От Марка 14

Туқусюкаңат Иисус

1Нықынӷаҳқылъыҳқа̄ Пасхам, Нықынӷаҳқылъыҳқа̄лъю Закваскалилъхилңӯм Нықыкшаңлъям ка̄сяҳқак ма̄лӷук аӷныӷык атуӷлюкык. Первосвященнигытлъю, апыҳтуӷикаюгытлъю Лӣлиҳтӯсяның паниның агӷитңулӷӣт аксяқлъюку тугулюку Иисус туқунъалюку. 2Иўырңа нықынӷаҳқымъи пиюгумаңилъкаңат лю̄рақ югыт сыӷлылӣҳқӣҳлъягнаюката.

Вифаниями Аӷнам Тыпыңлъяҳқыхкаңа Иисус

3Вифаниямиңуқ та̄ўа ю̄к атиӷақыхкаңат, Симон Прокаженный. Симонынкуни Иисус ныӷумалюку, аӷнақ ӣтқақ тугумӣқлъюкык алавастрык ақимлыӷутак акитупихлъыҳӣк тыпыңлъя̄сик, нардыпигмың улима̄ӷык. Сигиқлъюкык ақимлыӷутам па̄скык кӯвыхкакык Иисусым на̄сқўакун. 4Таўанлыңӯт иляңи угумиюглютың илятың пикӣт: «Сяңан тыпыңлъя̄сик сякусӣқакык? 5Акиклъюкык алъхыӷуткынъаяҳтук 300 сӣпңалӷӣмун динарийемун ынка̄м акиңа тунқуӷнаяҳтуқ аклъюмалӷӣнун!» Та̄хкын аӷью̄қа̄т аӷнақ.

6Иўырңа Иисусым пикӣ: «Авылӷаҳтыху! Сяңан сыӷлықӯӷыстыху? Пинӣпихтуқ хўаңамнун таўатын пилъҳа. 7Аклъюмалӷӣт қӯнпың тама̄нсяҳқа̄гут, ынка̄м қакун алңунак каюсӣтақна̄ӷаси. Иўырңа хўаңа қӯнпың лъпысининъа̄нӷитуңа. 8Ӯм аӷнам апыӷӣӷа̄ пияҳқани; тыпыңлъяҳқыкыстаӷа̄ югусиқа лъивылъыҳқамнун. 9Ипа уңипа̄тамси, нани алңунак нунатаҳа̄ни тамаҳа̄ни Пинилӷӣт Уңипат уңипақныӷмыхтыки, а̄пҳақна̄ӷа̄т аӷнам таўатын пилъҳа югнун нықамикысқылъюку».

Иудам Увыҳпагусюкаңа Иисус

10Та̄хкын Иуда Искариот, иляңат қуля ма̄лӷук сӣпнықлъюку малихся̄ҳтыт, первосвященнигнун пикақ увыҳпагусюгнилюку Иисус лъңитнун, тугусқылъюку. 11Таўатын пийистың ынңа̄талъ ыфқуқыхка̄т, акықыхка̄тлъю манилилъықнилюку. Ынка̄м Иуда пилъыҳқаңнақуткыхкақ увыҳпагунъалюку.

Малихся̄ҳтыт Ята̄ҳқыхкаңат Пасхам Нықынӷаҳқылъыҳқа̄

12Сивулиқ аӷныӷа Закваскалилъҳилңӯм Нықыкшаңлъям Нықынӷаҳқылъҳа ка̄ткақ. Таўани аӷныӷми, Иудеит ӣўлың туқутақыхкаңит пынъӣӷаӷа̄т Пасхам Нықынӷаҳқылъҳанун. Малихся̄ҳтыт а̄птыка̄т Иисус: «Нани ята̄ҳқулъякын Пасхам Нықынӷаҳқылъыҳқа̄ның?»

13Та̄хкын Иисусым пики ма̄лӷук малихся̄ҳтыгни: «Иерусалимымун агляҳтык, югым мыҳталӷӣм налъяҳлъықӣстык, малихнакыси. 14Мыңтыӷамун ӣтқан та̄м мыңтыӷам юга пинакыси: “Апыҳтуӷистым хўатын писқа̄тын, Нани малихся̄ҳтыкулъҳӣни ныӷнақыстыху Пасхам Нықынӷаҳқылъҳа?” 15Кылгувикылъықӣси қымтамылңуӷмың ныҳлъягмың, сяңўа̄ қамахлъюни апыӷӣӷўа̄ӷлюни аюқуқ. Таўани ята̄ҳқунъакыфкут».

