Luca 15

Oveja atuada k'orea nepɨrɨda

Mateo 18:10-14

1Ewariaba Romanepema pae erreara jɨrɨp'epataɨrã mãɨnepa nemietá oopataɨrã chesidama Jesupa jaratea bɨ ũrinai k'orea. 2Mãɨpuru p'ariseorãpa mãɨnepa Moisepa bɨda jarateapataɨrãpa ichi k'orea nãɨya piawẽa pedea p'aneesidama: «Ichia nemietá oopataɨrã́ pia pedeak'ari ãchi ome nek'oparima».

3Mãɨpuru Jesupa ãchiá nãɨya nepɨrɨsima, jarateai k'orea:

4«Abaɨpa 100 oveja uru bɨdepema aba atuaipɨra ¿sãima? ¿Chi 99 p'anɨ ĩjũa ewará bɨde ameek'ari chi atuada jɨrɨde wãiwẽk'ãra mãɨ unurunea? 5-6Unusira ichi ĩk'iade bɨk'ari sõpia ichi tiidá ua ateewãipɨ. Maapae ichi chi k'õp'ãerorã́, ichi k'ait'a p'anapataɨrã́ pida t'ɨ̃k'oak'ari jaraipɨ: “Mãra mɨ ome arapá p'aneet'ɨ. Mɨ oveja atuada unusiade asima”.

7»Ara mãɨ jĩra mɨa mãrá jararuma: 99 jĩp'a be k'orea pajãnepemarã sõ arapaapatamina, atepe sõ arapaapatama ẽpẽra aba nemietá ooparí Tachi Ak'õremá cherude.

Erreara tau atua bada k'orea nepɨrɨda

8»Wẽrapa erreara tau diez uru badadepema aba atuaipɨra, ¿ĩpira k'oak'ari ichi tejãne parrek'ari pia jɨrɨiwẽk'ãra aba chi erreara tau unurunea? 9Unusira ichi chi k'õp'ãerorã́, ichi k'ait'a p'anapataɨrã́ ome t'ɨ̃k'oak'ari jaraipɨ: “Mãra mɨ ome arapá p'aneet'ɨ. Mɨ erreara tau atuada unusima”. 10Mɨa jararuma ara mãɨ jĩra nemietá ooparí aba Tachi Ak'õremá cherude Tachi Ak'õrepa ɨt'aripa peedarã ome minachia arapaapatama».

Warrarã ume p'anɨ nemietá oopataɨrã k'orea nepɨrɨda

11Mãɨ awara Jesupa jarasima:

«Ẽpẽra basima. Mãɨ ẽpẽrapa warra ume uru basima. 12Ewariaba chi k'aadeapemapa chi ak'õrea jarasima: “Ak'õre, pɨa uru bɨdepema mɨá teai bɨt'a mɨá tease”. Mãɨ k'orea chi ak'õrepa uru bɨdepema ãchicha teasima. 13Tãaraawẽane chi k'aadeapemapa chi ichiá teada jõma netok'ari k'ait'awẽa wãsima tua awaraɨdea. Mãma ne ãarea nemietá oo beesima chi erreara jõrunea.

14»Ãarea jõk'ari mãɨ tuade jarra minachia oosima. Mãɨneepuru jarra choa beesima. 15Mãɨ k'orea mimia jɨrɨde wãsima mãɨ ĩjũanepema ẽpẽra chi ĩjũa uru bɨmá. Mãɨpa sina ak'ɨpisima. 16Minachia jarra bada pẽra sinapa k'o p'anɨnepema ichia pida k'o k'ɨ̃ria bapachima. Maamina abaɨ pida ichiá teadak'a pasima nek'omẽrá.

17»Maapae k'awasima ichia nemietá ooda k'orea jãɨya bɨt'a. Mãɨne ara ichi tuaba jarasima: “Mɨ ak'õre pae mimiapataɨrã minachia nek'opatama mãɨpari mɨ nãma jarrapa piumaa bɨma. 18Ara nãɨena mɨ ak'õremá wãyane asima. Wãk'ari, nãɨya jarayade asima: Ak'õre, mɨa nemietá oosima Tachi Ak'õre k'ĩrari mãɨnepa pɨ k'ĩrari pida. 19Mãɨpuru pia bɨwẽma mɨ waa pɨ warraade ait'a. Mãɨpari mɨ chi pɨ pae mimiaparí jĩra bɨse”. 20Ara mãɨne chi ak'õremá wãsima.

»Mãɨ k'ait'awẽa cheru chi ak'õrepa unusima mãɨnepa sõchupuriasima. P'irasima chi warramá mãɨnepa orek'ari, uitarra sõsima. 21Mãɨne chi warrapa jarasima: “Ak'õre, piarã mɨa Tachi Ak'õre k'ĩrari, pɨ k'ĩrari pida nemietá oosima. Mãɨpuru pia bɨwẽma mɨ waa pɨ warraade ait'a”. 22Maamina chi ak'õrepa chi ichi pae pari mimiapataɨrã́ jarasima: “Anamari jɨ̃parí chi piipará bɨ atadak'ari jɨ̃pit'ɨ. Ichi juade sortia jɨ̃pit'ɨ. Mãɨ awara jĩrune jɨ̃pataɨ sida jɨ̃pit'ɨ. 23-24Maapae p'ak'a chak'e chi atepe porek'ea bɨ peat'ɨ nek'odai k'orea. ¡Arapaapataɨ ewari oodaipɨ! Mɨ warra piu bada chok'ae p'irabarisima; chi atua bada tachia mãicha unusidama”. Maapae minachia arapá tuaneesidama.

25»Mãɨne chi ũpẽa naapema mimia bada tedea cheru pasima. Te k'ait'a cherude ũrisima siru chaa p'anɨ mãɨnepa paera p'anɨ. 26Mãɨ k'orea chi ak'õre pae pari mimiaparí aba t'ɨ̃k'ari idisima k'ãre k'orea mãɨya oo p'anɨ k'awayá. 27Chi ak'õre pae pari mimiaparipa jarasima: “Pɨ ak'õrepa p'ak'a chak'e porek'ea bɨ peapisima pɨ ũpẽa jĩitea k'ak'ua pia cheda pẽra”.

28»Mãɨ ũriside k'ĩruuk'ari chi tede eda wã k'ɨ̃riaé pasima. Mãɨya bɨde chi ak'õre ichimá wãk'ari chichupuria idisima eda wãmẽrá. 29Mãɨne chi warra naapemapa chi ak'õrea jarasima: “Ewaricha mɨ pɨ pae minachia mimiaparima. Pɨa jararu jõma oo baparima. Maamina waidi pɨa cabra chak'e aba pida mɨá teak'ama mɨ chi k'õp'ãerorã ome arapá nek'odai k'orea. 30Maamina pɨchi warrapa pɨ erreara wẽrarã k'achia be ome ãarea jõpik'ari, maapae pɨmá cherude pɨa ichi pae p'ak'a chak'e porek'ea bɨ peapisima arapá nek'odai k'orea”.

31»Mãɨne chi ak'õrepa jarasima: “Warra, pɨ ewaricha mɨ ome baparima. Jõma mɨa uru bɨ poreade asima. 32Maamina naapae sõ arapaadai pia bɨma, pɨ ũpẽa piuda jĩra bada chok'ae bɨẽra; chi atua bada unusidaɨdeepuru”».

Currently Selected:

Luca 15: tdc

Highlight

Copy