Luke 20

Ighleghutistet Aapqughaaqangat Jesus

1Aataasimi aghneghmi, Temple‑mi, Jesus apeghtughimaluku yugnun, ungipaqimalukullu Pinilghiineng Ungipaneng, chief priest‑etlu, apeghtughikayugetlu Liilightuusaneng, siivanllequlluteng takukaat. 2Pikaat, “Ungipaatikut kitum qeleghtaten tawaten pisqelluten, nalighmeng kitum qelellghakun tawaten pinguzin?”

3Kiimsiqii, “Whangallu aaptaghllamsi. Ungipaataghtengnga, 4John‑em paaptaayeghillgha Kiyaghneghmeng pingwaa, nalighmeng yugneng?”

5Ellmeggneng akuzimghutkelluku, pikat, “Sameng pinaqesta? Kiimsiqumteggu Kiyaghneghmeng pinguniluku, whaten pilleqiinkut, ‘Sanganmi ugpeqenghitesteggu John?’ 6Iwernga, ‘Yugneng pingunikumteggu’, qamaglluteng yuget milughpagaataghlleqiinkut, qayughllak ugpeqngukangat John uuknaliqistenguniluku.” 7Enkaam kiimsiqaat nallukniluku naken pingutanga.

8Jesus‑em pikii, “Whangallu ungipaannaanghitamsi kitumeng qelellengegkaatka tamaavek pikamnun.”

Jesus‑em Ungipaghaatkegkangi Seghleghet Aflengakistengi Piitesighaghvigem

9Taagken Jesus‑em yuget ungipaghaatkii, “Yuuk piitesighaghvigmini grapes‑meng piitesighaamalghii. Navghilluku aflengakistenun taagken ilanganun nunam aghulaqluni muluughllakaq. 10Grapes‑et saghnayaghqaaghsata, qepghaghta kevgaqegkaa aflengakistenun nengini aqfasqelluki. Iwernga aflengakistet qevuutiighluku aghulaqestekaat avangunaan. 11Ilanga qepghaghta kevgaqegkaa, ellngallu qevutiighluku, kayngusaakluku aghulaqestekaat avangunaan. 12Enkaam pingayiitangat qepghaghta kevgaqegkaa, taana kiitiquluku eslatmun miluutkaat. 13Taagken grapes‑em piitesighaghvigan yuga pikaq, ‘Sanaqsinga? Kevaqnaqaqa whanga katam piniqegkaqa ighneqa, luuraq siivaknayukatgu.’ 14Iwernga aflengakistet esghaghyamegteggu pikat, ‘Una pagitiyaghqaaguq whaken piitesighaghvigmeng, tuqutelteggu enkaam piitesighaghvik whangkuta piliilleqaghput.’ 15Aanesluku piitesighaghvigmeng tuqutkaat.” Taagken Jesus‑em aaptekii, “Piitesighaghvilgem salleqakingam taakut aflengakistet? 16Tagiluni tuququghlleqii, enkaam piitesighaghvini tuunelleqaa ilangitnun.” Nagasamegteggu tawaten pilghii, pikaat, “Kiyaghneghem tawatelluku apeghiightesneghilligu!” 17Iwernga esghaamakngwaaghluki aaptekii, “Una Akuzin Igaqegkaq sameng pisiiwa?

‘Uyghak mangteghangllaghtet ighsakegkaat,

megnunalleghpigaaghtekaaguq uyghak.’

18Tamaghhaghmi iqulghii taaggun uyghagkun kagimyaghqaaguq. Iwernga uyghagem ulleghvikegkumigu kina kagimqelleqaa pagulanguluku.”

Aapqughalleq Tax‑meng

19Apeghtughikayugetlu Liilightuusaneng, chief priest‑etlu liigikegkat Jesus‑mun ellmeng akuzitkengnguniluteng ungipaghaatmikun. Enkaam tawaninginaq tuguyukaat iwernga alikegkiit yuget seghleliighqiinayukata. 20Enkaam iiskughtengngwaaqaat Jesus qayughllak tuunyukangat Rome‑em governor‑nganun, ellnganun nanqigtesqelluku. Tamaaken apalluqluku kayagtekiit riirngistet nagatesqelluku Jesus. Ipapighqesighwaaghluki anaggutesnaqutkesqelluku Jesus akuzillghakun. 21Taakut riirngistet pikaat, “Apeghtughista, whangkuta liisimakamken akuzilleghtenllu apeghtughilleghtenllu ipanguut. Atunengwaaq pikayuguuten yugnun, apeghtughaqatenllu ipalleghmeng Kiyaghneghem piyukellghaneng ayuqelghiimeng. 22Ungipaataghtikut, Kiyaghneghem Liilightuusaani elqughutngaa llivikilleghqaghput tax‑meng Caesar‑mun? Llivikiltaa‑a nalighmeng pinghitelta?”

23Iwernga Jesus‑em liisimakegkangi peghqiniqellghit enkaam pikii, 24“Kelguvikitengnga coin‑meng. Kitum gginaallu, aatghallu coin‑meta?”

Kiimsiqaat, “Caesar‑em.”

25Pikii, “Tuuniteki Caesar‑mun tamaakut Caesar‑em pingi, enkaam tuuniteki Kiyaghneghmun tamaakut Kiyaghneghem pingi.”

26Enkaam riirngistet Jesus akuzillghakun anaggutestepagningitkaat yuget sivungitni. Saghiighayagulluki kiimsiitangi, qallegnaniqat.

Aapqughaalleq Tuqukat Unguvaghtellghitneng

27Taagken ilangi Sadducees‑et tagikat Jesus‑mun. Ellngita ugpeqngukangit tuqukat unguvaghyaghqaanghinniluki. 28Pikaat, “Apeghtughista, Liilightuusamnni Moses‑em igaqegkaqaa whaten, yugem anglegutanga nulightughluni tuqumakan avaqutigpenani, anglegutangan tuguyaghqaqaa nulighqesaqanga avaqutinnaluku anglegutni tuqukaq. 29Taawanguq maaghraghvinlek yuget anglegutkullghiit. Nuyekliq nulightughluni tuqukaq avaqutigpenani. 30Tuunglighhaan tuguluku ugingighaq, ellngallu tuqukaq. 31Pingagayiitangitallu tuguluku, ellngallu tuqukaq. Qenwat qamaglluteng maaghraghvinlegyaget anglegutkullghiit tuqulaghaatkat avaqutigpenateng. 32Kinguliiluni aghnaq tuqukaq. 33Qamagllutengqun maaghraghvinlegyaget nulighhuluku tugukaqegkangat. Enkaangam kitum nulighqelleqagu aghnaq tuqukat unguvaghtuuskata?”

34Jesus‑em pikii, “Kiyaghtaalleghmi maaten yuget nulightughaqut, aghnat aangꞌghutaqiit. 35Iwernga tamaakut Kiyaghneghem itagnaqegkii tuqulleghmeng unguvaghtuusaghqaagut, kiyaghllequtlu nutaghami nunami, tugutunnaanghitut. 36Tawani unguvalleghmi yaqulgestun ayuqsaghqaagut tuqunaanghitut. Avaqutaqii Kiyaghneghem, qayughllak tuqulleghmeng unguvaghtekaagut. 37Whateghlluwaaq Moses‑em ipapighqegkaqii tuqukat unguvaghsaghqaaniluki. Igatgun igaqaqngamigu uqfillegaq kumaghughngalghii whaten pikaaguq, Ataneq ‘Kiyaghneqaa Abraham‑em, Kiyaghneqaa Isaac‑em, Kiyaghneqaa Jacob‑em.’ 38Ellnga Kiyaghneqaat unguvalghiit, qayughllak ellngani qamaglluteng paninang unguvalghiinguut. Ellnga Kiyaghneqenghitaat tuqukat.”

39Ilangita apeghtughikayuget Liilightuusaneng pikaat, “Apeghtughista, kiimsighlaataqwaaten.” 40Taagken tetugyagutkaat aapqughaaneghmeng.

Aapqughaalleq Christ‑ameng

41Taagken Jesus‑em aaptekii, “Sanganmi yuget Christ‑a ighneqniiqatgu David‑mun? 42Igaani Psalms‑em David pikaalghii,

‘Atanghem Kiyaghneghem pikaqaa Atanqa,

Aqumi aghenqignemkun,

43kenlanga anguyagten asingiitellemnun itegaghpek.’

44David‑em tuqluqaa ‘Ataneghmeng’ enkaam natenmi ighneqelleqagu?”

Jesus‑em Kelengasaaghuskangi Apeghtughikayuget Liilightuusaneng

45Yuget ellminun nagatusimaluki, Jesus‑em maligsaaghteni pikii, 46“Kelengalusi apeghtughikayugneng Liilightuusaneng. Igleghsuneghtuut aalluteng akughtuqameng atkuyaaghmeng, akilpegaghvignillu quyakesugaqut aangwaaghughtekaaluteng. Synagogue‑nillu neqenghaghqelghiinillu aqumyuneghtuut aangwaaghughtekat aqumutiitgun. 47Esghaghlaataquluki ugingighat mangteghiighaqiit. Taagken pinighniluteng pisqelluteng taakluku yughaghaqut. Tamaaken apalluqluku aghyuullengeghllagyaghqaagut!”

Currently Selected:

Luke 20: ess

Highlight

Copy