တမၢၼ်ႇၸဝ်ႈ 2
2
ဝီႉၺိၺ်ႇမူတ်းၸၢင်ႇၸဝ်ႈလူင်းမႃး
1မိူဝ်ႈဢၼ် ဝၼ်းပွႆးပဵၼ်ႇတေႇၵုၵ်ႉတေႇ ႁွတ်ႈထိုင်ၼၼ်ႉၸိုင်၊ ၶဝ်တင်းသဵင်ႈတင်းလူင် ၽွမ်ႉၵၼ်သေလႄႈၸူႉၵၼ်တုမ်ၵၼ်ယူႇတီႈလဵဝ်ဢေႃႈ။- 2မိူဝ်ႈၼၼ်ႉ သဵင်မိူၼ်ၸိူဝ်ႉၼင်ႇသဵင်လူမ်းၽိဝ်ႇႁုင်ၼၼ်ႉ လုၵ်ႉသေၵႃႈၼိူဝ်ၵၢင်ႁၢဝ်မႃးၵမ်းလဵဝ်လႄႈ တဵမ်ႁိူၼ်းတီႈဢၼ်ၶဝ်ၼင်ႈယူႇၼၼ်ႉဝႆႉဢေႃႈ။- 3ၵမ်းၼၼ်ႉ လိၼ်ႉဢၼ်တႅၵ်ႇၵီႈတင်းလၢႆ ၽုတ်းမႃးၵႃႈတီႈၶဝ်မိူၼ်ၸိူဝ်ႉၼင်ႇလိၼ်ႉၽႆးၼၼ်ႉလႄႈ ၵိုတ်းသဝ်းယူႇၵႃႈၼိူဝ်ၶဝ်ၼၼ်ႉႁင်းၽႂ်ႁင်းမၼ်းဢေႃႈ။- 4ၶဝ်တင်းသဵင်ႈတင်းလူင်ၸိူဝ်းၼၼ်ႉ ပျေႉၸုမ်ႇဝႆႉတင်းဝီႉၺိၺ်ႇဢၼ်မူတ်းၸၢင်ႇၸဝ်ႈလႄႈ ၵႃႈၼင်ႇဢၼ်ဝီႉၺိၺ်ႇၸဝ်ႈ ပၼ်ဢၶႂၢင်ႉႁေႃးလၢတ်ႈၼၼ်ႉ၊ ဢွၼ်ၵၼ်ဢဝ်တင်းၵႂၢမ်းၽႃႇသႃႇၵူႈၸိူဝ်ႉၵူႈပိူင်ႁေႃးလၢတ်ႈဢေႃႈ။- 5မိူဝ်ႈၶိင်ႇၵႃႇလႃႉၼၼ်ႉ ၵူၼ်းယူႉတႃႉ ဢၼ်ရူဝ်ႇသေႇၵူဝ်ယမ်ၽြႃး ဢၼ်လုၵ်ႉသေၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း ၵႃႈဢၼ်မီးတႂ်ႈၽႃႉၵၢင်ႁၢဝ်မႃးၸိူဝ်းၼၼ်ႉ မီးယူႇၵႃႈၼႂ်းဝဵင်း ယေႇရူႉသလႅမ်ႇဢေႃႈ။
6မိူဝ်ႈဢၼ်လႆႈငိၼ်းသဵင်ၼၼ်ႉၸိုင်၊ ၵူၼ်းၼမ်ၼႃႇမႃးၸူႉၵၼ်တုမ်ၵၼ်သေယဝ်ႉ၊ ပိူဝ်ႈဢၼ်ၶဝ်လႆႈငိၼ်းတမၢၼ်ႇၸဝ်ႈၸိူဝ်းၼၼ်ႉ ဢဝ်တင်းၵႂၢမ်းၽႃႇသႃႇၶဝ်ႁင်းၽႂ်ႁင်းမၼ်း ၵူႈၵေႃႉၵူႈၵူၼ်းၼၼ်ႉ ႁေႃးလၢတ်ႈလႄႈၵိုတ်းမိုင်ၵႂင်ၸႂ်ယူႇဢေႃႈ။- 7ၶဝ်တင်းသဵင်ႈတင်းလူင်ၼၼ်ႉ ဢၢမ်းလူင်ဢၢမ်းလၢင်လႄႈ ၵႂင်ၸႂ်ယုင်ႈၸႂ်ယူႇသေလႄႈ ၼင်ႇၵၼ်ၵၼ်လၢတ်ႈၵၼ်လႄႈဝႃႈ၊ တူၺ်းလူး၊ ၵူၼ်းတင်းသဵင်ႈတင်းလူင်ဢၼ်ႁေႃးလၢတ်ႈယူႇတေႃႈလဵဝ်ၼႆႉၼၼ်ႉ ပဵၼ်ၵူၼ်းၵႃႇလီႉလႄးဢမ်ႇၸႂ်ႈႁိုဝ်။- 8ပေႃးပဵၼ်ၸိူဝ်ႉၼင်ႇၼႆၸိုင်၊ လွင်ႈဢၼ်ႁဝ်းႁင်းၽႂ်ႁင်းမၼ်းလႆႈငိၼ်း ၵႂၢမ်းၽႃႇသႃႇတီႈဢၼ်ႁဝ်းၵိူတ်ႇလဵင်ႉမႃးၼၼ်ႉၸမ်ႉ၊ ပဵၼ်လွင်ႈၸိူဝ်ႉၼင်ႇႁိုဝ်။- 9ႁဝ်းဢၼ် ယူႇၸႃႉၸဵမ်မိူင်းပႃႇထီႉ တင်းမိူင်းမေႇတီႉ တင်းမိူင်းဢေႇလမ်ႇ တင်းမိူင်း မေႇသေႃးပေႃးတႃႇမီႉ တင်းမိူင်း ယူႉတႃႉ တင်းမိူင်းၵပ်ႉပတေႃးၵီႉတင်းမိူင်းပွၼ်ႇတူႉတင်းမိူင်း ဢႃႇသီႉ 10တင်းမိူင်းၽႃႇရူႉၵီႉတင်းမိူင်းပမ်ႇၽူႉလီႉတင်းမိူင်းဢေႇၵိပ်ႉတူႉတင်းလၢႆ ဢိၵ်ႇတင်း ၶဝ်ၸိူဝ်းဢၼ်ယူႇဝၢၼ်ႈၼွၵ်ႈၼႃးပၢင်ႇမိူင်းလီႉပူႉ ဢၼ်ၸၢပ်ႈသႅင်ႇၵၼ်တင်းဝဵင်းၵူႉရေႇၼေႇတင်းၶႅၵ်ႇဢၼ်လုၵ်ႉသေၵႃႈတီႈဝဵင်းရူဝ်းမႃႉမႃး၊ ပဵၼ်ၵူၼ်းယူႉတႃႉ သေဢမ်ႇဝႃႈ၊ ပဵၼ်ၵူၼ်းၶဝ်ႈၽႃႇသႃႇသေဢမ်ႇဝႃႈ၊- 11ၵူၼ်းမိူင်းၵရေႇတေႇ၊ၵူၼ်းမိူင်းဢရေႇပျႃႉၸိူဝ်းၼႆႉ လႆႈငိၼ်းၵူၼ်းၸိူဝ်းၼႆႉဢဝ်တင်းၵႂၢမ်းၽႃႇသႃႇႁဝ်းၵူႈမဵဝ်းႁေႃးလၢတ်ႈ လွင်ႈတၢင်းဢၼ်လီဢၢမ်း ၽြႃးပဵၼ်ၸဝ်ႈတင်းလၢႆၼၼ်ႉလူင်ပႄႇ၊ ဝႃႈၼင်ႇၼႆဢေႃႈ။- 12ၶဝ်တင်းသဵင်ႈတင်းလူင်ၼၼ်ႉ ဢၢမ်းလူင်ဢၢမ်းလၢင်လႄႈ မီးၸႂ်ဢၼ်ဢမ်ႇပွင်ႇဢမ်ႇလႅင်းယူႇသေလႄႈ ၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်ၵၼ်လႄႈဝႃႈ လွင်ႈတၢင်းၼႆႉ ပဵၼ်လွင်ႈတၢင်းၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။- 13ၵမ်ႈၽွင်ႈၵေႃႈသႄႉသွမ်းလႄႈဝႃႈ၊ ၶဝ်ၸိူဝ်းၼႆႉဢိမ်ႇတဵမ်ဝႆႉတင်းၼမ်ႉၸပိတ်ႈဢၼ်ဝၢၼ်ယဝ်ႉ၊ ဝႃႈၼင်ႇၼႆဢေႃႈ။
