Hecho 4

Pedro mãɨnepa Juan chi judiorã k'ĩrari p'anana

1Pedro mãɨnepa Juan ẽpẽerã ome mãɨ pedea p'anɨmisa, judiorã p'aarerã, Tachi Ak'õre te minachia bɨdepema ot'eapataɨrã chi chaarea bɨ mãɨnepa saduceorã ãchimá chesidama. 2Mãɨne Pedropa Juan pida ẽpẽerã́ jaratea p'anasidama Jesú chok'ae p'irabarida jĩra ẽpẽerã sida chok'ae p'irabaridait'a. Mãɨpuru k'ĩruusidama. 3Pedro mãɨnepa Juan jitadak'ari k'iupodo pẽra waa norema jɨ̃a nɨbɨsidama. 4Maamina Pedropa jaratea bada ũri p'anana minachia p'anɨrãpa Jesude ĩjãasidama. Mãɨrã paara chi Jesude ĩjãapataɨrã chi ɨmɨk'ĩirãowa cinco mil p'anasima.

5Norema judiorã chi mãɨrã chaarearã, chi chõarã mãɨnepa chi Moisepa bɨda jarateapataɨrã Jerusalene ará posoa jeresidama. 6P'aarerã chi minachia k'awa bɨ Aná arí basima. Ichiaba chi ichidirã arí p'anasidama: Caip'á, Juan, Alejandro mãɨnepa waapẽarã sida arí p'anasidama.#4:6 Mãɨ ewaride Caip'á p'aarerã minachia k'awa bɨ pasima maamina ichi chãware Aná mãɨ naena p'aarerã minachia k'awa bɨ pada pẽra ichi wapida mãɨya t'ɨ̃ jarapachidama. 7Mãɨne ãchia Pedro mãɨnepa Juan atapide peesidama. Ãchi k'ĩrari bai nɨbeepidak'ari nãɨya idisidama:#Luca 12:11-12.

—Jãɨ ẽpẽra bɨɨrɨ sorek'ea bada mãrapa ¿k'ai jua chaareadepa jɨpa beepisidama? ¿K'ai t'ɨ̃nepa jãɨya oosidama?

8Mãɨne Pedropa Tachi Ak'õre Jaoredepa nãɨya p'anoosima:

—Tachi p'uurudepema chaarearã mãɨnepa chõarã: 9Idi mãrapa tachi nepɨra ak'ɨmaa p'anɨma, ẽpẽra bɨɨrɨ sorek'ea bada jɨpa beepidada k'orea, ¡mãɨnepa taiyá idi p'anɨma ichi sãmaasã́ jɨpa beepisit'a! 10Mãɨya bɨpɨra, taipa ãarea ará p'anoonaipɨ mãrapa mãɨnepa ãarea israel ĩjũanepemarãpa mãɨ ãarea k'awadamẽrá. Nãɨ ẽpẽra ara mãra k'ĩrari bɨt'a Jesucristo Nazaredepema jua chaareadepa jɨpa beesima.#4:10 Jesucristo Nazaredepema jua chaareadepa. Griego pedeade Jesucristo Nazaredepema t'ɨ̃nepa bɨ bɨma. Mãɨ Jesucristo mãrapa k'urusude barijira bɨk'ari peasidama, maamina Tachi Ak'õrepa ichi chok'ae p'irabaripisima. 11Tachi Ak'õre k'art'ade bɨ bɨma: “Chi te oopataɨrãpa mawara amaanana pada, mãɨ mawara chi atepe piipará beesima”.#Salmo 118:22; Luca 20:9-19. 12Abapuru Jesupa tachi p'ue k'aripaipɨ. T'ɨ̃ awara waa newẽma mãɨ t'ɨ̃neepuru nãɨ ĩjũane tachi ẽpẽerã k'aripamẽrá.

