От Луки 12

Кылыңася̄лъық Пинӣюхтылъыӷмың

1Таўатын пималюки тысячанылӷутыт югыт қырңуӷуткат, рыпалъ илятың тӯтқаҳтақлъюки пикӣт. Иисусым сивуклъюки малихся̄ҳтыни пикӣ: «Кылыңалюси Фарисеит закваскаңитның. Пинӣюхтылъҳат пӣқақа. 2Сяңўа̄ ся̄пыхкақ ся̄путӣӷьяҳқа̄гуқ. Қамахлъюни аксяқыхкақ қайвиҳқысяҳқа̄гуқ. 3Сямың пилъыси аксяқлъюку нагақуӷьяҳқақӣт қагани. Сяңўа̄тлъю сигутқӯткыхкаси ӯмгулъюси ными уңипақсяҳқа̄гут тамаңани».

Аликсяҳқақаҳси Кияӷнық

4«Уңипа̄тамси илякумта̄мни, аликыхпынаки тама̄кут туқутикаюгыт югусимың, иўырңа та̄м киңуңаның алъя сяна̄нӷитӣси. 5Иўырңа кылыңася̄ӷнақамси китумың аликсяҳқамың. Аликитыху Кияӷнық, туқускумиси аҳтуӷьяҳқа̄нӷилъылгӯқ милю̄сяҳқа̄люси геенамун. А̄а, уңипа̄тамси аликитыху!

6Талъимат қатыӷьӣӷаҳа̄т акикыхкаюгунӷита̄т ма̄лӷугыгнун монетагнун? Таўалъӣма налиҳӣнӣт Кияӷныӷым пуйгуна̄нӷитӣ. 7Талўа нуяҳпыси угляҳталяңи Кияӷныӷым лӣсимакӣ. Алиңыхпынаси, Кияӷныӷым мыгнукатаӷаӷӣси қатыӷьӣӷалӷутның пакихулъюси».

Тугуклъиӷилъық Налиӷмың Иҳсякилъық Христосымың

8«Ынка̄м уңипа̄тамси, китум алңунак уңипа̄скаки сивуңитни югыт хўаңамнун пикнилютың, Иӷныӷанлъю Югым пикнилъықӣ сивуңитни Кияӷныӷым яқулылӷутаңан. 9Иўырңа китум алңунак уңипа̄скаки сивуңитни югыт хўаңамнун пикынӷинъилютың, Иӷныӷан Югым пикынӷинъилъықӣ сивуңитни Кияӷныӷым яқулылӷутаңан.

10Китум алңунак сыӷлытун акузиткыхкумигу Иӷныӷа Югым, Кияӷныӷым сыӷывусяҳқақа̄. Иўырңа китум алңунак сыӷлытун акузиткыхкумикык Аглыӷналӷӣк Таӷныӷак, Кияӷныӷым сыӷывунъа̄нӷита̄.

11Агля̄скаңиси синагоганъун, сивуңитнун правителыт, налиӷмың иглыӷутистыт тыхылъҳӣҳпынаси натын кӣмсилъыҳқаҳпысиның, налиӷмың сямың пилъыҳқаҳпысиның. 12Таўани пилъыӷми Аглыӷналӷӣм Таӷныӷам акузиткаҳқалилъықӣси сямың пилъыҳқамың».

Иисусым Уңипаӷа̄ткыхкаңа Налъю̄қақ Аклъюңилңуқ Ю̄к

13Юлӷутыҳлъягыт акулңитның югым Иисус пика̄: «Апыҳтуӷиста, аңлыгутка уңипа̄таҳтигу, атамтаңуқ унитка̄ның сяӷьямың ныңитаҳлъиңа».

14Иўырңа Иисусым а̄птыка̄: «Югми хўани, китум нанқихтистыңлъяҳтаңа, налиӷмың ныңиҳқистыңлъяҳтаңа лъпытыгнун?» 15Та̄хкын қамахлъюки пикӣ: «Кылыңалюси алъя̄ҳӣнаӷмың пакигнӣҳтылъыӷмың, қаюҳлъяк югым уңувалъыҳпига̄ сяӷьӣҳтылъыҳқун аюқынӷитуқ».