ၵႂၢမ်းတြႃးဢၼ်ပေႇတရူႉႁေႃးလၢတ်ႈ
14မိူဝ်ႈၼၼ်ႉပေႇတရူႉဢိၵ်ႇတင်း သိပ်းဢဵတ်းပႃးၸိူဝ်းၼၼ်ႉလုၵ်ႉၸုၵ်းယူႇသေလႄႈ ဢဝ်တင်းသဵင်ဢၼ်ယႂ်ႇႁေႃးလၢတ်ႈတီႈၶဝ်ၼၼ်ႉလႄႈဝႃႈၸမ်ႉ၊ ၵူၼ်းယူႉတႃႉ ဢိၵ်ႇတင်းၵူၼ်းဢၼ်ယူႇၵႃႈၼႂ်းဝဵင်းယေႇရူႉသလႅမ်ႇ တင်းသဵင်ႈတင်းလူင်ၶဝ်ဢိူၺ်း၊ သူမၢတ်ႈဝႆႉတွင်းဝႆႉလွင်ႈတၢင်းၼႆႉလႄႈထွမ်ႇဢဝ်ၵႂၢမ်းၵဝ် ၸေးၸေးၸွတ်ႇၸွတ်ႇသေၵမ်းတႃႉ။- 15ၶိင်ႇတေႃႈလဵဝ်ၼႆႉၸမ်ႉ၊ ပိူဝ်ႈဢၼ်ပဵၼ်ၶိင်ႇၵၢင်ၼႂ်သၢမ်ၼႃႇရီႇလႄႈ ၶဝ်ၸိူဝ်းၼႆႉမဝ်းလဝ်ႈၸိူဝ်ႉၼင်ႇဢၼ်သူထၢင်ႇထိူမ်ၼၼ်ႉဢမ်ႇၸႂ်ႈ။- 16လွင်ႈတၢင်းၼႆႉၸမ်ႉ၊ ပဵၼ်လွင်ႈတၢင်းဢၼ်ပရေႃးၽႅတ်ႈ ယူဝ်းဢေးလႃႉ ႁေႃးလၢတ်ႈဝႆႉၼၼ်ႉယဝ်ႉ။- 17ဢၼ်ႁေႃးလၢတ်ႈဝႆႉၼၼ်ႉၸမ်ႉ၊ ၽြႃးပဵၼ်ၸဝ်ႈပျႃႇတိၵ်ႈဝႆႉလႄႈဝႃႈ၊ ၶိင်ႇၵႃႇလႃႉၵမ်းလိုၼ်းၼၼ်ႉ ၵဝ်တၵ်းဢဝ်ဝီႉၺိၺ်ႇၵဝ် သွၼ်းလေႃႇၵႃႈၼိူဝ်မဵဝ်းၵူၼ်းတင်းသဵင်ႈတင်းလူင်ဢေႃႈ။ လုၵ်ႈလၢင်းသူၼၼ်ႉတၵ်းလႆႈဢဝ်တင်းၺၢၼ်ႇပရေႃးၽႅတ်ႈႁေႃးလၢတ်ႈဢေႃႈ။ ၵူၼ်းၼုမ်ႇၵူၼ်းၵမ်သူၼၼ်ႉတၵ်းလႆႈႁၼ်ရူႇပႃႇရူင်ႇပျႃႇတိၵ်ႈၸဝ်ႈဢေႃႈ။ ၵူၼ်းထဝ်ႈၵူၼ်းၵႄႇသူၼၼ်ႉၵေႃႈ တၵ်းလႆႈၼွၼ်းၽၼ်ႁၼ်ၼီႉမိၵ်ႈတင်းလၢႆဢေႃႈ။- 18ၼႂ်းၶိင်ႇမိူဝ်ႈၼၼ်ႉၵေႃႈ ၵဝ်တၵ်းသွၼ်းလေႃႇဝီႉၺိၺ်ႇၵဝ် ၵႃႈၼိူဝ်ၵူၼ်းၸၢႆးၵူၼ်းယိင်းဢၼ်ႁဵတ်းပွင်ဢမူႉၵဝ်ၸိူဝ်းၼၼ်ႉလႄႈ ၶဝ်ၼၼ်ႉတၵ်းလႆႈဢဝ်တင်းၺၢၼ်ႇပရေႃးၽႅတ်ႈႁေႃးလၢတ်ႈဢေႃႈ။- 19ၵဝ်တၵ်းၼႄပျႃးလွင်ႈတၢင်းဢၼ်လီဢၢမ်းတင်းလၢႆၵႃႈၼိူဝ်ၽႃႉၵၢင်ႁၢဝ် ဢိၵ်ႇတင်းၸႃႉၸဵမ်လိူတ်ႈလႄႈ ပဵဝ်ၽႆး၊ ၵႂၼ်းၽႆး ပုၵ်ႉပႃႉၼီႉမိၵ်ႈတင်းလၢႆ ၵႃႈတႂ်ႈၼိူဝ်လိၼ်မိူင်းၼႆႉဢေႃႈ။- 20ၸူဝ်ႈဢၼ်ဝၼ်းထွတ်ႈဝၼ်းမျၢတ်ႈလူင်ထႃႇဝရႃႉၽြႃးၼၼ်ႉဢမ်ႇပႆႇႁွတ်ႈမႃးၼၼ်ႉၸိုင် ၵၢင်ဝၼ်းတၵ်းပဵၼ်ဢၼ်လပ်းသိင်ႇၽိတ်းၽိတ်းၵႂႃႇဢေႃႈ။ လိူၼ်ၵေႃႈတၵ်းပဵၼ်လိူတ်ႈၵႂႃႇဢေႃႈ။- 21မိူဝ်ႈၼၼ်ႉ ၶဝ်ၸိူဝ်းဢၼ်ႁဵတ်းသူးတွင်းပထၼႃႇ တီႈၼႃႇမႃႉၸိုဝ်ႈသဵင်ထႃႇဝရႃႉၽြႃး ၵႃႈမီးၸိူဝ်းၼၼ်ႉ တၵ်းလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ၊ ဝႃႈၼင်ႇၼႆဢေႃႈ။
22ၵူၼ်းဢီႉသရေႇလႃႉၶဝ်ဢိူၺ်း၊ ထွမ်ႇဢဝ်ၵႂၢမ်းၸိူဝ်းၼႆႉသေၵမ်းတႃႉ။ ယေႇသူႉၵူၼ်းဝဵင်းၼႃႇၸရႅတ်ႈ ဢၼ်ပဵၼ်ၵေႃႉဢၼ်လႆႈသၢၵ်ႈသေႇၵႃႈတီႈၽြႃးပဵၼ်ၸဝ်ႈၼႂ်းသူၵွပ်ႈပိူဝ်ႈတၼ်းၶူဝ်းဢၼ်လၢၵ်ႇလၢႆး ဢိၵ်ႇတင်းၼီႉမိၵ်ႈလၢၵ်ႈၶၼႃႇ တင်းလွင်ႈတၢင်းဢၼ်လီဢၢမ်းတင်းလၢႆ ဢၼ်ၽြႃးပဵၼ်ၸဝ်ႈ ဢဝ်မၼ်းၸဝ်ႈႁဵတ်းၵႃႈၼႂ်းၶိုင်ႈၵၢင်သူၵႃႈၼင်ႇဢၼ်သူႁူႉယဝ်ႉၼၼ်ႉ၊- 23မၼ်းၸဝ်ႈဢၼ်လႆႈၶၢမ်ႇတၢင်းဢၼ် ဢၢပ်ႈၵွပ်ႈပိူဝ်ႈဢလူဝ်ႇဢၼ် ၽြႃးပဵၼ်ၸဝ်ႈမၵ်းၶၢၼ်းဝႆႉ ဢိၵ်ႇတင်း #2:23 ဢၼႃႇၵႃႉတမ်ႇသႃႉၺၢၼ်ႇ - ၺၢၼ်ႇဢၼ်ႁူႉၸႅင်ႈ လွင်ႈဢၼ်တေပဵၼ်မႃးမိူဝ်းၼႃႈ ဢၼႃႇၵႃႉတမ်ႇသႃႉၺၢၼ်ႇၸဝ်ႈၼၼ်ႉၸိုင်၊ သူတီႉဢဝ်သေယဝ်ႉ၊ ဢဝ်တင်းမိုဝ်းၶဝ်ၸိူဝ်းဢၼ်ဢမ်ႇတြႃးၼၼ်ႉ တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈလႄႈ ဢဝ်တၢႆယဝ်ႉ။- 24မၼ်းၸဝ်ႈၼၼ်ႉၸိုင်၊ ပိူဝ်ႈဢၼ်ဝူၺ်ႇတၼႃႇတၢင်းတၢႆ ဢမ်ႇမတ်ႉၽုၵ်ႇၶျုၵ်ႈၵမ်ဝႆႉလႆႈသေႇသေႇလႄႈ ၽြႃးပဵၼ်ၸဝ်ႈၵႄႈဝူၺ်ႇတၼႃႇၼၼ်ႉပႅတ်ႈသေလႄႈ ႁႂ်ႈမၼ်းၸဝ်ႈၶိုၼ်းလိပ်းယဝ်ႉ။- 25ၶုၼ်လူင်တႃႇဝိတ်ႈဢဝ်လွင်ႈမၼ်းၸဝ်ႈလၢတ်ႈဝႆႉလႄႈဝႃႈ၊ ၵဝ်ၼႆႉႁၼ်ထႃႇဝရႃႉၽြႃးသိုဝ်ႈၼႃႈတႂ်ႈတႃယူႇတႃႇသေႇဢမ်ႇထၢတ်ႇဢေႃႈ။ လွင်ႈမၼ်းၸမ်ႉ ၼင်ႇႁိုဝ်ၵဝ်တၵ်းဢမ်ႇမီးတၢင်းဢၼ်တူင်ႉဢၼ်ၶွၼ်းၸိုင် မၼ်းၸဝ်ႈမီးယူႇၵႃႈတီႈၽၢႆႇၶႂႃၵဝ်ဢေႃႈ။- 26ပိူဝ်ႈၼႆလႄႈ ႁူဝ်ၸႂ်ၵဝ်ပၢင်ႇၸိုၼ်ႈဢေႃႈ၊ ဝီႉၺိၺ်ႇၵဝ်ၵေႃႈသႂၢင်ႇသိူဝ်းဢေႃႈ။ လိူဝ်သေၼၼ်ႉၼိူဝ်ႉၵဝ်ၼႆႉတၵ်းမုင်ႈထႃႈမွင်းထႃႈသေလႄႈၵိင်းဝၢပ်ႈယူႇဢေႃႈ။- 27လွင်ႈမၼ်းၸမ်ႉ ဝီႉၺိၺ်ႇၵဝ်ၶႃႈၸိုင် ၸဝ်ႈႁဝ်းတၵ်းဢမ်ႇပႅတ်ႈဝႆႉၵႃႈတီႈၼႂ်းမိူင်းမရၼႃႉတီႈၶႃႈ။ တီႈၵူၼ်းဢၼ်မူတ်းၸၢင်ႇၸဝ်ႈႁဝ်းၵေႃႈ၊ ၸဝ်ႈႁဝ်းတၵ်းဢမ်ႇပၼ်ႁႂ်ႈမီးတၢင်းဢၼ်တူႇဢၼ်ၼဝ်ႈတီႈၶႃႈ။- 28ၸဝ်ႈႁဝ်းၼႄပျႃးသဵၼ်ႈတၢင်းဢၼ်ႁွတ်ႈထိုင်တီႈဢၼ်ဢသၢၵ်ႈလိပ်းတင်းလၢႆၼၼ်ႉဝႆႉတီႈၵဝ်ၶႃႈတီႈၶႃႈဢေႃႈ။ ၸဝ်ႈႁဝ်းတၵ်းႁႂ်ႈၵဝ်ၶႃႈပျေႉၸုမ်ႇတင်းၸႂ်ဢၼ်သိူဝ်းပျေႃႇ ၵွပ်ႈပိူဝ်ႈဢၼ်လႆႈႁၼ်ၼႃႈၸဝ်ႈၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။
29ပီႈၼွင်ႉၶဝ်ဢိူၺ်း၊ ႁႂ်ႈၵဝ်လႆႈဢဝ်လွင်ႈပေႃႈၸိူဝ်ႉၶိူဝ်းႁဝ်းတႃႇဝိတ်ႈၼၼ်ႉ လၢတ်ႈပၼ်တီႈသူလႅင်းလႅင်းသေၵမ်း။ မၼ်းၼၼ်ႉတၢႆၵႂႃႇလႄႈ လႆႈၶၢမ်ႇတၢင်းဢၼ်သၢင်းၵျူဝ်ႇယဝ်ႉဢေႃႈ။ ၶုမ်သၢင်းၶႅင်းမၼ်းၼၼ်ႉမီးယူႇတီႈႁဝ်း တေႃႇထိုင်ႁွတ်ႈမိူဝ်ႈလဵဝ်ၼႆႉဢေႃႈ။- 30မၼ်းၼၼ်ႉပဵၼ်ပရေႃးၽႅတ်ႈလႄႈ ႁူႉလွင်ႈဢၼ်ၽြႃးပဵၼ်ၸဝ်ႈလႆႈတိၵ်ႈထၢၼ်ႇတိူင်ႇဝႃႈဝႆႉလႄႈဝႃႈ၊ မၼ်းၸဝ်ႈတၵ်းႁႂ်ႈၸဝ်ႈၶရိၸ်ႈဢဝ်ၸႃႇတီႉၵူၼ်း လုၵ်ႉဢွၵ်ႇမႃးၵႃႈၼႂ်းၸိူဝ်ႉၶိူဝ်းမၼ်းလႄႈ ဢဝ်တၢင်ႇၵႃႈၼိူဝ်ပလၢင်ႇမၼ်းဢေႃႈ၊ ဝႃႈၼင်ႇၼႆၼၼ်ႉယူႇ၊- 31ႁၼ်လွင်ႈတီႈႁဵင်းၼၼ်ႉဝႆႉဢွၼ်တၢင်းယူႇသေလႄႈ ဢဝ်တင်းဢၼႃႇၵႃႉတမ်ႇသႃႉၺၢၼ်ႇ ႁေႃးလၢတ်ႈလွင်ႈဢၼ် ၸဝ်ႈၶရိၸ်ႈ တၵ်းလုၵ်ႉၶိုၼ်းၼၼ်ႉဝႆႉလႄႈဝႃႈ၊ ဝီႉၺိၺ်ႇမၼ်းၸဝ်ႈၼၼ်ႉ ဢမ်ႇၶၢမ်ႇတၢင်းဢၼ်ပႅတ်ႈဝႆႉၵႃႈတီႈၼႂ်းမိူင်းမရၼႃႉ။ ၼိူဝ်ႉမၼ်းၸဝ်ႈၵေႃႈဢမ်ႇႁွတ်ႈထိုင်တၢင်းဢၼ်တူႇဢၼ်ၼဝ်ႈ၊ ဝႃႈၼင်ႇၼႆဢေႃႈ။
32လွင်ႈဢၼ်ၽြႃးပဵၼ်ၸဝ်ႈႁႂ်ႈယေႇသူႉၼၼ်ႉ လုၵ်ႉၶိုၼ်းယဝ်ႉၼၼ်ႉၸိုင် ႁဝ်းၵႃႈမီးၼႆႉပဵၼ်ၵေႃႉဢၼ်ၶၢမ်ႇသၢၵ်ႈသေႇဢေႃႈ။- 33ပိူဝ်ႈၼႆလႄႈ မၼ်းၸဝ်ႈလႆႈၶၢမ်ႇတၢင်းဢၼ်ယုၵ်ႉယွင်ႈဝႆႉၵႃႈတီႈၽၢႆႇၶႂႃမိုဝ်းၽြႃးပဵၼ်ၸဝ်ႈၸိူဝ်ႉၼင်ႇၼၼ်လႄႈ လႆႈၵတီႉဢၼ်ၵိုင်ႇၵၼ်တင်းဝီႉၺိၺ်ႇဢၼ်မူတ်းၸၢင်ႇၸဝ်ႈ ၵႃႈတီႈပေႃႈၸဝ်ႈၼၼ်ႉယဝ်ႉၸင်ႇ သွၼ်းလေႃႇလွင်ႈတၢင်းဢၼ် သူလႆႈႁူႉလႆႈငိၼ်းၼႆႉဢေႃႈ။- 34တႃႇဝိတ်ႈၼၼ်ႉ ဢမ်ႇၶိုၼ်ႈၵၢင်ႁၢဝ်။ ၼႂ်းဝႃႈၼၼ်သေၵေႃႈ မၼ်းဝႃႈ၊- 35ထႃႇဝရႃႉၽြႃးလၢတ်ႈတီႈၸဝ်ႈၵဝ်ၶႃႈလႄႈဝႃႈ၊ ၸူဝ်ႈဢၼ်ၵဝ်ဢမ်ႇပႆႇဢဝ်ရၢၼ်ႇသူႇမႂ်းတင်းလၢႆၶျႃးဝႆႉ ႁႂ်ႈပဵၼ်တီႈတၢင်ႇတိၼ်မႂ်းၼၼ်ႉၸိုင်၊ ၼင်ႈယူႇၵႃႈတီႈၽၢႆႇၶႂႃၵဝ်တႃႉ၊ ဝႃႈၼင်ႇၼႆဢေႃႈ။