13Chi judiorã chaarearãpa Pedro mãɨnepa Juan ne wap'eawẽa pedea p'anɨt'a unusidaɨde k'awa k'ɨ̃risiadaé pasima. Pedro mãɨnepa Juan k'art'a atua p'anɨ unusidaɨde, k'awasidama ãchi Jesú ome p'ɨrrɨapachidat'a. 14Mãɨ awara chi ẽpẽra jɨpa beeda ãchi ome bada pẽra ãchi k'orea p'ue k'achia pedeadaé pasima. 15Mãɨne Pedroa mãɨnepa Juaná tajatá wãpade adak'ari, ya maapae ara ãchi tuaba pedea p'aneesidama, k'ãre oodai k'awadayá. 16Nãɨya jarasidama: «Jãɨ ẽpẽra ome ¿k'ãre oodaima? Ãchia chi mãɨ ẽpẽerãpa ne p'ue oodak'apɨ́ oodada chi Jerusalenepema ãareaɨrãpa mãɨ k'awa p'anɨma. Tachia p'ue seadaiwẽa p'anɨma. 17Maamina waapẽarã́ mãɨ k'orea waa pedeapidaemaapa, tachia ãchi nemietá oodayade adaipɨ, mãɨ Jesú t'ɨ̃ne waa pedeapidaemaapa».

18Ara mãɨne Pedro mãɨnepa Juan mãicha t'ɨ̃nak'ari jarasidama mi ãpia pida Jesú t'ɨ̃ne pedeapidaemaapa mãɨnepa jarateapidaemaapa. 19Maamina Pedropa mãɨnepa Juanpa jarasidama:

—Minachia k'ɨ̃risiat'ɨ. ¿Pia bɨk'ãra Tachi Ak'õrene ĩjãanait'a wa mãrapa jara p'anɨt'a ĩjãanait'a? Taimá pia bɨma Tachi Ak'õrene ĩjãanait'a. 20Chi taipa ununana mãɨnepa ũrinana p'ue jaradaiwẽa p'anɨma.

21Maapae mãicha Pedroa mãɨnepa Juaná nemietá oodayade adak'ari, ãchi itu wãpisidama. Chi p'uurudepemarã wap'ea p'anɨ pẽra k'awadaé pasima ãchi sãmaasã́ ɨtɨadait'a. Chi ẽpẽra jɨpa beeda k'orea ãareaɨrãpa Tachi Ak'õrea pia pedea tuanasidama, 22mãɨ ẽpẽra chi ẽpẽerãpa ne p'ue oodak'apɨɨdepa jɨpa beeda cuarenta ãyo wãyá basideepuru.

Jesude ĩjãapataɨrãpa p'eradawẽa ɨt'aa chiididada

23Pedro mãɨnepa Juan pari ãjã́ bɨdak'ari chi waapẽarã Jesude ĩjãapataɨrã ará p'anɨmá wãsidama. Maapae p'aarerã chi mãɨrã chaarearãpa mãɨnepa chi judiorã chõarãpa ãchiá jara p'ananat'a ãarea nepɨrɨsidama. 24Mãɨ ũrisidaɨde ãarea Tachi Ak'õrea ɨt'aa chiidisidama: «Tai Chipari ãarea p'ue bɨ, pɨapuru pajã, nãɨ ĩjũa, p'usa mãɨnepa ãarea ãchide nɨbɨ sida oosima. 25Pɨ Jaoredepa chi pɨ pae pari mimiaparí Davia nãɨya jarapisima:#4:25 Pɨ Jaoredepa. Griego pedeade chi eda waapẽarã k'art'ade mãɨ newẽma. Pɨ pae pari mimiaparí Davia. Griego pedeade chi eda waapẽarã k'art'ade tai chõarãenapema Daví ichiaba mãɨya bɨ bɨma.

“¿K'ãre k'orea ĩjũanepemarã k'ĩruu p'anɨma mãɨnepa p'uurudepemarã Tachi Ak'õre k'orea ãchi k'ɨ̃ría nemietá oodai k'ɨ̃risia p'anɨma?

