Hecho 13

Tachi Ak'õre Jaorepa Saulo mãɨnepa Bernabé peeda

1Ũpẽarã Antioquía p'uurudepema t'ãena Tachi Ak'õre pari pedeapataɨrã mãɨnepa jarateapataɨrã p'anasima. Bernabé, Saulo, Lucio Cirenenepema mãɨnepa Simón basima. Simón ɨ̃ana t'ɨ̃ «Chi P'aimá» apachidama. Manaén sida basima. Ichi Galilea tuadepema chi poro jũra jɨ̃parí jɨ̃ bɨ Herode ome tausia warisima.#13:1 Galilea tuadepema chi poro jũra jɨ̃parí jɨ̃ bɨ Herode. Mãɨ Herode «Antipa» t'ɨ̃ jarapachidama.

2Ewariaba ũpẽarãpa Tachi Ak'õrene k'ɨ̃risiadayá nek'odak'apɨ́ ewaride oo p'anɨne Tachi Chiparia pia pedea p'anasidama. Mãɨya p'anɨne Tachi Ak'õre Jaorepa ãchiá jarasima: «Bernabé mãɨnepa Saulo mɨa t'ɨ̃sima. Mãɨpuru ãchi awara bɨt'ɨ mɨa oopi bɨt'a oodamẽrá».

3Ãchia Tachi Ak'õrene k'ɨ̃risiadayá nek'odak'apɨ́ ewaride oodak'ari, Tachi Ak'õrea ɨt'aa chiidiutade ãchi jua Bernabé mãɨnepa Saulo ɨ̃rɨ bɨsidama. Maapae ãchi peesidama Tachi Chiparipa oopi bɨ ode wãnamẽrá.

Saulo mãɨnepa Bernabé wãnana

4Ãchi Tachi Ak'õre Jaorepa peeda pẽra Seleucia p'uurudea wãsidama. Mãmãɨpa p'ãp'orrode Chipre ĩjũa p'ɨrra bɨdea wãsidama. 5Salamina p'uurude chedak'ari judiorã ará pedeapataɨ techa Tachi Ak'õre pedea jarateasidama. Ãchi k'aripai k'orea Juan Marco ãchi ome p'ɨrrɨasima.#13:5 Griego pedeade nãɨya bɨ bɨma: Juan. Ichi Bernabé ẽpẽerãnepema pasima. Colosense 4:10.

6Ãarea mãɨ ĩjũa p'ɨrrɨautade Pap'o p'uurude pasidama. Mãma judio Barjesú apataɨ unusidama. Mãɨ Barjesú jaipana pasima. Seadepa jarapachima ara ichi Tachi Ak'õre pari pedeaparí pasit'a. 7Ichi Chipredepema chi chaarea bɨ Sergio Paulo apataɨmá bapachima. Mãɨ Sergio Paulo k'ɨ̃risia minachia basima. Ewariaba ichia Bernabé mãɨnepa Saulo t'ɨ̃pisima Tachi Ak'õre pedea ũri k'ɨ̃ria bada pẽra. 8Maamina ãchia jaratea p'anɨne chi jaipana Barjesupa seaade apachima chi chaarea bɨpa Tachi Ak'õre pedea ĩjãapiemaapa. (Barjesú t'ɨ̃ griego pedeade Elima apatama). 9Mãɨne Saulo Tachi Ak'õre Jaoredepa basima. (Saulo ichiaba Pablo apatama). Pablopa Elimamá minachia ak'ɨ nɨbeek'ari nãɨya jarasima:

10—¡Tiore warra, pɨa ne ãarea jĩp'a bɨt'a k'ɨ̃riak'ama! ¡Nemietá ooyá bɨma mãɨnepa chi sea bɨma! ¿K'ãre k'orea ara pɨchia Tachi Chipari pedea seaade a bɨma? 11Naapae tai Chiparipa ichi jua chaareadepa pɨ ɨtɨaipɨ. Pɨ tau p'ãrio beeipɨ. Ewari tãaraa ɨmata unuwẽa baipɨ.

Ara mãɨne chi jaipanapa tau t'aua p'ãrio bɨ unuk'ari mãɨpa tau p'ãrio beesima. Maapae chichupuria idisima abaɨpa ichi juade jitak'ari k'aripa ateewãmẽrá. 12Sergio Paulopa mãɨ unuside chi Tachi Chipari k'orea jaratea p'anɨt'a minachia pia ũrina pẽra ĩjãasima.

