Juan 5

Jesusba bari panabadau ewarid̶e b̶akara bʉʉ nii aribiabid̶a

1Mau maad̶akare Jesús Jerusalend̶aa wãsii, aria judiorãba bari panabadau ewari waumaa panasid̶aud̶eeba. 2Jerusalén puurud̶e ẽbẽrarã kuibadau wauped̶aad̶a nub̶uasii. Hebreo bed̶ead̶e Betzatá abadau.#5:2 Betzatá. Griego bed̶ead̶e ãrea kartad̶e naka b̶ʉ kub̶uu: Betesda maebʉrã Betsaida. Mau kuibadau puurud̶e ed̶a wãbadau Oeja abadau kaita b̶uu. Chi kuibadau jãkaa de cheke jua ab̶a kob̶easii. 3Aria jeed̶a ẽpermo nuree, dau pãriu nuree, jʉ̃rʉ nʉka nuree maud̶e b̶akara bʉʉ nuree ãrea baraasii. [Ãchiba chi bania miipaaruu esed̶au panasid̶au. 4B̶esed̶e Dachi Mechiu angelba mau bania miipa neebachii. Makaaruud̶e chi naa mau baniad̶e ed̶a wãaruu chi ẽpermo b̶uad̶a aribiabachii.]#5:3-4 Griego bed̶ead̶e chi b̶ee kartad̶e bed̶ea corcheted̶e b̶uu wãꞌãe. 5Maud̶e ẽbẽra ab̶a 38 año ba b̶uasii ẽpermo b̶uu. 6Jesusba mau ẽbẽra jeed̶a b̶uu unusiid̶e kuitaasii chi mau aria maka b̶uu ãrea ba b̶uasii. Maud̶eeba ichimaa id̶isii:

—¿Bichi aribiai kʉ̃ria b̶uka?

7Maabae chi ẽpermo b̶uuba panausii:

—Maerã, maamina chi bania miipaaruud̶e kaiba mʉ doed̶a adooi wãꞌãe nii. Mʉ ed̶a wãi chaaruud̶e ab̶a mʉ naed̶e ed̶a wãbarii.

8Jesusba jarasii:

—Jiraduse. Chi bichi jira adoebadau adauped̶a deed̶aa wãse.

9Ara makʉd̶e chi ẽbẽra aribiasii. Ichi jira adoebadau adauped̶a nibad̶easii. Maamina mau ewari bari panabadau ewari basii. 10Maud̶eeba judiorã mechiurãba chi ẽbẽra aribiad̶amaa jarasid̶au:

—Id̶i bari panabadau ewarid̶eeba bichi jira adoebadau adoebai b̶uu.

11Maud̶e ichiba panausii:

—Maamina chi mʉ aribiabid̶aba jarasii: “Bichi jira adoebadau adoeped̶a wãse”.

12Ãchiba id̶isid̶au:

—¿Kaiba bichimaa maka bichi jira adoebadau adoeped̶a wãs asma?

13Maamina mau adua b̶uasii. Jesús ẽbẽrarã ãrea tãed̶e b̶uad̶a ãyaa wãsiid̶eeba ichiba poyaa unuubasii.

14Mau maad̶akare Jesusba ichi Dachi Akõre de mechiu dud̶a unusiid̶e jarasii:

—Biꞌia ũrise: bichi aribiasiid̶eeba waa kachirua waurã́se bichi ẽpermo b̶uad̶a audeara kachirua b̶eerãamera.

15Mau maad̶akare chi ẽbẽra judiorã mechiurãmaa wãped̶a jarakuasii chi ichi aribiabid̶a Jesús basii. 16Maad̶akare paare mechiurãba Jesús ʉ̃rʉbena kachirua jara paneesid̶au mau ẽbẽra bari panabadau ewarid̶e aribiabisiid̶eeba.#5:16 Griego bed̶ead̶e chi b̶ee kartad̶e nau sid̶a b̶ʉ kub̶uu: bea kʉ̃ria panasid̶au. 17Maamina Jesusba ãchimaa jarasii:

—Mʉ Chacha wabid̶a kʉrrjĩruwẽa ẽbẽrarã kariba b̶uu maud̶e mʉa bid̶a kʉrrjĩruwẽa kariba b̶uu.