36ပိူဝ်ႈၼႆလႄႈ လွင်ႈဢၼ်ၽြႃးပဵၼ်ၸဝ်ႈ ဢဝ်ယေႇသူႉ ဢၼ်သူဢဝ်တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈၼၼ်ႉ ၶၢၼ်းဝႆႉၼႂ်းဢရႃႇၸဝ်ႈၶရိၸ်ႈ ဢိၵ်ႇတင်းဢရႃႇၸဝ်ႈဢၼ်ဢုပ်ႉပိူင်ႇၼၼ်ႉၸိုင်၊ ႁႂ်ႈမဵဝ်းၸိူဝ်ႉၶိူဝ်းဢီႉသရေႇလႃႉ တင်းသဵင်ႈတင်းလူင်မၢတ်ႈတွင်းဝႆႉလီလီငၢမ်းငၢမ်းတႃႉ၊ ဝႃႈၼင်ႇၼႆဢေႃႈ။
37ၶဝ်ၼၼ်ႉလႆႈငိၼ်းသေယဝ်ႉ၊ မီးႁူဝ်ၸႂ်ဢၼ်မႆႈႁွၼ်ႉလႄႈ တွင်ႈထၢမ် ပေႇတရူႉ တင်းတမၢၼ်ႇၸဝ်ႈတၢင်ႇၵေႃႉၸိူဝ်းၼၼ်ႉလႄႈဝႃႈ၊ ပီႈၼွင်ႉၶဝ်ဢိူၺ်း၊ ႁဝ်းၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။- 38ပေႇတရူႉၵေႃႈလၢတ်ႈလႄႈဝႃႈ၊ ပုၼ်ႈလွင်ႈၼင်ႇႁိုဝ်တၵ်းလွတ်ႈဢပႅတ်ႈၸိုင် သူၶုၵ်းၸႂ်လႆႈမႆႈၸႂ်လႄႈ ၶၢမ်ႇပပ်ႉတီႉၸမ်ႇၼႂ်းၼႃႇမႃႉၸိုဝ်ႈသဵင်ယေႇသူႉၶရိၸ်ႈၵူႈၵေႃႉၵူႈၵူၼ်းတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ သူတၵ်းလႆႈၶၢမ်ႇဢဝ်သူႉၵျေးၸူးဝီႉၺိၺ်ႇဢၼ်မူတ်းၸၢင်ႇၸဝ်ႈဢေႃႈ။- 39လွင်ႈမၼ်းၸမ်ႉ ၵတီႉၸဝ်ႈၼၼ်ႉၸၢပ်ႈသႅင်ႇၵၼ်တင်းသူ ဢိၵ်ႇတင်းလုၵ်ႈလၢင်းသူ တင်းၵူၼ်းဢၼ်ၵႆတင်းသဵင်ႈတင်းလူင်၊ ၵႃႈဢၼ်ၽြႃးပဵၼ်ၸဝ်ႈႁဝ်းထႃႇဝရႃႉၽြႃးတၵ်းႁွင်ႉဢဝ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။
40လိူဝ်သေၼၼ်ႉ၊ မၼ်းဢဝ်တင်းၵႂၢမ်းတၢင်ႇၸိူဝ်ႉတၢင်ႇဢၼ်ၼမ်ၼႃႇ ၶၢမ်ႇသၢၵ်ႈသေႇလႄႈတိုၵ်းယူင်းၶဝ်ၼၼ်ႉလႄႈဝႃႈ၊ ၵႄႇၶျွတ်ႈဢဝ်တူဝ်ၸဝ်ႈၵဝ်ႇသေၵႃႈတီႈၼႂ်းၵူၼ်းမဵဝ်းဢၼ်ၸႂ်ၵူတ်ႉၸႂ်ငေႃးၼႆႉတႃႉ၊ ဝႃႈၼင်ႇၼႆဢေႃႈ။
