တမၢၼ်ႇၸဝ်ႈ ၵႂၢမ်းၼမ်း
ၵႂၢမ်းၼမ်း
ဝုတ်ႉထူႉတမၢၼ်ႇၸဝ်ႈၼႆႉ ၵေႃႉတႅမ်ႈမၼ်း ပဵၼ်မေႃယႃလူႉၵႃႇ၊ပဵၼ်ၵေႃႉလဵဝ်ၵၼ်တင်းၵေႃႉဢၼ်တႅမ်ႈၶၢဝ်ႇတြႃးသိူဝ်းပျေႃႇလူႉၵႃႇၼၼ်ႉဢေႃႈ။ ၵျၢမ်းၽိုၼ်ၼႆႉ ၵူၼ်းၵမ်ႈၽွင်ႈၵေႃႈဝႃႈ၊ ထုၵ်ႇလီႁွင်ႉပိုၼ်းၼႃႈၵၢၼ်ဝီႉၺိၺ်ႇမူတ်းၸၢင်ႇၸဝ်ႈဝႃႈၼႆ၊ ၵွပ်ႈပိူဝ်ႈလႆႈႁၼ် တၢင်းဢၼ်ဝီႉၺိၺ်ႇမူတ်းၸၢင်ႇၸဝ်ႈႁဵတ်းၵၢၼ်ၼမ်ၼႃႇ ၵႃႈၼႂ်းၵျၢမ်းၼႆႉဢေႃႈ။ ၵျၢမ်းၼႆႉထၢင်ႇဝႃႈ၊ မေႃယႃလူႉၵႃႇလႆႈတႅမ်ႈဝၢႆးလင်ၵျၢမ်းမၢတ်ႈထႄႇ၊ ၵျၢမ်းမႃႇၵူႉ၊ ၵျၢမ်းလူႉၵႃႇလႄႈ ဝၢႆးလင်ဢၼ်တမၢၼ်ႇၸဝ်ႈပေႃးလူႉလႆႈၶၢမ်ႇတၢင်းဢၼ်ၶုၼ်ႁေႃၶမ်းၼေႇရူဝ်းဢဝ်တၢႆၼၼ်ႉဢေႃႈ။ ၵျၢမ်းပိုၼ်းၼႃႈၵၢၼ်တမၢၼ်ႇၸဝ်ႈၼႆႉ မေႃယႃလူႉၵႃႇတႅမ်ႈမိူဝ်ႈပီႊၸဝ်ႈၶရိၸ်ႈ 80 ၵႃႈတီႈဝဵင်းရူဝ်းမႃႉဢမ်ႇၼၼ်ၵႃႈတီႈသေဝဵင်းဝဵင်းၵႃႈၼႂ်းမိူင်းၵရိၵ်ႉၼၼ်ႉဢေႃႈ။
ၵျၢမ်းၼႆႉလၢတ်ႈၼႄလွင်ႈတပႄးဢၼ်ၸွမ်းလင်ၸဝ်ႈယေႇသူႉၸဵမ်မိူဝ်ႈႁူဝ်ပိုင်းၸိူဝ်းၼၼ်ႉ၊ လႆႈၶၢမ်ႇဢဝ်ဝီႉၺိၺ်ႇမူတ်းၸၢင်ႇၸဝ်ႈသေလႄႈ ႁေႃးလၢတ်ႈၶၢဝ်ႇတြႃးသိူဝ်းပျေႃႇလွင်ႈၸဝ်ႈယေႇသူႉ “ၸႃႉၸဵမ်ဝဵင်းယေႇရူႉသလႅမ်ႇၶဝ်ႈၵႂႃႇထိုင်ၵႃႈၼႂ်းမိူင်းယူႉတႃႉၵူႈတီႈၵူႈလႅၼ်တင်းမိူင်းသမႃႇရီႉတေႃႇထိုင်လႅၼ်လိၼ်သုတ်းလိၼ်မိူင်းၼၼ်ႉဢေႃႈ၊” (1:8)။ ၽိုၼ်လိၵ်ႈၼႆႉ၊ ပဵၼ်ပိုၼ်းလွင်ႈဢၼ်ၶရိၸ်ႈယၢၼ်ႇတင်းလၢႆ၊ ပွင်ႁဵတ်းၵၢၼ်သႃႇသၼႃႇၵႃႈၼႂ်းၵူၼ်းမဵဝ်းယူႉတႃႉၶဝ်လႄႈ ယႂ်ႇၽႄႈၸွတ်ႇတူဝ်ႈ ၶဝ်ႈထိုင်ၵူၼ်းၵူႈတီႈၵူႈလႅၼ်ၼႂ်းလိၼ်မိူင်းၼႆႉလႆႈယုမ်ႇမၢတ်ႈဢေႃႈ။ တမၢၼ်ႇၸဝ်ႈလူႉၵႃႇၶႂ်ႈႁႂ်ႈၵူၼ်းဢၼ်ၽတ်းဢၢၼ်ႇလိၵ်ႈၼႆႉ ႁူႉဝႃႈၶရိၸ်ႈယၢၼ်ႇပဵၼ်ၵူၼ်းဢၼ်ယႃႉၵဝ်း လူင်ပွင်ၸိုင်ႈ ရူဝ်းမႃႉၶဝ်ဢမ်ႇၸႂ်ႈ တၢင်းယုမ်ႇမၢတ်ႈၶရိၸ်ႈယၢၼ်ႇၸိုင် ပဵၼ်တၢင်းဢၼ်ထၢပ်ႈထႅင်ႈ ႁႂ်ႈၽႃႇသႃႇယူႉတႃႉၶဝ်ပျေႉၸုမ်ႇမႃးၼၼ်ႉဢေႃႈ။
ၽိုၼ်လိၵ်ႈပိုၼ်းၼႃႈၵၢၼ်တမၢၼ်ႇၸဝ်ႈၼႆႉ ၽႄမႅင်ႇပဵၼ်သၢမ်တွၼ်ႈဝႆႉလႄႈ ၸၢပ်ႈသႅင်ႇၵၼ်တင်းၶၢဝ်ႇတြႃးသိူဝ်းပျေႃႇလွင်ႈၸဝ်ႈယေႇသူႉ ႁေႃးလၢတ်ႈသေယဝ်ႉ၊ ယႂ်ႇၽႄႈၸွတ်ႇတူဝ်ႈၵႂႃႇ၊ ဢိၵ်ႇတင်းၸိူဝ်းၸဝ်ႈၼမ်ၼႃႇတႄႇတင်ႈပဵၼ်မႃးၼၼ်ႉဢေႃႈ။ ၼႂ်းသၢမ်တွၼ်ႈၼၼ်ႉ၊ (1) လွင်ႈတႄႇၸႃႉၼႃႈၵၢၼ်သႃႇသၼႃႇၶရိၸ်ႈယၢၼ်ႇ ၸႃႉၸဵမ်ဝဵင်းယေႇရူႉသလႅမ်ႇဝၢႆးသေၸဝ်ႈယေႇသူႉၵျွႃႉၶိုၼ်ႈမိူင်းၵၢင်ႁၢဝ်ၵႂႃႇယဝ်ႉ၊ (2) ၸွတ်ႇတူဝ်ႈၵႂႃႇတၢင်ႇတီႈၼႂ်းမိူင်းပႃႇလတီႉၼႃႉဢိၵ်ႇတင်း (3) သိုပ်ႇၸွတ်ႇတူဝ်ႈၵႂႃႇထိုင်မိူင်းဢၼ်မီးၸွမ်းၽင်ႇပၢင်ႇလၢႆႇမေႇတီႇထေးရီးယၼ်းတေႃႇထိုင်ႁွတ်ႈဝဵင်းလူင်ရူဝ်းမႃႉပုၼ်ႉၼၼ်ႉဢေႃႈ။
ဢၼၢၵ်ႈဢထိၵ်ႈပႄႇ ဢၼ်ဢယေးယႂ်ႇၼႂ်းၽိုၼ်လိၵ်ႈၼႆႉ ပဵၼ်ၼႃႈၵၢၼ်တၼ်းၶူဝ်းဝီႉၺိၺ်ႇမူတ်းၸၢင်ႇၸဝ်ႈ ဢၼ်လူင်းမႃးၸပ်းသႂ်ႇတပႄးၸဝ်ႈတင်းလၢႆ၊ ၼႂ်းဝၼ်းပဵၼ်ႇတေႇၵုၵ်ႉတေႇသေယဝ်ႉ သိုပ်ႇပၼ်ဢဵၼ်ပၼ်ႁႅင်းၼႄသဵၼ်ႈတၢင်း တီႈၸိူဝ်းၸဝ်ႈတင်းလၢႆ၊ တင်းၵူၼ်းဢၼ်ဢွၼ်ႁူဝ်တင်းလၢႆဢေႃႈ။ တြႃးၶရိၸ်ႈယၢၼ်ႇမိူဝ်ႈၵေႃႇၸႃႉၸိူဝ်းၼၼ်ႉ၊ တႅမ်ႈဝႆႉၼႂ်းၵႂၢမ်းႁေႃးတြႃး လၢႆတီႈၼႂ်းၽိုၼ်လိၵ်ႈဝုတ်ႉထူႉၵၢၼ်တမၢၼ်ႇၸဝ်ႈၼႆႉလႄႈ တႅမ်ႈမၢတ်ႈမၢႆဝႆႉ လွင်ႈတၼ်းၶူဝ်းတြႃးၸဝ်ႈတိုၵ်းသူၼ်းၸႂ်တပႄးၸဝ်ႈတင်းလၢႆ၊ ႁႂ်ႈမီးမိၵ်ႉသႃႇႁႃယႃႉၼႂ်းၸိူဝ်းၸဝ်ႈတင်းလၢႆၼၼ်ႉဢေႃႈ။
ႁူဝ်ၶေႃႈဢၼ်ၶဝ်ႈပႃးၸမ်ႉ
တၢင်းဢၼ်မႄးႁႅၼ်းပုၼ်ႈဢၼ်တၵ်းၶၢမ်ႇသၢၵ်ႈသေႇ 1:1-26
ၵ) ဢမိင်ႉၸဝ်ႈ တင်းၵတီႉတေႃႇၸဝ်ႈယေႇသူႉ 1:1-14
ၶ) ၵေႃႉႁပ်ႉဢရႃႇတႅၼ်းတီႈယူႉတႃႉဢီႉသၵႃႇရေႇဢုတ်ႈ 1:15-26
တၢင်းဢၼ်ၶၢမ်ႇသၢၵ်ႈသေႇၼႂ်းဝဵင်းယေႇရူႉသလႅမ်ႇ 2:1-8:3
တၢင်းဢၼ်ၶၢမ်ႇသၢၵ်ႈသေႇၼႂ်းမိူင်းယူႉတႃႉတင်းမိူင်းသမႃႇရီႉ 8:4-12:25
ၵၢၼ်သႃႇသၼႃႇတမၢၼ်ႇၸဝ်ႈပေႃးလူႉသၢင်ႈႁဵတ်း 13:1-28:31
ၵ) ၶၢဝ်းတၢင်းဢၼ်ဢွၵ်ႇႁေႃးတြႃးပွၵ်ႈတီႈၼိုင်ႈ 13:1-14:28
ၶ) ပၢင်ၵုမ်လူင်ၼႂ်းဝဵင်းယေႇရူႉသလႅမ်ႇ 15:1-35
င) ၶၢဝ်းတၢင်းဢၼ်ဢွၵ်ႇႁေႃးတြႃးပွၵ်ႈထီႉသွင် 15:36-18:22
ၸ) ၶၢဝ်းတၢင်းဢၼ်ဢွၵ်ႇႁေႃးတြႃးပွၵ်ႈထီႉသၢမ် 18:23-21:16
သ) တမၢၼ်ႇၸဝ်ႈပေႃးလူႉတူၵ်းထွင်ႇၼႂ်းဝဵင်းသၢမ်ဝဵင်း 21:17-28:31
Currently Selected:
တမၢၼ်ႇၸဝ်ႈ ၵႂၢမ်းၼမ်း: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship