John 19

1Enkaam Pilate‑em qelghutkaa iqitulluku Jesus kagsagmigesqelluku. 2Pilluwaghtet qaghpangllaqaat sikughllugtuqameng avayameng. Aatesluku qaghpa Jesus‑em naasqwakun, esnegrukegtagnengllu atkuyaaqaat. 3Taagken Jesus takuluku legasiighwaatkegkaat, “Hail, Quulvaghamken, Umiilgat Jews‑et!” qasaghtaataqaatlu.

4Pilate‑em aaneqiglluni pikii Jews‑et, “Esghaghteggu, aanutesnaqaqa Jesus elpesinun, liigikesqellusi naalkefikenghitaqa anaggutelleghmeng.” 5Taagken Jesus aanusaqmegteggu qaghpaluni sikughllugmeng, atkuyaaghlunillu esnegrukegtagneng ayuqeftuq. Pilate‑em pikii Jews‑et, “Taanata yuuk! Esghaqaghtegguqun!”

6Chief priest‑etlu, kelengakistetlu Jews‑et esghaghluku Jesus akilghuutkat, “Qaquuraghtestigu! Qaquuraghtestigu!”

Iwernga Pilate‑em pikii, “Elpesineng aghulaqulluku qaquuragteggu, qayughllak whanga naalkefikenghitaqa sameng anaggutelleghmeng.”

7Jews‑et pikaat, “Liilightuusamnni tuqusaghqaaguq, qayughllak Ighneqniluni Kiyaghneghmun pikaaguq.”

8Pilate‑em nagalluki tawaten pilghiit wataqaaghaq alingegkaq. 9Itenqiglluni palace‑mun aaptekaa Jesus, “Naken pinguzin?” Iwernga Jesus‑em kiimsiimangitkaa. 10Pilate‑em aaptekaa, “Aleghqughyunghisingaa? Liisimakenghisiguu itemutesqennayaqemken, nalighmeng qaquuriisqennayaqemken?”

11Jesus‑em kiimsiqaa, “Qeleghnaanghitaten pilluwaghtet qaquuriisqellunga wetkuqun Kiyaghneghem piyukelqegkagu. Enkaam yuuk tagitisteka seghleghqelleghtaaghatuq elpeneng.”

12Kingunganeng taam Pilate‑em itemunnaqutkegkaqsaqanga Jesus, iwernga Jews‑et akilghuukat, “Kina alngunak ellmineng umiilengllalghii, anguyaguuq Caesar‑mun. Itemuskuvgu taana yuuk ilakumtaaqenghitaaten Caesar‑em.”

13Pilate‑em nagalluki taakut akuzitet, aanutestekaa Jesus, Stone Pavement‑mun. (Hebrew‑stun taana ateq Gabbatha‑ngulghii.) Taagken Pilate aqumegkaq nanqigtivigem aqumutaakun. 14(Aghneghem qukaghnaqegkanga Yataaghqillghem Aghneghani Passover‑mun.) Pilate‑em pikii Jews‑et, “Taawa Umiilegsi!”

15Jews‑et akilghuutkat, “Sanguluku, sanguluku, qaquuraghtestigu!”

Pilate‑em aaptekii, “Whangamnun qaquuraghtestesugestegguu umiilegsi?”

Chief priest‑et kiimsiqaat, “Caesar‑nginaghhaaguq umiilegput.”

16Enkaam Pilate‑em pegtekaa Jesus ellngitnun qaquuriisqelluku.

Qaquuraqangat Jesus

17Taagken pilluwaghtet aanutkaat Jesus uyamigtesluku qaquuraa. Aglaatkaat tawavek atilqelghiimun, “Yugem Naasqwan Nenga.” (Taana Hebrew‑stun, Golgotha‑ngulghii.) 18Tawani qaquuraqaat, maalghuklu yugek maligullukek qaquuraqagket. Aallgha aghenqigneghanilluku, ilanga saghumigneghanilluku, Jesus qukaanilluku. 19Pilate‑em igaqestekaqegkanga, Jesus Nazareth‑eghmii, Umiilgat Jews‑et. Taagken nekegtestekaa qaquuraakun Jesus‑em. 20Taana igaqegkaalghii Hebrew‑t, Latin‑et, Greek‑et ulungistun. Uglalghiit Jews‑et atightuqaat, qayughllak qaquuraghviga Jesus‑em qantaghanlenguq Jerusalem‑emeng. 21Jews‑et chief priest‑ngita takuluku Pilate pikaat, “Tawaten igaqsaghqaanghisaghtuq, ‘Umiilgat Jews‑et.’ Whaten igaqsaghqaayaghtuq, ‘Una yuuk pikaaguq, Whanga Umiilkaatnga Jews‑et.’”

22Pilate‑em pikii, “Igaqestekaqa tawatennaqnguuq.”

