От Матфея 18

Кина Аңылъыҳпига̄ўа?

1Та̄м киңуңина̄ның малихся̄ҳтыт Иисусымун тагилютың а̄птыка̄т: «Атаныҳпагулъҳани Қилягым кина аңылъыҳпига̄ўа?»

2Иисусым тахсиӷлюку таӷнуҳақ ныкывыстыка̄ қукӣтхун. 3Пикӣ: «Ипа уңипа̄тамси, итыӷна̄нӷитңўа̄ҳтуси Атаныҳпагулъҳанун Қилягым ўытқукун таӷнуҳаӷыстун лъӣқуфси. 4Кина алңунак укалӣҳлъыҳӣ ӯтун таӷнуҳаҳтун, аңылъыҳпига̄гуқ Атаныҳпагулъҳани Қилягым. 5Китум алңунак атымкун тугуклъиныӷминигу хўатылңуқ таӷнуҳақ, хўаңа тугуклъиӷақа̄ңа. 6Иўырңа китум алңунак сыӷлыҳқыстыкагу налӣт мыкыста̄ҳа̄т ухпықиңалӷӣт хўаңамның, итагнаӷнаяҳтуқ ю̄к қа̄мқаҳфиклъюку уяқўаҳкун уйӷахлъягмың калыфсяқумыхтыху ӯсқалъҳанун кылъӣм».

Якуӷналъҳа Сыӷлыҳқылъҳым

7«Сыӷлыӷўа̄ӷунақңӯт югыт қаюҳлъяк нунами хўани нанӷӣқулъыҳтупихтут сыӷлыҳқылъыӷмун. Нанӷӣқулъҳыт сыӷлыҳқистимун пияҳқа̄гут, иўырңа сыӷлыӷўа̄ӷунақңӯқ кина сыӷлыҳқыстилӷӣ югның!

8Ӣхыхпык налиӷмың итыгаҳпык сыӷлыҳқыстыкаңатын, кыплъюки ыхнакытын! Итагнаӷатаӷаӷнаяҳтутын кынлыңилңуӷмун уңувалъыӷмун ӣтқувык, ӣхитыӷңа̄ҳпык налиӷмың итыгӣтыӷңа̄ҳпык милю̄тылъыҳқаҳпының кынлыңилңӯгнун кынӷыгнун, иңлюхтун ӣхылиӷлютын налиӷмың итыгалиӷлютын. 9Ийыхпыклъю сыӷлыҳқыстыкаңатын ипуглюку ыхнакын! Итагнаӷатаӷаӷнаяҳтутын кынлыңилңуӷмун уңувалъыӷмун ӣтқувык иңлюпигақ ӣскылъюку, милю̄тылъыҳқаҳпының кынӷанун геенам иңлюхтун ийылгулютын.

10Ўатаҳлъяк, укалиқыхпынаки налиҳӣнӣт укут мыкыстаҳа̄т. Уңипа̄тамси, қилягми яқулгита қӯнпың Атама қилягмылңӯм хина̄ ысҳаӷақа̄т. 11Иӷныӷа Югым тагика̄гуқ югулиналюки ифлъякат».

Уңипаӷа̄ткыхкақ Ифлъякақ Пынъӣқ

12«Сюмыҳпысини сянаяҳта ю̄к ю̄к талъимат пынъӣлык, ата̄сиқ аӷуляқсяқан? Иваӷьяҳтуӷнаяҳтагӯ аӷуляқыхкақ унилъюки 99 пынъӣни қыминилъюки? 13Ипа пӣмси, на̄лъкыхкумигу қуякыҳлъягьяҳқақа̄ пакихулъюку 99ының аӷуляқумаңилңуӷның. 14Таўатыҳпигақ Атахпыси қилягмылңӯм пиюкылъқынӷита̄ налиҳӣнӣт ма̄кут мыкыстаҳа̄т ифлъясқылъюки».

Ухпықа̄лгутым Анахутылъҳа

15«Ухпықа̄лгутыхпык сыӷлытун пикаңатын, лъңина̄ҳалюку уңипа̄нъакын анахутылъҳаның. Нагаскумитын та̄ўа илялӣӷунъықихлъықутык. 16Иўырңа нагасюнӷилъкаңатын, такунқихнакын кылъқылъюку ата̄сиқ налиӷмың ма̄лӷук ухпықа̄лгутык лӣсимакыстыңулюкык сямың пилъыҳпытыгның. Таўатын пилӷа̄тын қаюҳлъяк Акузитыт Игақыхкат апыҳтӯсяқа̄т ма̄лӷук налиӷмың пиңают лӣсимакистыт ипапиҳқысяҳқақа̄т анахутылъық. 17Иўырңа нагасюнӷилъкаки апыӷнакыси юӷаӷвигым югитнун. Нагасюнӷилъкаки талўа юӷаӷвигым юги, кияӷунъакыси язычнигыңулӷӣстун, налогымыңлъю қырңуҳтистыңулӷӣстун.

