लूका 24

ईसूराः जियाव रिमुः

(मती 28:1-10; मरकूस 16:1-8; एहुना 20:1-23)

1हपताराः मड़ंग दिन, एतवार दिन अंगुः मेला हँकुःआ अइमीकू हँकू सपड़ाव दोहोतेरा हना नपाय महक जिनिसकून मड़गट लातरेकू गोःतेरा। 2हँकू ञेलतेरा, हना मड़गट लात दुवार कोलोंग रेडतो दोहोना हना दिरि, लात दुवार अते चलाःतो दोहोना। 3हँकू लात पेंदारे बोलोनेनखनकू ञेलतेरा दो, परबू ईसूराः मुरदा हंडा मेर दोहोगान। 4हँकुःआ अइमीकू बोरोनेनखनकू बयावयान। दो हनमेला असाका, टेडेगतो सोनहे तुसिंगतो बार होड़ होड़किन हँकू मड़ंगरेकिन चड़ाँयान। 5हँकुःआ अइमीकू बोरतेकू एकलाःआ अरू हुटुयानकू। हँकिन हँकुःआ अइमीकू एचेरेकिन कताया, “जीयत होड़ गोएगतो होड़कू तलारे अपे चिला लगापे ञमेयतना? 6ईसू नंडा कोवाया। हाँय दो जियाव रेमयनाय। ईसू गलील छतररेय दोहोन मेला, अपे एचेरे चेले चेले माःआने कतातेरा हनापे उहियार। 7हाँय नाःआ इयाय कतातेरा, कसूर होड़कू मनुवारीग बेटातकू एचे साबेयता। अरू हँकू हाँय कुरूसरेकू ठोंकाव ञेड एंडायता। मनदो पेय दिनरेय जियाव रिमुःता।” 8हनमेला अइमीकू ईसूराः हना बड़राकू उहियार अगूतेरा।

9लात मड़गट अते सहर अगी कुदा सेनेकियानखन हँकू ईसूरिकुःआ गारहो मूक चेलाकू अरू एटाः चेलाकू एचेरे नाःआ जमा बड़राकू कता उदुःतेरा। 10हँननकुःआ अइमीकू मगदलियायिन मरियम, एउनी, एकूबरीग एंगात मरियम अरू एटाः तोनोंग तोनोंग अइमीकू हों दोहोना। 11अइमीकू कताया हना बड़रा हँकू लगा लबरा कहड़ी इया लगावनेना। अरू हना बड़रा हँकू मेरकू बिसवासगाड। 12मनदो पतरस रेमकियानखन मड़गटरेय बतकाव सेनेडा अरू हना लातरेय बोलोयान। हाँय बंगानेनखने कोबोःतेरा दो, ईसूराः मुरदा मोड़हाव रेडतो दोहोना हना सोनहे एकलाय ञेलतेरा। हनाते हाँय बयावयाने अरू ओंगोल घड़ीन अनँयग ओड़ाःए कुदायान।

ईसू इमाऊसराः दूररे

(मरकूस 16:12-13)

13हनानाः दिन ईसूरिकुःआ चेलाकू अते बार होड़ इमाऊस गाँव अगीकिन सलाःआ। हना गाँव एरुसलेम अते अंदांज चइर कोस तोरेरे दोहोना। 14हँकिन एरुसलेमरे होयानेना हना जमा कता उदुः होड़ेंग घड़ीनकिन सेना। 15हँकिन उदुः होड़ेंग घड़ीनकिन सेन मेला, ईसू वेगनेनखन हँकिन सुदाय सेना। 16मनदो भगवान हँकिन ईसू सिनहा लगा मेरेय ओवागडकिन।

17हाँय हँकिन एचेरेय होंबरेःआ, “अबा सेनेन सेन मेला चिन चिलाबा कता होड़ेंगतना?” दो हँकिन हदरावनेनखनकिन चड़ाँयान।

18दो हँकिन अते किलियोपास ञावीग होड़ कताया, “एरुसलेमरे मड़ंग दिनरे चिन चिला होयानेना हना कता हंडाकू वेगनेना हँकुःआ होड़कू अते अनम एकला मेरेम अयूमगरा जा?”

19दो ईसू होंबरेया, “चिन चिला कता हंडा होयानेना?”

हँकिन ईसू एचेरेकिन कताया, “नसरेतरीग ईसू, भगवानराः बड़रा कतायीग होड़ दोहोना अरू हाँय भगवान अरू होड़कू मड़ंगरे मुरुक जंगरते भगवानराः बड़राय कताःआ अरू बुताय एचेःआ। 20दो मरंग पुजउरीकू अरू एटाः हातपात होड़कू ञेड एंडागेय लगा रूमी देसरिकुःआ हातपात होड़कू एचेरे ईसूकू जिमातेरा अरू हँकू हाँय कुरूसरेकू ठोंकाव ञेडतिरिया। 21अलेके असरा दोहोना, हाँय अले इसराएल होड़कूय अजइतलेता, माःआन। नाःआ इया होयाकियान अते नुँहू पेय दिन होयाकिया। 22अरू नान इया हों होयानेना। अले अते तोनोंग तोनोंग अइमीकू अंगुः मेला ईसूकू मंडावतेरा हना मड़गट लातरेकू सेनेडा अरू हँकू अलेकू कता बयावगोतेड। 23हँकू ईसूराः मुरदा हंडा मेरकू ञेलगाड। अरू हँकू वेगवाडखनकू कताया, अले सेरमो देसरिकुःआ बराहीलकू ञेनेल मेडरेले ञेलकतेडकुःआ अरू सेरमो देसरिकुःआ बराहीलकू कताया, ईसू जीयत इदानिया, माःआन। 24अरू अलेरिकुःआ सउंगताकू अते अदोमकू मड़गट लातरेकू सेनेडा अरू अइमीकू कताया हनन इयाकू ञेलतेरा मनदो हँकू ईसू मेरकू ञेलगडीग।”

25दो ईसू हँकिन एचेरेय कताया, “ने बोको होड़किन, भगवानराः बड़रा कता होड़कू कताया हना जमा बड़रा अबा गते-गातबा बिसवासगेतना जा? 26मसीके मुरुक कटसिया सहावकेडखन गुनुजुः लगा दोहोना अरू हना तयोमरे मान मरजइत सुदा सेरमो देसरे बोल लगा दोहोना।”

27हनते भगवानराः कागदरे मोसेस अरू एटाः जमा भगवानराः बड़रा कता होड़कू ओजाःकेरा हनाते अनँयग बदीरे ओजाःतो दोहोना हना जमा ईसू हँकिने कता समझावतेडकिना।

28हँकिन सेन दोहोना हना गाँवराः लेसानरेकिन सोदोरयान। दो हँकिनके लगावनेना, ईसू अलंगते मड़ंग मड़ंग सेन लगाय चहाःतना। 29दो हँकिन कताया, “नुँहू अयूबगुःतना। हनलगा आम तिसिंग अलिंग सुदाम दोहोन।” दो ईसू हँकिन सुदा दोहोन लगा ओड़ाः पेंदारेय बोलोनेना।

30ईसू हँकिन सुदा जोजोम लगाय दुड़ुःयान। हनमेला रुटी साबवाडखन भगवाने धनियाबादतेरा। अरू हना रुटी डुंडीगतेडखन हँकिनाः होड़किन जोम लगाय हटिंगवातेडकिना। 31हनमेला ईसू हँकिन भगवान एचे सिनहागोतेडकिन। हँकिन ईसूकिन सिनहातेड दो, असाका ईसू छपितयान। 32हनते हँकिन अँननकिन कता होड़ेंगा, “हाँय दूररे अलंग सुदाय बड़राःआ अरू भगवानराः कागदरे ओजाःतो इदा हना बदीरे अलंगे कता समझावा हनमेला अलंगराः जीव मुरुक बहालते पेरेगयान।”

33हँकिन ओहेन रेमवाडखन एरुसलेम सहर अगीकिन कुदा सेनेडा। हना अगीकिन सेनेड दो, गारहगोटोंग चेलाकू अरू एटाः होड़कू मिनीरेकू जुमावकुःआ। 34हँकुःआ होड़कू हँकिन एचेरेकू कताया, “सतायरे ईसू जियाव रेमयनाय। पतरस हों अनँयग मेडतेय ञेलकिरिया।” 35दो हँकिन हों दूररे होयानेना अरू ईसू रुटीय डुंडीग मेला करा इयाकिन सिनहातिरिया, हना जमा कता हँकू एचेरेकिन कता उदुःतेरा।

