Hecho 15

Jesude ĩjãapataɨrã Jerusalene ará p'anana

1Mãɨ ewaride chi eda waapẽarã Judea tuadepemarã Antioquía p'uurudea chesidama. Ãchia ũpẽarã judiorãwẽa jaratea p'aneesidama Moisepa bɨda jĩra ɨmɨk'ĩra k'ak'ua tauchaadaepɨra, Tachi Ak'õrepa ãchi k'aripaiwẽt'a.#Génesi 17:12. 2Mãɨpuru Pablo mãɨnepa Bernabé ãchi ome minachia k'ĩruu pedeasidama. Ũpẽarãpa Pablo, Bernabé mãɨnepa chi eda waapẽarã Jerusalenea peesidama chi Jesupa peedaɨrã ome mãɨnepa ũpẽarã ak'ɨpataɨrã ome mãɨ k'orea ará pedeadamẽrá.

3Ũpẽarã Antioquiadepemarã peesidaɨde ãchi P'enicia tuade mãɨnepa Samaria tuade wãsidama. P'uurucha nepɨrɨsidama sãmaasã́ judiorãwẽpa ãchi naena k'ɨ̃risia p'ananat'a itu bɨdak'ari Jesude ĩjãasidama. Mãɨ pedea ũrisidaɨde ũpẽarã ãarea arapaasidama.

4Jerusalene chesidaɨde Jesupa peedaɨrãpa, ũpẽarãpa mãɨnepa chi ũpẽarã ak'ɨpataɨrãpa ãchiá pia chesidade asidama. Mãɨne Pablo mãɨnepa Bernabepa ãarea Tachi Ak'õrepa ãchidepa judiorãwẽ t'ãena oodat'a nepɨrɨsidama. 5Maamina waapẽarã p'ariseorã Jesude ĩjãapataɨrãpa bai nɨp'aneenak'ari jarasidama:

—Chi ũpẽarã judiorãwẽ k'ak'ua tauchaadai p'anɨma. Ãchirã́ jarateadai p'anɨma Moisepa bɨda ĩjãanamẽrá.

6Chi Jesupa peedaɨrã ũpẽarã ak'ɨpataɨrã ome ará p'anasidama chi mãɨ nepɨra pedeadai k'orea. 7Tãaraa pedeautade Pedro p'irabarik'ari jarasima:

—Ũpẽarã, mãrapa k'awa p'anɨma mãranepema Tachi Ak'õrepa mɨ naena jɨrɨ atasima judiorãwẽa jarateamẽrá.#Hecho 10:1-43. Mãɨne judiorãwẽpa chi pedea pia Jesú k'orea ũrinak'ari ĩjãasidama. 8Tachi Ak'õrepa ẽpẽerã ãarea sõ k'awa bɨma. Mãɨ judiorãwẽpa ĩjãasidaɨde Tachi Ak'õrepa k'awapisima ãchi pia jitasit'a. Ichi Jaore ãchiá teasima, tachiá naena teada jĩra.#Hecho 10:44-47. 9Tachi Ak'õrepa tachi ãchi ome k'ĩra awara ooé pasima. Ãchia ĩjãasidaɨde ãchi sõ sɨɨsima. 10Mãrapa ¿k'ãre k'orea Tachi Ak'õrepa k'awapida itu bɨ p'anɨma? ¿Ichia sãmaasã́ ooi k'awai k'orea mãɨya p'anɨk'ãra? Tachia mãɨnepa tachi chõarãenapemarãpa Moisepa bɨda mãɨ ãarea p'ue oodak'a pasima, mũra ɨ̃rɨ minachia chɨk'ɨa at'oopari jĩra. ¿K'ãre k'orea chi judiorãwẽa mãɨ oopi k'ɨ̃ria p'anɨma? 11Tachia ĩjãa p'anɨma Tachi Chipari Jesupa ichi sõpiadepa tachi mãɨnepa ãchi k'aripait'a.

