От Марка 10

Иисусым Апыҳтӯсяқыхкык Ныңуҳтылъю, Пылъҳутутылъю

1Та̄хкын Иисус аӷуляқыхкақ тама̄кын нунамың. Агляӷлюни нунамун а̄тқылӷӣмун Иудеямун, аӷвиқакык Кӣўык Иорданык. Юлӷутым қырңуҳфиклъя̄тақа̄ ынка̄м апыҳтуқӣ пӣқылъыӷмитун.

2Иляңита Фарисеит такулюку анагнӣлъқавигиӷнақуткылъюку а̄птыка̄т: «Лӣлиҳтӯсямнъи итагнаҳта̄ югым нулӣни пыхтыкумигу?» 3Иисусым кӣмсиқӣ а̄птымъың: «Сяңа̄ўами Моисейем қылӷуся̄?» 4Кӣмсиқа̄т: «Моисейем пилъыҳқалиткақа̄ ю̄к пыхтусим игӣ имиӷлюки пыхтысқылъюку нулиҳа». 5Иисусым пикӣ: «Таўатын Моисейем Лӣлиҳтӯсялиткақӣси пиныҳлъюхлъягутыхпысиның. 6Иўырңа нунаңлъяӷьюхўа̄лъыӷмың “Кияӷныӷым улимакақа̄к ю̄клъю, аӷнақлъю”. 7Та̄на апалъюқлъюку югым унилъюкык атанилъю, на̄нилъю нулӣӷминун лъӣӷўа̄ӷьяҳқа̄гуқ. 8Ынка̄м ма̄лӷугунаниҳлъықук, ата̄сӣҳлъықук. 9Тама̄кын апалъюқлъюку Кияӷныӷым қырңуӷутыстыкакык йықай югым пылъҳутутысныӷилъикык».

10Мыңтыӷамун итыӷа̄сямың малихся̄ҳтыт а̄птыка̄т Иисус тама̄кын пилъҳаның. 11Иисусым пикӣ: «Югым нулӣни пыхлъюку алъяның нулиҳтуқуми, та̄ўа гылгаӷнӣҳлъықуқ. 12Таўатыҳпигақ аӷнам угини пыхлъюку алъяның угӣқуми, та̄ўа гылгаӷнӣҳлъықуқ».

Иисусым Қуястыкаңи Таӷнуҳа̄т

13Иляңита югыт тагиткӣт таӷнуҳа̄т Иисусымун ся̄флъюки қуястысқылъюки, иўырңа малихся̄ҳтыт иныҳтыкӣт тагитилӷӣт. 14Иисусым ысҳаӷлюки сыӷлыӷьягулъюки малихся̄ҳтыни пикӣ: «Таӷнуҳа̄т тагилит хўаңамнун. Иныҳтыхпынаки, қаюҳлъяк Атаныҳпагулъҳа Кияӷныӷым таӷнуҳаӷыстун аюқылӷӣт пика̄т. 15Ипа уңипа̄тамси, китум алңунак тугуклъинӷилъкумигу Атаныҳпагулъҳа Кияӷныӷым таӷнуҳаҳтун, итыӷна̄нӷитуқ». 16Та̄хкын таӷнуҳа̄т туга̄қлъюки, ся̄фтақлъюки қуястыкӣ.

Аклъюңилңуқ Ю̄к

17Иисус иглыҳнықихтақуқлъю, югым кытанқуснақ такулюку мануңакун сыгысқуҳлъюни а̄птыка̄: «Пинилӷӣ Апыҳтуӷиста, натын сялюңа кынлыңилңуқ уңувалъық алъхыҳнаяҳсикун?» 18Иисусым а̄птыка̄: «Сяңан пиниӷнизиңа? Кина алңунак пининӷитуқ, Кияӷныҳӣна̄гуқ пинилӷӣ. 19Лӣлиҳтӯсят лӣсимакатын: “Юхтаҳпынаң; гылгаӷнӣҳпынаң; тыглыхпынаң; иқлъыңиқуткыхпынаки югыт; пӯҳтихпынаң; қӯлваӷлюкык атанлъю, на̄нлъю”». 20Югым пика̄: «Апыҳтуӷиста, има нукалъпига̄тымның қа̄ткыңъўа̄нка та̄кут Лӣлиҳтӯсят». 21Иисусым пиниқыпихлъюку қӣвлюку пика̄: «Ата̄сӣгуқ пияҳқан. Акикуӷьяҳтуҳу қамахлъюку сяӷьян, ынка̄м акиңа тунқуӷнакын аклъюмалӷӣнун. Таўатын пикувык аклъюңилъықутын қилягми. Та̄хкын малихсяҳтуӷнакывңа». 22Таўатын пиятни ю̄к нулгӣқақ, иқиткақ ӣлъқыпихлъюни қаюҳлъяк аклъюңитыпихлъыҳӣ.

