एहुना 9

ईसू अंधा होड़े नपायतेरा

1तयोमरे ईसू अरू आँयगरिकुःआ चेलाकू दूर सेन मेला जनमावनेन वरीते अंधाय दोहोना, मी होड़ होड़कू ञेलतेरा। 2दो चेलाकू ईसू एचेरेकू होंबोरतेड, “ने गुरुजी, नाँयग होड़ अनँयगराः कसूरते जा एंगात अपातराः कसूरते अंधाय जनमावनेना?”

3दो ईसू कतातेड, “नाँयग होड़राः सहे आँयग एंगात अपातराः कसूरते मेरेय अंधागना। मनदो नाँयग होड़राः जीवते भगवान अनँयग जंगरे उदुः लगा नाःआ इया होयाकिया। 4रइत सुदुरुःतना, अरू हनमेला तोनोंगाः बुता ओरोबू एचे अवेतेरा। हनालगा ईंगे वारकेरा हाँयराः बुता दिनीने दिनरे एएचे लगा इदा। 5चउंदीसरेयिंग दोहोन वरी ईंग चउंदीसराः मरसल हवे।”

6नाःआ इया कतातेडखन ईसू ओतरेय बेगतेरा। हनते हाँय हना ओल दाःते हासे सुवेडतेड अरू अंधा होड़राः मेडरे लोटावगोतेडखने कतावातेरिया, 7“दूमे, अरू सिलोहराः दाहराः दाःरेम आब जुवाः।” (सिलोहराः मतलोब वारतो हवे।) दो हाँयग अंधा होड़ सेनेडखन मेडे आबयान अरू ञेल ञेले कुदा वेगयान।

8दो हाँयरिकुःआ परुसीकू अरू हाँय असे जोमतोकू ञेलतिरिया, हँकुःआ होड़कू कताया, “दुडुःकियानखने असे जोमा हाँय ननाँय दो ना लवे जा?”

9अदोम होड़कू कताया, “नाँय दो हनाँय हवे।”

अरू एटाः होड़कू कताया, “बुरी, नाँय हनाँयग होड़ इयाय ञिलुःतना।”

मनदो हाँयग होड़ कताया, “ईंग हनाँय हवे।”

10हनते हँकू हाँय एचेरेकू होंबरेःआ, “आमराः मेड करा इया गीगयना?”

11दो हाँय कतातेड, “ईसू ञावीग मी होड़ होड़ हासे सुवेडतेड अरू ईंगराः मेडरे लोटावतेडखन ईंगे कतावातेरा, सिलोह दाहरे सेनेकियानखन आब जुवाःमे, माःआन। दो ईंग सेनेडखनिंग आबयान अरूयिंग ञेलगोडतना।”

12दो हँकू होंबोरतेड, “हाँय करे इदानिया?”

दो हाँय कताया, “चुवा मन दो।”

फरीसी होड़कू हाँयग अंधा होड़कू जासतेरा

13हनते हँकुःआ होड़कू मड़ंग अंधाय दोहोना हाँयग होड़ फरीसी होड़कू एचेरेकू गोःयाडीग। 14ईसू हास सुवेडतेडखन हाँयग अंधा होड़राः मेडे एचे ञेलतिरिया हना दिन, लोड़ोनराः दिन दोहोना। 15हनालगा फरीसी होड़कू हाँय एचेरेकू होंबोरतेरा, “आमराः मेड करा इया नपाययना?”

दो हाँय हँकू एचेरेय कतातेड, “हाँयग होड़ ईंगराः मेडरे हासे लोटावतेरा अरू ईंग आबनेना, दो ईंग ञेञेलतना।”

16फरीसी होड़कू अते अदोम होड़कू कताया, “हाँयग होड़ लोड़ोनराः दिन मेरेय मनाःता। हनालगा हाँय भगवानरीग होड़ ना लवे।”

मनदो एटाः होड़कू होंबोरतेरा, “कसूर होड़ करा उड़ी नाःआ इया बयाव जुवाः इयाःआ बुताय एचे अवेय?” नाःआ इया हँकू अड़ा-चउकीयान।

17हनते हँकू अंधाय दोहोना हाँयग होड़ एचेरे अरूकू होंबोरतेड, “आमराः मेडे नपायकेरा हाँयराः बदीरे चेले माःआनमे कतायतना?”

दो हाँय कताया, “हाँय दो भगवानराः बड़रा कतायीग होड़ हवे।”

18हनारे हों हँकुःआ एहूदाकूरिकुःआ मूक होड़कू नाँयग होड़ अंधाय दोहोना अरू नुँहूय ञेञेलतना माःआन हाँयरिकिनाः एंगात अपात राःतेडकिनखन अरीनकू होंबोरकिन वरी मेरकू बिसवासगाड। 19हँकू हँकिन एचेरेकू होंबोरतेड, “नाँय अबारीग बेटा हवे जा? ननाँय हवे जा अंधाय जनमावनेना हाँय? दो नाँय करा उड़ी नुँहूय ञेञेलतना?”