12Bernabepa mãɨnepa Pablopa nepɨrɨsidama Tachi Ak'õrepa ẽpẽerãpa ne p'ue oodak'apɨ́ ãchidepa judiorãwẽ t'ãena oosit'a. Mãɨpa k'awapisima ichi ãchi ome bɨt'a. Mãɨne ãareaɨrãpa k'ĩup'ea ũri tuanasidama. 13Mãɨ nepɨrɨk'ari Santiagopa jarasima:#15:13 Mãɨ Santiago Jesú ũpẽapɨ. Santiago ichiaba «Jacobo» apatama. Chi k'art'a Santiago apataɨ mãɨ Santiagopa bɨsima.

—Ũpẽarã, mɨ pedea ũrit'ɨ. 14Simonpa#15:14 Simonpa. Mãɨ Simón Pedropɨ. tachiá nepɨrɨsima Tachi Ak'õrepa chi judiorãwẽ k'orea k'ɨ̃risia bɨdepa naapae ãchi jɨrɨ atasit'a ichi p'uuru padamẽrá. 15Simonpa jarada Tachi Ak'õre pari pedeapataɨrãpa bɨdada jĩra bɨma. Nãɨya bɨ bɨma:

16“Mãɨya nak'ari mɨ mãicha cheipɨ. Chi Davipa ichi juade uru p'anana, te chae k'orowãna jĩra bɨma.

Mɨa mãra pia bɨipɨ, te mãicha pia oopari jĩra.

17Mãɨya chi waapẽarã ẽpẽerãpa mãɨnepa judiorãwẽ chi mɨa jɨrɨ atadarãpa mɨ jɨrɨdaipɨ.

18Tachi Chiparipa mãɨya jara bɨma. Chõarãena mãɨ minachia k'awapi bɨma”.#Amó 9:11-12.

19»Mãɨpuru mɨmá, tachia chi judiorãwẽ Tachi Ak'õrene ĩjãautarã́ ne chi t'aju be waa oodai p'anɨane a jaradaiwẽa p'anɨma. 20Mãɨyawẽapuru, k'art'ade bɨdai p'anɨma chi juapa oodada sãdoa ne k'iuru teadada p'ue k'odaiwẽa p'anɨt'a, nemietá awaraɨ ome oodaiwẽa p'anɨt'a, ãnimara ojɨ̃ peadada k'odaiwẽa p'anɨt'a mãɨnepa oa k'odaiwẽa p'anɨt'a. 21Mãɨya oodaiwẽa p'anɨma tachi chõarãenapema Moisepa bɨda p'uurucha jarateapata pẽra. Mimianak'apɨ́ ewaricha mãɨ Moisepa bɨda tachi judiorã ará pedeapataɨ techa jĩk'ua eda jarapatama.

22Mãɨne chi Jesupa peedaɨrãpa, ũpẽarã ak'ɨpataɨrãpa mãɨnepa ãarea ũpẽarãpa mãɨ jaradada pia ũrisidama. Mãɨpuru chi eda waapẽarã jɨrɨ atasidama Pablo mãɨnepa Bernabé ome Antioquiadea wãnamẽrá. Sila mãɨnepa Juda chi ɨ̃ana t'ɨ̃ Barsabá apataɨ ateewãsidama. Chi waapẽarãpa ũpẽarãpa ãchi k'orea pia k'ɨ̃risiasidama. 23Ãchi ome k'art'a nãɨya bɨdak'ari tea peesidama:

Jesupa peedaɨrãpa, ũpẽarã ak'ɨpataɨrãpa mãɨnepa ãarea ũpẽarã pida nãɨ k'art'a bɨutama ũpẽarã judiorãwẽ Antioquía p'uurudepema pae, Siria tuadepema pae mãɨnepa Cilicia tuadepema pae. Taipa k'ɨ̃ria p'anɨma mãra pia p'ananait'a. 24Taipa ũrisidama waapẽarã ẽpẽerã nãmãɨpa mãramá wãnak'ari ãchia jaratea p'anɨ k'orea mãra sõk'achia p'aneenak'ari k'awa k'ɨ̃risiadawẽa p'aneesidama.#15:24 Griego pedeade chi eda waapẽarã k'art'ade nãɨ sida bɨ bɨma: Ãchia jaratea p'anɨma mãra k'ak'ua tauchaadai p'anɨt'a mãɨnepa Moisepa bɨda oodai p'anɨt'a. Hecho 15:1,5. Maamina mãɨ ẽpẽerãt'a taipa peedaé pasima.