23Иисус юхсюӷалюни малихся̄ҳтыни пикӣ: «Пияқнапихтуқ аклъюңилңуӷни итылъыҳқа̄ Атаныҳпагулъҳа Кияӷныӷым!» 24Таўатын пийистың малихся̄ҳтыт сяӷӣӷаюкат. Иисусым пиля̄тақӣ: «Таӷнуҳаӷни, пияқнапихтуқ итылъыҳқақ Атаныҳпагулъҳанун Кияӷныӷым! 25Пияқнӣсяҳқа̄гуқ верблюдым сюфлъюӷутылъыҳқа̄ сикӯм ӣйңакун, аклъюңилңӯм югым итылъыҳқа̄ның Атаныҳпагулъҳанун Кияӷныӷым». 26Малихся̄ҳтыт ўатақа̄ӷақ сяӷӣӷаюкат, ынка̄м лъңитның а̄пқуӷа̄ӷуткат: «Кинаңам югулилъыңылъықа?» 27Иисусым қӣвлюки пикӣ: «Югыт пияҳқақынӷилъкаңит, Кияӷныӷым пияҳқақӣ».

28Та̄хкын Петырым пика̄: «Ысҳақаҳқутқун, сяңўа̄ қамахлъюку унилъюку малихлъыӷа̄тамкын».

29Иисусым пикӣ: «Ипа уңипа̄тамси, китум алңунак унискумики мыңтыӷани, аңлыгутни, на̄ни, атани, авақутани, нунани апалъюқлъюңа хўаңа, Пинилӷӣтлъю Уңипат, 30алъхыӷута̄ӷаӷьяҳқа̄гуқ хўани кияҳта̄лъыӷми. Мыңтыӷа̄, аңлыгутаңи, на̄ңа, авақутӣ, нунаңа, нуляҳлъягьяҳқа̄гут; тама̄кунун малигулъюку амью̄ткылъыңьяҳқа̄гуқ. Та̄хкын та̄кўаниңани кынлыңилңуӷмың уңувалъыңьяҳқа̄гуқ. 31Иўырңа углялӷӣт аңылъыҳпига̄т укалӣҳсяҳқа̄гут та̄гани, ынка̄м углялӷӣт укалиҳпига̄т аңылъыҳпига̄ҳсяҳқа̄гут».

Иисусым Туқулъыҳқани Акузиткылъя̄тақаңа

32Иисус ага сивуңитнитни иглыӷаңулюку тумытхун Иерусалимымун аюқылӷӣтхун. Малихся̄ҳтыңи сяӷӣӷаюкат, югытлъю алиңумаӷмың малихтыка̄т. Иисусым қуля ма̄лӷук сӣпнықлъюку малихся̄ҳтыни а̄фулъюки уңипа̄лъя̄тақӣ сялъыҳқаминың. 33Пикӣ: «Нагатык, Иерусалимынъақукут. Таўани Иӷныӷа Югым тӯнылъықа̄т первосвященнигынунлъю, апыҳтуӷикаюгнунлъю Лӣлиҳтӯсяның. Нанқихлъюку туқусяҳқа̄нилъықа̄т, ынка̄м тӯнылъықа̄т язычнигнун. 34Та̄кут лыгасӣӷўа̄ткылъықа̄т, қысиқулъықа̄т, кахсягмихлъықа̄т, туқулъықа̄тлъю. Пиңают аӷныӷыт атуӷлюки уңуваҳлъықуқ».

