Juan 16

1»Mʉʉba joma mau machimaa jara b̶uu mʉʉd̶e ijãa panuu ida b̶urãad̶amera. 2Judiorãba machi ãchi judiorã araa ãbua imibadau ded̶ebena duabʉikad̶ai. Mau awara machi bead̶ai ewari neei. Machi beaduud̶e ãchiba kʉ̃risiad̶ai “Dachi Akõreba kʉ̃ria b̶uu wau panuu”. 3Maka waud̶ai mʉ Chacha maud̶e mʉ unud̶akaud̶eeba. 4Maamina mʉʉba joma mau machimaa jarakuaruu, mau ewari neeruud̶e mʉʉba jarad̶a kĩrabad̶aped̶a perawẽa nuread̶amera.

Dachi Akõre Jauriba wau b̶uu ʉ̃rʉbena

»Mʉʉba naed̶e machimaa mau jaraabasii, machi baara b̶uasiid̶eeba. 5Maamina mʉ, chi mʉ bʉid̶amaa wãi. Maamina ab̶a machid̶ebenaba mau ʉ̃rʉbena mʉʉmaa id̶iwẽa b̶uu. 6Maumaarã machi kĩra nomaa panuu mʉ wãaruu asiid̶eeba. 7Mʉʉba biawãra jaraaruu: machi baita biꞌia b̶uu mʉ wãi. Mʉ wãwẽebʉrã machi Aid̶abarii neebai. Maamina mʉ wãaruubʉrã chi mau machimaa bʉii. 8Dachi Akõre Jauri neeruud̶e nau iujãad̶ebenarãmaa kuitaabiai kai chi kachirua waubarii, kai chi jipa nii maud̶e kai nebʉra wauped̶a nii. Kuitaabiai ãchiba joma mau arakʉd̶e kʉ̃risiad̶awẽa panuu. 9Dachi Akõre Jauriba ãchimaa kuitaabiai mʉ bed̶ea ijãad̶akaud̶eeba kachirua waubadau. 10Kuitaabiai mʉ jipa nii mʉ Chachamaa wãaruud̶eeba. Maud̶e machiba mʉ makaa unud̶aabai. 11Maud̶e Dachi Akõre Jauriba kuitaabiai nau iujãad̶ebenarã nebʉrad̶e panuu, Dachi Akõreba nau iujãad̶ebena rey nebʉra bara b̶uu asiid̶eeba.#Juan 7:21-24; 8:42-47; 12:31.

12»Mʉʉba wabid̶a ne ãrea machimaa jara kʉ̃ria b̶uu. Mau machiba anakʉd̶e joma poyaa kauwa ũrid̶aabai. 13Maamina Dachi Akõre Jauriba biawãra bed̶ea kuitaabiabariid̶eeba ichi neeruud̶e machimaa jaradeai chi biawãra bed̶ea Dachi Akõred̶eeba nee b̶uu joma kuitaad̶amera. Ara ichi kʉ̃risiad̶eeba berreabai, maumaarã joma mʉʉd̶ebena ũriiruu jarai. Ichiba machimaa kuitaabiai chi neei ewarid̶e kãare sakai. 14Kuitaabiai mʉ chi mechiu nii, mʉ bed̶ea ũriped̶a joma machimaa jaraaruud̶eeba. 15Joma mʉ Chachad̶e mʉʉd̶ebʉ. Maud̶eeba mʉʉba jarasii Dachi Akõre Jauriba mʉ bed̶ea ũriped̶a machimaa jaradeai.

Machi kĩra nomaa panaped̶a kĩrajʉʉd̶ai

16»Kãꞌãabariwãed̶e machiba mʉ makaa unud̶aabai, maamina nau maad̶akare waya kãꞌãabariwãed̶e mʉ unud̶ai.#16:16 Griego bed̶ead̶e chi b̶ee kartad̶e b̶ʉ kub̶uu: mʉ Chachamaa wãid̶eeba.

17Maud̶e waabenarã ichi baara nibabadaurãba ãchi chiya id̶isid̶au:

—¿Mau kãare jara b̶uma: “Kãꞌãabariwãed̶e machiba mʉ makaa unud̶aabai. Maamina mau maad̶akare waya kãꞌãabariwãed̶e mʉ unud̶ai, mʉ Chachamaa wãid̶eeba?”

