От Матфея 12

А̄пқуӷа̄лъық Субботамың

1Та̄хкын Субботам аӷныӷани Иисус иглыҳтыкақ пшеницам пӣтфигакун. Малихся̄ҳтыңи игатақат ынка̄м пшеницамың қысюгутақлъютың ныӷыхкат. 2Фарисеит ысҳаӷлюки малихся̄ҳтыт пшеницамың қысюгута̄талӷӣт, Иисус пика̄т: «Ӣи, Субботами малихся̄ҳтытын қыпҳаҳтут, Лӣлиҳтӯсяқ на̄фқа̄т!»

3Иисусым пикӣ: «Атиҳтӯмаңистыхӯ Давидылъю юкулъҳӣт сяка̄таңи иятаӷақңамың? 4Ӣтқа̄гуқ скиниямун ынка̄м юкулъҳӣт ныӷыхкақа̄т нықыкшаңлъяқ Кияӷныӷмун тӯныхкақ. Таўатын пилъыӷмыхтыхун Лӣлиҳтӯсяқ на̄фқыхкақа̄т қаюҳлъяк священнигыт ныӷьяҳқақсяқаңат. 5Атиҳтӣгастыхулъю Лӣлиҳтӯсянилңуқ священнигыт Храмыми қыпҳаныӷмыхни Субботами на̄фқақыхкаңат Субботам Лӣлиҳтӯся̄? Нақамлъю священнигыт анахусигатут. 6Уңипа̄тамси, хўа̄нтуқ Храмыми кина а̄ңатаӷалӷӣ. 7Акузитни Игақыхкани Кияӷнық пика̄гуқ: “Наңлъыхтӣсқысюгамси юлгутыхпысинун пакихулъюку аҳқутыхпысиның”. Та̄кут акузитыт лӣгикңўа̄ӷьяқуфсики сямың пикатаңи, нанқихнаянӷитаси аӷью̄ӷьяҳқа̄люки анахутылъҳилңӯт, 8қаюҳлъяк Иӷныӷа Югым, Атанқа̄ Субботам».

Ю̄к Ӣхылык Унӣқамың

9Та̄кын Иисус агляӷлюни синагогаңитнун ӣтқақ. 10Та̄ўаңуқ ю̄к ӣхан иңлюңа унӣқат. Иляңита югыт таўанлыңӯт а̄птыка̄т Иисус на̄лъкыфикналюку анахутылъыӷмың: «Лӣлиҳтӯсямнъи итагнаҳта̄а на̄лъҳутилъыҳқақ Субботами?»

11Иисусым кӣмсиқӣ: «Налиҳпыси пынъӣӷа калыфкахсяқан ля̄ўа̄ӷмун Субботами, нусюгнаяӷыстыхӯ? 12Ю̄к мыгнунаӷатаӷаҳтуқ пынъӣӷмың! Ынка̄м Лӣлиҳтӯсяни итагналӷӣңӯқ пинитун пилъыҳқақ Субботами». 13Та̄хкын ю̄к унӣӷңалӷӣмың ӣхылык пика̄: «Ныңугутики ӣхытын». Ӣхыни ныңугуткӣ, ага на̄лъҳуткат, иңлюмыгыстун лъӣқат. 14Та̄хкын Фарисеит а̄нлютың агӷисяҳтуқат натын туқунъалюку Иисус.

Кияӷныӷым Накмикыхка̄ Қыпҳаҳта

15Иисусым лӣсимаклъюку агӷилъҳат, аӷуляқыхкақ. Юлӷутыҳлъягыт малихлъыӷа̄тка̄т, ынка̄м на̄лъҳуқуқӣ қинуюлӷӣт қамахлъюки, 16иныҳтыкӣлъю уңипақыфқа̄ми писқылъюни. 17Таўатын пилъыӷмикун апыӷӣқа̄ Кияӷныӷым пилъҳа ӯкналиқистыкун Исаиякун хўатын:

18«Уна ысҳа накмикыхкақа̄ қыпҳаҳтыңулюку.

Пиниқыхкақа уңувасигма ыфқуқыпихта̄. Таӷныӷахка лъңакун ныкыхлъықахка.

Уңипа̄лъықӣ язычнигыт таўатыҳлъюўа̄қ нанқихтилъыҳқамның тамаҳа̄нун югнун.

19А̄ҳтӣра̄ӷна̄нӷитуқ налиӷмың акилӷӯна̄нӷитуқ,

тумыни игляхтупихлъюни акузина̄нӷитуқ.

20Ӣкна̄нӷита̄ выга̄қ улъыӷңалӷӣ,

қа̄мьяҳтӯңыстақак кынылӷутак қа̄мнъа̄нӷита̄к.

Таўатын пияҳқа̄гуқ кынляңа қамахлъюни ю̄к хўатын пиюглюни лъӣқан,

Кияӷныӷым нанқихтылъҳа югның авутаңитуқ.

21Ынка̄м Кияӷныӷым накмикыхка̄кун язычнигыт сиӷималъықут».

Иисусынкук, Веельзевулынкук

22Та̄хкын Иисусымун тагитка̄т ю̄к ая̄кақ, акузиңигалңуқ қаюҳлъяк илюмикун туӷныӷалык. Иисусым на̄лъҳутка̄ ынка̄м акузиягуткақлъю ысҳа̄сягуткақлъю. 23Юлӷутыҳлъягыт сяӷӣӷаюхлъякат рыпалъ лъңитның а̄пқуӷа̄ӷуткат хўатын: «Уна Давидым Иӷнықынӷитагӯ?»

24Фарисеит нагалъютың пикат: «Югның а̄ныстақӣ туӷныӷа̄т қаюҳлъяк атуқңукаңа аҳтуӷьяҳқа̄нӷилъҳа Веельзевулым, иглыӷутистыңат Туӷныӷа̄т».

25Иисусым лӣсимакыхкаңи сюмыҳтаӷалъҳит ынка̄м пикӣ: «Алңунак атаныҳпагулъық а̄фқӯлъюни пилъюгускуми, на̄вылъықуқ. Танымлъықа ныҳлъягыт налиӷмың ныңлъюгутыт а̄фқӯлъютың пилъюгускумың, қырңаӷмынъа̄нӷитут. 26Таўатыҳпигақ Туӷныӷа̄м а̄ныстыкумигу Туӷныӷақ, та̄ўа лъңаның пилъюўа̄гуқ ынка̄м атаныҳпагулъҳа кынлытҳӯлъықуқ. 27А̄нысқӯңукума туӷныӷаӷның Веельзевулкун, натынми юхпыси а̄нысқуӷақатки туӷныӷа̄т? Ынка̄м юси нанқихтистыкылъықаси. 28Иўырңа Кияӷныӷым Таӷныӷахкынка аҳтуӷьяҳқа̄нӷилъҳакун а̄нысқӯңукума туӷныӷаӷның, та̄ўа та̄м ипапиҳқа̄ Атаныҳпагулъҳа Кияӷныӷым ка̄сима̄қ лъпысинун.

29Кина алңунак итыӷьюкуми икнақылӷӣм югым мыңтыӷа̄нун тыглыгуӷналюни сяӷьяңаның, сивуклъюку ю̄к асиҳқысяҳқақа̄. Та̄хкын ўаяҳтыҳлъықӣ сяӷьяңи.

30Кина алңунак хўаңамнинъыӷилңуқ кипулъхина̄ҳтыкақа; китум алңунак қырңуҳтилгусинӷилъкумиңа миңитистыңӯқ. 31Тама̄кын апалъюқлъюку уңипа̄тамси югыт сыӷывутылъыңьяҳқа̄гут алңунак сыӷлыҳқылъыӷмыхның, алңунаклъю сыӷлықӯлъыӷмыхның. Иўырңа китум алңунак сыӷлықӯқумикык Аглыӷналӷӣк Таӷныӷак, сыӷывутылъыңна̄нӷитуқ. 32Китум алңунак кипулъыгмун сямың пикумигу Иӷныӷа Югым, сыӷывутылъыңьяҳқа̄гуқ. Иўырңа китум алңунак кипулъыгмун сямың пикумикык Аглыӷналӷӣк Таӷныӷак, сыӷывутылъыңна̄нӷитуқ ма̄тын кияҳта̄лъыӷми, налиӷмың тӯңлиҳа̄ни».

Уқфигым Пӣтыстыкӣ

33«Уқфик афлъыңакыхкақ пинилӷӣңӯқ, пӣтыстыкӣ пиниҳтут. Уқфик афлъыңакылъҳилңуқ сыӷлыӷӯқ, пӣтыстыкӣ сыӷлыӷӯт. Пӣтыстилъҳакун лӣсимакылъықаҳси уқфигым натытуляңа. 34Укуҳси нымыӷьяни! Натын акузӣқыстык пинилӷӣмың сыӷлыӷуӷңа̄ҳпыси? Сяңўа̄ алңунак югым илюңанилңуқ а̄ныхка̄югӯқ акузилъҳакун. 35Пинилӷӣ ю̄к пинилӷӣмың илюмикилӷӣ пинилӷӣмың а̄ныстикаюгӯқ. Сыӷлық ю̄к сыӷлыӷмың илюмикилӷӣ сыӷлыӷмың а̄ныстикаюгӯқ.

36Уңипа̄тамси, Нанқихтилъҳым Аӷныӷани югыт апыӷьяҳқапыста̄қӣт Кияӷныӷмун қамахлъюки сыӷлыӷыт акузитыт атуқыхкатың сяңита атуқуматаңи. 37Қаюҳлъяк Кияӷныӷым нанқихлъықа̄тын акузитыхпыгун. Акузитыхпык ипапиҳқылъықа̄тын авутңинъилютын налиӷмың нанқихлъықа̄тын аӷью̄ӷьяҳқа̄лютын».