18Maud̶eeba judiorã mechiurãba ichi aude bead̶ai kʉ̃ria paneesid̶au. Ichiba bari panabadau ewarid̶e ẽbẽrarãba ne poyaa waud̶akau waud̶a kʉ̃riad̶aabasii. Mau awara mʉ Chacha ad̶a kakua aude kʉ̃riad̶aabasii, ara ichi Dachi Akõre asiid̶eeba.

Dachi Akõreba poyaabarii ichi Warrmaa dead̶a ʉ̃rʉbena

19Maabae Jesusba ãchimaa jarasii: «Mʉʉba biawãra jaraaruu: mʉ, Dachi Akõre Warrba ara mʉ du ab̶auba poyaa waubai. Maamina mʉʉba unu b̶uu mʉ Chachaba wau b̶uu. Joma mʉ Chachaba wau b̶uu mʉa bid̶a wau b̶uu. 20Mʉ Chachaba mʉ kʉ̃ria b̶uu. Maud̶eeba joma ichiba wau b̶uu mʉʉmaa unubibarii. Mau awara ichiba nau ẽbẽrarãba ne poyaa waud̶akau waud̶a audeara mechia b̶uu unubiai. Maud̶eeba machi kãare kʉ̃risiad̶ai adua panad̶ai. 21Mʉ Chachaba biud̶arã chokae jiradubiaped̶a chokae duanubiabarii kĩra, maka mʉ chi Warrba chi mʉʉba kʉ̃riakuaruu chokae duanubiabarii. 22Mʉ Chachaba ab̶aumaa bid̶a ichiabai. Maumaarã mʉ b̶usii jomaurã ichiamera. 23Maka jomaurãba mʉ Chacha wapea panuu kĩra mʉ sid̶a wapead̶ai. Chi mʉ wapeawẽa b̶uuba mʉ Chacha sid̶a wapeawẽa b̶uu, mʉ Chachaba mʉ nau iujãad̶aa bʉisiid̶eeba.

24»Mʉʉba biawãra jaraaruu: barikiuba mʉ bed̶ea ũriped̶a mʉ bʉid̶a ijãaruubʉrã, mau ẽbẽra mau ome ewaricha chokae b̶uai. Dachi Akõreba mau ichiabai. Biawãra mau ẽbẽra biu b̶uad̶a chokae b̶uu. 25Mʉʉba biawãra jaraaruu: chi ewari neei b̶uad̶a jãabae neesii. Id̶iid̶eeba biud̶a kĩra nureeba mʉ, Dachi Akõre Warr bed̶ea ũrid̶ai. Chi mʉʉd̶e ijãaduu chokae panad̶ai. 26Mʉ Chacha chokae b̶uabarii kĩra, mʉʉba mau chokae b̶uai deabarii ichiba mʉʉmaa deasiid̶eeba. 27Mau awara mʉ b̶usii jomaurã ichiamera, mʉ chi Ẽbẽra Ba B̶uad̶a niid̶eeba.#Daniel 7:13-14. 28Mʉʉba jara b̶uu kakua kʉ̃riskawarã́sturu. Biawãra ewari ab̶ad̶e jomaurã biud̶arãba mʉ, chi Ẽbẽra Ba B̶uad̶a bed̶ea ũriiduud̶e, 29maud̶e jomaurã chokae jiradud̶ai. Chi ne biꞌia wau nuread̶a chokae jiradud̶ai mʉ baara ewaricha chokae nuread̶ai baita, maamina chi kachirua waubadaurã chokae jiradud̶ai mʉʉba ãchi kastikamera.

30»Mʉ du ab̶auba ne ab̶a bid̶a poyaa waubai b̶uu. Mʉʉba ẽbẽra nebʉra ichiabarii mʉ Chachaba jara b̶uu kĩra. Mʉʉba jipa ichiabarii. Mʉʉba kʉ̃ria b̶uu kĩra waukau maumaarã mʉ Chacha, chi mʉ bʉid̶aba kʉ̃ria b̶uu kĩra waubarii.

¿Kaiba Jesús ʉ̃rʉbena bia berreabadau?