18Mau bed̶ea “kãꞌãabariwãed̶e” a b̶uuba ¿kãare jara b̶uma? Dachiba adua panuu kãare ʉ̃rʉbena berrea b̶uu.

19Jesusba kuitaasii ãchiba mau ʉ̃rʉbena id̶i kʉ̃ria panuu. Maud̶eeba jarasii:

—Mʉʉba machimaa jarasii kãꞌãabariwãed̶e mʉ unud̶aabai maamina nau maad̶akare waya kãꞌãabariwãed̶e mʉ unud̶ai. ¿Mau ʉ̃rʉbena machi chiya id̶i panuuwãeka?

20Mʉʉba biawãra jaraaruu: nau iujãad̶ebenarã kĩrajʉʉduumisa, machi kĩra nomaaba jẽad̶ai. Machi kĩra nomaaba panad̶ai, maamina mau kĩra nomaa wãꞌãed̶akare kĩrajʉʉd̶ai. 21Biawãra wẽraba warr adauruud̶e b̶i pirabarii ichi ewari neesiid̶eeba. Maamina warr adaud̶akare mau puaba waa kĩrabakau ichi warr kakua kĩrajʉʉ b̶uud̶eeba. 22Ara mau kĩra machi jãabae kĩra nomaa panuu, maamina mʉ waya machi ichiad̶e neei. Maabae machi kĩrajʉʉd̶ai. Ab̶au bid̶a mau kĩrajʉʉ poyaa wãꞌãebiibai.

23Mau ewarid̶e machi ab̶au bid̶a mʉʉmaa waa id̶id̶aabai. Mʉʉba biawãra jaraaruu: machiba mʉ Chachamaa mʉ trʉ̃d̶eeba id̶iiduu ichiba deai. 24Machiba wabid̶a Dachi Akõremaa ab̶au bid̶a mʉ trʉ̃d̶eeba id̶id̶awẽa panuu. Maamina maka id̶iiduubʉrã adaud̶ai. Maka machi ãrea kĩrajʉʉ nuread̶ai.

25»Mʉʉba ne jara b̶uud̶eeba mau machimaa jarasii, maamina ewari ab̶a mʉ waa nebʉrʉ b̶uud̶eeba berreabai. Maumaarã mʉ Chacha ʉ̃rʉbena arakʉd̶e jarai. 26Mau ewarid̶e machiba mʉ trʉ̃d̶eeba Dachi Akõremaa id̶id̶ai. Mʉ machi baita Dachi Akõremaa ne id̶iibai, 27mʉ Chachaba machi kʉ̃ria b̶uud̶eeba. Ichiba machi kʉ̃ria b̶uu, mʉ kʉ̃ria panuud̶eeba maud̶e mʉ Dachi Akõred̶ebena need̶a ijãa panuud̶eeba. 28Mʉ Chacha b̶uumarebena nau iujãad̶aa neesii. Maamina mʉʉba nau iujãa b̶ʉi mʉ Chachamaa waya wãi baita.

29Maabae ichi baara nibabadaurãba jarasid̶au:

—Ʉ̃raburu bichiba jara b̶uu dai baita arakʉd̶e ũri panuu. Nebʉrʉ b̶uud̶eeba berrea b̶uuwãe. 30Ʉ̃raburu daiba kuitaaduu bichiba ne joma kuitaa nii. Daiba id̶id̶ai naed̶e bichiba saka panaui kuitaa b̶uu. Maud̶eeba kuitaa panuu bichi Dachi Akõred̶ebena neesii.

31Jesusba jarasii:

—¿Ʉ̃raburu machiba biawãra ijãa panuka? 32Chi ewari neei b̶uad̶a neeruu. Machi joma ab̶aab̶aa jĩichoad̶aped̶a mʉ du ab̶a b̶uid̶ai.#Zacarías 13:7. Maamina mʉ du ab̶a b̶uabai mʉ Chacha mʉ ome b̶uud̶eeba. 33Joma mau mʉʉba machimaa jarasii mʉʉd̶eeba jirukaraayuwãe nuread̶amera. Nau iujãad̶e ãrea biꞌiwãe nuread̶ai, maamina wapearã́sturu: nau iujãad̶ebena kachiruarã mʉʉba poyaasii.

Currently Selected:

Juan 16: cmi

Highlight

Copy