Matthew 16
16
Allaaghlluwhaghtisqelleq
1Taagken ilangi Pharisees‑etlu Sadducees‑etlu tagikat Jesus‑mun anagniilqavigighnaluku. Enkaam allaaghlluwhaghtisqegkaat esghaasighqaaluku aghtughyaghqaanghillgha Kiyaghneghmeng pingutanga. 2Iwernga Jesus‑em kiimsiqii, “Siqineq tevighyaghtungestanghani esla kavighrugunghani piiqusi, ‘Unaami pinighnaquq.’ 3Siqineq piitekestanghani qilaga kavighrugunghanillu qilagiinghanillu piiqusi, ‘Aghneghmi esla seghleghunaquq.’ Esghapagluku qilaga liisimakaqaghsi esla natennaqutanga. Iwernga esghapaneghpesiki sallghet aghneghni maani liigikepagningitasi sameng pisiitangi. 4Aghneghem uum yugi seghleghqumanguut, ataasiighneghilnguut Kiyaghneghmun, naqam allaaghlluwhaghtitesqut whangamnun. Yeghlegillu! Taananginaghhaq allaaghlluwhaghtilleq esghaghlleqaghsi Kiyaghneghem allaaghlluwhaghtillgha Jonah‑mun.”
Taagken Jesus‑em unilluki aghulaqegkat.
Jesus‑em Kelengasaaqangi Maligsaaghteni
5Maligsaaghtekullghiit inglunganun naayvam kaalluteng, maligsaaghtet piyalghiimeng puygumalghiit neqekrangllameng kelqegpenateng. 6Jesus‑em pikii, “Kelengalusi Pharisees‑etlu Sadducees‑etlu yeast‑angitneng.”
7Ellmeggneng akuzimghhutkegkaat, “Tawaten piiq qayughllak kelqenghilnguukut neqekrangllameng.”
8Jesus‑em liisimakegkangi sameng pitangi enkaam pikii, “Elpesi yugni, ugpeqilleghqestaapiguusi! Sangafsi neqekranglliinnitsi? 9Taawa liigikigatsii? Neqamikenghistekii tallimat neqekrangllat aavguqanka 5,000 yugnun, qafsinꞌgutangillu pasketet siipneghmeng imiqasi esleqaghaghlluki? 10Taakutlu neqamikenghistekii maaghraghvinlek neqekrangllat 4,000 yugnun neghestekanka, qafsinꞌgutangitlu pasketet siipneghmeng imiqasi esleqaghaghlluki? 11Naten sangan liigikenghitesteggu neqekrangllaanghilnguq akuzitkegkegka? Kelengalusi Pharisees‑etlu Sadducees‑etlu yeast‑angitneng!”
12Taagken maligsaaghtet liigikegkaat sameng piiqutanga. Yeast‑angunghiteftuq neqekrangllamelnguq kelengasaaghutkegkaa, iwernga kelengasqaqeftii apeghtuusiitneng Pharisees‑etlu Sadducees‑etlu.
Peter‑em Jesus, Christ‑angunikanga
13Taagken Jesus kaasami tunganganun Caesarea Philippi‑em, aaptekii maligsaaghteni, “Yuget kinanguniiqatgu Ighnegha Yugem?”
14Kiimsiqaat, “Ilangi piiqut John‑nguniluku Paaptaayesta, ilangita Elijah, paninang ilangita Jeremiah‑nguniiqaat nalighmeng naliit uuknaliqistet.”
15Aaptekii, “Elpesimi kinanguniiqestengnga?”
16Simon Peter‑em kiimsiqaa, “Christ‑anguuten, Ighnegha unguvalghiim Kiyaghneghem.”
17Jesus‑em pikaa, “Quyastellelguuten, Simon, ighnegha Jonah‑m! Qayughllak yugmeng liisimangitan, Atama qilagmelnguum elpenun liitestekaqaa. 18Enkaam piimken, Peter‑nguuten, Uyghak. Whagun uyghagkun nekefleqaqa yughaghvika, tuqullghem aghtughyaghqaanghillghan kayaalqesaghqaqenghitngwhaaghaa. 19Elpenun tuunelleqanka key‑ngi Ataneghpagullghan Qilagem. Sangwaa alngunak asightekuvgu nunami whani, asighsaghqaaguq qilagmillu. Sangwaa alngunak itemuskuvgu nunami whani, itemusaghqaaguq qilagmillu.”
20Taagken Jesus maligsaaghteminun apeghtesnanighwaaqaq kitumun alngunak Christ‑anguniluni.
Jesus‑em Aapqanga Ikfiqluni Tuqulleghqani
21Taagken kenlanga Jesus‑em liigikesnaqegkii maligsaaghteni, Jerusalem‑etepestaaghyaghqaaniluni, tawani allaaghhiinakun ikfiqesleqniluni Elder‑enun, chief priest‑enun, apeghtughikayugnunllu Liilightuusameng. Ungipaatkii tuqusaghqaaniluni taagken pingayaani aghneghem Kiyaghneghmun unguvaghsaghqaaniluni.
22Peter‑em iqitulluku aghyuuniiqaa, “Ataneq, Kiyaghneghem pisnaanghitaaten! Tawaten pinaanghituten!”
23Jesus‑em qiivluku Peter pikaa, “Tughneghaq, iqiten whangamneng! Amigighaghpenga, qayughllak sumeghtaghallghen yugem sumeghtaghalqaa, Kiyaghneghem sumeghtaghalqenghitaa!”
24Taagken Jesus‑em maligsaaghteni pikii, “Kitum alngunak maligsukuminga, ellmi katam piyukelleni peglluku, qaquurani uyamigluku maligllinga. 25Qayughllak kitum alngunak unguvalleni ellminun katam piknikumigu iflayaghqaqaa. Kitum alngunak pegtekumigu unguvalleni whanga apalluqlunga allgeghlleqaa. 26Sangwaangam yugem pinighqusiqelleqagu piliilluku nunaghllak, iflakumigu unguvasigni? Taawa avangituq veghtusighqameng unguvasigminun. 27Aapghanka tamaakut elpesinun qayughllak Ighnegha Yugem tagiyaghqaaguq Atamineng aghtughyaghqaanghillelighluni yaqulegtuumaghmi. Taagken tamaghhaa yuuk nallangightughlleqaa apeghiighutellghatun. 28Ipa ungipaatamsi, whaanlenguut ilagpesi unguvalleghmeggni esghaghyaghqaqaat Ighnegha Yugem tagilghii Umiilguluni.”
Currently Selected:
Matthew 16: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
