एहुना 13
13
ईसू अनँयग चेलाकूराः काटे बुहालतेरा
1पसहा परोब बुँहड़ीन अते मड़ंग ईसू सुदीगोतेडे, नाःआ चउंदीस अड़ाःकेडखन ईंग अपांग एचेरे सेन लगा बेला निचकाःतना। अरू चउंदीसरे इदानकुःआ आँयग निकता होड़कू हाँय मुरुके दुलारकेडकुःआ अरू हनन इया हँकू सगर सइटे दुलारकूता।
2सिमोनरीग बेटात जूदा इसकरियोतीराः जीवरे ईसू एचे साब लगा मड़ंगते कलउ ओंगोले सोलोंग दोहोतेरा। दो ईसू अरू चेलाकूतेन बियाड़ीकू जोम मेला, 3अपांग जमाकूनराः हातपात ईंग एचेरेय जिमाकेरा अरू ईंग भगवान अतेयिंग वेगकिया अरू भगवान एचेरेयिंग कुदा सेनता माःआन ईसू सुदीकेडखन, 4जोजोम अते रेमकियानखन आँयगराः सेरमोय तुसिंगतेरा हना अंगा तोलेगवातेडखन साफी मयांगरेय तोलतेरा। 5हनते हाँय पराँतरे दाः गोःतेडडखन आँयग चेलाकूराः काटे बुहालतेरा। हनते मयांगरे तोलतो दोहोना हना साफीते हँकूराः कटातूकूय जोड इदीया।
6ईसू सिमोन पतरसराः काट बुहाले सेनेडा दो पतरस हाँय एचेरेय कतातेरा, “ने परबू, चिला लगा ईंगराः काटमे बुहालता?”
7ईसू कतातेड, “ईंग एचेयतना हना नुँहू आम ओरोम सुदीतेरा, मनदो तयोमरे नाःआम सुदीगोडता।”
8दो पतरस कतातेड, “आम ईंगराः काट कहियो बुबुहाल लगा ओरोयिंग एमेवातेडमेःआ।”
दो ईसू हाँय एचेरेय कताया, “आमराः काट बुबुहाल लगा मेरेम ओवायिंग दो, आम ईंगरीग होड़ ना लवे।”
9हनते सिमोन पतरस कतातेड, “ने परबू, दो आम ईंगराः कनाट एकला कोवान, मनदो ईंगराः तिःई अरू बोः होंम बुहालगोड।”
10दो ईसू कतातेरा, “ऊमयनाय हाँयग होड़राः काट एकला बुहाल लगा इदा अरू तोनोंगाः बुबुहाल लगा कोवानेःआ अरू जमा अमिंगयना। अपे दो अमिंगतो इदानपेःआ मनदो जमाकू अमिंगतो कोवापेःआ।” 11हाँये एचे सबेयता हाँयग होड़ बदीरे ईसू सुसुदीःआ। हनालगा हाँय नाःआ इयाय कतातेरा, जमाकू अमिंगतो कोवापेःआ, माःआन।
12दो ईसू जमाकूराः काटे बुहालतेडखन आँयगराः सोनहे तुसिंगतेडखने दुड़ुःयान। अरू हाँय हँकू एचेरेय कताया, “अपे सुसुदीतनापे जा ईंग चिलायिंग एचेकेरा? 13अपे ईंग गुरुजी अरू परबू माःआनपे कतावायिंगता अरू ईंग हनाँय हवे। हनलगा अपे सनातायपे कतायता। 14ईंग अपेरीग गुरुजी अरू परबू हवे। हनारे हों अपेराः काटिंग बुहालकेरा। दो अपे हों अँननपे अपे सेवा होड़ेंग लगा इदा। 15ईंग एचेकेरा हनन इया अपे होँपे एचेय लगा चिनहायिंग उदुःवाडपेःआ। 16अपे ईंगपे अयूम! तोनोंगीग सेवकिया होड़ आँयग मालिक अते मरंग कोवाया अरू तोनोंगीग आँयग बराहीले वारता हाँय आँयगरीग बराहील अते मरंग इदानिया। 17नाःआ कताकून अपे सुदीयतना अरू हनन इयापे सलाः दो, भगवान अपेराः जीवे नपायगोडता।
18ईंग सुनावकेडकुःआ, हँकूयिंग सुसुदीतना। नुँहू अपे जमाकू बदीरे मेरिंग कतायतना, मनदो भगवानराः कागदरे ओजाःतो इदा हना कता होनोयाः लगा इदा।
ईंग सुदाय जोमा हाँयग होड़,
ईंगरीग मुदइ होड़े बड़ाँवनेना।#सेरेंगकून 41:9
19हना कता होयाः अते मड़ंग ईंग अपे एचेरेयिंग उदुःगेतना, अरू हना होया जुवाः दो अपे बिसवासगेता ईंग हनाँय हवे माःआन। 20अपे ईंगपे अयूम! ईंग वारेयता हाँयग होड़ तोनोंगीग मनेवायता, दो हाँय ईंगे मनेवाता अरू ईंगे मनेवाता हाँय, ईंगे वारकेरा हाँये मनेवाता।”
ईसू अनँयगकू एचे साबता हना बदीरेय कतायतना
(मती 26:20-25; मरकूस 14:17-21; लूका 22:21-23)
21नाःआ बड़रा कतातेडखन ईसू कुंभलावनेनखने कताया, “ईंगपे अयूम! अपे अते मी होड़ ईंगपे एचे साबिंगता।”
22दो चेलाकूतेन इये बदीरेय कतायतना माःआन ओंगोलकेडखन अँननकू अँकू ञेल होड़ेंगा। 23ईसू एटाः चेलाकू अते बगराय दुलारगेया हाँयग चेला ईसूराः कुड़ोम अगी तेंदारनेनखने दुड़ुःकुःआ।#13:23 होनायाःकून करे नाँयग होड़ एहुना हवे। नाँय नाःआ कागदे ओजाःतेरा अरू अनँयग बदीरे कता लगा मेरेय चाहावगान। 24दो सिमोन पतरस हनाँयग चेला ईसू एचेरे होंबरे लगाय अकियावतिडिया, “नाँय इयेराः बदीरेय कतायतना?”
25दो हाँय हनन इया ईसूराः कुड़ोम अगी तेंदारकियानखने होंबरेया, “ने परबू, हाँय इये हवे?”
26दो ईसू हाँये उदुःवातेरिया, “डुंडीगतो रुटी झोड़रे जोबरावकेडखन ईंग एमेवायता हाँयग होड़, हनाँय हवे।” अरू हाँय डुंडीगतो रुटी झोड़रे जोबरावकेडखन सिमोनरीग बेटात जूदा इसकरियोतीय एमेवातेरा। 27जूदा डुंडीगतो रुटीय जोमतेरा दो ईसू हाँय एचेरेय कतातेरा, “दूमे! आम एएचे लगा इदा, हना नुनुँहूम एचेय।” हननमेला कलउ हाँय एचेरेय समसावनेना। 28मनदो ईसू चिला लगा हाँय एचेरे नाःआ इयाय कताकेरा माःआन जोजोम लगाकू दुड़ुःनेना हँकुःआ चेलाकू अते तोनोंगीग मेरकू सुदीगाड। 29दो ढिबुवाकूनराः बगलीराः जिमेवारी होड़ जूदा दोहोना। अरू ईसू परोब लगा कहिसाः किजा लगा सहे गरीब होड़कू कहिसाः एमेवाकू लगाय कताकेरा माःआन अदोमकू ओंगोलतेरा। 30दो हनमेला रइतयान अरू डुंडीगतो रुटी जोमकेडखन जूदा ओहेन बहरी होरे उडुंगनेना।
ईसूराः नँवा हुकुम
31जूदा बहरी होरे उडुंगनेन दो ईसू कतातेड, “नुँहू मनुवारीग बेटातराः मान मरजइत होयायना अरू भगवानराः मान मरजइत हाँय एचेरे होयानेना। 32हाँय एचेरे भगवानराः मान मरजइत होयाः दो, भगवान बेटातेय मान मरजइतगुःता अरू ओहेन हाँये मान मरजइतगोडता।
33ने ईंगरिकुःआ लइंकू#13:33 एहूदाकूराः रिती-बिधीरे मी होड़ चेडदार आँयग चेलाकू तोनोंग तोनोंग बेलारे लइंकू माःआने कतावाकूता अरू चेलाकू अँकूरीग गुरुजी अपांग माःआनकू कतावायता।, गुनहोन बेला वरी अपे सुदायिंग दोहोनता। अपे ईंगपे ञामता, अरू ईंग एहूदा मूक होड़कू एचेरेयिंग कतातेरा हनन इया अपे एचेरे होयिंग कतायतना, ईंग सेनता हना ततेररे अपे ओरोपे सेने अवेतेरा।
34ईंग अपे लगा मीटोंग नँवा हुकुमिंग एमेयतना। ईंग अपेयिंग अलार-दुलारतना, हनन इया अपे होँपे अलार-दुलार होड़ेंगगोड ञवन।#एहु 15:12,17; 1 एहु 3:23; 2 एहु 5 35अपे अँननपे अपे अलार-दुलार होड़ेंग दो ननानाः अते जमा होड़कू सुदीगोडपेता अपे ईंगरिकुःआ चेलाकू हवे, माःआन।”
ईसूराः आड-बेकार बदीरे
(मती 26:31-35; मरकूस 14:27-31; लूका 22:31-34)
36दो सिमोन पतरस ईसू एचेरेय कतातेड, “ने परबू, आम करम सेनता?”
दो ईसू हाँय एचेरेय कतातेड, “ईंग सेनता हना ततेररे आम नुँहू ईंग देह दूर ओरोम सेने अवेतेरा। मनदो तयोमरे आम ईंग देहोरमे वेगता।”
37दो पतरस ईसू एचेरेय होंबोरतेड, “ने परबू, चिला लगा नुँहू ईंग आम देहोर ओरोयिंग सेने अवेतेरा? ईंग आम लगा ईंगराः जीव होयिंग एमेगोडता।”
38दो ईसू कतातेड, “ईंग लगा आमराः जीवमे एनेमेगोडता जा? ईंगमे अयूम! कुकुड़ा अरीन कुकूड़चुः अते मड़ंग आम पेय तुरहा ईंगमे आड-बेकारवाता।”
Currently Selected:
एहुना 13: kfp
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
