John 21
21
Jesus Esghaghteslaataqaq Ilangitnun Maligsaaghteminun
1Taakwaningani Jesus esghaghteslaataqaq maligsaaghteminun Naayvami Tiberias‑mi. Whaten esghaghtestekaaguq. 2Ilanginguq maligsaaghtem qerngaghmetkat naayvami. Simon Peter‑enkunguftut, Thomas‑enkut (aatghan aallgha Malghi), Nathanael‑enkut, Cana‑meng pi Galilee‑melngughmeng, Zebedee‑mllu ighneghqek, alla maalghuk maligsaaghtek. 3Simon Peter‑em pikii, “Iqalliniighyaghnaqunga.” Pikaat, “Maliggnaqamken”. Enkaam angyakun kelluteng unulqusiq iqalluggnaqutkegkaayalghiit, iwernga pikengumangitkat.
4Aghtaghaghaqaallu maligsaaghtet esghaqaat Jesus nekevghalghii esnemi, iwernga kinangutanga nallukegkangat. 5Jesus‑em pikii, “Ilakumtaamni, iqalluggneghitsii?” Kiimsiqaat, “Nakaa”. 6Pikii, “Ateghteggu negaghpagsi angyaghpesi aghenqigneghakun, enkaam pikengellequsi.” Pisqellghatun pikat. Naapqaghighllakat repall negaghpak qaakneghmeng aghtuqaat angyamun.
7Maligsaaghtem Jesus‑em piniqegkaan pikaa Peter, “Atanghuuq!” Simon Peter‑em nagaqughyamigu pilugugluni qetgeqaq meghmun. (Peter amsikaghtekaayalghii qepghaghnaluni.) 8Maligsaaghtet angyamelnguut esnamun qamuqaat naapqaghiighngalghii negaghpak. Awavantepanghilnguut quutmeng, entaqun 100 yards uyatutkalghiit.
9Maligsaaghtet uuglleghaasalghiimeng quutmun esghaqagket aniighwtekak kenghek, iqallugmeng ugkelgek. Taawallu neqekrangllalguftuq. 10Jesus‑em pikii, “Tagitek iqallugtaghpesineng.”
11Enkaam Simon Peter angyamun uuglluni sayukaa negaghpak quutmun. Taawanguq 153‑nguftut iqallugpaghqughllaget naaptekat, naqamllu negaghpak piigumangilnguq. 12Jesus‑em pikii, “Neghyaghtughtek.” Nalighhiiniita maligsaaghtet aapneghmeng tetukaat kinangutanga, liisimakluku Atanghutanga. 13Jesus‑em tuguluku neqekrangllaq tunquqaa ellngitnun, iqallugetlu tawaten pikii.
14Taana pingayiitkegkanga Jesus‑em esghaghtestellgha maligsaaghteminun, unguvaghtestelleghmi kingunganeng.
Jesus Peter‑mun Apeghtuutkesqelghii Ugpeqanun
15Taaqsameng neneghmeng Jesus‑em aaptekaa Simon Peter, “Simon, ighnegha John‑em, piniqataghaghsingaa ukuneng?”
Kiimsiqaa, “Aa‑a Ataneq, liisimakaghpenga piniqegkemken.”
Jesus‑em pikaa, “Neghqiki penniighaghaanka.” 16Alla Jesus‑em aaptekaa, “Simon, ighnegha John‑em, piniqsingaa?”
Kiimsiqaa, “Aa‑a Ataneq, liisimakaghpenga piniqegkemken.”
Jesus‑em pikaa, “Aflengakiki penniighenka.” 17Pingayiitkun aaptekaa, “Simon, ighnegha John‑em, piniqsingaa?”
Peter seghleghyukaq, qayughllak Jesus‑em pingayuneng aaptekanga, “Piniqsingaa?” Peter‑em kiimsiqaa, “Ataneq, liisimakan sangwaa qamaglluku. Liisimakaghpenga piniqegkemken.”
Jesus‑em pikaa, “Neghqiki penniighenka. 18Ipa ungipaatamken, nukalpigaaluten elpeneng tafsiluten navek piyukelleghpenun piiquten. Iwernga nanevgaquvek, iiggeten kevegluki, kitum tafsiluten aglaalleqaaten takuyukegkaqenghilkegpenun.” 19Tawaten pilleghmikun Jesus‑em ungipaatnguftaa Peter naten tuquyaghqaatanga, enkaam tuqulleghmikun quulvaghyaghqaa Kiyaghneq. Taagken Jesus‑em pikaa Peter, “Maligtinga.”
Jesus‑llu Ilangallu Maligsaaghta
20Peter‑em qiivluni esghaqaa maligsaaghta Jesus‑em piniqegkaa maligullghii. (Taananguuq maligsaaghta ayaqightekaq Jesus‑kun neghuutnguluteng aaptikaq, “Ataneq, kitum uveghpagunnaqaten?”) 21Peter‑em esghaghluku taana maligsaaghta, aaptekaa Jesus, “Ataneq, ellngangam salleqa?”
22Jesus‑em kiimsiqaa, “Kiyaghtesukumkun kenlanga tagillemnun, agghitkesaghqaqenghitan elpek. Maligtengnginaghnga.”
23Enkaam ugpeqani ungipaq mingitkaq, taana maligsaaghta tuqunaanghinniluku. Iwernga Jesus‑em pimangitaa tuqunaanghinniluku. Whaten pikaaguq, “Kiyaghtesukumkun kenlanga tagillemnun, agghitkesaghqaqenghitan elpek.” 24Ellnganguuq maligsaaghta aapghiiqelghii tamaaken pilleghneng, igaquqaqiillu tamaakut. Liisimakaput aapqii ipanguut.
25Uglaapigtut igaqullghilnguut Jesus‑em pikii. Igaquqaayaqumeng qamaglluteng sumemni entaqun iingunaghmi nuna llivigiinnayaghaa igalghuteghllagnun.
Currently Selected:
John 21: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
