Juanasiup Aglangit 14

Jiisusiup Aqqutauninga Ataatamut

1“Uummatikkut qiksaangniarasi; Guuti ukpirisiuk, uvangalu ukpirilunga. 2Ataatama iglungani iniksaqaqpuq amisunik; ainiaqpunga iniksaliuriaqturlusi, taimainngippat tamatuminga uqautigajanngilassi. 3Ainiarumali iniksaliuriaqturlusi, utirumaarivunga ailusi uvanniiqullusi, najuganni. 4Aqqut qaujimavasi aiviginiaqtannut turaangajuq.”

5Tuumasiup uqautivaa, “Ataniq qaujimanngilagut namut ainiarmangaaqpit; qanurli aqqummik qaujimajunnaqpita?”

6Jiisusiup uqautivaa, “Aqqutauvunga, sulijuullunga, inuusiuvunga; kinamigluunniit Ataatamuaqtuqarunnanngilaq, uvakkuurluni kisiani. 7Qaujimagussinnga, Ataataga qaujimagajarivasi; maannali qaujimaliqpasi takusimavasilu.”

8Pilippuusiup uqautivaa, “Ataniq, Ataata takujautiguk uvattinnut; naammaksiniaqpugut tavva.”

9Jiisusiup uqautivaa, “Akunialuk najuliqpassi, suli qaujimanngilarma Pilippuusi? Uvannik takusimajuup Ataata takusimagivaa; sungmalli uqaqpit, ‘Ataata takujautiguk uvattinnut’? 10Ukpirusunngilatit Ataatamiinnama, Ataatalu uvanniimmat? Uqausiit uqausirijakka ilissinnut uvannit nangmininnit pisimanngilat; Ataataulli uvanniittuup piniarniit piniarnirivait. 11Ukpirisinnga Ataatanniinnama, Ataatalu uvanniimmat; ajurussili, piniarnirijakka pillugit ukpirisinnga. 12Sulijumik uqautivassi, uvannut ukpiqtuup piniarniit piniarnirijakka piniarutiginiarivait; anginiqsaniglu taakkunangat pinasuarumaaqpuq, Ataatamut ainiarama. 13Sunamigluunniit tuksiarniarussi atinni, pinasuarniaqpunga, Ataata niqturnaqtitauqullugu Irnirmigut; 14tuksiarussi sunatuinnarmik atinni, pinasuarniaqpunga.”

Anirniup Ijjurnaittuup Tunijaujumaarninga

15“Nagligigussinnga, piqujakka malingniaqpasi. 16Ataatalu tuksiarviginiaqpara, Ikajuqtigikannirniaqtassinnik tunisiqullugu ilissinnut, ilissinniitsainnarniaqtumik isuqanngittumut, 17taannauvuq Anirniq sulijumit pijuq, silarjuarmiut pijunnanngitangat, takujunnannginnamijjuk qaujimannginnamijjuglu; ilissili qaujimavasi, ilissinniimmat, ilusinniinniarmallu.

18“Iliarjuktitut qimangnianngilassi; utilaarivungali ilissinnut. 19Akuniunngittuq silarjuarmiut takuqattarniarunniiqpaanga, ilissili takulaarivassinnga; inuugama, ilissittauq inuuniarivusi. 20Ulluq taanna nalliutikpat qaujijumaaqpusi Ataatanniinnama, ilissilu uvanniinnassi, uvangalu ilussinniinnama.

21“Piqujannik pisimajuq maliglugillu, taannauvuq uvannik nagligusuktuq; Ataatamalu nagliginiaqpaa uvannik nagligusuktuq, uvangattauq nagliginiaqpara uvanniglu qaujijautillunga taassumunga.”

22Juutasiup uqautivaa (Iskariatiunngittuup), “Ataniq, sungmat ilingnik qaujijautittumavit uvattinnut, silarjuarmiunullu qaujijautittumanak?”

23Jiisusiup kiuvaa, “Uvannik nagligusuktuup, uqausikka malingniaqpait, Ataatamalu nagliginiaqpaa, Ataatagalu uvaguk tikilaaqpavuuk tavvanilu angirraqalirlunuk. 24Uvannigli nagligusunngittuup uqausikka malinngilait; uqausiit tusaqtasi piginngilakka Ataatamilli tilijinnit pivut.

25“Tamakkuninga uqallagvigivassi suli ilissinni najuutininni. 26Ikajuqtiksarli, Anirniq Ijjurnaittuq, Ataataup tililaaqtangata atinni, taassuma ajuriqturumaaqpaasi sunalimaanik, iqqaitillusilu uqausirilauqtalimaannik ilissinnut.

27“Isumajaarnanngittumik qimaivigivassi; uvanga nangminiq isumajaannginnirijannik tunisivigivassi; tunisinngilanga silarjuarmiut tunisijjusinngititut. Uummatikkut qiksaangniarasi, sivuuraniarasilu. 28Tusaqpusi uqautigassi, ‘Aullarniarama, utirumaarivungali ilissinnut.’ Nagligigussinnga, tavva quviasukkajaqpusi, Ataatamut ainiarnira pillugu; Ataata anginiqsaungmat uvannit. 29Tamanna ilissinnut uqausirivara nalliutiqqaaqtinnagu, tamanna nalliutikpat ukpiliqullusi. 30Akuni uqallaviginiarunniiqpassi, silarjuup tamatuma aulatsijinga qailirmat. Uvannullu pijunnarniqarani; 31silarjuarmiut tukisiliqullugit Ataata nagligigakku; taimaimmat pinasuaqpunga Ataatama pinasuaqtauqulauqtanginnik.

“Makillusi, tamaanngat nuuliqta.”

Currently Selected:

Juanasiup Aglangit 14: EAIBR

Highlight

Copy