Lucas 1

Lucasba Teofilomaa b̶ʉ urubʉid̶a

1Dachi Akõreba dachi tãed̶e waud̶a ʉ̃rʉbena, ẽbẽrarã ãreaba kartad̶e b̶ʉd̶ai kʉ̃riasid̶au. 2Joma mau waud̶a unuped̶aad̶aba nebʉrʉsid̶au maud̶e jaradeasid̶au. Maabae chi karta b̶ʉped̶aad̶aba mau b̶ʉsid̶au. 3Mʉʉba biꞌia ichiasii chi b̶ʉped̶aad̶a maud̶e chi nebʉrʉped̶aad̶a biꞌia kuitaasii. Maabae mau kʉ̃risiaped̶a, mʉʉba nau b̶ʉmaa b̶uu, bichi baita chi mechiu nii Teófilo. 4Maka bichiba kuitaai bichimaa jaradeaped̶aad̶a chi biawãra.

Juan chi Boro Eabarii adaui kuitaabid̶a ʉ̃rʉbena

5Herodes Judea druad̶ebena rey basiid̶e paare Zacarías abachid̶au b̶uasii.#1:5 Herodes. Mau Herodes «chi Mechiu nii» abachid̶au. Mau Zacarías paarerã ichi baarabena trajabadaurã basii Abías abachid̶aud̶ebenarã.#1:5 Abías. Abías nabẽraed̶ebena paare basii. 1 Crónicas 24:10. Chi wẽra Elisabet Aarond̶ebena need̶a basii. 6Ãchi omea Dachi Akõre daad̶e jipa panasid̶au. Dachi Mechiuba waubii jarad̶a joma wau panuud̶eeba kachirua jarad̶ayuswãe panasid̶au. 7Maamina Elisabet warr baraakau basiid̶eeba warrwãe nibasid̶au. Maud̶e mau awara ãrea chõra panasid̶au.

8Maka panuud̶e Zacarías Dachi Akõre de mechiud̶e trajai b̶uu ewari neesii. Maud̶eeba ichi maud̶e waabena paarerã ichi baara trajabadaurã Dachi Akõre daad̶e trajamaa panasid̶au. 9Maud̶e paarerãba waubadau kĩra ne jemenesid̶au kuitaad̶ayua kai wãi b̶uu Dachi Mechiu de mechiud̶e ed̶a ne tuwaa baai baita. Maabae Zacariasmaa b̶aesii.

10Ne tuwaa baa deai hora neesiid̶eeba Zacarías ed̶a wãsii.#1:10 Ne tuwaa baa deai hora. Éxodo 30:34-38. Maud̶e ẽbẽrarã ãrea awara Dachi Akõremaa ʉtaa id̶imaa panasid̶au. 11Maka b̶uud̶e Dachi Mechiud̶e ángel ne tuwaa baa deabadau jua biare unubisii. 12Mau unusiid̶e Zacarías ãrea peraped̶a kãare kʉ̃risiai adua basii. 13Maamina chi angelba jarasii:

—Wapearã́se. Bichiba Dachi Akõremaa ʉtaa id̶i b̶uad̶a ichiba ũrisii. Bichi wẽra Elisabetba warr adaui. Mau trʉ̃ Juan b̶use. 14-15Mau warr kakua ãrea kĩrajʉʉd̶ai. Mau Dachi Mechiu daad̶e chi mechiu baid̶eeba bichi sid̶a ãrea kĩrajʉʉ b̶uai. Uva b̶aa orekea maud̶e itua dokau b̶uai. Warr adaui naed̶e, Dachi Akõre Jauri ichi baara b̶uai.#Números 6:1-5; Jueces 13:2-5. 16Ichiba ãrea israeld̶ebenarã Dachi Akõre Mechiumaa waya neebiai. 17Eliasba uru b̶uad̶a jauri maud̶e chi poyaabarii bichi warrba uru b̶uai. Maud̶eeba ichi Dachi Mechiu naa wãi chi akõrerã ãchi warrarã baara waya kĩrajʉʉ panabiai baita.#Malaquías 4:5-6. Mau awara chi ijãad̶akau nuree sid̶a aid̶ai, jipa nureerãba kʉ̃risiabadau kĩra kʉ̃risiad̶amera. Maka aid̶ai puurud̶ebenarãba Dachi Mechiu biꞌia irsibid̶amera.