Pisidia tuadea wãnana

13Pablo mãɨnepa chi ichi ome wã p'anɨrã Pap'o p'uurudepa Panp'ília tuadea p'ãp'orrode wãsidama. Mãma Pergue p'uurude chesidama. Maamina Juan Marcopa ãchi ameek'ari Jerusalenea jĩitea wãsima.#13:13 Mãɨ Juan Marco jĩitea wãna Pablopa piawẽa unusima. Hecho 15:38.

14Ãchi Pergedepa Antioquiadea wãsidama. Mãɨ Antioquía Pisidia tuade bɨma. Mãma mimianak'apɨ́ ewaride judiorã ará pedeapataɨ tede eda wãnak'ari suak'abari p'aneesidama. 15Maapae chi chaarearãpa Moisepa bɨdadepema mãɨnepa Tachi Ak'õre pari pedeapataɨrãpa bɨdaadadepema jĩk'ua eda jarasidama. Maapae ãchia Pablo mãɨnepa Bernabé suak'abari p'anɨmá nãɨya jara peesidama:

—Ũpẽarã, mãrapa pedea aba uru p'anɨpɨra tai k'aripadai k'orea, mãɨyara pedeat'ɨ.

16Mãɨne Pablo p'irabarik'ari juapa jarasima ãareaɨrã́ k'ĩup'eadamẽrá. Maapae jarasima:

—Israeldepemarã mãɨnepa judiorãwẽ Tachi Ak'õre wap'ea berã, ũrit'ɨ: 17Chi Israel p'uurudepema Ak'õrepa tachi chõarãenapemarã jɨrɨ atasima. Ãchi Egito tuade chĩararã jĩra p'anasidaɨde Tachi Ak'õrepa ãchi p'uuru minachia eapapisima. Maapae ichi jua chaareadepa ãchi Egito tuadepema ateewãsima.#Éxodo 1:7; 12:51. 18Mãɨya nak'ari ãchi ĩjũa pania newẽa bɨde, Tachi Ak'õrepa chi ãchia piawẽa oodada cuarenta ãyo choa basima.#13:18 Choa basima. Griego pedeade chi eda waapẽarã k'art'ade bɨ bɨma: ak'ɨ basima. Número 14:34. 19Maapae Canaán ĩjũane Tachi Ak'õrepa p'uuru k'ak'o siete ãarea k'enapip'eda, chi mãɨrã ĩjũa pada tachi chõarãenapemarã́ teasima.#Josué 11:15-23. 20Egitodea wãnaananepa aba ãchi ĩjũa atautadea 450 ãyo basima.

»Mãɨya nak'ari Tachi Ak'õrepa chi ẽpẽerã nepɨra ak'ɨpataɨrã bɨpachima, aba Tachi Ak'õre pari pedeaparí Samuel ewaridea.#Juece 2:16-19. 21Mãɨ ewaride ãchia Tachi Ak'õrea chichupuria idisidama ẽpẽra aba ãchi poro jũra jɨ̃ bɨ bɨmẽrá. Mãɨ k'orea Tachi Ak'õrepa Quis warra Saúl bɨsima.#1 Samuel 8:1-9; 10:23-25. Mãɨ Saúl Benjaminepa ununa pasima. Cuarenta ãyo israel ĩjũanepemarã poro jũra jɨ̃parí jɨ̃ bɨ basima. 22Maamina Tachi Ak'õrepa Saulo ãyá bɨk'ari Daví bɨsima ãchi poro jũra jɨ̃parí jɨ̃ bɨ bamẽrá. Daví k'orea Tachi Ak'õrepa nãɨya jarasima: “Mɨa Jesé warra Daví pia unu bɨma. Mɨa oopi k'ɨ̃ria bɨt'a ichia ãarea ooipɨ”.#1 Samuel 13:14; Salmo 89:20; Isaía 44:28.