16Та̄хкын Иисусым уңипаӷа̄ткӣ: «Ю̄к аклъюңилңуқ нуналгуфтуқ пӣтыстиҳлъякаюгмың. 17Сюмыҳтаӷақақ: “Натын сянақсиңа? Пӣтыстыҳлъякамнун кахпагвигитуңа”. 18Лъминың кӣмсиқақ, Хўатын пинақуңа. Кахпагвигынка ифкаҳқуӷлюки, а̄ңатаӷалӷӣның кахпагвихканың ныкыфқуӷнақуңа. Ынка̄м қамахлъюки зернонка, сяӷьянкалъю кахпахлъықанка. 19Та̄хкын пилъықуңа уңувасимнун: “Уңувасимни, кахпагиҳлъяхтуңа аюмиқулъылӷутнун! Та̄ўа сянаниӷнақуңа, ныӷақлъюңа, мыӷақлъюңа, пиниӷью̄хнақуңа!” 20Иўырңа Кияӷныӷым пика̄: “Уюқ налъю̄қақ! Унукун уңувасин туқунақңӯқ. Кахпахлъякаҳтын тама̄кут китум пикнақаки?”» 21Иисусым та̄қниқӣ: «Та̄тун юхтун аюқут тама̄кут сямың тамаҳа̄ның кахпагилӷӣт лъмыхнун катам, иўырңа Кияӷныӷми аклъюмалӷӣңӯт».

Ныӷьюкилъық Кияӷныҳқун

22Та̄хкын Иисусым малихся̄ҳтыни пикӣ: «Тама̄кын апалъюқлъюку уңипа̄тамси, нулъқавӣӷуткыхпына̄н уңувалъыҳси, сямың ныӷылъыҳқаҳси, налиӷмың сямың а̄тылъыҳқаҳси. 23Уңувалъық мыгнунаӷатаӷаҳтуқ нықның, югусиқлъю мыгнунаӷатаӷаҳтуқ а̄тканың. 24Ысҳақаҳтыкиқун мытыҳлъюгыт, пӣтысиӷӣгатут, налиӷмың унатӣгатут, налиӷмың кахпагиңигатут, нақамлъю Кияӷныӷым ныҳқақӣ. Лъпыси мыгнунаӷатаӷаҳтуси қаўа̄гның! 25Ынка̄м налиҳпыси нулъқавӣӷуткылъюку уңувалъыни та̄куҳтырыгаҳлъықагӯ? 26Нулъқавӣӷым уйгувлыӷаӷна̄нӷитутаңаның уңувалъық, сяңанңам сяңўа̄т алңунак нулъқавӣӷуткақыстыки? 27Ысҳақаҳтыкиқун пӣтысиӷа̄т нагулӷӣт, қыпҳӣгатут налиӷмың а̄ткаңлъӣгатут лъңитның. Иўырңа уңипа̄тамси, талўа Соломон, аклъюңитыҳлъягмини а̄симаңитуқ пӣтысиӷаӷыстун пиниҳтуткалӷӣмың. 28Кияӷныӷым а̄сиҳтуӷақӣ выга̄ӷыт пӣтфигмыхнилңӯт аӷныӷми таўани, иўырңа уна̄миңани қӣтақӣт. Кияӷныӷым а̄сиҳтӯңукаки выга̄ӷыт, лъпыси а̄сиҳтуӷатаӷаӷна̄нӷитисӣ? Ухпықилъыҳқыста̄пигӯси! 29Сюмыҳтаӷа̄маңинаҳпынаси сямың ныӷылъыҳқаҳпысиныңлъю мыӷылъыҳқаҳпысиныңлъю. Нулъқавӣӷуткыхпынаки тама̄кут, 30қаюҳлъяк ухпықиңигалңӯт Кияӷныӷмың нулъқавӣӷуткақӣт тама̄кут. Атахпыси лӣсимакӣ аклъюкыхкаси. 31Тама̄кын апалъюқлъюку кияҳтылъыҳпысини мыгнуналъыҳпига̄ҳтыстыкык Кияӷныӷым Атаныҳпагулъҳалъю, пиюкылъҳалъю. Таўатын пикуфси Кияӷныӷым тӯнылъықӣ қамахлъюки аклъюкыхкаси».

