Luke 4

Христос йŏвра хўщты щир

1Иисус, Йэмәӈ Ԓыԓән тэкәнман, Иордан йŏхан эԓты йŏхԓы мӑнәс, пӑ щи Ԓыԓән хӑр пӑ таԓ мўва тўвман уса.

2Щита Ԓўв ԋӑԓйаӈ хӑтәԓ хиԋән#4:2 дьяволән хўщман уса пӑ щи хӑтԓәтән Иисус нэмәԓты ӑт ԓэс, щи хӑтԓәт мӑнәм йўпийән, мет йўхәт Ԓўв ԓэты ԓӑӈхаты питса.

3Хиԋ Ԓўвеԓа йастәс: "Нӑӈ – Турәм Пŏх ки, тӑм кев шуп, ԋаԋа йитыйа парты".

4Иисус йŏхԓы йастәс: "Йэмәӈ Нэпекән xӑшман уԓԓа: ”Ӑнта туп ԋаԋ йурән хŏйат уԓты питәԓ, пӑ кашәӈ Турәм йасәӈ йурән”".

5Щӑԓта Ԓўв хиԋән пӑԓ кев ԓŏӈԓа нŏх туса пӑ щиԓта ищи кумат хŏԓыйэ мўв ԓŏватән уԓты хон мўвәт аԉиԓысԓы,

6хиԋ ики пӑ йастәс: "Нӑӈен тӑм хон мўвәт хŏща кущайа уԓты пŏнԓэм, пӑ ԓыв вŏсԓәты–вŏрԓәты щирэԓ Нӑӈен мӑԓэм, щит иса мӑнэма мӑса, пӑ ма, хŏйа ԓӑӈхаԓәм, щита мӑԓэм.

7Нӑӈ ма йэԓпемән шаншен иԓ эсәԓԓэн ки, тӑм иса Нӑӈен мӑԓэм".

8Туп Иисус йŏхԓы йастәс: "Сатана#4:8 сатана, дьйавол, ‘хиԋ’, Ма эԓтайэм пўӈԓа мӑна; Йэмәӈ Нэпекән xӑшман уԓԓа: ”Турәм Кущайэн йэԓпийән туп шаншен иԓ эсԓы, Ԓўвеԓа туп митхуйа уԓа”".

9Щӑԓта Иисус сатанайән Иерусалим воша туса, Турәм Хот ԓоӈәԓ йира ԓощәԓтәса, пӑ йастәса: "Нӑӈ Турәм Пŏх ки, тӑԓта иԓ керәптыйа,

10хӑшман ӑт уԓ: “Ԓўв ангелԓаԓа Нӑӈен шавиты партԓәԓы”,

11пӑ “Нӑӈен нŏх аԓәмман туԓэԓ, Нӑӈ кўрэн кева аԓт вакләпәԓ”".

12Иисус йŏхԓы йастәс: "Йастәман уԓ: ”Турәм Кущайэн, Турмен аԓ хўщи”".

13Хун хиԋ ики хўщәпсайԓаԓ вŏԓәтсәԓԓы, Ԓўв эԓтайәԓ мӑтты пŏра унты шӑшән мӑнәс.

Галилея мўв ԓŏватән вана ўты щир

14Иисус, Йэмәӈ Ԓыԓ йурән тэкәнман, Галилея мўва йŏхԓы йŏхтәс. Ԓўв айкеԓәԓ Галилея мўв керәтман лакки ԓӑрпиԓәс.

15Ԓўв Турәм йасӈа утәԓтәты хотԓаԓән#4:15 Турәм йасӈа утәԓтәты хот 'синагога'; Словарь ванта. ԓывиԓаԓ утәԓтәс, пӑ хŏԓыйэ Ԓўвеԓ ишәксэԓ.

Назаретән вана ӑт ўты щир

16Иисус Назарета, энмәм вошәԓа, йŏхтәс, пӑ шаббат хӑтәԓән#4:16 шаббат хӑтәԓ 'суббота' - эврейәт ԓапәтмет хӑтәԓ, ԓўв йэмәӈ хӑтԓа ԓўӈәтԓа, щи хӑтәԓән щўтщәԓа;, Ԓўв уԓтаԓ иты, Турәм йасӈа утәԓтәты хота ԓŏӈәс, пӑ щита Йэмәӈ Нэпек эԓты сыйәӈа ԓуӈәтты ԓойәс.

