keye de bimanê. 5Cayo ke şima şiyê de eger şar weş nêewnîyo şima ra, uca ra vejîyê; gama ke şima uca ra vejîyayî, tozê linganê xwu biweşanê.”#9:5 tozê linganê xwu biweşanê: Eke hewarîyan tozê linganê xwu biweşanayne, eno îfade kerdêne ke êdî aqîbetê şarê ucayî ra mesûl nîyê. 6Hewarî kewtî rayir. Dewe bi dewe geyrayî û her ca de mizgîna xelasî waez kerde, şîfa da nêweşan.
7Hîrodesê ke mintîqeyê Celîle îdare kerdêne gama ke enê heme biyenî şinawitî, heyret mend. Çimkî tayê merdiman vatêne Yehya merg ra biyo gane. 8Tayêne zî vatêne Îlyas asayo, sewbîna kesan zî vatêne pêxemberanê verînan ra yew biyo gane. 9Hîrodesî zî vatêne “Mi sereyê Yehyayî da birnayiş; eyla eno merdimo ke ez derheqê ci de xeberanê winasîyan şinawena kam o?” Û dest pê kerd, fikirîya ke senî xwu biresno Îsayî.
Îsa Panc Hezarî Kesî Keno Mird
(Metta 14:13-21; Marqos 6:30-44; Yûhena 6:1-44)
10Gama ke hewarî ageyrayî, raywanîye de çi kerdo, Îsayî rê qal kerd. Dima Îsayî ê berdî yew şaristanê bi nameyê Beytsayda. Waştêne tiya înan dir tenya bimano. 11Feqet şar eno pê hesîya û kewt Ey dima. Îsayî bi zerrweşî şar qebûl kerd û behsê Hukimranîya Homayî kerde, ê ke muhtacê şîfa bî, kerdî weş.
12Vera şanî diwês hewarî ameyî Îsayî het û wina va: “Însanan ra vaje wa vila bibê. Tiya yew cayo tenha yo. Wa şêrê dewanê derûdorî û çewlîgan de xwu rê werd û cayê rakewtişî bivînê.”
13Labelê Îsayî şagirdanê xwu ra va “Şima werd bidê înan.” Şagirdan va “Ma dir tenya panc nanî û di maseyî estê. Qey ti ma ra pawenê ke ma şêrê hende însanan rê werd temîn bikerê?”
14Tenya hûmara camêrdan teqrîben qasê panc hezarî bî.
Îsayî şagirdanê xwu ra va “Qelebalixî bi komanê pancas-pancas bidê roniştiş.”
15Şagirdan zî o qeyde kerd û her kes da roniştiş. 16Îsayî panc nanî û di maseyî girewtî û ewnîya rîyê asmînî ra û Homayî rê şukir kerd. Dima enê lete kerdî û seba ke şarî rê vila bikerê, dayî şagirdanê xwu. 17Heta ke bibê mird her kesî werd, gelek werd zî zêde mend. Werdo ke mendo ra diwês sepetî debiyî.
Petrûs Şehadet Keno ke Îsa Mesîh o
(Metta 16:13-28; Marqos 8:27—9:1)
18Rojêk, wexto ke Îsayî tenya dua kerdêne şagirdê ci şiyî nizdîyê Ey. Îsayî înan ra persa va: “Şar vano ez kam a?”
19Înan wina cewab da: “Tayê vanê Yehyayo Waftîzkar o, tayê zî fikirîyenê ke Îlyas#9:19 Îlyas: Yew sermiyano zaf muhîm û pêxember o. Teqrîben ÎV (Îsayî ra Ver) heta 850, 25 serrî kelamê Homayî neqil kerdo. o. Tayê zî vanê pêxemberanê verînan ra yew biyo gane û ameyo.”
20Enê ser o Îsayî înan ra persa va: “Eyla şima gore ez kam a?”
Petrûsî ci ra va “Ti Mesîhê Homayî yê.”
21Îsayî ê îqaz kerdî ke enê çî kesî ra nêvajê.
Îsa Dano Zanayiş ke Mireno û Beno Gane
22Û Îsayî va “Gereka Benîademo Semawî zaf dej bianco, hetê sermiyanan, serkahînan û alimanê Tewratî ra bêro redkerdiş, bêro kiştiş û roja hîrêyine bibo gane.”
23Dima hemîne ra va “O ke wazeno mi dima bêro wa xwu înkar bikero. Her roje wa çarmixê#9:23 çarmix: Yew usûlê îdamî bi ke Romayijan seba sûcdaranê siyasî û adîyan tetbîq kerdêne. Dest û lingê sûcdaran şeklê xaçî de dar ra ameyne mîxkerdiş. Kesê ke biyê mehkûmê ena ceza wina mergî rê ameyne verdayiş. Sey enê, keso ke Îsa Mesîhî ra bawer kerdo zî gereka heyatê xwu yê verînî “mehkûmê mergî” bihesibno, se beno wa bibo, gereka îtîmadê xwu bi Mesîhî biyaro û yew heyato newe bicûyo. Manaya “çarmixê xwu dayiş serê polê xwu” ena ya. xwu bido polê xwu ser û mi teqîb bikero. 24O ke biwazo ganê xwu bixelisno do ey vindî bikero, o ke ganê xwu rayirê mi de feda bikero zî do ey bixelisno. 25Însan wayirê heme dinya bo la ganê xwu û ruhê xwu vindî bikero çi keweno dest? 26Kam mi ra û vateyanê mi ra bişermayo, wexto ke Benîademo Semawî zî miyanê îhtîşamê xwu û Babîyê xwu û melekanê mibarekan de bêro, do ê kesî ra bişermayo. 27Ez şima rê enê vajî, merdimê ke tiya yê, nînan ra tayê kesî mergê xwu ra ver do Hukimranîya Homayî bivînê.”
Aseyişê Îsayî Bedilyeno
(Metta 17:1-8; Marqos 9:2-8)
28Îsayî, vatişê enê çiyan ra teqrîben heşt rojî badê, Petrûs, Yûhena û Yaqûb girewtî xwu het û seba ke dua bikero vejîya ko. 29Îsayî gama ke dua kerdêne aseyişê rîyê ci bedilîya. Kincê Ey sey beriqîyayişê virsoyî biyî sipî. 30Nişka ra di merdimî verê ci de peyda biyî, înan dest pê kerd Îsayî dir xeberî da. Enê Mûsa û Îlyas bî. 31Aseyişê înan muhteşem bi. Înan qal kerdêne ke Îsa do nizdîyan de Yeruşalîm de bimiro û bibo gane, badê pey zî do bigêrîyo asmîn. 32Petrûs û êyê bînî şibî hewn a. Labelê wexto ke biyî aya, înan îhtîşamê Îsayî û her di merdimê ke verê ci de vindertbî dî. 33Gama ke Mûsa û Îlyas êdî verê Îsayî ra şiyêne, Petrûsî Îsayî ra va “Seyda, baş o ke ma hê tiya. Ma hîrê çardaxan virazê; yew to rê, yew Mûsayî rê, yew zî Îlyasî rê.” Hende şaş bibi ke ferq de nêbi vano se.
34Gama ke Petrûsî enê qalî vatêne yew hewr ame û sîya xwu da înan ser. Seba ke hewrî dorê înan girewt, Petrûs, Yûhena û Yaqûbî saw girewt. 35Miyanê hewrî ra yew veng ame, va: “Eno Lajê min o, O weçînite yo. Ey rê îtaet bikerê!”
36Gama ke veng birîya tenya Îsa uca bi. Şagirdanê ci derheqê ena biyene de tek yew qale nêkerde. Ê rojan de çiyo ke dîyo, înan kesî rê qal nêkerd.
Îsa Tutêk Cinî ra Xelisneno
(Metta 17:14-23; Marqos 9:14-32)
37Roja bîne Îsa û hîrê şagirdê xwu ko ra ameyî war. Yew qelebalixo zêde ame Îsayî vera. 38Miyanê qelebalixî ra yew mêrik wina qîra, Ey ra va: “Seyda ez bextê to de ya, lajê mi bike weş, o ewladê mino yewek o! 39Cin dekeweno zereyê ci, nişka ra qîreno, perpetîyeno, fek ra kefûkepûr vejyeno. Cin ganê ey pêro keno birînî; bi çi kul û halî ci ra aqitîyeno. 40Mi şagirdanê to rê lavey kerd ke cinî vejê, la nêeşkayî bikerê.”