Иглыӷутистыт Алъя̄ҳлъюхўаҳтитысқылӷӣт

38Та̄хкын иляңита апыҳтуӷистыңита Лӣлиҳтӯсям, иляңиталъю Фарисеит пика̄т Иисус: «Апыҳтуӷиста, алъя̄ҳлъюхўаҳтилӷӣтын ысҳапагьюўамкын лӣгикналюку аҳтуӷьяҳқа̄нӷилъҳын Кияӷныӷмың пиңутаңа».

39Иўырңа Иисусым пикӣ: «Аӷныӷым ӯм юги сыӷлыҳқумаңӯт, ата̄сӣӷныӷилңӯт Кияӷныӷмун. Нақам алъя̄ҳлъюхўаҳтитысқут хўаңамнун. Йыӷлыгилъю! Та̄наңинаҳақ алъя̄ҳлъюхўаҳтилъық ысҳаҳлъықаҳси Кияӷныӷым алъя̄ҳлъюхўа̄ҳтилъҳа Ионамун. 40Иона иқалъюгрухлъягым ақсяқҳўанитка̄гуқ пиңают аӷныӷыт, пиңают унугыт. Таўатыҳпигақ Иӷныӷа Югым сямансяҳқа̄гуқ нунами пиңают аӷныӷыт, пиңают унугыт. 41Нанқихтилъҳым Аӷныӷани Кияӷныӷым нанқихтыкаңиси лъпыси кияҳлъыҳӣни аӷныӷми хўани, Ниневияӷмӣт ныкывлютың анахунъилъықӣси аӷью̄ӷьяҳқапыста̄ӷунилюси. Ӯкналиқиста Иона уңипаӷьян Ниневияӷмӣт авутыҳқылъютың сыӷлыҳқынъаниқа̄гут. Иўырңа лъпыси авутыҳқылъюси сыӷлыҳқынъанилъҳитуси қайўа нагаткақыӷңа̄ҳпысигу кина а̄ңатаӷалӷӣ Ионамың. 42Нанқихтилъҳым Аӷныӷани Кияӷныӷым нанқихтыкаңиси лъпыси кияҳлъыҳӣни аӷныӷми хўани, акивақым царицаңан ныкывлюни нанқихсяҳқа̄нилъықӣси. Тагика̄гуқ уяваҳпанилңуӷмың ныминың наганъалюку Соломоным пыҳқиныҳлъяк апыҳтуӷилъҳа. Иўырңа кина а̄ңатаӷалӷӣ Соломонымың хўа̄нтуқ, таўалъӣма иҳсякақаҳси».

Утыӷнилъҳа Туӷныӷа̄м

43«Туӷныӷақ югмың а̄ныхкуми иглыҳлъықуқ мықшахӣлңуӷми нунами, иваӷилъықуқ мыӷна̄ливихкамың. Иўырңа на̄лъкунъыӷисями, 44пикақ: “Кияҳфиксяқымнун утыҳнақуңа”. Ка̄сялӷӣми па̄ҳқитыфтуқ, а̄лъўа̄ӷлюни, миңлъыхтыңъўа̄ӷлюни аюқыфтуқ. 45Та̄хкын а̄нлюни тагиткӣ ма̄ӷраӷвинлык туӷныӷа̄т лъңаның сыӷлыӷатаӷалӷӣт. Итыӷа̄лъютың югмун таўантыкат. Ынка̄м та̄на ю̄к сивунӷаның ўатақа̄ӷақ сыӷлыӷўа̄ӷуҳтыкақ. Таўатыҳпигақ аюқсяҳқа̄гут сыӷлыӷыт югыт кияҳлъыҳӣт ма̄тын, ўатақа̄ӷақ сыӷлыӷуҳтаӷаӷьяҳқа̄гут сивунӷани пилъыӷмыхның».

Иисусым На̄ңалъю, Аңлыгутаңилъю

46Паниның Иисусым алыҳқӯмалюки югыт, Иисусым на̄ңалъю, аңлыгутаңилъю ка̄лъютың мануӷами алыҳқуӷьюка̄т. 47Ынка̄м китум уңипа̄тка̄: «Ӣи, қакма на̄нлъю, аңлыгутытынлъю, алыҳқуӷьюгақа̄тын».

48Иисусым а̄птыка̄: «Кинаңа̄ўа на̄ка? Кинкуңа̄ўат аңлыгутынка?» 49Та̄хкын кыниӷлюки малихся̄ҳтыни, пикақ: «Та̄куңӯт на̄калъю, аңлыгутынкалъю! 50Кина алңунак Атама қилягмылңӯм пиюкылъҳатун пикуми, аңлыгуткақа, наякақа, на̄кақалъю!»

Currently Selected:

От Матфея 12: ess2

Highlight

Copy