От Иоанна 21

Иисус Ысҳаҳтыслъя̄тақақ Иляңитнун Малихся̄ҳтыминун

1Та̄кўаниңани Иисус ысҳаҳтыслъя̄тақақ малихся̄ҳтыминун На̄йвами Тивериадами. Хўатын ысҳаҳтыстыка̄гуқ. 2Иляңиңуқ малихся̄ҳтым қырңаӷмыткат на̄йвами. Симон Петырлъю, Фомалъю (а̄тҳан а̄лъҳа Малӷи), Нафанаилылъю, Канамың пи Галилеямылңуӷмың, Зеведейемлъю иӷныӷык, алъя ма̄лӷук малихся̄ҳтык. 3Симон Петырым пикӣ: «Иқалъинӣӷьяӷнақуңа». Пика̄т: «Малихнақамкын». Ынка̄м аңьякун кылъютың унулъқусиқ иқалъюхнақуткыхка̄ялӷӣт, иўырңа пикыңумаңиткат.

4Аҳтаӷаӷақа̄лъю малихся̄ҳтыт ысҳақа̄т Иисус ныкывӷалӷӣ ысными, иўырңа кинаңутаңа налъюкыхкаңат. 5Иисусым пикӣ: «Илякумта̄мни, иқалъюхныӷистык?» Кӣмсиқа̄т: «Нака̄». 6Пикӣ: «Атыҳтыху ныгаҳпахси аңьяҳпыси аӷынқигныӷакун, ынка̄м пикыңылъықуси». Писқылъҳатун пикат. На̄пқаӷиҳлъякат рыпалъ ныгаҳпак қа̄кныӷмың аҳтуқа̄т аңьямун.

7Малихся̄ҳтым Иисусым пиниқыхка̄н пика̄ Петр: «Атанӷӯқ!» Симон Петырым нагақуӷьямигу пилюгуглюни қытхықақ мыӷмун. (Петр амсикаҳтыка̄ялӷӣ қыпҳаӷналюни.) 8Малихся̄ҳтыт аңьямылңӯт ыснамун қамуқа̄т на̄пқаӷӣӷңалӷӣ ныгаҳпак. Аўавантыпанӷилңӯт қӯтмың, ынтақун ю̄к талъимат метра уятуткалӷӣт.

9Малихся̄ҳтыт ӯхлъыӷа̄сялӷӣмың қӯтмун ысҳақахкыт анӣӷўтыкак кынӷык, иқалъюгмың ухкылгык. Та̄ўалъю нықыкшаңлъялгуфтуқ. 10Иисусым пикӣ: «Тагитык иқалъюхтаҳпысиның».

11Ынка̄м Симон Петр аңьямун ӯхлъюни сяюка̄ ныгаҳпак қӯтмун. Та̄ўаңуқ 153ңуфтут иқалъюхпаҳқуҳлъягыт на̄птыкат, нақамлъю ныгаҳпак пӣгумаңилңуқ. 12Иисусым пикӣ: «Ныӷьяҳтуҳтык». Налиҳӣнӣта̄ малихся̄ҳтыт а̄пныӷмың тытука̄т кинаңутаңа, лӣсимаклъюку Атанӷутаңа. 13Иисусым тугулюку нықыкшаңлъяқ тунқуқа̄ лъңитнун, иқалъюгытлъю таўатын пикӣ.

14Та̄на пиңайӣткыхкаңа Иисусым ысҳаҳтыстылъҳа малихся̄ҳтыминун, уңуваҳтыстылъыӷми киңуңаның.

Иисус Петырымун Апыҳтӯткысқылӷӣ Ухпықанун

15Та̄қсямың ныныӷмың Иисусым а̄птыка̄ Симон Петр: «Симон, иӷныӷа Иоанным, пиниқатаӷаҳсиңа̄ укуның?»

Кӣмсиқа̄: «А̄а Атанық, лӣсимакаҳпыңа пиниқыхкымкын».

Иисусым пика̄: «Ныҳқики пынъӣӷаӷа̄нка». 16Алъя Иисусым а̄птыка̄: «Симон, иӷныӷа Иоанным, пиниқсиңа̄?»

Кӣмсиқа̄: «А̄а Атанық, лӣсимакаҳпыңа пиниқыхкымкын».

Иисусым пика̄: «Афлъыңакики пынъӣӷынка». 17Пиңайӣткун а̄птыка̄: «Симон, иӷныӷа Иоанным, пиниқсиңа̄?»

Петр сыӷлыӷьюкақ, қаюҳлъяк Иисусым пиңаюның а̄птыкаңа: «Пиниқсиңа̄?» Петырым кӣмсиқа̄: «Атанық, лӣсимакан сяңўа̄ қамахлъюку. Лӣсимакаҳпыңа пиниқыхкымкын».

Иисусым пика̄: «Ныҳқики пынъӣӷынка. 18Ипа уңипа̄тамкын, нукалъпига̄лютын лъпынун тафсилютын навык пиюкылъыҳпынун пӣқсин. Иўырңа нанывгақувык, ӣхытын кывыглюки, китум тафсилютын агля̄лъықа̄тын такуюкыхкақынӷилъкыхпынун». 19Таўатын пилъыӷмикун Иисусым уңипа̄тңуфта̄ Петр натын туқуяҳқа̄таңа, ынка̄м туқулъыӷмикун қӯлваӷьяҳқа̄ Кияӷнық. Та̄хкын Иисусым пика̄ Петр: «Малихтиңа».

Иисусылъю, Иляңалъю Малихся̄ҳта

20Петырым қӣвлюни ысҳақа̄ малихся̄ҳта Иисусым пиниқыхка̄ малигулъҳӣ. (Та̄наңӯқ малихся̄ҳта аяқиҳтыкақ Иисусыкун ныӷӯтңулютың а̄птикақ: «Атанық, китум увыҳпагунъақатын?») 21Петырым ысҳаӷлюку та̄на малихся̄ҳта, а̄птыка̄ Иисус: «Атанық, лъңаңам сялъықа?»

22Иисусым кӣмсиқа̄: «Кияҳтысюкумкун кынляңа тагилъымнун, агӷиткысяҳқақынӷитан лъпык. Малихтыңъинаӷңа».

23Ынка̄м ухпықани уңипақ миңиткақ, та̄на малихся̄ҳта туқуна̄нӷинъилюку. Иўырңа Иисусым пимаңита̄ туқуна̄нӷинъилюку. Хўатын пика̄гуқ: «Кияҳтысюкумкун кынляңа тагилъымнун, агӷиткысяҳқақынӷитан лъпык». 24Лъңаңӯқ малихся̄ҳта а̄пҳӣқылӷӣ тама̄кын пилъыӷның, игақуқақӣлъю тама̄кут. Лӣсимакапут а̄пқӣ ипаңӯт.

25Угля̄пихтут игақулъҳилңӯт Иисусым пикӣ. Игақуқа̄яқумың қамахлъютың сюмымни ынтақун ӣңунаӷми нуна лъивигӣнъаяӷа̄ игалӷутыҳлъягнун.

Currently Selected:

От Иоанна 21: ess2

Highlight

Copy