Matthew 11

John‑em Paaptaayestem Maligsaaghteni Jesus‑mun Pistekangi

1Jesus‑em qula maalghuk siipneqluku maligsaaghteni apeghiighyamiki apeghtughaneghmeng, tamaaken aghulaqegkaq ilangitnun town‑et apeghtughinalunillu ungipaqinalunillu.

2Anusimingllaghvigmelluni John‑em Paaptaayestem nagaqughluku Christ‑a saaqutanga, ilangi maligsaaghteni kayagtekii Jesus‑mun. 3Aaptekaat Jesus, “Elpengwaa taginaqnikaat, nalighmeng kina tagiyaghqaawaa?” 4Jesus‑em kiimsiqii, “Ungipaasaghtughteggu John nagatkaghpesinengllu esghaqaghpesinengllu: 5ayakaayalghiit esghaghyagutut, piyugigasalghiit piyugyagutut, leprosy‑lguyalghiit naallghutut, tuuslaghyalghiit nagaquusagutut, tuqukaayalghiit unguvaghtut, aklumalghiinunllu Pinilghiit Ungipat ungipaqut. 6Kina alngunak ugpeqinaninghilkumi whangamneng quyastekaaguq!”

Jesus‑em Aapqanga John Yugnun

7Aga John‑em maligsaaghtengi aghulaqsata, Jesus‑em akuzitkegkaa John yulghutnun, “Kilgaanun piiqngafsi, sangwaa esghaghyaghtughesteggu? Vegaaq anuqem ufsuguskangaa? 8Saqutsimi? Esghaghnalukuu aatkaqegtaq yuuk? Tamaaken aatkaqelghiit kiyaghtaqut umiilget mangteghiitni! 9Sangwaami esghaghyaghtughesteggu? Uuknaliqistaa? Aa‑a, ungipaatamsi, esghaqaghsi John uuknaliqistenginaanghituq. Megnunaghataghaghtuq 10qayughllak ellnganguuq Akuzitet Igaqegkat aapqaat whaten,

‘Kiyaghneq piiq, Sivugpeni kayaglleqaqa ungipaghteka,

yataaghqesaghtiisqelluku tuumkaghqan’.

11Ipa ungipaatamsi, John Paaptaayesta megnunalleghpigaaguq yugneng allgeqaghyaggaghneng. Iwernga kina alngunak ukalighpigaq Ataneghpagullghani Qilagem John‑meng megnunaghataghaghtuq. 12John Paaptaayesta ungipaqiyuggaallghaneng whavemun kenlanga, suuglluget wayaghnaqutkaqaat Ataneghpagullgha Qilagem. 13Qamaglluteng uuknaliqistetlu Moses‑emllu Liilightuusiita uuknaliqutkengngwaat Ataneghpagullgha Qilagem kenlanga John‑em tagillghanun. 14John‑nguuq uuknaliqistet uuknaliqutkegkaat taginaqnilleghmeggteggun Elijah. Ugpeqsukufsigu uuknaliqelleq, John Elijah‑nguuq. 15Sigutelguusi, nagatek!

16“Maaten kiyaghlleghhit yuget samun uspunnaqsingi? Taghnughhaaghestun ayuqut aqumuulluteng akilpegaghvigni, naghaalgutmeggnun akilghuullghiit whaten,

17‘Qalghightaatamsi, tukaleganghitusi!

Qiyiqutukut, qiyiqenghitusi!’

18“John tagiiqngami fast‑aaquq, meghigatuqlu wine‑meng, enkaam yuget whaten pikaagut, ‘Tughneghalguuq’. 19Ighnegha Yugem tagiiqngami, neghelgusighaqii, meghelgusighaqiillu yuget, enkaam yuget whaten pikaagut, ‘Yuukqun taana esghaqaghteggu! Neghetupigtuq, meghetupigtuq, ilakumtaaqaatlu tax‑em qerngughtistengita, seghleghqestetlu!’ Naqamllu Kiyaghneghem peghqinellgha ipapighqengngaaq sallghakun.”

Jesus‑em Aghyuuqangi Avuteghqellghilnguut Yuget

20Jesus‑em allulluki allaaghlluwhaghtilleni atuqegkaqii Chorazin‑mi, Bethsaida‑mi, Capernaum‑emillu. Iwernga yugit avuteghqelluteng taaqellghilnguut seghleghqenneghmeng enkaam Jesus‑em aghyuughmikii. 21Pikii, “Seghleghwaaghunaqnguusi, Chorazin‑eghmiini! Seghleghwaaghunaqnguusi, Bethsaida‑ghmiini! Elpesini allaaghlluwaghtilleghllaget apeghiiqat pikaayaqata Tyre‑millu Sidon‑millu, neghipiglluteng yugit avuteghqelluteng seghleghqennanighnayaghtut. Tamaaken apalluqluku suvinalghiimeng qiipaghaghqameng aalluteng aqumnayaghtut panetelleghteggun. 22Ipa ungipaatamsi, Nanqigtillghem Aghneghani Tyre‑eghmiitlu Sidon‑eghmiitlu aghyulleghqestaaghhaayaghqaagut elpesineng! 23Enkaam elpesi, Capernaum‑eghmiini! Qaywa anglisteghllagyaghngaaghpesi elpesineng katam repall sumeghpesini usuqellengelleqnillusi qilagmi, yeghlegi ukiglleqiisi hell‑mun. Allaaghlluwhaghtilleghllaget pikaayaqata Sodom‑emi, paninang aghneghmi whani nekevghanayaghtuq! 24Iwernga ungipaatamsi Nanqigtillghem Aghneghani Kiyaghneghem nangllekataghaghyaghqaqii Sodom‑eghmiit pakiggulluki elpesineng!”

Whangamnun Tagilusi Meghnaalitek

25Taagken Jesus pikaq, “Kaay Ata, Atanqaaten qilagemllu nunamllu! Iqamsiqayugvikamken qayughllak liitkaanghilngughnun liitestekaqan ipapighqelleq iiqan liitkanengllu peghqineghnengllu. 26Aa‑a, Ataay, efquqelleghpetun pikaaguten.

27“Atama tagivaqaqaa sangwaa qamagtengngwaaghluku. Kitum alngunak nallukaa Ighneq, iwerngaqun Atam. Kitum alngunak nallukaa Ata, iwerngaqun Ighneghem, enkaam Ighneghem nakmikegkaminun liitesleqaa Ata.

28“Tagitek whangamnun qamagllusi ughleghilghiini, uqigtuqamengllu akmalegllagni, meghnaalisleqamsi. 29Iisqaghmiitagka aallukek liitivikitengnga, qayughllak yakumanginneghitunga, iluka qusevegngaaq. Enkaam meghnaalillequsi unguvasighpesinun. 30Iisqaghmiitagka piyaqniituk, akmakallu uqengestaaghhaaguq.”

Currently Selected:

Matthew 11: ess

Highlight

Copy