ईसू चेलाकू एचेरे

(मती 28:16-20; मरकूस 16:14-18; एहुना 20:19-23; मूक चेलाकू 1:6-8)

36हँकुःआ होड़कू कता उदुः होड़ेंगा, हननमेला असाका ईसू हँकू तलारेय चड़ाँयान अरूय कताया, “भगवान अपे लगा सलसते एमे।” 37हँकू ओंगोलतेरा, नाँय तोनोंगीग भूत हवे, माःआन अरू मुरुककू बोरोयान। 38ईसू हँकू एचेरेय कताया, “अपे अलोपे बोर। अपे चिला लगापे बार जीवगुःतना? 39ईंगराः तिःई अरू काटकूनपे ञेल। ईंग हनाँय हवे। ईंगपे टोँवाव सो। ईंगराः देहरे इदा हना इया भूतराः जांग अरू मास मेर दोहोनता।”

40नाःआ इया कतातेडखन ईसू हँकू एचेरे अनँयग तिःई अरू काटकूने उदुःगोतेड। 41हँकुःआ होड़कू मुरुककू बहालयान। हनारे हों हँकू नाःआ जमा कता सताय हवे माःआन मेरकू बिसवासगेःआ। दो ईसू हँकू एचेरेय होंबोरतेरा, “नंडा कहिसाः जोम लगा इदा जा?” 42दो हँकू, ईसू जोम लगा मी डुंडीग रपाःतो हकूकू ओवातिरिया। 43हाँय डुंडीगतो हकू साबतेडखन हँकुःआ होड़कू मड़ंगरेय जोमगोतेड।

44तयोमरे हाँय हँकू एचेरेय कताया, “ईंग अपे सुदा दोहोन मेलायिंग कतातेरा, मोसेसराः नियम कागदरे, भगवानराः बड़रा कता होड़कूराः कागदरे अरू सेरेंगकून कागदरे ईंग बदीरे ओजाःतो इदा, हना जमा कता हनन इया होनोयाः इदा।”

45भगवानराः कागदरे ओजाःतो इदा हना जमा कता ईसू हँकूय एचे सुदीगोतेडकुःआ। 46हाँय कताया, “भगवानराः कागदरे नाःआ इया ओजाःतो इदा, मसी कटसिया सहावकेडखने गुजुःता अरू पेय दिनरेय जियाव रिमुःता। 47होड़कू हनाँयराः ञावते एरुसलेमते बुँहड़ीवाडखन जमा जइत होड़कू एचेरेकू परसारगेता, होड़कू कसूर अते जीवकू कुदाता दो हँकूराः कसूर ईसूराः ञावते भगवान बराव एंडागोडताय, माःआन। 48नाःआ जमा कताराः हिदइतदारकू अँननपे हवे। 49ईंग अपांग जबानकेरा हाँयग सुद बिरुवायिंग वारेयता। अरू हाँय अते अपे सेरमो देसराः जंगर अरीनपे पवाः वरी ननानाः सहररेपे दोहो हताड़।”

ईसूराः कुदा रकबगुः

(मरकूस 15:1-5; मूक चेलाकू 1:9-11)

50तयोमरे एरुसलेम अते बेतनिया गाँव वरी ईसू हँकूय गोःयाडकू। हनते हाँय तिःई पेरेतेडखन हँकू भलावातेडखने कताया, अपेराः जीव-जहनकून नपाय जुवाः, माःआन। 51हनन इया एचेकेडखन ईसू हँकूय पइड़घावतेरा अरू हँकू ञेनेल ञेला मेला, हाँय सेरमो देस अगी भगवान रेम गोःयाडीग। 52दो हँकू हाँय जागतेडखन एरुसलेम अगी मुरुक बहालतेकू कुदा वेगयान। 53अरू हँकू सगर दिन भगवानराः ओड़ाःरे हाँयकू जागा।

Currently Selected:

लूका 24: kfp

Highlight

Copy