26Chi nãɨ ĩjũanepema poro jũra jɨ̃parí jɨ̃ berãpa k'ĩruu jɨrɨpatama mãɨnepa chi poro chaarearãpa pedea aupatama Tachi Ak'õre Chipari ome mãɨnepa chi ichia jɨrɨ atada ome k'ĩruunai k'orea”.#4:25-26 Chi ichia jɨrɨ atada. Griego pedeade nãɨya bɨ bɨma: Ichi Cristo. Salmo 2:1-2.

27Ara mãɨ jĩra nãɨ p'uurude Herode, Poncio Pilato, judiorãwẽ mãɨnepa Israeldepemarãpa pedea ausidama chi pɨ pae pari mimiaparí jĩp'a bɨ Jesú peadai k'orea.#4:27 Herode. Mãɨ Herode Antipa jarapachidama. Pɨ pae pari mimiaparí. Mãɨ pedeapa ichiaba jara bɨma «warra». Pɨa mãɨ Tachi Chipari bɨdamina, 28ãchia mãɨya oosidama pɨa naena k'ɨ̃risia bada jĩra. Pɨ minachia jua chaarea bɨ pẽra naena mãɨya bɨsima ãchia mãɨya oodamẽrá.

29»Naapae Tai Chipari, chi jãɨrã judiorã chaarearãpa taiyá nemietá oopidayá p'anɨ k'orea k'ɨ̃risiak'ari, taiyá pɨ pedea ne wap'eawẽa jarapise. Mãɨ tai chi pɨ pae pari mimiapataɨrãpɨ. 30Pɨ jua chaarea bɨdepa chi k'ɨdade berã jɨpa beepise mãɨnepa chi pɨ pae pari mimiaparí jĩp'a bɨ Jesú t'ɨ̃nepa ẽpẽerãpa ne p'ue oodak'apɨ́ ãarea oose».

31Tachi Ak'õrea ɨt'aa chiidi p'ananak'ari chi ãchi ará posoa p'anana te ore nɨbeesima. Mãɨne ãareaɨrãpa Tachi Ak'õre Jaore jitadak'ari, Tachi Ak'õre pedea ne wap'eadawẽa pedea tuaneesidama.

Jesude ĩjãapataɨrãpa ãchi neet'á jedadada

32Mãɨ ewaride chi Jesude ĩjãapataɨrã k'ɨ̃risia abarik'a mãɨnepa sõ abarik'a p'anapachidama. Abaɨ pida ara ichi neet'á ichidí jĩra k'ɨ̃risiak'a pasima, mãɨpari abaɨ ome ne jedapachima. 33Chi Jesupa peedaɨrãpa Tachi Ak'õre jua chaareadepa Tachi Chipari Jesú chok'ae p'irabarida k'orea pia jarateapachidama. Mãɨnepa Tachi Ak'õrepa ichi sõpiadepa ũpẽarã minachia k'aripapachima.#4:33 Tachi Ak'õrepa ichi sõpiadepa ũpẽarã minachia k'aripapachima. Mãɨ pedea ichiaba jara bɨma «ãarea ẽpẽerãpa Jesude ĩjãapataɨrã wap'eapachidama». 34-35Mãɨpuru ãchi t'ãena nenea k'ede newẽ pasima. Chi ĩjũa uru berãpa ãchi ĩjũa netopachidama mãɨnepa te uru berãpa ãchi te netopachidama. Netodak'ari chi erreara Jesupa peedaɨrãmá enemeepachidama mãɨ jedadamẽrá, ara ãchi ne newẽa p'anɨ jĩra.

36Mãɨne ẽpẽra José apataɨ ãchi ome basima. Jesupa peedaɨrãpa ichi t'ɨ̃ bɨsidama Bernabé. (Bernabé t'ɨ̃ jara k'ɨ̃ria bɨma «Sõpiapiparí Warra»). Ichi Levidepa ununa pasima. Mãɨ Chipredepema pasima. 37Mãɨ Bernabepa ĩjũa netok'ari chi erreara Jesupa peedaɨrã́ ateewãsima mãɨ jedadamẽrá.

Currently Selected:

Hecho 4: tdc

Highlight

Copy