Juan 3

Jesú Nicodemo ome pedeada

1P'ariseo Nicodemo apataɨ basima. Ichi judio chi minachia k'awa bɨ pasima. 2Teamasi Jesumá wãside, nãɨya jarasima:

—Jarateaparí, taipa k'awa p'anɨma pɨ Tachi Ak'õrepa peedapɨ. Tachi Ak'õre pɨ ome badawẽpara, chi ẽpẽerãpa ne p'ue oodak'apɨ́ p'ue ooiwẽ pasima.

3Jesupa ichiá jarasima:

—Piarã ara mɨa pɨá jararuma: ẽpẽra mãicha chiwidi t'õepɨra p'ue baiwẽma Tachi Ak'õre juade ichidirã ome.#3:3 Chiwidi t'õepɨra. Griego pedeade mãɨpa ichiaba jara bɨma: «pajãnepa t'õepɨra».

4Mãɨ k'orea Nicodemopa ichiá idisima:

—¿Sãmaasã́ tachi chõa bɨt'a mãicha t'õima? Mãɨya bɨpɨra ¿tachi nae bide wãi bɨk'ãra mãicha t'õmẽrá?

5Jesupa p'anoosima:

—Piarã mɨa pɨá jararuma: panianepa, Tachi Ak'õre Jaorede pida t'õepɨra, Tachi Ak'õre juade paiwẽma ichidirã paara.#3:5 Waapẽarãmá mãɨ pedea nãɨya jara bɨma: «Tachi Ak'õre Jaorepa ẽpẽra sɨɨk'ari mãicha t'õpiepɨra, mãɨ ẽpẽra Tachi Ak'õre juade paiwẽma ichidirã paara». 6Tachi naepa t'õna nãɨ k'ak'uadepa chedapɨ, maamina mãicha t'õna Tachi Ak'õre Jaoredepa t'õnapɨ. 7Mɨa mãicha chiwidi t'õnai p'anɨane ada k'orea minachia k'ɨ̃risiarãse. 8Nãu paritua p'õat'ɨparima. Chi jĩk'ua ũriparimina k'awak'ama sãmãɨpa cherut'a mãɨnepa sãmá wãrut'a. Ara mãɨ jĩra, Tachi Ak'õre Jaore ununak'amina k'awa p'anɨma ẽpẽra sõne sãmaasã́ mãɨya oo bɨt'a.

9Nicodemopa jarasima:

—Tachi Ak'õre Jaorepa ¿sãmaasã́ mãɨ mãɨyaima?

10Jesupa p'anoosima:

—Pɨ Israeldepemarã́ Tachi Ak'õre pedea jarateaparí chi minachia k'awa bɨmina ¿mãɨ atua bɨk'ãra? 11Piarã ara mɨa pɨá jararuma: taipa k'awa p'anɨnepa mãɨnepa unu p'anɨnepa pedea p'anɨma maamina taipa pedea p'anɨt'a mãrapa ĩjãanak'ama. 12Mɨa nãɨ ĩjũane unupataɨdepema jara bɨt'a mãrapa ĩjãanak'apɨra, mãɨ pajãnepema jararude ¿sãmaasã́ ĩjãanaima?

13»Aba pida pajãnea wãk'ama mãɨ k'awai k'orea. Abapuru mɨ, chi Ẽpẽra Warrapa mãɨ k'awa bɨma, pajãnepa cheda pẽra.#3:13 Griego pedeade chi eda waapẽarã k'art'ade ichiaba bɨ bɨma: ichi pajãne bɨ pẽra. 14Moisepa ĩjũa pania newẽa bɨde taama bronce ooda ɨt'ɨ barijira bɨda jĩra,#Número 21:4-9. mɨ, chi Ẽpẽra Warra ara mãɨya ɨt'ɨ barijira bɨdaipɨ, 15chi mɨne ĩjãauta Tachi Ak'õre ome ewaricha chok'ae p'ananamẽrá.#3:14-15 Griego pedeade chi eda waapẽarã k'art'ade mãɨnepa bɨ bɨma: piudak'ari atuapidaemaapa.

16»Tachi Ak'õrepa ẽpẽerã minachia k'ɨ̃ria bɨ pẽra ichi Warra aba bɨt'a nãɨ ĩjũanea peesima jõma ichide ĩjãauta atuapidaemaapa, mãɨpari ichi ome ewaricha chok'ae p'ananamẽrá. 17Tachi Ak'õrepa ichi Warra nãɨ ĩjũanea peé pasima ẽpẽerã nepɨra pará p'anɨane amẽrá mãɨpari peesima k'aripamẽrá. 18Tachi Ak'õrepa chi ichi Warrade ĩjãa bɨt'a nepɨra pará bɨade a bɨwẽma. Maamina chi ichi Warrade ĩjãawẽa bɨt'a Tachi Ak'õrepa mãɨ nepɨra pará bɨade aparima, ichi Warra aba bɨt'a itu bɨda pẽra.

19»Tachi Ak'õrepa nãɨ ĩjũanepemarã nepɨra pará p'anɨane aparima nãɨ k'orea: chi ɨnaa bɨ nãɨ ĩjũane chesima ãareaɨrãpa Tachi Ak'õre ununamẽrá. Maamina ẽpẽerãpa k'achia oopata pẽra p'ãriot'a k'ɨ̃riasidama. 20Ãarea nemietá oopataɨrãpa chi ɨnaa bɨ k'ɨ̃rianak'ama. Chi ɨnaa bɨdea chedak'ama ãchia nemietá oo p'anɨt'a unupidaemaapa. 21Maamina ãarea chi piarã oopataɨrã chi ɨnaa bɨdea che p'anɨma, ãchia mãɨ Tachi Ak'õrepa k'ɨ̃ria bɨ jĩra oopataɨ ãareaɨrãpa k'awadamẽrá.

Juan chi Porochoaparipa Jesú k'orea pedeada

22Mãɨya nak'ari Jesú ichi ome p'ɨrrɨapataɨrã sida Judea tuadea wãsidama. Mãma p'anasidaɨde chi ichide ĩjãauta porochoapachima. 23Mãɨmisa Juanpa porochoa bapachima Enonde, mãɨ Salim p'uuru k'ait'a, mãma pania minachia bɨẽra. Mãma ẽpẽerã wãpachidama porochoapidai k'orea. 24Mãɨ mãɨyasima Juan jɨ̃a nɨbɨpataɨ tede jɨ̃a nɨbɨi naena. 25Mãɨ ewaride waapẽarã Juan ome p'ɨrrɨapataɨrã judio aba bɨ ome k'ĩruu pedeasidama, ne sɨɨdak'ari, ya mãɨ k'orea Tachi Ak'õrepa ãchi pia unumẽrá.#3:25 Judio aba bɨ. Griego pedeade chi eda waapẽarã k'art'ade bɨ bɨma: judiorã. 26Mãɨne Juanmá wãnak'ari jarasidama:

—Jarateaparí, chi pɨ ome Jordán k'ĩrari badapa ẽpẽerã porochoa bɨma, chi pɨa ichi k'orea pia pedea badapa. Mãɨ ãareaɨrã ichimá wãutama.

27Mãɨpuru Juanpa jarasima:

—Abaɨ pida ne p'ue uru baiwẽma, chi mãɨ Tachi Ak'õrepa ichiá teaiwẽpɨra. 28Mãrapa mɨa jarada ũrisidama. Mɨa jarasima mɨ chi Tachi Ak'õrepa Tachi K'aripaparí teai jaradawẽpɨ. Mãɨpari Tachi Ak'õrepa mɨ naa peesima o jarimẽrá ichi pae. 29Miak'ãiutade chi wẽra ataru mãɨ chi atepe bɨma. Maamina chi ichik'á bɨ k'õp'ãero arapá bɨma, ichia pedearut'a ũri bɨẽra. Ara mãɨ jĩra mɨ sõpia bɨma ichi nãma bɨ k'orea. 30Ichi chi atepe bai bɨma. Mɨ k'aepe bai bɨma.

Ɨt'aripema ẽpẽra

31»Chi ɨt'aripa cheru ãareaɨrã k'aepẽra chi atepe bɨma. Chi nãɨ ĩjũane bɨt'a nãɨ ĩjũanepema pẽra aba nãmapemat'u pedeaparima. Mãɨpuru chi pajãnepa cheru ãareaɨrã k'aepẽra chi atepe bɨma. 32Ichiapuru pedea bɨma pajãne ununa k'orea mãɨnepa ũrina k'orea. Maamina ichia pedea bɨt'a mi ãpia pida ĩjãanak'ama. 33Chi ichi pedeade ĩjãa bɨpa k'awa bɨma Tachi Ak'õrepa jara bɨt'a piarãpɨ. 34Tachi Ak'õrepa peedapa Tachi Ak'õre pedea pedeaparima, Tachi Ak'õrepa ichi Jaore wãak'awẽa teada pẽra. 35Tachi Ak'õrepa ichi Warra k'ɨ̃ria bɨma; mãɨnepa ne ãarea teasima ichi juade uru bamẽrá. 36Chi ichi Warrade ĩjãa bɨ Tachi Ak'õre ome ewaricha chok'ae baipɨ, maamina chi ichi Warra itu bɨru, mãɨ Tachi Ak'õre ome ewaricha chok'ae baiwẽma. Ara nãɨena Tachi Ak'õrepa ichi ɨtɨa uru bɨma.

Currently Selected:

Juan 3: tdc

Highlight

Copy