Қилягмылңӯт Аклъюңит

32«Алиңыхпынаси пынъӣҳамни, қаюҳлъяк Атахпыси қуякусиқлъюку тӯньюгақа̄ лъпысинун Атаныҳпагулъық. 33Сяӷьяси акиклъюки манилитыки аклъюмалӷӣт. Ынка̄м лъпыси кахпагилъықуси аклъюңихпысиның қилягми. Таўатын пикуфси қилягми ақыфтаӷа̄лгулъықуси на̄вьяҳқа̄нӷилңуӷмың. Таўани аклъюңиси на̄ңьяҳқа̄нӷилңӯт, тыглыгнӣҳтытлъю тугуна̄нӷитӣт, молытлъю на̄фқынъа̄нӷитӣт. 34Аклъюңиси на̄нтыката сюмыҳтаӷалъысилъю таўанлъықут».

Иисусым Апыӷӣҳсӣсқыхкаңи Тагилъыҳқаминун

35«Сямун тамаҳа̄нун ятаҳқыңъўа̄ӷлюси, а̄ткаси а̄сяқлъыхӣна̄ӷлюки, кынылӷутаси кумаҳтыңъўа̄ӷлюки. 36Таўатын пикуфси қыпҳаҳтыстун аюқылъықуси утақӣлӷӣт умӣлыгмыхның утыӷнилъыҳқа̄ның ныңуӷутылъҳым нықынӷаҳқылъҳаның. Ынка̄м ка̄лъюни тыңлюхтуқан қылъпыӷутқаҳлъықа̄т. 37Қуянапихтут қыпҳаҳтыт тыҳумаӷмың апыӷӣӷўа̄ӷлютың аюқылӷӣт умӣлгита ка̄скумики! Ипа уңипа̄тамси, умӣлгым қыпҳаҳтыни ақумӯтыслъюки қаюӷвикыгныкун, та̄хкын кынигни тафсӣлъюкык кыпсӣқулъықӣ нықмың. 38Тагӣқлъилъю унугым қукаҳтыстыхпына̄н налиӷмың унугым қука̄н киңуңаның. Иўырңа қакун алңунак тагикуми тама̄кут қыпҳаҳтыт апыӷӣӷўа̄қат қуястылъылгуяҳқа̄гут. 39Иўырңа лӣсимаклъюку уна, мыңтыӷалгым лӣсимаксяқумигу қакун тыглыгнӣҳтым тагилъыҳқа̄, унинъа̄нӷита̄ мыңтыӷани тыглыӷнӣҳта на̄фқулъюни итыӷнаюкан. 40Лъпысилъю апыӷӣҳсяӷўа̄ӷлюси пикатык қаюҳлъяк Иӷныӷа Югым тагияҳқа̄гуқ ўа̄кынӷилъҳаӷулъюни».

Ата̄сӣӷмылңуқлъю, Ата̄сӣӷмынъыӷилңуқлъю Қыпҳаҳта

41Петырым а̄птыка̄: «Атанық, уңипаӷа̄н а̄пқан, хўаңкунъун пиңўа̄, налиӷмың тамаҳа̄нун?»

42Атанӷым кӣмсиқа̄ хўатын: «Кинаңа̄ўа ата̄сӣӷмылңуқ, пыҳқинылӷӣ қыпҳаҳта? Та̄наңуяҳқа̄гуқ умӣлган иглыӷутистыңлъяқа̄ қыпҳаҳтыминун, нықылита̄тӣсқылъюкилъю аҳутаңа тамаҳа̄н. 43Та̄на қыпҳаҳта қуястылъыңьяҳқа̄гуқ, умӣлгым ка̄лъюни ысҳақумигу қылылъыӷмитун пилӷӣ. 44Ипа уңипа̄тамси, та̄на қыпҳаҳта умӣлган иглыӷутистыңлъяӷьяҳқақа̄ сяминун тамаҳа̄нун. 45Иўырңа та̄на қыпҳаҳта сюмыҳтаӷа̄макуми хўатын: “Умӣлъка мулю̄қ тагихпынани”, ынка̄м қывутқуӷьягулъықӣ қыпҳаҳтыт югытлъю, аӷнатлъю. Ныӷақлъюни, мыӷақлъюни, сю̄мақлъюнилъю пилъықуқ. 46Та̄хкын умӣлга ка̄лъықуқ налъютҳа̄ӷулъюни, сиӷимакынӷилъкаңани аӷныӷым. Ынка̄м умӣлгым аӷью̄ӷмихта̄ҳлъяхлъықа̄, илятыслъықа̄лъю ата̄сӣӷныӷилңуӷнун. 47Қыпҳаҳта апыӷӣҳсялъҳилңуқ налиӷмың умӣлыгми пиюкылъҳатун пиюнӷилңуқ анагулылъыңыҳлъяхлъықуқ. 48Иўырңа қыпҳаҳтым налъюкыхкумигу сясқысюлъҳа умӣлыгми, анахутка̄яӷңа̄ӷми аҳся̄н аюқлъюку анагулылъыңылъықуқ. Ю̄к тӯнылъыңыҳлъякақ сямың, сяяҳқаҳтулъықуқ; ю̄к ўата тӯнылъыңыҳлъякақ сямың, ўатақа̄ӷақ сяяҳқаҳтуҳлъяхлъықуқ».