18Maud̶e Zacariasba chi angelmaa id̶isii:

—¿Mʉʉba saka kuitaima bichiba biawãra jara b̶uu? Mʉ ãrea chõra b̶uu. Mʉ wẽra sid̶a chõodraa b̶uu.

19Chi angelba Zacariasmaa jarasii:

—Mʉ Gabrielbʉ, Dachi Akõreba jarad̶a waubarii. Ichiba mʉ bichimaa bʉisii mau bed̶ea bia jaramera. 20Mʉʉba jara b̶uu Dachi Akõreba b̶ʉd̶a ewarid̶e biawãra makai. Maamina ijãabasiid̶eeba bichi bosara b̶eei ab̶a bichi wẽra warr adauruud̶aa.

21Maumisa ẽbẽrarãba awara esed̶au panasid̶au. Ãchiba kuitaad̶aabasii sakãe Zacarías de mechiud̶e ed̶a ãrea kãꞌãa b̶uu. 22Maka b̶uud̶e ichi awara neesiid̶e poyaa berreabasii. Bosara b̶eesiid̶eeba ichi juaburu jua su jara b̶uasii. Mauba ẽbẽrarãba kuitaasid̶au Dachi Akõreba jãumaa ne unubisii.

23Mau Dachi Akõre de mechiud̶e trajai ewari bad̶akare, Zacarías deed̶aa wãsii. 24Mau maad̶akare ichi wẽra Elisabet warr baraa b̶eesii. Maud̶eeba Elisabet 5 jed̶ako deed̶a b̶eesii. Naka kʉ̃risiasii: 25«Dachi Mechiuba mʉ aid̶asii warr baraa b̶eemera. Jãka bia waud̶aba mʉ kĩrakaya wãꞌãebisii. Ẽbẽrarãba mʉ ʉ̃rʉbena waa kachirua jarad̶aabai».

Angelba Mariamaa jarad̶a

26-27Elisabet warr baraa b̶eed̶a jed̶ako 6 bad̶akare, Dachi Akõreba ángel Gabriel Galilea druad̶e Nazaret puurud̶aa bʉisii ãwera mukĩra chaawẽa nii Mariamaa. Mau María José ome bed̶ea dea panasid̶au miakãid̶ayu. José Davidd̶ebena need̶a basii. 28Mau ángel Mariamaa neeped̶a naka jarasii:

—¡María! Dachi Mechiuba bichi biꞌia unu b̶uu.#1:28 Dachi Mechiuba bichi biꞌia unu b̶uu. Griego bed̶ead̶e chi b̶ee kartad̶e naka b̶ʉ kub̶uu: Dachi Akõreba bichi waabena wẽrarã audeara biꞌia unu b̶uu. Ichi bichi ome b̶uu.

29Mau bed̶ea ũrisiid̶e Mariaba kãare kʉ̃risiai adua basii sakãe nau angelba maka berrea b̶uu. 30Maud̶e chi angelba ichimaa jarasii:

—María, wapearã́se; Dachi Akõreba bichi aid̶a b̶uu. 31Maud̶eeba bichi warr baraaped̶a warr adaui. Mau warr trʉ̃ Jesús b̶use.#Mateo 1:21. 32Mau chi mechiu bai maud̶e Dachi Akõre mechiuba ichi Warr ai. Dachi Akõre ichi israeld̶ebenarã mechiu b̶ui ichi nabẽraed̶e David b̶uad̶a kĩra. 33Ichi Jacobd̶ebena imiped̶aad̶arã chi mechiu b̶uai. Ewaricha ichid̶irã ichi juad̶e ua b̶uai.#2 Samuel 7:8,16.

34Maud̶e Mariaba chi angelmaa id̶isii:

—Mukĩra ome kãi b̶eewẽa b̶uud̶e ¿mʉ saka warr baraaima?