18Ипа уңипа̄тамси, сяңўа̄ алңунак асиҳтыкуфсигу нунами хўани, асиҳсяҳқа̄гуқ қилягмилъю. Сяңўа̄ алңунак итымускуфсигу нунами хўани, итымусяҳқа̄гуқ қилягмилъю.

19Иляңаныңлъю уңипа̄нъақамси, нунами хўани ма̄лӷугулютык итагнақутңукуфтык а̄пналютык сямың алңунак, Атама қилягмылңӯм апыӷӣҳлъықа̄ лъпытыгнун. 20Қаюҳлъяк ма̄лӷуха̄т налиӷмың пиңаюха̄т қырңуӷуската хўаңа атымкун, акулңитнисяҳқа̄гуңа».

Уңипаӷа̄ткыхкақ Сыӷывутинӷилңуқ Қыпҳаҳта

21Та̄хкын Петырым такулюку Иисус а̄птыка̄: «Атанық, ухпықа̄лгутма сыӷлытун пимаңинақаңаңа натын угляҳқака̄н сыӷывусяҳқақсикун? Кытўылъ ма̄ӷраӷвинля̄к?»

22Иисусым кӣмсиқа̄: «Ма̄ӷраӷвинлыхӣнақ сыӷывусяҳқақынӷитан, иўырңа 70 х 7. 23Таўатын пӣмкын қаюҳлъяк Кияӷныӷым иглыӷутилъҳа Атаныҳпагулъҳани Қилягым хўатытуқ: Умӣлгым қыпҳаҳтыми игӣт ювӷӣӷьяҳтуқӣ ысҳаӷналюки асыңытуляңит. 24Ӣўынлъю игӣт ювӷӣӷақӣ, умӣлыгмун итҳутка̄т қыпҳаҳта асыңылык 10,000 манимың. 25Таўатын аңка̄н маниңилңуқ лъивикӯсяҳқамың асыңыминун. Ынка̄м умӣлгым акикысқыхкӣ лъңа, нулиҳа, авақутӣ, сяӷьяңилъю лъивикӯся̄люки асыңыңанун. 26Иўырңа қыпҳаҳта сикмӯлъюни умӣлыгми мануңакун манигӯтыпихлъюни пика̄: “Утақӣгаҳтын! Лъивикна̄ӷақа қамахтыңъўа̄ӷлюку!” 27Умӣлгым наңлъыгьягулъюку пуйгусқыхка̄ асыңыңа ынка̄м а̄ныстыка̄.

28Та̄хкын та̄на қыпҳаҳта а̄нлюни налъяқа̄ қыпҳаҳтылгутни ю̄к талъимат манимың асыңыкақ. Акуқаӷлюку уяқхўакун пика̄: “Лъивикиңа асыңыхпының!” 29Қыпҳалгутаңан сикмӯлъюни наңлъыхсипихлъюни пика̄: “Утақӣгаҳтын, лъивикылъықамкын”. 30Иўырңа югым нагасимаңилъкаңа, йыӷлыги анусимиңлъяҳтыстыка̄ кынляңа асыңыңа лъивикылъҳанун. 31Иляңита қыпҳаҳтыт ысҳапаглюку таўатын пилъҳа, сыӷлыӷьягутыҳлъяглюку умӣлыгмыхнун апыӷьяҳтуқа̄т. 32Ынка̄м умӣлгым қыпҳаҳта та̄на тахсиқлъиӷлюку пика̄: “Уюқ сыӷлыпыста̄қ қыпҳаҳта! Лыганңам сыӷывутамкын асыңыҳлъяхпының, қаюҳлъяк наңлъыхсилӷӣтын. 33Қыпҳалгутын наңлъыгьягусяқлъыгыстун катам хўаңа наңлъыгьягутылъымтун лъпык!” 34Умӣлгым сякшитыпихлъюни та̄на қыпҳаҳта агля̄тыстыка̄ амью̄ткистынун анусимиңлъяӷвигмылңуӷнун кынляңа қамахтыңъўа̄ӷлюку асыңыңа лъивикылъҳанун.

35Ысҳа таўатыҳпигақ Атама қилягмылңӯм қамахлъюси пияҳқӣси, қамакын илюхпысиның сыӷывунъыӷилъкуфсики юлгутыси».

Currently Selected:

От Матфея 18: ess2

Highlight

Copy