16Малихся̄ҳтык аӷуляқлъютык Иерусалимымун, ка̄сялӷӣмык сяңўа̄ қамахлъюни Иисусым апылъҳатун аюқыфтуқ. Ынка̄м Пасхам нықыкаҳқа̄ ята̄ҳқыхка̄қ.

17Иӷивгаӷьягу, Иисусым кылъқылъюки қуля ма̄лӷук сӣпнықлъюку малихся̄ҳтыни агляқат таўавык мыңтыӷамун. 18Ныӷӯтңулютың қаюӷвыгми Иисусым пикӣ: «Ипа уңипа̄тамси, налиҳпыси ныӷылгусиӷилӷӣм хўаңамның увыҳпагунъақңўа̄ңа».

19Малихся̄ҳтыт сыӷлыӷьюглютың кипулъхуснақ а̄пқуӷа̄қа̄т: «Хўаңаңўа̄?»

20Иисусым кӣмсиқӣ: «Налиҳси лъпыси қуля ма̄лӷук сӣпңалӷӣни, хўаңамнун малигулъюни сягныӷмун ныптыкаңа нықыкшаңлъяқ. 21Иӷныӷа Югым туқуяҳқа̄гуқ Акузитыт Игақыхкат пинақнилъҳистун. Иўырңа сыӷлыӷўа̄ӷунақңӯқ та̄на ю̄к увыҳпагутилӷӣ Иӷныӷаның Югым! Итагнаӷнаяҳтуқ алъхыӷумаңисяқуми!»

Атанӷым Ныӷыстилъҳа

22Ныӷӯтңулютың Иисусым тугука̄ нықыкшаңлъяқ. Игамсиқаюгвиклъюку Кияӷнық, а̄вгуӷлюку тунқуқӣ малихся̄ҳтыни. Пикӣ: «Тугулюку ныӷитыху, уна югусиқақа».

23Та̄хкын тугулюку қаю̄сиқ виномың ималык, игамсиқаюгвиклъюку Кияӷнық, тӯныхка̄ лъңитнун, қамахлъютың мыӷвика̄тақа̄т. 24Иисусым пикӣ: «Уна а̄кўақа, та̄хун Кияӷныӷым акықуся̄ апыӷӣӷьяҳқа̄гуқ. Туқукума а̄кўа кӯвылъықуқ угля̄пихлъыӷӣнун югнун. 25Ипа уңипа̄тамси, виномың алъя мыӷна̄нӷитуңа кынляңа аӷныӷми таўани виноӷраӷақ мыӷыхкумкун Атаныҳпагулъҳани Кияӷныӷым».

26Та̄хкын иляга̄н атуӷлюку, а̄нлютың Елеоным найӷаҳанун пикат.

Иисусым А̄пқаңа Петырымун Налъюнқылъықнилюни

27Иисусым пикӣ: «Униқаӷа̄лъықаҳпысиңа қаюҳлъяк Акузитни Игақыхкани Кияӷнық пика̄гуқ:

“Туқулъықақа пынъӣӷнӣҳта ынка̄м пынъӣӷыт миңиқылъықут”.

28Иўырңа киңуңаның уңуваҳтыстыкаңаңа Галилеямун агляқыстаҳлъықуңа сивухпысини».

29Петырым пика̄: «Унитықыҳна̄нӷитамкын қайўа илянка қамахлъютың қимагӯтыӷңа̄та!»

30Иисусым пика̄ Петр: «Ипа уңипа̄тамкын, унукун петухым қалӷилъыни алӷиҳтыстыхпына̄н налъюнқылъықаҳпыңа кытхўылъ пиңаюның».

31Иўырңа Петырым сягиқыпихлъюни пика̄: «Қайўа туқулгусиӷьяӷңа̄мкын, налъюнқынъа̄нӷитамкын!» Иляңиталъю қамахлъютың таўатын пика̄т.

Иисус Юӷалӷӣ Гефсиманиями

32Ка̄лъютың таўавык атилъқылӷӣмун Гефсиманиямың, Иисусым пикӣ малихся̄ҳтыни: «Ақумитык та̄хун, юӷа̄малюңа».

33Петырлъю, Иаковлъю ынка̄м Иоаннылъю кылъқыхкӣ. Та̄хкын Иисус алиңрӯҳлъякыстақақлъю, сыӷлылӣҳлъякыстақақлъю. 34Ынка̄м пикӣ: «Уңувасихка қивӷуҳлъягӯқ рыпалъ туқуяҳқа̄ҳлъюңа. Таўанлъюси кылыңалгусиҳтыңъа».