23Pilluwaghtet tuquuqaasamegteggu Jesus qaquuramun tuguluki aatkii, estamaghqegkiit, ataasikaghtaan tugulaatkat. Ataasik atkuyaaghqek kelungunatek ulimaaghek tuuymegneng kenimegnun.

24Pilluwaghtet pikat, “Taakuk iighwiigkenka ateghtiiraaghusiqeltekek.” Tawaten pilleghmegteggun Akuzitet Igaqegkat apeghiightestekiit whaten pillghit:

“Aatkanka nengiitkaqiit,

enkaam taakuk atkuyaaghegka ateghtiiraaghusiqegkaqagket.”

25Pilluwaghtet tawaten pimaluki, taawanguq estamat aghnat nekevghallghiit qaquram tungangani: Jesus‑em naanga, naanganllu anglegutanga, Mary‑llu Clopas‑em nulighha, Mary‑llu Magdala‑ghmii. 26Jesus‑em esghaqakek naanillu, piniqegkanillu maligsaaghteni nekevghalghiik tawani. Naani pikaa, “Aghnami whani, taana ighneliitan.”

27Taagken maligsaaghteni pikaa, “Taana naaliitan.” Taagken kenlanga maligsaaghtengan aglaatkaa ellmeggnun.

Jesus‑em Tuqullgha

28Taam kingunganeng Jesus‑em liisimakegkaa sangwaa tamaghhaghmi whaa apeghiilghii. Enkaam Akuzitet Igaqegkat apeghiighesqelluki whaten pikaq, “Meqsugtunga.”

29Taawanguq sagneghwaaq quwaalghiimeng wine‑meng imalek. Pilluwaghtet nekeglluku nepsagusiq hyssop‑em unaghsiighwaaghakun, nepluku wine‑mun Jesus‑em qaanghanun nengugutkaat. 30Jesus‑em naasiighluku wine‑a, pikaq, “Taawa apeghiightuq.” Guughtutkelluku taghneghagni pegtekakek.

31Yataaghqivigutanganeng Aghneq, Jews‑et igleghutistengita taakut yugusit qaquurametesunghilkangit, qayughllak unaamingani Sabbath‑ngumaghmi, Passover‑emllu aghneqegkanga. Enkaam Pilate‑mun qelghutesqegkiit pilluwaghtenun ayemqiisqelluki ighungit tuquragkiighesqelluki, iqinnaluki qaquuriitneng. 32Taagken pilluwaghtet takuluku sivuliq yuuk, ayemquqagket ighukek, aallghanllu ighukek ayemquqagket. Taakuk qaquuraqaqegkegket maligullukek Jesus‑mun. 33Jesus‑em ighukek ayemsimangilkegket qayughllak takuyaqmegteggu tuqungwaaghluni ayuqeftuq. 34Iwernga ataasim pilluwaghtem panamineng kenuqaqaa Jesus saningakun. Tawaninginaq aakwlu meqlu maaqegkak. 35(Esghapakam tamaaken aapghii tamaakut. Akuzitkegkii ipanguut, liisimakuqlu ungipaqngwaa ipapilleq. Aapghii tamaakut elpesillu ugpeghesqellusi.) 36Tamaakut apeghiiqaagut Akuzitet Igaqegkat apeghiighesqelluki:

“Talwa ataasiq neghqwaagha ayemyaghqaanghituq.”

37Whatenllu Akuzitet Igaqegkat pikaagut,

“Esghapaglleqaat panakaghteng.”

Jesus Lliifqangat

38Taam kingunganeng yugem Arimathea‑ghmiim, aatqelghiim Joseph‑meng, Jesus‑em yugusii aghulaqutkaa Pilate‑em angeghyagu. (Joseph maligsaaghtekegkanga Jesus‑em, iwernga aksaqluku pikaalghii alingluni Jews‑et igleghutistengitneng.) 39Nicodemus‑em maligtekaa Joseph, kelqelluni tepengllaasimeng 100 pounds, myrrh‑enkugneng, aloes‑enkugneng akumutngalghiigneng. (Taana Nicodemus sivunghani Jesus‑mun pikaalghii unugmi.) 40Taakuk yugek aghulaqulluku Jesus‑em yugusii tepengllaghqumaan iimgutkaak qiipaghaghqun. (Tawaten Jews‑et lliivghaqegkangit yuget tuqukat.) 41Jesus‑em qaquuraghvigan tungangani taawanguq garden‑a uqfigtuqaq. Tawanteftuq nutaghaghlluk lliveq, salin lliveghvikellghilnguq. 42Taayughqengngulghiik qayughllak Jews‑et Yataaghqefikegkangat Aghneq taana, enkaam taaggun qantaghanlengughqun lliifqaak.

Currently Selected:

John 19: ess

Highlight

Copy