От Луки 17

Сыӷлыҳқылъықлъю, Сыӷывутилъықлъю

1Иисусым малихся̄ҳтыни пикӣ: «Сыӷлыҳқыстинақуткылъҳыт қӯнпың пияҳқа̄гут. Иўырңа сыӷлыӷўа̄ӷунақңӯқ та̄на сыӷлыҳқыстинақуткылӷӣ югның. 2Та̄м югым сыӷлыҳқыстыкагу налӣт мыкыста̄ҳа̄т ухпықиңалӷӣт хўаңамның, итагнаӷнаяҳтуқ югыт қа̄мқаҳфиклъюку уйӷахлъягмың уяқҳўакун милю̄сяқумыхтыху кылъӣмун. 3Ынка̄м кылыңалюси! Сыӷлыҳқыснақуткыхпынаки югыт.

Ухпықа̄лгутын сыӷлыҳқыхкан, аӷью̄ӷнакын. Ынка̄м авутыҳқылъюни сыӷлыҳқынъаниқан, сыӷывунъакын. 4Ата̄сими аӷныӷми ма̄ӷраӷвинлыгның сыӷлытун пикаңатын, тагӣӷа̄тақанлъю лъпынун ма̄ӷраӷвинлыгның хўатын пимаӷми: “Қивӷукыпихтамкын сыӷлытун пӣӷа̄талъымның”, сыӷывутыпыста̄ӷьяҳқақан».

Ухпықилъық

5Апостолыт Атанық пика̄т: «Ухпықилъыҳтуҳтаӷақаҳқут!» 6Атанӷым пикӣ: «Ухпықилъылгуяқуфси горчицам пӣтутаңатун аңкалӷӣмың, уна смоковница уқфик хўатын пикуфсигу: “Акуҳтӯмаҳпык ӣклъютын, пӣсяҳта̄ кылъӣкун”, қа̄ткынъаяӷӣси».

Қыпҳаҳтым Қыпҳаӷьяҳқа̄

7«Налиҳси қыпҳаҳтылгуяқуми пӣтысиӷаӷвигми нунамун ля̄гўа̄ҳтымың, налиӷмың пынъӣӷмың афлъыңакикаюгмың, утыӷниқан қыпҳаӷвигминың пинаяҳсигӯ: “Ыснываӷаҳлъютын, ныӷи”? 8Нака̄! Итупилъ хўатын пилъықан: “Ята̄ҳқигу ныӷьяҳқақа. Симиҳтуӷлютын кыпсӣқуңа ныӷьяҳқамның, мыӷьяҳқамның. Ныныӷмың та̄қыхкума, ныӷумаҳпык, мыӷумаҳпык пилӷа̄тын”. 9Умӣлгым игамсиқаюгвикна̄нӷита̄ қыпҳаҳтыни қаюҳлъяк та̄ўара̄ӷинақ қылылъҳатун пӣқылӷӣ. 10Лъпысилъю таўатытуси. Апыӷӣӷумакуфсики қамахлъюки Кияӷныӷым қылӷуткӣ, хўатын пилъықуси: “Қыпҳаҳтыңина̄гукут; та̄ўара̄ӷинақ қылӷуткаҳӣна̄т пӣқапут”».

Иисусым На̄лъҳускаңи Қуляӷьягыт Проказалгыт

11Иисус Иерусалимымун пикаткылъюку, иглыҳтыкақ акулыхкынкун Самариямлъю, Галилеямлъю. 12Ныңӣҳаӷмун ка̄тақуқлъю, қуляӷьягыт югыт проказалгыт налъяка̄т. Уявақа̄нлъютың 13акилӷӯкат: «Иисус! Югунӣқ! Наңлъыгьягутаҳтикут!» 14Ысҳаӷьямики пикӣ: «Агляҳтык священнигынун ювӷӣӷысқылъюси». Иглыҳсималютың на̄лъҳуткат, укмаңӣткат проказамыхның. 15Та̄хкын ата̄сим ысҳаӷлюку на̄лъҳутылъыни, Иисусымун утыҳлъюни, игляхтулюни усюқыхка̄ Кияӷнық. 16Иисусым итыга̄н сивуңакун сыкылъюни нунамун игамсиқаюгвикыхка̄. Ю̄к та̄на Самарияӷмӣңуфтуқ. 17Та̄хкын Иисус пикақ: «Қуляңуяҳтут на̄лъҳутканка. На̄ки стаманың иңлюлгыт югыт? 18Уна накумӣ, лъңина̄ўа̄ утыҳлъюни усюқияҳтулӷӣ Кияӷныӷмун?» 19Та̄хкын Иисусым пика̄: «Ныкывлютын иӷлыҳтын, ухпықилъыҳпык на̄лъҳутыста̄тын».

Кияӷныӷым Атаныҳпагулъҳан Тагилъҳа

20Иляңита Фарисеит а̄птыка̄т Иисус қакун Атаныҳпагулъҳа Кияӷныӷым тагияҳқа̄таңа. Кӣмсиқӣ: «Атаныҳпагулъҳа Кияӷныӷым тагиңӯқ иўырңа югыт ысҳаӷьяҳқақынӷита̄т қаюҳлъяк налъюнӣӷусӣлңуқ. 21Ынка̄м кина алңунак хўатын пина̄нӷитуқ: “Ӣи, хўа̄нтуқ!” налиӷмың: “Ысҳа тазигна!” қаюҳлъяк Атаныҳпагулъҳа Кияӷныӷым илюхпысинитуқ».

22Та̄хкын малихся̄ҳтыни пикӣ: «Укыхкуни аӷныӷни тагилӷӣни хўаңамнисюхлъяхлъықуси, Иӷныӷани Югым, ўаран ата̄симун аӷныӷмун, иўырңа та̄на аӷнық ысҳаӷна̄нӷитаҳси. 23Югыт уңипа̄лъықӣси: “Ӣи, ысҳа тазигна Иӷныӷа Югым!” налиӷмың: “Ӣи, хўа̄нтуқ!” Иўырңа такухпынаки, малихтыхпынаки. 24Катам ниӷухпагӯтылъҳым ниӷухтылъҳатун қиляга иңлюңаның агавык иңлюңанун, таўатысяҳқа̄гуқ Иӷныӷа Югым утыӷниқуми нунамун. 25Иўырңа сивуклъюни, Иӷныӷа Югым углялӷӣмың икфиқыпыста̄ӷьяҳқа̄гуқ, иҳсяксяҳқақа̄тлъю ма̄тын кияҳлъыҳӣт югыт. 26Сивуңани утыӷнилъыҳқа̄н Иӷныӷан Югым, югыт кияҳта̄лъҳит таўатысяҳқа̄гут югыт кияҳтылъҳистун та̄гани аӷныӷни Ной кияҳтыңъулюку. 27Югыт ныӷақлъютың, мыӷақлъютың, ныңуӷутақлъютың, а̄ңггутӣқлъютың пика̄гут кынляңа Нойем ковчегымун итылъҳанун. Та̄хкын улывыҳлъягым туқуқуқақӣ қамахтыңъўа̄ӷлюки. 28Югыт кияҳта̄лъҳит таўатысяҳқа̄гут югыт кияҳтылъҳистун та̄гани аӷныӷни Лот кияҳтыңъулюку. Югыт ныӷақлъютың, мыӷақлъютың, тукфиӷӣқлъютың, акикӣқлъютың, пӣтысиӷаӷақлъютың, ныкыфтӣқлъютың пика̄гут. 29Иўырңа таўани аӷныӷми Лот аӷуляқсян Содомымың, қилягмың ыслъялъюгуҳтыка̄гуқ кыныӷмыңлъю, серамыңлъю, ынка̄м туқуқуқақӣ қамахтыңъўа̄ӷлюки.

30Таўани аӷныӷми Иӷныӷа Югым алӣҳтыкан, югыт кияҳта̄лъҳат алмысиқсяҳқақа̄ югыт кияҳта̄лҳистун сивунӷани. 31Та̄м аӷныӷани, ю̄к мыңтыӷам қа̄йңанилңуқ укифқа̄ми пилӷа̄қ мыңтыӷами илюңанун сяӷьяқуналюни. Таўатыҳпигақ пӣтысиӷаӷвигмылңуқ мыңтыӷаминун пифқа̄ми пилӷа̄қ. 32Нықамикитыху сяка̄таңа Лотым нулиҳа! 33Ынка̄м китум алңунак пыхныӷилъкумигу уңувалъыни Атаныӷмун, ифлъяяҳқақа̄. Иўырңа китум алңунак пыхтыкумигу уңувалъыни Атаныӷмун, уңувалъыңыпӣхлъықуқ. 34Уңипа̄тамси, Иӷныӷа Югым тагикан, таўани унугми, ма̄лӷук қава̄лъықук ата̄сими қаваӷвигми. А̄лъҳа тугулъықа̄, иляңа уныхлъықа̄. 35Ма̄лӷук аӷнак қырңа̄гмык кагимтилъықук зерномың. А̄лъҳа тугулъықа̄, иляңа уныхлъықа̄. 36Ма̄лӷук югык пӣтысиӷаӷвигмылъықук. А̄лъҳа тугулъықа̄, иляңа уныхлъықа̄».

37Малихся̄ҳтыт а̄птыка̄т: «Атанық, нани тама̄кут пияҳқа̄гўат?»

Иисусым кӣмсиқӣ: «Нани алңунак кымыхкўа̄лгукан қаўа̄хпагыт қырңуҳфикылъықа̄т».

Currently Selected:

От Луки 17: ess2

Highlight

Copy