41ၶဝ်ၸိူဝ်းဢၼ် ဢဝ်ၵႂၢမ်းၼၼ်ႉသႂ်ႇၸႂ်လီလီငၢမ်းငၢမ်းၼၼ်ႉ ၶၢမ်ႇပပ်ႉတီႉၸမ်ႇလႄႈ ၼႂ်းဝၼ်းၼၼ်ႉၼပ်ႉဢၢၼ်ႇၵူၼ်းဢၼ်ၶဝ်ႈမီးသေသၢမ်ႁဵင်ၼိုင်ႈၸမ်ၸမ်ဢေႃႈ။- 42ၶဝ်ၼၼ်ႉၶၢမ်ႇဢဝ် တၢင်းဢၼ်တမၢၼ်ႇၸဝ်ႈသင်ႇသွၼ်ပၼ်၊ တၢင်းဢၼ်ႁဵတ်းမုၵ်ႉႁဵတ်းၸိူဝ်း၊ တၢင်းဢၼ်ဝိတ်းၶဝ်ႈမုၼ်း၊ တၢင်းဢၼ်ႁဵတ်းပထၼႃႇၸိူဝ်းၼၼ်ႉသေလႄႈ ယူႇသေႇသေႇဢေႃႈ။
ၸူဝ်ႈတႃႇဢသၢၵ်ႈတၢၼ်းတပႄးၸဝ်ႈ
43ၶဝ်ၼၼ်ႉ ၵူႈၵေႃႉၵူႈၵူၼ်း မီးတၢင်းဢၼ်ၵူဝ်ႁႄၼႃႇလူင်လၢင်လႄႈ တမၢၼ်ႇၸဝ်ႈၸိူဝ်းၼၼ်ႉၼႄပျႃးလွင်ႈတၢင်းဢၼ်လီဢၢမ်း ဢိၵ်ႇတင်းၼီႉမိၵ်ႈလၢၵ်ႈၶၼႃႇၼမ်ၼႃႇဢေႃႈ။- 44ၶဝ်ၸိူဝ်းဢၼ်ယုမ်ႇမၢတ်ႈတင်းသဵင်ႈတင်းလူင်ၼၼ်ႉ ႁဵတ်းမုၵ်ႉႁဵတ်းၸုမ်းတီႈလဵဝ်ၵၼ်သေလႄႈ သိူၵ်ႈသမ်ႇႁူမ်ႈၵၼ် ၸၢႆႇၵိၼ်ၵႃႈဢၼ်တူဝ်ၸဝ်ႈၵဝ်ႇမီးၼၼ်ႉဢေႃႈ။- 45ၶဝ်ၼၼ်ႉ ၶၢႆဢုၵ်ႉၸႃႇၶူဝ်းလဵင်းဢၼ်တူဝ်ၸဝ်ႈၵဝ်ႇပိူင်ႇၼၼ်ႉသေယဝ်ႉ၊ ၽႄမႅင်ႇပၼ်တီႈၶဝ်တင်းသဵင်ႈတင်းလူင် ၸွမ်းၵႃႈၼင်ႇၵႃႈဢၼ်ၶဝ်လူဝ်ႇႁင်းၽႂ်ႁင်းမၼ်းၼၼ်ႉဢေႃႈ။- 46ၶဝ်ၼၼ်ႉယူႇႁူမ်ႈၵၼ်ၼႂ်းပိၵ်ႈမၢၼ်ႇၸဝ်ႈၵူႈမိုဝ်ႉၵူႈဝၼ်းယူႇ ဝိတ်းၶဝ်ႈမုၼ်းၵႃႈတီႈႁိူၼ်းယူႇ၊ မီးတင်းႁူဝ်ၸႂ်ဢၼ်ၶၢဝ်သႂ် တင်းၸႂ်ဢၼ်ၸူမ်းသိူဝ်းမူၼ်ႈပျေႃႇလႄႈ ၵိၼ်တၢင်းၵိၼ်တၢင်းၶူပ်းၶဝ်ယူႇ၊- 47ယွင်ႈယေႃးၽြႃးပဵၼ်ၸဝ်ႈယူႇသေလႄႈ လႆႈၼႃႈလႆႈတႃၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်ဢေႃႈ။ ၶဝ်ၸိူဝ်းဢၼ်ယင်းတိုၵ်ႉႁွတ်ႈထိုင် တၢင်းဢၼ်ၵႄႇၶျွတ်ႈယူႇၼၼ်ႉၵေႃႈ ဢမ်ႇလွတ်ႈသေမိုဝ်ႉသေဝၼ်း ၽြႃးပဵၼ်ၸဝ်ႈႁႂ်ႈၶဝ်ႈၼႂ်းၸိူဝ်းၸဝ်ႈဢေႃႈ။
Currently Selected:
တမၢၼ်ႇၸဝ်ႈ 2: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