23»Maapae Tachi Ak'õrepa naena jarada jĩra oosima. Ichia Davidepa ununanepema aba bɨsima israel ĩjũanepemarã Tachi K'aripaparí bamẽrá.#2 Samuel 7:12-16; Salmo 132:11-13,17. Mãɨ ẽpẽra Jesupɨ. 24Mãɨ Jesú chei naena Juanpa ãarea israel ĩjũanepemarã́ jaratea basima ãchi nemietá itu bɨdak'ari Tachi Ak'õremá chedamẽrá. Chi mãɨya ooutarã ichia porochoapachima. 25Ichi piui ewari ara k'ait'a paside Juanpa jarasima: “Mãrapa mɨ ¿k'ai k'ɨ̃risia p'anɨma? Mɨ Tachi Ak'õrepa Tachi K'aripaparí teai jaradawẽma.#Luca 3:16; Juan 1:20. Maamina chi mɨ k'aadea cherut'a mɨ k'aepẽra chi atepe bɨma. Ichia jĩrune jɨ̃ bɨ ẽrai k'orea mɨ mãɨ pae pida pia bɨwẽma”.

26»Mãra ũpẽarã Abrahanepa ununaanarã mãɨnepa mãra judiorãwẽ Tachi Ak'õre wap'ea berã, Tachi Ak'õrepa tachiá peesima mãɨ pedea ateewãnai k'orea.#13:26 Tachiá. Griego pedeade chi eda waapẽarã k'art'ade bɨ bɨma: mãrá. 27Jerusalenepemarãpa mãɨnepa ãchi chaarearãpa Jesú Tachi K'aripaparí k'awadaé pasima. Tachi Ak'õre pari pedeapataɨrãpa bɨdada mimianak'apɨ́ ewaricha jĩk'ua eda jarapatamina chi ichi k'orea bɨdada k'awadaé pasima. Mãɨpari Jesú peapisidaɨde mãɨ pedea jara bɨt'a piarã oosidama. 28Mi ãpia pida nemietá ooda ununawẽmina ãchia Pilatoa jarasidama peamẽrá. 29Tachi Ak'õre k'art'ade ichi peadai bɨdada ãarea mãɨyak'ari ichi k'urusudepema edá jiradak'ari t'ɨbarisidama. 30Maamina Tachi Ak'õrepa ichi chok'ae p'irabaripisima. 31Mãɨya nak'ari Jesupa chi ichi ome Galileadepa Jerusalenea wãnaanarã́ ara ichi bari k'ak'o minachia unupisima. Idiapae mãɨ ẽpẽerãpa ichi k'orea ãarea israel ĩjũanepemarã́ pedea p'anɨma.

32-33»Ara mãɨ jĩra taipa nãɨ pedea pia bɨt'a jara p'anɨma: Tachi Ak'õre tachi chõarãenapemarã ome pedea ausima mãɨnepa tachi, chi ãchidepema ununaanarã mãɨ pedea auda ãarea oosima. Jesú chok'ae p'irabaripisima salmo umene bɨ bɨ jĩra. Nãɨya jara bɨma: “Pɨ mɨ Warrapɨ. Idi pɨ mɨ Warraade aruma”.#13:32-33 Griego pedeade nãɨya bɨ bɨma: Idi mɨ pɨ ak'õre pasima. Salmo 2:7. Mãɨ salmone pedea bɨma Tachi Ak'õrepa ichi Warra israel ĩjũanepemarã Chipari bɨdat'a.

34»Tachi Ak'õrepa Jesú piu bada chok'ae p'irabaripisima waa piupiemaapa. Mãɨ k'orea ichi k'art'ade nãɨya jarasima: “Mɨa Davia k'aripai jarada mãra ome piarã ooipɨ”.#Isaía 55:3. 35Mãɨpuru salmo chi k'art'a awara bɨ bɨde nãɨya bɨ bɨma:

“Mɨ, chi pɨ pae pari mimiaparí chi jĩp'a bɨt'a itu beraapiiwẽma”.#Salmo 16:10.

36»Daví chok'ae baside Tachi Ak'õrepa ichidepa oosima ichia k'ɨ̃ria bada jĩra. Maapae Daví k'ĩrawẽak'ari t'ɨbarisidama ichi chõarãenapemarã t'ɨbaridaadamá. Mãɨne ichi beraasima. 37Maamina chi Tachi Ak'õrepa chok'ae p'irabaripidat'u mãɨ beraaé pasima.