31»Mʉʉba jara b̶uu biawãramina ara mʉ ʉ̃rʉbena berrea b̶uud̶eeba, machimaarã mau biawãrawãe b̶uu.#Deuteronomio 19:15. 32Maamina mʉ Chachaba mʉ ʉ̃rʉbena berrea b̶uu.#5:32 Griego bed̶ead̶e b̶ʉ kub̶uu: ab̶auba mʉ ʉ̃rʉbena berrea b̶uu. Mʉʉba kuitaa b̶uu ichiba jara b̶uu biawãra b̶uu. 33Machiba ẽbẽrarã Juan chi Boro Eabariimaa bʉisid̶au mʉ ʉ̃rʉbena id̶id̶amera. Maud̶e ichiba jarad̶a biawãra basii.#Juan 1:19-34. 34Mʉʉba jʉrʉwẽa b̶uu ẽbẽraba mʉ ʉ̃rʉbena berreamera. Maamina Juanba mʉ ʉ̃rʉbena jarad̶a mʉa bid̶a machimaa jara b̶uu karibad̶amera. 35Juan ʉ̃d̶aa koabarii kĩra nibasii. Machi ichi ʉ̃d̶aad̶e kĩrajʉʉ panasid̶au ichi machi baara ãrea b̶uabasmina.

36»Maamina Juanba jarad̶a audeara nau mʉ ʉ̃rʉbena biꞌia berrea b̶uu: Mʉ Chachaba waubi b̶uu mʉʉba joma wau b̶uud̶eeba kuitaabi b̶uu mʉ Chachaba mʉ biawãra bʉisii. 37Biawãra mʉ Chachaba, mʉ bʉid̶aba mʉ ʉ̃rʉbena berrea b̶uu. Maamina machiba ichi bed̶ea ũrid̶akau#Éxodo 33:11. maud̶e ichi unud̶akau.#Éxodo 19:9. 38Maud̶e ichi bed̶ea machi sõd̶e uru panuuwãe,#Josué 1:8-9. mʉ, chi ichiba bʉid̶a ijãad̶akaud̶eeba. 39Machiba Dachi Akõre bed̶ea kauwa ichiabadau kʉ̃risia panuud̶eeba Dachi Akõre ome ewaricha chokae nuread̶ai. ¡Mau kartad̶e mʉ ʉ̃rʉbena berrea b̶uu! 40Maamina machi mʉʉmaa need̶ai, kʉ̃riad̶akau, mʉʉba chokae panabiamera.

41»Mʉʉba jʉrʉwẽa b̶uu machiba mʉ biꞌia unud̶amera. 42Mau awara mʉʉba machi unubarii. Kuitaa b̶uu machiba Dachi Akõre kʉ̃riad̶akau. 43Mʉ Chacha trʉ̃d̶eeba neesii, maamina mʉ biꞌia irsibisid̶au. Maamina ab̶a ara ichi trʉ̃d̶eeba neeruubʉrã, mau biꞌia irsibibachid̶au. 44¿Saka mʉʉd̶e ijãad̶aima? Ab̶aburu kʉ̃ria panuu waabenarãba machi biꞌia unud̶ai. Maamina machiba jʉrʉd̶awẽe Dachi Akõre ab̶a niiba machi biꞌia unui.

45»Kʉ̃risiarã́sturu mʉ Chacha daad̶e mʉʉba machi jideai. Machiba Moisesd̶eeba biꞌia panad̶ai esed̶au panuu. Maamina ara mau Moisesba mʉ Chacha daad̶e machi jideai. 46Machiba Moisesba jarad̶a biawãra ijãaduubʉrã mʉʉd̶e ijãad̶ai basii, Moisesba mʉ ʉ̃rʉbena Dachi Akõre bed̶ead̶e b̶ʉsiid̶eeba.#5:46 Biawãra joma Dachi Akõre nabẽraed̶ebena kartad̶e Jesús ʉ̃rʉbena b̶ʉ kub̶uu. Deuteronomio 18:15-19. 47Maamina Moisesba b̶ʉd̶a sid̶a ijãad̶awẽebʉrã ¿saka mʉ bed̶ea ijãad̶aima?»

Currently Selected:

Juan 5: cmi

Highlight

Copy