John 5

Naallghutilleq Naayvaghaaghmi

1Taam kingunganeng Jesus, Jerusalem‑etkaq Jews‑et neqenghaghqellghitnun. 2Taawanguq Jerusalem‑emi, Sheep Gate‑em tungangani naayvaghaaq tallimaneng porch‑elek, Hebrew‑stun atillgha Bethesda. 3Uglapiglleghhii qinuyuk ingaghmetullghii porch‑eni, ayaakat, piyugigalnguut, uniiqat. (Pagughrugughhneghsighaqegkangat meq ateghyuwhaaghnaluteng. 4Ilangani aghneghem, yaqulga Atanghem ateneghmini naayvaghaaghmun pagughrugughtestaqegkanga meq. Enkaam kina ateghyuwhaalghii meghmun naallghutaqelghii sameng alngunak aqnighneghmineng.)

5Taawanguq yuuk qinuyugngalghii 38 ayumiqulleghni. 6Jesus‑em esghaqaa. Liisimakegkaa qavngarugllak ima qinuyukaq enkaam aaptekaa, “Naallghusugsiin?” 7Qinuyulghiim kiimsiqaa, “Yuguniiq, meq pagughrugughhneghani kayutkaghqiitaqunga. Ateghnaqutkaqsaghtunga ima kitum ingyaghaghtaqaanga.” 8Jesus‑em pikaa, “Nekevi, allighan tuguluku piyugi.” 9Tawaninginaq yuuk naallghulluni, allighani tuguluku piyukaq. Sabbath‑ngulghii tawani aghneghmi.

10Tamaaken apalluqluku Jews‑et igleghutistengita pikaat naallghutkaq yuuk, “Aghneghmi Sabbath‑nguuq, Liilightuusamnni allighan igleghusaghqaqenghisaghan Sabbath‑mi.” 11Pikii, “Yugem naallghutistema piinga, ‘Allighan tuguluku piyugi.’” 12Aaptekaat, “Kitum naallghulluten allighan tuguluku piyugesqaten?” 13Iwernga yugem nallukegkaa naallghutisteni kinangutanga, qayughllak uglapiglleghii yuuk tawanlenguq, Jesus‑llu esghaghtengngunani iqitkaalghii.

14Aghneghmi taakwani Temple‑mi, Jesus‑em nallaqaa taana yuuk naallghutkani, pikaa, “Uyuq, naallghusimaaten. Seghleghqennanii luuraq sangwaa seghleghataghalghii ikfiqutkennayukavgu seghleghqumanginaquvek.” 15Taagken yugem ungipaasaghtuqii Jews‑et igleghutistengit Jesus‑nguniluku naallghutisteni. 16Taagken kenlanga Jews‑et igleghutistengita seghletun piyagutkaat Jesus, Sabbath‑mi naallghutillghaneng apalluqluku. 17Iwernga Jesus‑em pikii, “Ataka quunpeng qepghaaguq, whangallu qepghaghyaghqaagunga.” 18Enkaam Jews‑et igleghutistengita wataqaaghaq tuqusukaat. Pikat, “Jesus‑em Sabbath‑em Liilightuusaa naafqinaghpenaan pikaaguqlu Kiyaghneq Atakniluku. Tawaten akuzilleghmikun Kiyaghneghtungwaaq ayuqniluni piiquq.”

Jesus‑em Aghtughyaghqaanghillgha

19Iwernga Jesus‑em pikii, “Ipa piimsi, Ighneq ellnginaghmi sayaghqaanghituq, Atamineng esghapakaghhiinani piiqaa. Atami pillghatun piiquq. 20Atam piniqaa Ighneni, enkaam kelguvikaqaa sameng tamaghhaaneng salleghmineng. Iwernga taakuneng aangataghalghiineng kelguviksaghqaqaa saghiighayugesqellusi. 21Atam unguvaghtesluki tuqukat unguvallelitaqii, enkaam tawateghpigaq Ighneq unguvallelitikayuguuq piyukegkaminun. 22Ata nanqigtingigatuq kitumeng alngunak. Iwernga aghtughyaghqaanghillelitkaqaa Ighneni qamaglluku nanqigtilleq ellnganun pisqelluku. 23Kiyaghneghem tawaten pikaqaa Ighneni tamaghhaanun quulviisqelluku katam tawaten quulvallghistun Ata. Kitum taam quulviigalkumigu Ighneq quulviigataa Ata kayagtikaq Ighneghmeng.

