Genesis 44
44
Уштыԓыйәм ан
1Щӑԓта Иосиф ԓўв хотәԓ митйохәт кущайа партәс, щиты йастәс: «Тӑм хŏйатәт хирԓаԓ ԓэтŏтән тэԓ пŏнаԓән, мўй арат войԓаԓ туты верәтԓәт, кашәӈ ŏта сŏхәптәм щел ŏхәԓ хир ова йŏхԓы пŏны,
2ма анэм пӑ, щел ŏх анэм, ай хуйэԓ хир ова ԓўв ԓутәм ԋаԋәԓ сӑхат сŏхәптәм ŏхәԓ пиԓән пŏны». Щитәԓ Иосиф йастәм щирән иса версәԓы.
3Аԓәӈсӑхат, нŏвийа йўвәмән, щи хŏйатәт йŏхԓы мӑнты эсәԓсайәт, ԓыв пӑ осёл войԓаԓ па.
4Ԓыв шек хўва вош эԓты ӑт питсәт, хун Иосиф хотәԓ митйохәт кущайа йастәс: «Мӑна, щи хŏйатәт йŏԓта ԋухԓаԓән, эԓты йŏхәттэнән, ԓывиԓаԓа йаста: ‘Мўйа нын йӑм йўкана атәм версәты?
5Тӑм ан эԓты кущайэм йищәԓ пӑ щӑртәԓ? Атәм нын версәты’».
6Ԓўв ԓывиԓаԓ эԓты йŏхәтсәԓы пӑ щи йасӈәт ԓывиԓаԓа йастәс.
7Ԓыв пӑ ԓўвеԓа йŏхԓы йастәсәт: «Мўйа кущайэв щимәщ йасӈәт пŏтәртәԓ? Ӑнта, нӑӈ митйохԓан щимәщ вер ӑт верԓәт.
8Тӑта щи, хир овԓувән уйтәм щел ŏхев мўӈ нӑӈена йŏхԓы Ханаан мўв эԓты тусэв: хŏты сӑхат щел ŏх мўй па сорԋи кущайэн хот эԓты ԓоԓәмты верәтԓув?
9Мӑты митхуйэн хŏща щи ан уйәтԓэн, щитэна сŏрәм, мўӈ пӑ кущайэва митйоха питԓув».
10Ԓўв йастәс: «Йӑм; хŏты нын йастәсты, щиты ат питәԓ: хŏй хŏща ан уйәтԓа, щит митхуйэма питәԓ, нын пӑ нўрәӈа ӑт питԓәты».
11Ԓыв сора хирԓаԓ иԓ эсәԓсәԓаԓ, мўв эԓты пŏтсәԓаԓ пӑ кашәӈ хŏйат ԓўв хирәԓ пелки эхсәԓы.
12Ԓўв хирәт хŏԓ ватсәԓы, ун хуйэԓ эԓты питщәсԓы пӑ ай ŏтәԓән йэтшәптәсԓы; Вениамин хирән ан уйәтса.
13Ԓыв ԓумтәмԓаԓ мӑншисԓаԓ пӑ осёл войԓаԓ эԓты хирԓаԓ ԓэԓсәԓәԓ, пӑ йŏхԓы воша керԓәсәт.
14Иуда пӑ ԓўв йайԓаԓ-апщиԓаԓ Иосиф хота йŏхәтсәт, ԓўв хŏԓна йŏԓән уԓмаԓ, пӑ ԓўв йэԓпеԓән мўва иԓ рӑкәтсәт.
15Иосиф ԓывиԓаԓа йастәс: «Мўй нын версәты? Нын мўй ӑт уйәтсәԓән, ма хŏрпем хŏйат ищипа щи вер ԓэрапты урәӈән щӑртыԓәты верәтәԓ?»
16Иуда йастәс: «Мўй мўӈ верәтԓув кущайэва йастәты? Мўй пŏтәртты? Мўй йŏхԓы йастәԓув? Митйохԓан накԓат Турәм уйәтсәԓы; ин мўӈ хŏԓ кущайэв митйохәт, мўӈ хŏԓ, пӑ щитэв, хŏйтэв хирән ан уйәтса».
17Иосиф пӑ йастәс: «Ӑнта, щиты ма ӑт верԓэм; хŏй хŏща ан уйәтса, щит ма митхуйэма питәԓ, нын пӑ ащан хŏща йӑмән мӑнаты».
Иуда Вениамин апщеԓ йўкана хӑщты ўратәԓ
18Иуда ԓўв хŏщайәԓ ванамәс пӑ йастәс: «Кущайэм, митхуйэна пӑԓԓана йасәӈ йастәты эсԓы, пӑ митхуйэн пеԓа аԓ ԉикаща, нӑӈ ищи фараон пӑԓатән омәсԓән.
19Кущайэм митйохԓаԓ иԋщәссәԓы, йастәман: ‘Ащи мўй йай-апщи тӑйԓәты?’
20Кущайэва мўӈ йастәсув, пирәщ ащи тӑйты верэв пӑ апщи, ащев тӑԓԓаԓ ара йўвман тӑйәм пŏхәԓ, ԓўв йайәԓ пӑрәс, аԋԏэԓ эԓты ԓўв утща ԓыԓӈа хӑщәс, щишән, ащеԓән сӑмәӈа тӑйԓа.
21Нӑӈ митйохԓана партсэн: ‘Ма хŏщайэм ԓўвеԓ тўваԓән, мӑнэм ԓўвеԓ ватты урәӈән’.
22Кущайэва мўӈ йастәсув: ‘Энәмты пŏх ащеԓ хӑйты ӑт верәтԓәԓы, ащеԓ хӑйԓәԓы ки, ащеԓ пӑрәԓ’.
23Нӑӈ пӑ митйохԓана йастәсән: ‘Ай апщан нын пиԓанән ӑт ки йŏхәтәԓ, нын ма хŏщайэм аԓ па этԓыйаты’.
24Хун мўӈ ащев хŏща, нӑӈ митхуйэн хŏща, йŏхәтсув, кущайэм йасӈәт ԓўвеԓа пŏтәртсәԓув.
25Щӑԓта, пŏра хӑщәмән, ащев ики па йастәс: ‘Па йӑӈхаты, ԓэтŏт йэша ԓутаты’.
26Мўӈ ԓўвеԓа щиты йастәсув: ‘Утща мӑнты мўӈева ӑт рӑхәԓ; туп апщев мўӈ пиԓэвән мӑнәԓ ки, мўӈ мӑнԓув; щи хŏйат веш ватты мўӈева ӑт рӑхәԓ, апщев мўӈ пиԓэвән ӑт ки питәԓ’.
27Ащев, нӑӈ митхуйэн, мўӈева щиты йастәс: ‘Нын уйәтԓәԓән, имем мӑнэма кӑт пŏх сэма пайтәс;
28итәԓ ма эԓтэм мӑнәс, ма йастәсәм: аԓт ԓўв ут войән лакки мӑншиса; ин тӑм унты ԓўвеԓ ӑт ватсэм;
29хŏԓна тӑмем ма эԓтэм ўԓԓән ки, пӑ мŏԓты вера питәԓ ки, вотәм ŏхем, щи шукән хощман, иԓта турма туԓԓән’.
30Ин ма ащев хŏща, нӑӈ митхуйэн хŏща, йŏхәтԓәм ки, пӑ ԓўв ԓыԓәԓ шавиты ай апщев мўӈ пиԓэвән ӑт ки питәԓ,
31ԓўв, энәмты пŏх ӑнтом вер кащаԓәтаԓән, пӑрәԓ; пӑ мўӈ, нӑӈ митйохԓан ащев ики вотәм ŏхәԓ, хощман, иԓта турма туԓэв.
32Щӑԓта пӑ ма, нӑӈ митхуйэн, щи энәмты пŏх урәӈән ащема йасәӈ мӑсәм: ‘Йŏхԓы нӑӈ хŏщайэн ӑт ки туԓэм, уԓтэм хўват нӑӈ йэԓпенән нўрәӈ питԓәм’.
33Щишән, ма, нӑӈ митхуйэн, ԓўв йўканәԓа кущайэм хŏща митхуйа ат хӑщԓәм, энәмты пŏх пӑ йайԓаԓ пиԓән ат мӑнәԓ;
34ӑԓ щиты, ма мўй щирән ащем хŏща апщем такԓы мӑнԓәм? Ащем шук туты вер ма ватты ӑт верәтԓәм».
Currently Selected:
Genesis 44: ХБ
Highlight
Share
Copy
Want to have your highlights saved across all your devices? Sign up or sign in
Institute for Bible Translation, Finland