41Enê ser o Îsayî wina va: “Ey gidî neslo bêîman û bêray! Ez do hema çiqas şima dir bimanî, ez do hema çiqas tehemulê şima bikerî?” Û tadiya mêrikî ser va: “Lajê xwu biyare tiya!” 42Gama ke tut ameyne cinî o da erd ro, bi şîdet o hejna. Labelê Îsayî tazîrê cinî da û şîfa da tutî, dima o teslîmê babîyê ci kerd. 43Çi kesê ke eno dî, vera ezametê Homayî de şaş mendî.
Îsa Reyna Dano Zanayiş ke Mireno û Beno Gane
(Metta 17:22-23; Marqos 9:30-32)
Gama ke her kes kerdenanê Îsayî de şaş bibi, Ey şagirdanê xwu ra wina va: 44“Nika çiyo ke ez do şima rê vajî baş goşdarî bikerê. Benîademo Semawî do teslîmê destê însanan bibo.” 45Înan eno vate fam nêkerd. Seba ke vateyî fam nêkerê manaya ci înan ra ameybî nimitiş û tersayne ke derheqê enê vateyî de Îsayî ra çiyêk bipersê.
Tewr Berz Kam o?
(Metta 18:1-5; Marqos 9:33-40)
46Hewarîyanê Îsayî dest bi minaqeşe kerd ke înan miyan de tewr berz kam o. 47Îsayê ke zanayne hişê înan ra çi vîyareno, yew tuto qijek girewt xwu het 48û hewarîyanê xwu ra wina va: “Kamo ke enê tutî nameyê mi ser o qebûl bikero seke ez qebûl kerda. Eyê ke ez qebûl kerda zî yeno ena mana, seke Eyê ke ez şirawita qebûl kerdo. Çimkî şima miyan de tewr nizim kam bo, o kes tewr berz o.”
49Yûhenayî enê ser o wina va: “Seyda, ma dî yewî bi nameyê to cinî vetêne. Ma lebitîyayî ke ey vindarnê, çimkî o şagirdanê to ra yew nêbi.”
50Îsayî va “Ey mevindarnê, çimkî o ke vera şima de nîyo, hetê şima yo.”
Samîrîyeyijî Îsayî Nêwazenê
51Zemano ke do Îsa bigêrîyayne asmîn nizdî bi, Îsayî bi gamanê pêtan verê xwu da Yeruşalîm. 52Xwu ra ver qasidî şirawitî. Enê, seba ke Îsayî rê amadekarî bikerê, şiyî yew dewa Samîrîye. 53Labelê şarî baş nêewnîya Îsayî ra, çimkî Ey verê xwu dabi Yeruşalîm.#9:53 Yeruşalîm: Demêko derg ra Samîrîyeyijan û cihûdan yewbînî ra nefret kerdêne. Îsa şiyêne mabedê cihûdan ke Yeruşalîm de yo, eno semed ra weşê Samîrîyeyijan nêşiyêne ke O mintîqeyê înan ra bivîyaro. 54Şagirdan ra Yaqûb û Yûhenayî gama ke eno dî, Îsayî ra persayî va: “Wayirê ma, ti wazenê ma bi yew emir asmîn ra adir bivarnê û enê însanan helak bikerê?” 55Labelê Îsa ageyra û tazîrê înan da. 56Badê cû şiyî yewna dewe.
Îsayî Dima Şiyayiş
(Metta 8:19-22)
57Gama ke rayir ra şiyêne yew mêrikî Îsayî ra va “Ti ser a şêrê, ez do to teqîb bikerî.”
58Îsayî ey ra va “Qulê lûyan û halînê teyran esto. Feqet cayê Benîademê Semawî çinê yo ke sereyê xwu bido ser.”
59Îsayî yewnayî ra va “Mi dima bêre!”
Labelê mêrikî va “Wayirê mi destûr bide, heta ke babîyê mi bimiro ez bimanî.”
60Îsayî ey ra va “Caverde, wa merdeyî bi xwu merdeyanê xwu defin bikerê. Ti şo û Hukimranîya Homayî îlan bike.”
61Yewna mêrikî Îsayî ra va “Wayirê ma, ez do to teqîb bikerî, feqet verî destûr bide ke ez keyeyê xwu ra xatir biwazî.”
62Îsayî zî ey ra va “O ke dest bi ramitişê hêgayî keno, gereka biewnîyo xwu ra ver; o ke ewnîyeno xwu ra dima, layiqê Hukimranîya Homayî nîyo.”
Currently Selected:
Lûqa 9: diqSZZ
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