35Тазиңапиҳқа̄ӷлюни, нунамун сикмӯлъюни юӷақақ пилъыҳқалгукуми икфиқусиҳқани атуқыфқа̄н пиналюку. 36Пикақ: «Авва, Ата̄й, сяңўа̄ қамахлъюку пияҳқақан. Аўӣтигу уна қаю̄сиқ хўаңамның, иўырңа хўаңа пиюкылъқа авылӷаӷлюку лъпык пиюкылъҳын пигу».

37Та̄хкын такуяқминики пиңают малихся̄ҳтыни, қава̄фтут. Петр пика̄: «Симон, қава̄зӣн? Ата̄сиҳақ афлъю тыҳуматкынъыӷмың аҳтуҳсигӯ?» 38Та̄хкын пикӣ: «Кылыңатык, юӷаҳтык, нанӷӣқулъыңынӷитысқылъюси. Ипапыста̄қ таӷныӷак пияҳқа̄ӷңа̄ӷмык иўырңақун югусиқ кая̄туқ».

39Тазиңавык аглянқихлъюни юӷақақ та̄кут ата̄сит акузиткылъюки. 40Такунқихсяқминики малихся̄ҳтыни, та̄ўа қава̄тңуфтут, қаюҳлъяк қавам сякниқыстыкаңи. Кукшиқыхкатлъю сямың пилъыҳқамың. 41Пиңайӣткун такулюки пикӣ: «Та̄ўа қава̄ўақыстык, мыӷна̄лӣқыстык? Таўатынңам! Та̄ўа афлъю ка̄туқ, Иӷныӷа Югым увыҳпагусяҳқа̄ҳтуқ сыӷлыҳқыстынун. 42Ныкывитык, иглыҳтылъта. Ысҳақаҳтыхуқун, ука увыҳпақутистыка!»

Иисус Тугукаңат

43Иисус паниның акузималюку, Иуда ка̄ткақ, қуля ма̄лӷук сӣпнықлъюку малихся̄ҳтыт иляңат. Юлӷутыт малихтыка̄т, иляңи сявихпалиӷлютың, иляңи анагуталиӷлютың. Первосвященнигытлъю, апыҳтуӷикаюгытлъю Лӣлиҳтӯсяның, сӣванлъыӷытлъю каяхтыкӣт малихтысқылъюку Иуда. (Та̄на Иуда қуля ма̄лӷук сӣпнықлъюку малихся̄ҳтыт илякыхкаңат.) 44Увыҳпагутистым пикақыхкаңи: «Ю̄к на̄ӷьяҳқақа тугунакыси, ынка̄м аӷуляқунъакыси кылыңакистылиӷлюку».

45Иудам ка̄туткылъюку нагныӷвиклъюку Иисус пика̄: «Апыҳтуӷиста!» Та̄хкын на̄қа̄. 46Ынка̄м Иисус тугулюку нуқнықа̄т. 47Иўырңа ата̄сим таўанлыңӯм сявихпани нусюглюку первосвященнигым қыпҳаҳтыля̄ӷа сигутңиӷаҳтыка̄. 48Та̄хкын Иисусым пикӣ: «Тугуяҳтуӷыстыңъа̄ сявихпахтӯмаҳпыси, анагутаҳтӯмаҳпыси никимқун ўаяӷнӣҳтыстун аюқлъюңа? 49Аҳутаңа тамаҳа̄н апыҳтуӷӣқуңа Храмыми тугуңигатаҳпысиңа. Иўырңа таўатын пилъыҳпысигун Акузитыт Игақыхкат пилъҳит апыӷӣҳтыстаси».

50Та̄хкын қамахлъютың малихся̄ҳтыт унилъюку, қимагӯткат.

51Нукалъпигам малихтыка̄ Иисус қӣпаӷаӷмың сяпутақӣнаӷлюни. Тугукақсяқаңат 52иўырңа сяпутани унитқаҳлъюку қимакақ амсикаӷми.