25Mãɨpuru taipa pedea ausidama chi tai paarapemarã mãramá peedai k'orea, chi tachia k'ɨ̃ria p'anɨ ũpẽa Bernabé mãɨnepa Pablo ome. 26Perá piusidama Tachi Chipari Jesucristo k'orea. 27Mãɨya taipa Juda mãɨnepa Sila peeutama. Mãɨ ũpẽarãpa taipa nãɨ k'art'ade bɨuta jĩra abarik'a jaradaipɨ.

28Tachi Ak'õre Jaoremá mãɨnepa taimá pia bɨma ne chi t'aju be mãrá oopidaiwẽt'a. Abapuru nãɨ oodai p'anɨma: 29juapa oodada sãdo ne k'iuru paateada k'odaiwẽa p'anɨma mãɨnepa oa k'odaiwẽa p'anɨma, ãnimara ojɨ̃ peadada k'odaiwẽa p'anɨma mãɨnepa nemietá awaraɨ ome oodaiwẽa p'anɨma. Ãarea mãɨ oosidara pia p'ananaipɨ. Pia p'anat'ɨ.

30Maapae chi ãchia peedaadarã Antioquía p'uurudea wãsidama. Chedak'ari ãarea ũpẽarã ará t'ɨ̃nak'ari mãɨ k'art'a teasidama. 31Ũpẽarãpa mãɨ k'art'a jĩk'ua eda jaradak'ari minachia arapaasidama chi mãɨ nepɨrapa ãchi sõpia beepida pẽra. 32Juda mãɨnepa Sila Tachi Ak'õre pari pedeapataɨrã pasima. Mãɨpuru ne minachia jarasidama ũpẽarãpa pia ĩjãanamẽrá mãɨnepa chaarea p'ananamẽrá. 33Juda mãɨnepa Sila mãma tãaraa p'ananak'ari ũpẽarãpa ãchi peedaadamá jĩitea pia wãpisidama. 34Maamina Silamá pia bɨade a k'ɨ̃risiasima mãma beeit'a.#15:34 Griego pedeade chi eda waapẽarã k'art'ade mãɨ versículo newẽma.

35Pablo mãɨnepa Bernabé Antioquiade p'aneesidama. Ãchi mãɨnepa minachia ũpẽarã pida chi ĩjãapataɨrã jaratea p'anasidama mãɨnepa Tachi Chipari pedea jarapachidama.

Pablo Bernabé awara wãna

36Tãaraarune Pablopa Bernabea jarasima: «P'uurucha Tachi Chipari pedea jaratea p'ananamá mãicha wãtɨma, ũpẽarã sãmaasã́ p'anɨt'a k'awadai k'orea».

37Mãɨne Bernabepa Juan Marco ãchi ome ateewã k'ɨ̃ria basima. 38Maamina Pablopa mãɨ ateewã k'ɨ̃riaé pasima, naena Panp'ília tuade Juan Marcopa ãchi itu amee basi pẽra mãɨnepa ãchi ome waa mimiaé pasi pẽra.#Hecho 13:13. 39Pablo Bernabé ome mãɨ k'orea ãstu k'ĩruu pedeadak'ari awara wãsidama. Bernabepa Marco ateewãk'ari p'ãp'orrode Chipre tuadea wãsidama. 40Mãɨne Pablopa Sila ateewãsima ichi ome wãmẽrá. Ũpẽarãpa Tachi Chipari juade bɨsidama ichi sõpiadepa k'aripamẽrá. 41Maapaepuru wãsidama. Siria tuade mãɨnepa Cilicia tuade p'ɨrrɨautade p'uurucha ũpẽarã k'aripapachidama Tachi Chipari pia ĩjãanamẽrá.

Currently Selected:

Hecho 15: tdc

Highlight

Copy