20दो हँकिन कतातेड, “अलिंग सुनुदीयतनालिंग नाँय दो अँननलिंगरीग बेटा हवे अरू अंधाय जनमावनेना। 21मनदो नाँय करा उड़ी नुँहूय ञेञेलतना अरू इये नाँयराः मेडे नपायकेरा, हना मेरलिंग सुसुदीतना। नाँय लँइग कोवाया। हनालगा अपे अनँयग एचेरेपे होंबरे। आँयग बदीरे अनँयग उदुःगेता।” 22-23तोनोंगीग होड़ ईसू, मसी हवे माःआने मनेवाया दो, हाँयग होड़ अरजी ओड़ाः अते हिगार एंडाय लगा एहूदाकूरिकुःआ मूक होड़कू मी रायरेकू दोहोना। हनालगा हाँयग होड़रिकिनाः एंगात अपात एहूदाकूरिकुःआ मूक होड़कूराः बोतोरतेकिन कतातेरा, नाँय लँइग कोवाया। हनालगा अपे अनँयग एचेरेपे होंबरे, माःआन।

24हनते हँकू मड़ंगरे अंधाय दोहोना हाँयग होड़ अरू राःतिडीगखनकू होंबरेया, “भगवानमे मान मरजइत। अले दोले सुसुदीतना हाँयग होड़ कसूर होड़ हवे।”

25दो हाँय कता कुदातेरा, “हाँय कसूर होड़ हवे जा ना लवे, हना ईंग मेरिंग सुदीयतना। ईंग नाःआयिंग सुदीतना, ईंग मड़ंग मेरिंग ञेञेला, मनदो नुँहूयिंग ञेञेलतना।”

26हनते हँकुःआ होड़कू अरूकू होंबोरतेरा, “आमराः मेड करा इया नपाययना? हाँय करा इयाय एचेतेरा?”

27दो हाँय हँकू एचेरेय कतातेड, “ईंग अपे एचेरेयिंग कता उदुःगोतेडा। मनदो अपे हना कता मेरपे अयूमगाड। मी तुरहा अरू चिला लगा अअयूम लगापे चहाःतना? हाँयरिकुःआ चेलाकू अपे हों बड़ाँः लगापे चहाःतना जा?”

28हनते हँकू हाँय एचे बेग-हतावाड़िगखनकू कताया, “आम हाँयरीग चेला हवे। मनदो अले दो मोसेसरिकुःआ चेलाकू हवे। 29अले सुदीयतना भगवान मोसेस सुदाय बड़रानेना, मनदो अले नाँयग होड़ मेरले सुदीगेयता, हाँय करेयीग होड़ हवे, माःआन।”

30दो हाँय हँकू एचेरेय कतातेरा, “हाँय ईंगराः मेडे नपायकेरा। अरू अपे हाँय करेयीग होड़ हवे, हना अपे मेरपे सुसुदीतना दो नाःआ बयाव जुवाः इयाःआ कता हवे। 31अबू सुदीयतना भगवान कसूर होड़कूराः अरजी मेरेय अयुमेता। मनदो भगवानराः ओंगोल इयाय सलाःता, हाँयग होड़राः अरजी भगवान अयुमेता। 32चउंदीसराः मड़ंग जूग वरीते हों अंधाय जनमावनेना हाँयग होड़राः मेड तोनोंगीग नपायकेरा, हना मेर अयूमगना। 33अरू नाँय भगवानरीग होड़ अहाय दोहोकुः दो, हाँय कहिसाः ओरोय एचे अवेकेःआ।”

34हँकू हाँय एचेरेकू कतातेड, “आम दो जनमावनेन वरीते कसूर होड़ इदानमेःआ। अरू नुँहू अलेम चेडतना जा?” हनते हँकू हाँय अरजी ओड़ाः अते हिगारतिरीगखनकू एकला एंडागोतेडीग।

इंदरीराः अंदरा

35ईसू अयूमतेरा, एहूदाकूरिकुःआ मूक होड़कू मड़ंगरे अंधाय दोहोना हाँयग होड़कू एकला एंडागोतेडिया, माःआन। दो ईसू हाँये ञामतेरा अरू जुमावनेनखन हाँय एचेरेय कताया, “आम मनुवारीग बेटात एचेरेम बिसवासगेतना जा?”

36दो हाँय कतातेड, “ने परबू, हाँय एचेरेयिंग बिसवासगे लगा हाँय इये हवे?”

37दो ईसू कतातेड, “आम हाँयमे ञेलकिरिया अरू आम सुदा नुँहूय बुतुड़ुतना, हनाँय हवे।”

38हनते हाँय कताया, “ने परबू, ईंग बिसवासगेतानिंग।” हनते हाँय उकुड़ोमनेनखन ईसूय जागतेरा।

39दो ईसू कतातेड, “ईंग नाःआ चउंदीसरे होड़कू फड़ियाव लगायिंग वेगकिया। नाःआ अते मेरकू ञेञेलतना हँकुःआ होड़कू ञेलता अरू ञेञेलतना हँकुःआ होड़कू अंधा जुवाःता।”#एस 6:9

40दो हाँय सुदाकू दोहोना हँकुःआ फरीसी होड़कू अते अदोम होड़कू नाःआ अयूमतेडखनकू कताया, “अले हों अंधा इदानलेःआ जा?”

41ईसू हँकू एचेरेय कताया, “अपे अंधापे दोहोकुः दो अपे एचेरे कसूरराः बोझा ओरो दोहोनेना। मनदो अपे कतायतना, अले ञेञेलतनाले, हनानाः अते अपेराः कसूरराः बोझा दोनोहो जुवाःता।”

Currently Selected:

एहुना 9: kfp

Highlight

Copy