FAARSO 22
22
FAARSAANOTE ROORRICHIRA SOODIMARI GEEDIMI HIRBI GARINNI DAAWITI FAARSO
DADILLENNA GALATU FAARSO
1Magano'ya! Magano'ya!
Mayira agurittoe?
Anewiinni mayira xeerti'ritto?
Raare'ya macciishshite mayira gatisa giwittoe?
2Magano'ya barra wo'ma ate woshshi'reemmo;
ati kayinni didawarattoe;
hashsha wo'ma fooliishsho dinoe.
3Ati kayinni Qullaawaho;
Israeelete manni galatannoheho.
4Annuwanke ate addaxxitino;
atino gatisoottonsa.
5Atewa higge raarte, balatenni gattino;
ate addaxxitino; atino disaalfachishoottonsa.
6Ani kayinni da'muulchoho; manna di"ikkoommo;
mannu baalu mishannoe, qacifatannoe.
7Afiehu baalu diqatannoe;
angichunni kultanni malxifattanni,
8«Kaaliiqa addaxxootto;
hanni mayira gatisa hoogiheyya?
Kaaliiqi baxannoheha ikkiro,
mayira kaa'la hoogiheyya?» yitannoe.
9Ati kayinni keerunni ilameemmo gede assoottoe;
unuunu qarra hee're ate addaxxeemmoha assittoe.
10Ilamummo barrinni kayise ate anga noommo;
ama'ya godowi giddo hee'reennanni ati Magano'yaati.
11Qarru iillinoena,
kaa'lannoehuno dinona, anewiinni faffooti.
12Lowo baarigaarra woraammate gede gaangeessitinoe;
qassanno woraamma Baasaanite gede doyissitinoe;
13siara ittananno doobbiyi gede,
afoonsa anera manqa assite fantino.
14Wolqa'ya waa ikkitu;
miqqa'ya baala addi addinni fultu;
wodani'ya gagate gede daaqi.
15Kokke qa'a yite mooltue;
arrawi'ya ga'roho qa'mie.
Shinoonnihu gede uulla tugge agurittoe.
16Bushu manni woshshu gede gaangeessie;
woshshu gede tuudde amaddue;
anga'yanna lekka'ya ladditue.
17Miqqa'ya baala reqecci yitanno;
baarigaarra'yano ikkito'ya la'e hagiidhitanno.
18Uddanna'yano adhitu;
hixa tuqqite beeqqitu.
19Ati kayinni Kaaliiqa ballo, anewiinni faffooti;
ati wolqa'yaatina, rakke dagge kaa'lie.
20Bisetenni gatisie;
lubbo'ya woshshu kunniwiinni agarie.
21Doobbiyu afiinni gatisie;
lubbo'ya qassanno buudda woraammannitenni agarie.
22Su'mikki jawimma roduuwi'yara kuleemmo;
songote mereerono galateemmohe.
23Ki'ne Kaaliiqa waajjitinanniri galattesi;
Yaiqoobi sirchi baalunku ayirrissesi;
Israeelete manni baalunku waajjesi.
24Qarraataamo dimishanno; lashshino diassanno;
albasino isiwiinni shawwu diassanno;
isiwa raaranno woyite macciishshannosi.
25Assoottoerira lowo songo mereero galateemmohe;
waajjitannoheri albaanni xano'ya uyi'reemmo.
26Buxane duubba geeshsha ittanno;
Kaaliiqa hasidhannori galattannosi;
insa, heeshshonsa diri baalunkunni qawaaxxidhe heedho!
27-29Gashshootu Kaaliiqihona,
gosa baala qaagge, Kaaliiqiwa higganno;
daga baala albasiinni kumbuultanno.
Kunni daafira, daga isi gashshanno.
Baattote aani duuwaleeyye baala jilte isira kumbuultanno;
bushsha e'annori baalunna,
lubbonsa reyotenni gatisidhe affannokkiri baalu,
albasiinni guluphitanno.
30Dagganno ilama soqqantannosi;
mannuno Mootichu looso dagganno ilamara kulanno.
31Kunni ka'a ilamanno mannira,
«Kaaliiqi mannasi gatisino» yine kullanni.
Currently Selected:
FAARSO 22: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