24“Ipa piimsi, kitum nagaskumiki akuzitenka, ugpeqegkumigullu kayagtisteka, kenlengilngughmeng unguvallelguuq. Nanqigtellengnaanghituq aghyuughyaghqaaluni qayughllak tuqumeng unguvalleghmun lliiqaaguq. 25Ipa piimsi, pilleghqaq uka taginguuq, whaa kaasimaaq, tuqukat nagaqughlleqaat menga Ighneghan Kiyaghneghem. Tamaakut nagaquullghiit unguvallequt, 26qayughllak Ata unguvallghuuq, enkaam unguvalleq ellnganeng pinguuq. Tawateghpigaq Ighnegha unguvallghuuq, qayughllak Atam tawatetestekanga. 27Aghtughyaghqaanghillelitkaqaallu Ighneni nanqigtilleghmun qayughllak Ighneqegkanga Yugem.

28“Saghiighayagutegpenaan una: pilleghqaq taginguuq qamaglluteng tuqukat lliveghmelnguut nagaqughluku menga, 29aanleghaasaghqaagut lliveghmeggneng. Tamaakut pinitun pikat unguvaghtesaghqaagut unguvalleghmun. Iwernga tamaakut seghletun pikat unguvaghtesaghqaagut nanqigtelleghmun aghyuughyaghqaaluteng.

Aapghistengi Jesus‑em

30“Nanqigsigataqa kina alngunak sivukluku aaptellngunaan Ata. Enkaam nanqigtiiqunga ellngan pisqellghinaghhaatun. Nanqigtilqa elqughutngaaq, qayughllak nanqigtiiqunga Atam kayagtikam whangamneng piyukellghatun. Whanga piyukellemtun pingigatunga.

31“Aapquma whangamneng, yuget ugpeqnaanghitiit akuzitenka, wetkuqun kitum alla aapqanganga. 32Iwernga kitum aapghaqaanga tawaten, liisimakanka aapqii ipanguut qayughllak aapghisteka Atakaqa. 33Elpesi yuget kayagtekaqasi John‑mun, apellghi whangamneng ipanguut. 34Yuget apenghisaghngaaghmegtengnga, iwernga tawaten piinga elpesi yugulillengesqellusi. 35John kenelghutastun kumangayaghtuqlu kuukgutngayaghtuqlu. Akuzitangi nighugestun ayuqsaghtut enkaam elpesi natengiighhaq akuzitangakun quyastesukaagusi. 36John‑em akuzitangan liitestekaqaanga yugnun. Iwernga wataqaaghaq John‑em akuzitanganeng qepghalleghma liitestaghaghaanga yugnun. Qepghaghanka Atama pisqegkii enkaam qepghalleghma liitestaa yugnun Atamnun kayagtekaqnilunga. 37Kayagtikam whangamneng, Atam ellmineng katam aapghwaa ipapighqelleq whangamneng ayuqelghii. Nagaqiigatngwaaghaghsi menga, esghiigatngwaaghaghsi natetulanga, 38tugukliigatasillu akuzitangi, qayughllak ugpeqigataghsi Atam kayagtekaa. 39Ivaghivikaqasi Akuzitet Igaqegkat, qayughllak sumeghpesini kenlengilngughmeng unguvallengviknaluki piiqasi. Taakusta ataasit Akuzitet Igaqegkat aapghilghiit whangamneng. 40Naqam whangamnun tagiyugigatusi unguvallelitesqellusi.

41“Yugnun usuqesunghitunga. 42Liisimakamsi elpesi, piniqellghitusi ilugpesini Kiyaghneghmun. 43Atama kayagtekaqaanga akuzistengulunga ellminun, iwernga elpesi tugukliigataghpesinga. Naqam kina tagiluni ellminun katam akuzilghii tuguklighaqluku. 44Natenꞌngam ugpeqelleqesteggu tagikaatka Kiyaghneghmeng usuqesugukufsi ilagpesinun, naqam taananginaghhaam Kiyaghneghem usuqelleghqaa avelghaghluku? 45Sumeghtaghaghpenasi apeghlleqniluku anaggutelleghsi Atamun. Moses‑nguuq aapghiyaghqaq anaggutelleghpesineng qaywa sighimaksaghngaaghpesigu yugulisqellusi. 46Moses ipa ugpequmakufsigu ugpeqnayaghaghpesinga qayughllak igaqegkaqaanga igatgun. 47Enkaam Moses‑em igaqegkii ugpeqigalkufsiki, natenꞌngam ugpeqelleqesteki akuzitenka?”

Currently Selected:

John 5: ess

Highlight

Copy