Juan 20

Jesú chok'ae p'irabarida

Mateo 28:1-10; Marco 16:1-8; Luca 24:1-12

1Tomione tap'ededa mãɨ p'ãrio nɨbɨde María Magdalena Jesú t'ɨbaridaadamá wãsima. Ará pak'ari chi mawara p'ẽya uria t'ap'a bada pɨra k'obɨt'a unusima. 2Mãɨpuru p'ira wãsima Simón Pedromá. Chi Jesú ome p'ɨrrɨaparí chi «Jesupa minachia k'ɨ̃ria bɨade» apataɨ mãma basima. Chek'ari jarasima:

—Tachi Chipari ichi t'ɨbaridaadamaapema ateewãsidama. Taipa atua p'anɨma sãmá ateewãsidat'a.

3Maapae Pedro mãɨnepa chi abaɨ Jesú ome p'ɨrrɨaparí ome Jesú t'ɨbaridaadamá wãsidama. 4Ume ará p'ira wãsidama, maamina chi abaɨ Pedro k'aepẽra isapea atepe p'ira wãna pẽra Jesú t'ɨbaridaadamá naa pasima. 5Pak'ari eda jãjorrea k'obeek'ari, chi p'aru Jesú k'ak'ua pɨra bada arí bari bɨt'a unusima, maamina eda wãé pasima. 6Simón Pedro ichi k'aade chek'ari uriade eda wãsima. Ichia pida unusima chi Jesú k'ak'ua pɨra bada p'aru arí bari bɨt'a. 7Ichiaba Jesú porode p'aru t'uya bada, bedak'ari awara bɨt'a unusima. 8Maapae chi abaɨ Jesú ome p'ɨrrɨaparí sida eda wãsima. Unuk'ari, piarã ĩjãasima Jesú chok'ae p'irabarisit'a. 9Ara mãɨ ĩjãanamina, ãchia Tachi Ak'õre pedeade Jesú chok'ae p'irabarii bɨt'a mãɨ k'orea bɨ bɨt'a, mãɨ waidi pia ũrinawẽa p'anasima.#20:9 Tachi Ak'õre pedeade. Salmo 16:8-11; Isaía 53:11-12; Osea 6:1-2; Joná 1:17; Levítico 23:11. 10Maapae chi Jesú ome p'ɨrrɨapataɨrã ãchi p'ananamá jĩitea wãsidama.

Jesupa María Magdalená ichi unupida

Marco 16:9-11

11Mãɨmisa María mawara p'ẽya uria ik'idá jẽa basima. Mãɨya jẽarune eda jãjorrea k'obeesima eda ak'ɨi k'orea. 12Mãɨne Tachi Ak'õrepa ɨt'aripa peedaɨrã neet'á t'ot'oa jɨ̃ p'anɨ ume eda unusima. Jesú k'ak'ua badamá suak'abari p'anasima, aba chi poro nok'oari, chi abaɨ ichi jĩru badamá. 13Ãchia idisidama:

—Wẽra, ¿k'ãre k'orea jẽa bɨma?

Mãɨne p'anoosima:

—Mɨ Chipari Jesú ateewãsidama. Mɨa atua bɨma sãmá ateewãsidat'a.

14Ara mãɨya jararude María ãpɨtea ak'ɨside, Jesú unusima, maamina k'awaé pasima chi mãɨ Jesut'a. 15Jesupa ichiá idisima:

—Wẽra, ¿k'ãre k'orea jẽa bɨma? ¿K'ai jɨrɨ bɨma?

Mariapa k'ɨ̃risiasima chi mãɨ ẽpẽra chi ne uu ĩjũa ak'ɨparí pasit'a. Mãɨpuru jarasima:

—Pɨa Jesú k'ak'ua ãyá ateewãsipɨra, mɨá jarase sãma bɨsit'a mɨa ichi k'ak'ua atade wãi k'orea.

16Mãɨne Jesupa jarasima:

—¡María!

Mariapa ãpɨtea ak'ɨk'ari —¡Raboni! asima. (Mãɨ hebreo pedeade jara k'ɨ̃ria bɨma “Jarateaparí”).

17Jesupa jarasima:

—Mɨ jitarãse mɨ Ak'õremá waidi wãwẽa bɨ pẽra. Mɨ ũpẽarãmá wãk'ari jarase mɨ Ak'õremá wãrut'a. Ichi mãra Ak'õrepɨ. Mãɨ mɨ Tachi Ak'õrepɨ mãɨnepa mãra Tachi Ak'õrepɨ.

18Ara mãɨne María Magdalena Jesú ome p'ɨrrɨapataɨrãmá wãk'ari jarasima: «Mɨa Tachi Chipari unusima».

Mãɨ awara Jesupa jarada ãarea nepɨrɨsima.