35Mau angelba panausii:

—Dachi Akõre Jauri bichimaa neeped̶a chi poyaabarii bichi baara b̶uai.#1:35 Bichi baara b̶uai. Griego bed̶ead̶e naka b̶ʉ kub̶uu: Ichi Jauri bichimaa neei, jʉ̃rʉara kĩra. Maud̶eeba ichiba dea b̶uu warr bichiba adauruu Dachi Akõreba ichi Warr ai. 36Bichi niu Elisabet sid̶a warr adaui. Chõodraa b̶umina maud̶e warr adaukau abachid̶amina, warr baraad̶a jed̶ako 6 basii. 37Dachi Akõre baita poyaa waubai wãꞌãe.

38Mariaba panausii:

—Mʉ Dachi Mechiu baita bari trajabariibʉ. Biꞌia b̶uu bichiba jarad̶a kĩra mauba waui.

Maabae chi ángel wãsii.

Mariaba Elisabet ichiad̶e wãd̶a

39Mau maad̶akare María isa Elisabet puurud̶aa wãsii. Mau puuru Judea drua ea id̶aa b̶uud̶e b̶uu. 40Aria Zacarías ded̶e ed̶a wãped̶a Elizabetmaa jarasii:

—¡Ãjãa!

41Elisabetba María bed̶ea ũriiruud̶e ichi warr b̶ited̶e b̶uu miipasii. Ara makʉd̶e Elisabet Dachi Akõre Jaurid̶e b̶eesii. 42Maud̶e Mariamaa naka jĩwa jarasii:

—Bichi biawãra waabena wẽrarã audeara Dachi Akõreba biꞌia aid̶a b̶uu, maud̶e bichi warr Dachi Akõreba biꞌia aid̶a b̶uai. 43¿Mʉ kaima, mʉ Mechiu naweba naka ichiad̶e neesma? 44Biawãra bichi bed̶ea ũriiruud̶e warr mʉ b̶id̶e b̶uu kĩrajʉʉba miipasii. 45Dachi Mechiuba jarad̶a biawãra makai ijãad̶ad̶eeba bichi ãrea bia b̶uu.

46Maud̶e Mariaba jarasii:

«Sõd̶eeba mʉʉba jaraaruu: Dachi Akõre chi Mechiubʉ.#1 Samuel 2:1-10; Salmos 113:5-9.

47Mʉ ãrea kĩrajʉʉ b̶uu Dachi Akõre ome, mʉ karibabarii.

48-49Ichiba mʉ chi ichi baita bari trajabarii miichuburi nii biꞌia uru b̶uu.

Id̶iid̶eeba jomaurãba jarad̶ai Dachi Akõre joma poyaa b̶uuba mʉ ãrea aid̶a b̶uu, mʉ baita ne mechiu wau b̶uud̶eeba.

¡Ab̶a ichi Dachi Akõrebʉ!

50Maud̶eeba ichi wapea nuree ewaricha kĩra chuburia b̶uabarii.

51Dachi Akõreba ichi poyaad̶eeba ne waib̶ʉa waukuasii.

Ara ãchi du ab̶a chi mechiu kʉ̃risia b̶eerã ichiba jĩichoabiasii.

52Chi mechiu b̶ead̶a ãyaa duanuped̶a chi kaebeu b̶ee chi mechiu duanusii.

53Chi nejarr barauwãe nureerãmaa ne bia joma deasii, maamina chi nejarra barau nuree ãyaa jua bari wãbiakuasii.

54-55Chi ichi baita bari trajabarii Israel puuru karibasii. Ichiba Abraham maud̶e ichid̶ebena needuurã ewaricha kĩra chuburiasii dachi nabẽraed̶ebenarãmaa jarad̶a kĩra».

56María Elisabet ded̶e jed̶ako õbea b̶uaped̶a waya ichi deed̶aa wãsii.

Juan chi Boro Eabarii adaud̶a

57Chi ewari neesiid̶e Elisabet warr adausii. 58Ichi de jãkaa panabadauba maud̶e chi ded̶ebenarã bid̶a mau ũrisid̶aud̶e ichi ome kĩrajʉʉsid̶au Dachi Mechiuba ãrea kĩra chuburiasiid̶eeba.