17Ԓўвеԓа Исаия, Турәм йасәӈ туты ху, нэпек мӑса: Ԓўв нэпек нŏх ԓӑрпитмаԓ йўпийән, щи тӑха уйәтсәԓы, хŏта хӑшман уса:

18"Турәм Куща Ԓыԓ Ма хŏщайэм уԓ; Ԓўв Мӑнэм, куԋарәта Йӑм айкеԓ йастәты урәӈән, ԋŏсәтсәԓы#4:18 словарь Христос ванта;, пӑ Мӑнэм, сӑмԓаԓ рӑкнәм хŏйатәт тўмтака верты урәӈән, китсәԓы, ԋӑрэмәм хŏйатәта хŏԓт сŏхәнты вер пӑ сэмԓы хŏйатәта – сэмәӈа йиты вер аԉты китсәԓы, шукатты хŏйатәт хŏԓт эсәԓты китсәԓы,

19Турәм Куща йӑм ŏт тӑԓ-ԓўӈ йŏхтәм такан айәԓтты китсәԓы".

20Иисус, нэпек лӑп йŏвәртман, ԋотты хŏйата мӑсԓы пӑ иԓ опсәс. Турәм йасӈа утәԓтәты хот тэԓ хŏйат хŏԓ Ԓўв пеԓайәԓ тŏрԓы ватԓәт.

21Щӑԓта Ԓўв ԓыв пеԓайэԓ пŏтәртты питәс: "Тӑмхӑтәԓ, нын хуԓәм тӑм Йэмәӈ Нэпек йасӈәт, йӑнәпсәт".

22Хŏԓыйэ ԓыв кўтэԓән Ԓўвеԓ ишәксэԓ, пӑ Ԓўв эԓтэԓ этты сӑма рӑхты йасәӈԓаԓ эԓты ощатыԓәт, пӑ пŏтәрԓәт: "Тӑм мўй ӑнта Иосиф пŏх?"

23Иисус ԓывиԓаԓа йастәс: "Нын, уйәтман, Мӑнэма щимәщ йасәӈ йастәԓты: ”Ԉэккар, Нӑӈен Нӑӈ йӑмәԓты!”, хŏԓна: ”Тӑта Нӑӈ вошенән па щит вера, мўй, мўӈ хуԓмевән, Капернаум вошән версән”".

24Щӑԓта йастәс: "Йӑна нынана йастәԓәм: Турәм йасәӈ туты и ху нэш энмәм мўвәԓән вана ӑт уԓа.

25Вещката нынана пŏтәртԓәм: Илия Турәм йасәӈ туты ху уԓмаԓән, Израиль мўвән ар икиԓы хӑщәм ими ус, щи пŏрайән хуԓәм тӑԓ пӑ хут тыԓәщ турәм хӑр щиты лӑп йэртман уса, пӑ иса мўв ԓŏвата ун ԓэԓԓы пŏра йŏхтәс,

26ԓыв кўтэԓа ий ими хŏща нэш Илия ӑт китса, туп Сидон вош пўӈәԓән уԓты Сарепта курта икиԓы ий ими хŏща китса.

27Елисей Турәм йасәӈ туты ху уԓәм пŏрайән, йэмәӈ ԓайӈәӈ ԋўлмәт тӑйты ар хŏйат Израиль мўвән ус, Нееман нэмпи Сирия мўвәӈ ики тўмпийән, нэмәԓты хŏйат ӑт сыстапса".

28Щит хуԓмеԓ кемән, Турәм йасӈа утәԓтәты хотән уԓты хŏйатәт хŏԓыйэ ԉикән йŏхәтсайәт.

29Ԓыв нŏх ԓойәпсәт, Иисус вош эԓты ким воштәсэԓ; вошеԓ кев пай эԓты омәсман уԓ, пӑ пӑԓ кев пай венша тусэԓ, иԓ вŏщкәты урәӈән.