Jesupa jɨrɨ atadaɨrã́ ara ichi unupida

Mateo 28:16-20; Marco 16:14-18; Luca 24:36-49

19Mãɨ ewari tomio k'iuk'ari Jesú ome p'ɨrrɨapataɨrã tiida ará p'anasidama. Waapẽarã judiorã wap'ea p'anɨ pẽra chi eda wãpataɨ jɨ̃a uru p'anasidama. Mãɨne Jesú mãɨya bɨde eda pasima. Ãchi esa bai nɨbeek'ari jarasima:

—¡Ne k'ɨ̃risiadawẽa p'anat'ɨ!#20:19 ¡Ne k'ɨ̃risiadawẽa p'anat'ɨ! Judiorãpa chi unuutade, mãɨya pedeapachidama.

20Mãɨ jarak'ari ichi jua, ichi orro sida ãchiá ak'ɨpisima. Tachi Chipari unusida pẽra arapaasidama. 21Maapae Jesupa mãicha ãchiá jarasima:

—Ne k'ɨ̃risiadawẽa p'anat'ɨ. Mɨ Ak'õrepa mɨ nãɨ ĩjũanea peeda jĩra mɨa mãra nãɨ ĩjũanea peeruma.

22Mãɨya jarak'ari ãchimá jãrap'uak'ari jarasima:#Génesi 2:7; Ezequiel 37:1-14.

—Tachi Ak'õre Jaore jitat'ɨ.#20:22 Tachi Ak'õre Jaore jitapata k'orea, ak'ɨse Hecho 1:4-8; 2:1-4. 23Ẽpẽrapa nemietá ooda mãrapa Tachi Ak'õre Jaoredepa k'ɨ̃risia atuadaipɨra, mãɨpa jara bɨma Tachi Ak'õrepa mãɨ nemietá k'ɨ̃risia atuasit'a. Mãɨnepa ẽpẽrapa nemietá ooda mãrapa Tachi Ak'õre Jaoredepa k'ɨ̃risia atuadaepɨra mãɨpa jara bɨma Tachi Ak'õrepa mãɨ nemietá k'ɨ̃risia atuawẽa bɨt'a.

Jesupa Tomá ichi unupida

24Tomá Jesupa jɨrɨ atada doce p'anɨnepema pasima. Ichi ɨ̃ana t'ɨ̃ Mikisu apachidama.#20:24 Mikisu. Griego pedeade nãɨya bɨ bɨma: Dídimo. Jesú paside ichi waapẽarã ome baé pasima. 25Mãɨpuru ichiá jarasidama:

—Taipa Tachi Chipari unusidama.

Maamina Tomapa jarasima:

—Mɨ taupa ichi juade k'araupa mẽrap'et'adada unuepɨra, mɨ jua jimini chi k'arau mẽrap'et'adadade berajuepɨra, mãɨnepa mɨ jua ichi orrode jẽraepɨra, ichi chok'ae p'irabarida mɨa ĩjãaiwẽma.

26Ewari ocho pak'ari Jesú ome p'ɨrrɨapataɨrã mãicha tiida ará p'anɨne, Tomá sida basima. Mãɨya p'anɨne chi eda wãpataɨ minachia jɨ̃a nɨbɨmina, mãɨne Jesú mãɨya bɨde eda pasima. Ãchi esa bai nɨbeek'ari Jesupa jarasima:

—¡Ne k'ɨ̃risiadawẽa p'anat'ɨ!

27Mãɨya jarak'ari Tomá jarasima:

—Pɨ jua jimini nãma berajuse, mɨ juacha ak'ɨse mãɨnepa pɨ jua mɨ orrode jẽrase. Waa ĩjãawẽa barãse, mãɨpari ĩjãase mɨ piarã chok'ae p'irabarisit'a.

28Mãɨne Tomapa jarasima:

—¡Mɨ Chipari! ¡Mɨ Tachi Ak'õre!

29Mãɨya bɨde Jesupa ichiá jarasima:

—Pɨa mɨ unuru pẽra ĩjãaruma. ¡Maamina ẽpẽerãpa mɨ ununawẽa ĩjãanaipɨra, minachia pia p'ananaipɨ!

Nãɨ k'art'a k'ãre k'orea bɨsit'a

30Jesupa waapẽarã ẽpẽerãpa ne p'ue oodak'apɨ́ ichi ome p'ɨrrɨapataɨrã k'ĩrari minachia oosima, maamina ãarea mãɨ nãɨ k'art'ade bɨwẽma. 31Maamina ãarea nãɨ bɨsima mãrapa Jesú Tachi Ak'õrepa Tachi K'aripaparí teai jarada, Tachi Ak'õre Warrade ĩjãanamẽrá. Mãɨya ĩjãanaipɨra ichidepa chok'ae bai uru p'ananaipɨ.

Currently Selected:

Juan 20: tdc

Highlight

Copy