Иисус А̄фқымыра̄ӷутыстилӷӣ

49«Тагика̄гуңа кыныӷмың милюӷналюку нуна, хўа̄туқ ма̄тын кумалӷӣ! 50Иўырңа та̄м сивуңани крестиӷьяҳқа̄гуңа икфиқылъыҳқунлъю, туқулъыҳқунлъю. Ынка̄м сыӷлылӣҳлъягӯңа кынляңа крестилъыӷма апыӷӣлъҳанун. 51Сюмыҳпысини тагинъилюңа ныкыхмылъыӷмың пистыңъа̄ нунамун? Йыӷлыгилъю, уңипа̄тамси, а̄фқӯтыстияҳтӯгуңа. 52Хўакын кынлыклъюку ныңлъюгуткулъҳӣт талъимат а̄фқӯлъықут апалъюқлъюңа хўаңа. Пиңают кипулъхина̄ҳлъықахкыт ма̄лӷук, ынка̄м ма̄лӷук кипулъхина̄ҳлъықӣк пиңают. 53Лъңит а̄фқымыра̄ӷулъықут; атам кипулъхина̄ҳлъықа̄ иӷныни, ынка̄м иӷныӷым кипулъхина̄ҳлъықа̄ атани. На̄м кипулъхина̄ҳлъықа̄ панини, ынка̄м паниган кипулъхина̄ҳлъықа̄ на̄ни. Аӷнам кипулъхина̄ҳлъықа̄ ука̄ни, ынка̄м ука̄ӷан кипулъхина̄ҳлъықа̄ аӷнақ сякини».

Иисусым Кылыңася̄қаңи Нагатыстыни

54Та̄хкын Иисусым юлӷутыҳлъягыт пикӣ: «Ысҳақуфсигу қилягўа̄қ маюлӷӣ пакфалъямылъюку, таўаниңинақ пилъықуси: “Ыслъялъюгуҳнақа̄” пинақнилъыҳпысистун пилъықуқ. 55Ануқа икыва̄ҳтыкан, пилъықуси: “Пуқлъяҳқўа̄нақа̄” пинақнилъыҳпысистун пилъықуқ. 56Лӣсимакисиӷўа̄лӷӣни лъпыси! Нунамлъю, қилягамлъю ныкыгныӷа ысҳаныҳпысигу, ыслъям натытуляңа лӣсимакақаҳси. Сяңанңам лӣсимаксюнӷистыки ма̄тын сяңўа̄т сялъҳыт сямың писӣтаңи?»

Иисусым Апыҳтӯсяқыхкаңа Қаниқутылъҳым Налъҳусялъҳа

57«Сяңан лӣгикигастыху лъпысиның катам сяңўа̄ пинитун пилъҳутаңа? 58Авуткистыхпык нанқихтивигмун агля̄сималютын, тумыми та̄кўани ка̄тфагилгафтык налъҳусяӷнакын қаниқутылъыҳтык. Пинӷилъкувык иҳсяхпыгун агля̄лъықа̄тын нанқихтистымун. Ынка̄м нанқихтистым тӯнылъықа̄тын умӣлўа̄ӷмун анусимиңлъӣсқылъютын. 59Уңипа̄тамкын, а̄на̄нӷитутын кынляңа киңулиҳпигақ манин лъивикӯсяқылъыҳпынун».

Currently Selected:

От Луки 12: ess2

Highlight

Copy