Иисус Агӷистынун Агля̄скаңат

53Та̄хкын Иисус агля̄тка̄т Первосвященнигым мыңтыӷа̄нун. Первосвященнигытлъю, сӣванлъыӷытлъю, апыҳтуӷикаюгытлъю Лӣлиҳтӯсяның қамахлъютың таўантулъҳӣт. 54Уявақа̄нлъюни Петырым малихся̄қа̄ Иисус дворыңанун Первосвященнигым мыңтыӷа̄н. Таўани кылыңакистыт акулңитхун ақумлюни уӷухсиқақ кынӷым мануңани. 55Первосвященнигытлъю қамахлъютыңлъю агӷистыт туқутысюпихтыкаңат Иисус. Ынка̄м тахсиқлъиӷақлъюки югыт а̄пҳысқыхка̄т Иисус сямың анахусиматаңа. Иўырңа на̄лъкусимаңилңӯт туқутусиҳқамың, 56қаюҳлъяк угляпихлъыҳӣт тымңи иқлъыңиқуткыхка̄т Иисус, а̄пқӣтлъю алъякулъҳӣт.

57Та̄хкын иляңи югыт ныкывлютың иқлъыңиқуткыхка̄т Иисус, пикат: 58«Нагаткақаҳпут хўатын пилӷӣ: “Уна Храм югыт улима̄ӷат на̄фқылъықақа. Ынка̄м пиңают аӷныӷыт атуӷлюки алъяның ныкыфтилъықуңа югым улима̄қынӷилъкаңаның!”» 59Талўа та̄кутлъю апылъҳит алъякуткат.

60Первосвященнигым сивуңитхун ныкывлюни а̄птыка̄ Иисус: «Авуткилъҳитнун сямың пияҳқӣсӣн?»

61Иўырңа Иисус қа̄лъка̄маңилңуқ, кӣмсӣмаңилъкаңа. Первосвященнигым а̄плъя̄тақа̄: «Христосыңузӣн, Иӷныӷа Манигуӷақыхкымта?»

62Иисусым кӣмсиқа̄: «Та̄наңӯңа. Ысҳаҳлъықаҳси Иӷныӷа Югым ақумгалӷӣ аӷынқигныӷакун Аҳтуӷьяҳқа̄нӷилъылгым. Ысҳаҳлъықаҳсилъю тагилӷӣ қилягым қиляўа̄ӷитхун!» 63Первосвященнигым а̄ткани пӣглюки пикақ: «Лӣсимакыстыңисяӷңа̄мта лъӣҳтукут! 64Нагатаҳси сыӷлытун акузилӷӣ, Кияӷныӷунилӷӣ. Натын лъпыси агӷиткыстыху?» Агӷилъҳат ата̄сӣҳтыкақ, қамахлъютың туқусяҳқа̄ника̄т.

65Та̄хкын иляңита қысиқука̄т Иисус, хина̄ ся̄плъюку тыңлюхпага̄тақа̄т. А̄птыка̄т: «Ӯкналиқистыңукувык, уңипа̄тикут китум тыңлюхтатын?» Та̄хкын кылыңакистыт тугулюку қасяҳта̄тақа̄т.

Петырым Налъюнқыхкаңа Иисус

66Петр паниның қакма мануӷамылъюку, ата̄сиқ аӷнаӷақ первосвященнигым қыпҳаҳтыңа тагикақ. 67Ысҳақа̄ Петр уӷухсилӷӣ. Лӣсюқсямигу пика̄: «Лъпыклъю Иисусымыткаюгӯтын Назаретыӷмӣми».

68Иўырңа мысиӷақақ: «Налъюкақа̄ сямың пӣқсин талўа лӣгикынӷитақа сямың пикатын». Та̄хкын Петр агляӷақуқлъю амигмун а̄налюни, петух қалӷиқақ.

69Аӷнаӷа̄м қыпҳаҳтым ысҳаӷьямигу алъямың таўанлыңӯт пикӣ: «Уна ю̄к та̄кут иляка̄т!» 70Иўырңа Петр мысиӷаӷля̄тақақ.

Мулюнӷитуқ ныкывӷалъҳӣт пика̄т Петр: «Мысиӷаҳпагниңитутын, та̄кут иляка̄тын қаюҳлъяк лъпыклъю Галилеяӷмӣңӯтын».

71Та̄хкын Петырым сӣңвалъяӷмың пикӣ: «Иқлъыңиқңукума Кияӷныӷым аӷью̄ӷлиңа! Налъюкақа̄ ю̄к акузиткыхкыси!» 72Лыган ныпӣҳтуқ петухым қалӷилъыни алӷиқа̄. Таўани Петырым нықа̄тка̄ Иисусым хўатын пилъҳа: «Петухым қалӷилъыни алӷиҳтыстыхпына̄н налъюнқылъықаҳпыңа кытхўылъ пиңаюның». Та̄хкын қия̄ӷўаҳлъякақ.

Currently Selected:

От Марка 14: ess2

Highlight

Copy