30Туп Ԓўв, хŏйатәт кўтән шушман, пўӈԓа йирԓәс.

Кўԉәт воштәсайәт

31Иисус Галилея мўвән уԓты Капернаум воша йŏхтәс, пӑ шаббат хӑтәԓән ԓывиԓаԓ утәԓтәс.

32Мŏхет Ԓўв утәԓтәпсайәԓ эԓты ӑԓ пакнысыԓәт, Ԓўв йасӈәԓ партатты щир тӑйәс.

33Турәм йасӈа утәԓтәты хотән кўԉ сŏх тӑйәм хŏйат ус, пӑ ԓўв сыйәӈ тўрән ўваԓтәс:

34"А-а-а: Назарет эԓты уԓты Иисус, мўӈ эԓтэв мўй Нӑӈен мосәԓ? Нӑӈ мўӈев пӑратты йŏхәтсән; уйәтԓэм, Хŏй Нӑӈ! Нӑӈ – Турәм Йэмәӈ Ŏт!"

35Иисус ԓўвеԓ такан партсәԓы: "Мӑшйайа йўвәмта па ԓўв эԓтэԓ ким эта!" Кўԉ сŏх Турәм йасӈа утәԓтәты хот кўтәпән хŏйат иԓ вŏщкәсԓы, щӑԓта ԓўв эԓтэԓ ким этәс, нэмәԓты атәм ин хŏйата ӑт верәс.

36Мŏхет хŏԓыйэ хŏрщәмән йŏхәтсайәт, пӑ кўтԓаԓән пŏтәртсәт: "Мўй щит? Ԓўв щиты партатты щирән пӑ йуртат кўԉ сŏхәта пӑртәԓ пӑ ԓыв ким этԓәт?"

37Пӑ Ԓўв эԓтэԓ айкеԓ керәтман куртәт хўват лакки мӑнәс.

Петра унтәп тўмтака верса

38Турәм йасӈа утәԓтәты хот эԓты ким этмаԓ йўпийән, Иисус Симон хота ԓŏӈәс. Симон утпәԓ ими шек кӑшаӈ ус; пӑ Иисус щи ими урәӈән вохса.

39Ԓўв щи ими хŏща ԋўрман, муш нŏх вŏԓыты партсәԓы; ин ими мушән хӑйса. Ԓўв ищи мŏхты нŏх ԓойәс, пӑ мŏхета пӑсан омәсты питәс.

Иисус Галилея мўв ԓŏватән Турәм верәт верәԓ

40Хӑтәԓ иԓ опсәм сыс хŏԓыйэ, хŏй мушән йŏхтәм хŏйат тӑйәс, щи ар сыр мушпи хŏйатԓаԓ Ԓўв хŏщайәԓа тусԓаԓ. Ԓўв пӑ, кашәӈ мушәӈ хŏйат эԓты йошԓаԓ пŏныԓыман, ԓывиԓаԓ тўмтака версәԓы.

41Ар хŏйат эԓты ищиты кўԉ сŏхәт, ўвман, ким этсәт пӑ пŏтәртсәт: "Нӑӈ – Христос, Турәм Пŏх!" Ԓыв уйәтԓәт - Ԓўв – Христос, туп Иисус щит ԓывиԓаԓа йастыты ӑт эсәԓсәԓы.

42Хун хӑтԓа йис, Ԓўв хот эԓты ким этмаԓ йўпийән, таԓ шитам тӑхайа мӑнәс. Ар хŏйатән кӑшса, пӑ Ԓўв хŏщайәԓ йŏхәтмеԓән, Ԓўвеԓ иԓ рŏнатԓэԓ, ԓыв эԓтайэԓ ӑт ат мӑнәс.

43Ԓўв пӑ ԓывиԓаԓа йастәс: "Мӑнэм па вошәтән ищи Турәм Хон Уԓәпса эԓты Йӑм айкеԓ йастәты мосәԓ. Щи урәӈән Ма китсайәм".

44Щиты Ԓўв Галилея Турәм йасӈа утәԓтәты хотәтән сыйәӈа пŏтәртәс.

Currently Selected:

Luke 4: ХБ

Highlight

Copy