59Warr adaud̶a 8 ewari baaruud̶e mau adoesid̶au chi wãwa chi mukĩra kakua tõod̶ai baita.#Génesis 17:10-12. Maud̶e waabenarãba ichi akõre trʉ̃ kĩra Zacarías trʉ̃ad̶ai kʉ̃ria panasid̶au. 60Maamina chi naweba jarasii:

—Maka trʉ̃ad̶aabai b̶uu, maumaarã jãu Juan trʉ̃ad̶ai.

61Ãchiba jarasid̶au:

—¿Sakãe mau trʉ̃ b̶ud̶aima? Machi ded̶ebenarãd̶e mau trʉ̃ wãꞌãe.

62Maabae chi akõre Zacariasmaa juad̶eeba id̶isid̶au kuitaad̶ayua kãare trʉ̃ b̶u kʉ̃ria b̶uu. 63Maud̶eeba Zacariasba bakuru peed̶ea eneebisii. Maud̶e naka b̶ʉsii: «Jãu trʉ̃ Juan b̶ud̶ai».

Mau unusid̶aud̶e jomaurãba kãare kauwa kuitaad̶ai adua panasii. 64Ara makʉd̶e Zacarías bosara b̶uad̶a waya berreasii maud̶e Dachi Akõremaa biꞌia berreasii.

65Joma ãchi de jãkaa panabadauba mau ʉ̃rʉbena ũrisid̶aud̶e Dachi Akõre wapea panuuba joma Judea drua ea id̶aa b̶uud̶e nebʉrʉbachid̶au. 66Joma mau ũriped̶aad̶aba jarabachid̶au: «Maka b̶uaibʉrã, mau warr chi mechiu bai». Maka jarasid̶au Dachi Mechiu juaba chi warr nubariid̶eeba.

67Maabae chi Juan akõre Zacariasba Dachi Akõre Jaurid̶eeba naka berreasii:

68«¡Dachi Mechiu ãrea biꞌia nii, Dachi Akõre Israeld̶ebenarãd̶e, ichi ẽbẽrarã karibayua neesiid̶eeba!

69Chi ichi baita bari trajabarii Davidd̶ebena need̶a bʉisii Dachi Karibabarii poyaabarii bamera.#2 Samuel 7:12-13; Salmos 132:17.

70Naed̶e Dachi Akõreba ichi baita berreabadaurãmaa mau ʉ̃rʉbena jarabisii.

71Ichiba jarabisii joma dachi kĩramaa panabadau maud̶e dachi unuamaa panabadau juad̶ebena karibai.

72Maka waui dachi nabẽraed̶ebenarãmaa kĩra chuburiai ad̶ad̶eeba

maud̶e ãchi ome bed̶ea dead̶a joma waui ad̶ad̶eeba.

73-74Ichiba dachi nabẽraed̶ebena Abrahammaa jarasii dachi chi kĩramaa panabadau jua chaaread̶ebena karibai.

Maka wapeawẽa dachiba ichi baita poyaa ne wau panad̶ai.

75Dachi chokae panuumisa ichi daad̶e biꞌia jipa nibad̶ai».

76Maabae Zacariasba ichi warr ʉ̃rʉbena naka jarasii:

«Warr, bichi Dachi Akõre chi mechiu nii baita berreabarii ad̶ai. Bichi Dachi Mechiu naa wãi ichi o jarei baita.#Malaquías 3:1.

77Bichiba israeld̶ebenarãmaa kuitaabiai saka Dachi Akõreba ãchi kachirua perdonai aped̶a karibai.

78Ichiba dachi ãrea kĩra chuburia b̶uud̶eeba, ʉmada neebarii kĩra Dachi Karibabarii bajãad̶ebena neei.

79Mauba chi pãriud̶e nureerãmaa, chi biud̶ai wapea nureerãmaa bid̶a Dachi Akõreba ichi ʉ̃d̶aa kuitaabiai.

Maud̶e dachimaa kuitaabiai saka ichi od̶e jirukaraayuwãe nibad̶ayu».

80Chi warr warisii maud̶e Dachi Akõre Jaurid̶eeba meserãa b̶eesii. Kũudrãa bad̶akare drua sirua wãꞌãe b̶uud̶e b̶uad̶e wãsii. Aria b̶uabachii ab̶a Israel puurud̶ebenarã daad̶e berrearuu ewarid̶aa.

Currently Selected:

Lucas 1: cmi

Highlight

Copy