Иаковым, Иоанным Туңсилъҳак

35Та̄хкын Иаковым, Иоанным, Зеведейем иӷныӷыхкынка такулюку Иисус пика̄т: «Апыҳтуӷиста, лъпынун сямың писқысюхтукуң». 36Иисусым а̄птыкакык: «Сясқысюгыстык хўаңамнун?» 37Кӣмсиқа̄к: «Ниӷуҳқыңъалӷӣми Атаныҳпагулъыҳпыни ақумыхкувык ақумылгусиӷьюгамкын, налиҳпут аӷынқигныҳпынилъюку, налиҳпуң сяӷумигныҳпынилъюку». 38Иисусым пики: «Налъюкаҳси сямың туңсилъыҳси. Мыӷьяҳқамның қаю̄симылңуӷми мыӷылъықыстык? Крестиӷалъыҳқамтун крестиҳлъықыстык?» 39Кӣмсиқа̄к: «Пияҳқа̄гукуң». Иисусым пики: «Мыӷьяҳқақа қаю̄симылңуқ қайўа мыӷылъықыстыху, крестиӷылъықутыклъю крестиӷалъыҳқамтун. 40Иўырңа хўаңа накмиксяҳқақынӷитанка килъю ақумьяҳқа̄таңи аӷынқигнымкунлъю, сяӷумигнымкунлъю, ята̄ҳқуткат тама̄кут ақумьяҳқа̄гут».

41Та̄кут қуля малиҳся̄ҳтыт нагақуӷлюкык Иаковым, Иоанным пилъҳак, угумиягуткахкыт. 42Ынка̄м Иисусым қырңуҳлъюки пикӣ: «Лӣсимакаси язычнигыт иглыӷутистыңита атанӷутақӣт ютың, а̄ңўа̄ӷуҳтыкатлъю юкыҳқутақӣт. 43Иўырңа таўатысяҳқа̄нӷитуси лъпыси. Налиҳси а̄ңўа̄ӷуюкуми қыпҳаҳтыңули иляминун, 44налиҳсилъю а̄ңылъыҳпига̄юкуми қыпҳаҳтыля̄ӷуҳлъи тамаңанун. 45Талўа Иӷныӷа Югым тагика̄нӷитуқ қыпҳа̄тысқылъюни, тагика̄гуқ қыпҳа̄тиналюнилъю тӯналюкулъю уңувалъыни югулиналюки юлӷутыт».

Иисусым На̄лъҳускаңа Ая̄кақ Вартимей

46Та̄хкын Иисусылъю малихся̄ҳтыкулъҳӣт, юлӷутыҳлъягытлъю Иерихонымун ка̄лъютың, аӷуляқыхкат. Та̄ўаңуқ ая̄кақ ю̄к, а̄тҳа Вартимей, иӷныӷа Тимейем ақумлюни тумыт сяниңитхун туңсиӷраӷақылӷӣ. 47Нагақуӷьямигу Иисус Назаретыӷмӣ, туӷўа̄ӷнилюку акилӷӯкақ: «Иисус! Иӷныӷани Давидым! Наңлъыгьягутаҳтиңа!»

48Углялӷӣм югым аӷью̄қа̄т ныпӣӷысқылъюку иўырңа қывӯтаӷалъюни акилӷӯкақ: «Иӷныӷани Давидым, наңлъыгьягутаҳтиңа!» 49Иисусым аӷулӣӷлюни пикӣ: «Тагисқитыху». Ынка̄м туқлъюӷлюку ая̄кақ пика̄т: «Сыӷлыҳалык, туқлъюӷа̄тын ныкыви!» 50Қа̄слъӣк аткуя̄ӷыгни матаӷаҳлъюкык ныкыфқаҳлъюни такука̄ Иисус. 51Иисусым а̄птыка̄: «Сясқылъютын пӣқсин?» Ая̄кам кӣмсиқа̄: «Апыҳтуӷиста, ысҳа̄ҳсягунъақақсяҳтуңа». 52Иисусым пика̄: «Иглыҳлъыҳа̄тын, ухпықилъыҳпык на̄лъҳутыста̄тын». Таўаниңинақ ысҳа̄сягуткақ та̄хкын малихтыка̄ Иисус.

Currently Selected:

От Марка 10: ess2

Highlight

Copy