38Mãɨpuru ũpẽarã, nãɨ k'awat'ɨ: mãrapa nemietá oopataɨ Tachi Ak'õrepa Jesudepa k'ɨ̃risia atuaipɨ. 39Moisepa bɨdade bɨ bɨma Tachi Ak'õrepa chi tachia nemietá tachi k'ɨ̃ría oopataɨ k'ɨ̃risia atuaiwẽma. Maamina ãarea chi Jesude ĩjãauta Tachi Ak'õrepa nepɨra newẽa p'anɨane aparima. Mãɨt'a mãrá jara p'anɨma. 40Jĩrak'aua p'anat'ɨ Tachi Ak'õre pari pedeapataɨrãpa bɨdada mãra ome mãɨyapiemaapa. Nãɨya bɨsidama:

41“Mãrapa chi Tachi Ak'õrepa jara bɨt'a itu bɨ berã, ¡ak'ɨt'ɨ! ¡Ak'ɨɨtua nɨbeet'ɨ! ¡Piut'ɨ!

Mɨa nãɨ ewaride ne ooipɨ.

Mãɨ abaɨ pida mãrá jararu sida ĩjãanaiwẽma”.#Habak'ú 1:5.

42Pablo mãɨnepa Bernabé judiorã ará pedeapataɨ tedepa wãutade ẽpẽerãpa chichupuria idisidama nãɨ mimianak'apɨ́ ewari cherude mãɨ k'orea mãicha pedeadamẽrá.#13:42 Ẽpẽerãpa. Griego pedeade chi eda waapẽarã k'art'ade bɨ bɨma: judiorãwẽpa. 43Chi jere p'anana wãsidaɨde minachia judiorãpa mãɨnepa griegorã chi judiorã k'ɨ̃risia jĩra p'anapataɨrãpa Pablo mãɨnepa Bernabé paara wãsidama. Ãchia mãɨ ẽpẽerã́ minachia jarasidama Tachi Ak'õrepa ichi sõpiadepa ãchi k'aripa bɨt'a ĩjãa p'ananamẽrá.

44Ya ewari mimianak'apɨ́ ewari cherude chi p'uurudepemarã chi judiorã ará pedeapataɨ tedea ará cheepɨrɨsidama Tachi Chipari pedea ũrinai k'orea. 45Maamina chi judiorã chaarearãpa ẽpẽerã minachia nɨbɨ ãchi tede unusidaɨde Pablo k'orea sõpiawẽa tuaneesidama. Pablopa jaratea bɨde ãchia seaade apachidama mãɨnepa Pablo k'orea piawẽa pedeapachidama. 46Mãɨne Pablo mãɨnepa Bernabepa ne wap'eawẽa ãchiá jarasidama:

—Piarã taipa mãrá Tachi Ak'õre pedea naa jaradai p'anasidama. Maamina mãrapa mãɨ itu bɨ p'anɨ pẽra mãɨnepa mãramá ewaricha Tachi Ak'õre ome chok'ae bai piawẽa pẽra, taipa judiorãwẽmá mãɨ jarade wãnaipɨ. 47Taipa mãɨya oodamẽrá Tachi Chiparipa nãɨya jarasima:

“Mɨa pɨ ɨnaa jĩra bɨsima judiorãwẽpa mɨ k'orea k'awadamẽrá.

Pɨa ãarea nãɨ ĩjũane berã́ k'awapiipɨ chi mɨa ẽpẽerã k'aripait'a”».#Isaía 49:6.

48Judiorãwẽpa mãɨ ũrisidaɨde arapaasidama. Ara mãɨne Tachi Chipari k'orea pedea pia pedeasidama. Chi Tachi Ak'õrepa ewaricha ichi ome chok'ae beadai k'orea bɨdarãpa ichide ĩjãasidama. 49Maapae Tachi Chipari pedea ãarea mãɨ tuade jarasidama.

50Maamina judiorãpa chi Tachi Ak'õre wap'ea be wẽerã minachia k'awa berã́ mãɨnepa p'uurudepema ɨmɨk'ĩira chi chaarearã́ jarasidama Pablo mãɨnepa Bernabé piawẽa oodamẽrá. Mãɨya ãchi p'uurudepema ãyá jeret'aasidama. 51Mãɨne Pablo mãɨnepa Bernabepa p'uurudepema yooro jora ãchi jĩrunepema jãrap'et'asidama unupidai k'orea Tachi Ak'õrepa mãɨ k'ɨ̃riawẽa bɨt'a ãchiá k'awapii k'orea. Maapae Iconio p'uurudea wãsidama. 52Maamina chi Jesude ĩjãapataɨrã mãɨ Antioquiade p'anɨ minachia arapá p'anasidama mãɨnepa Tachi Ak'õre Jaoredepa p'anasidama.

Currently Selected:

Hecho 13: tdc

Highlight

Copy