MAARQOOSI 14

YESUUSIRA GANNOONNI GANO

(Mat 26:1-5; Luq 22:1-2; Yoh 11:45-53)

1Yihudaho Agure Sa"ate Ayyaananna Timu Ayyaana ayirrinsara, lamu barri gate hee'reenna, qeesootu roorrootinna Seeru rosiisaano Yesuusa amadde shitanno doogo hasidhanni no. 2Ikkollana, «Mannu gibbo kayisanno» yite waajjitino daafira, «Ayyaanu barra dikinseemmo» yitu.

YESUUSIRA SHITTO BUURTU MANCHO DHAGGE

(Mat 26:6-13; Yoh 12:1-8)

3Yesuusi Biitaaniyaho taraawannoha gogu dhibba afi'rino manchi Simiooni mine sagalete ofolle hee'reenna, mitticho mancho lowo woxinni hirrannita naardoosi yinanni shitto, albasxiroosi yinanni kinchinni seekkinoonni gujuujjera haadhe daggu. Gujuujjete afoo hiiqqite, shitto Yesuusi umira duntu. 4Hakko noo manni giddonni mitu mitu hanqite, «Tenne shitto mulla mayira hunnanni? 5Woleteemmero, tenne shitto 300 roorannohura kinchu birrira hirre, woxe buxanete uyinannihu baino» yite mancho lowo geeshsha arrassituse. 6Yesuusi kayinni, «Agurrese! Mayira qarrissinannise? Ise anera dancha coye assitino. 7Buxane wo'manka woyite ki'ne ledo noona, baxxini woyite kaa'litinanninsa. Ane kayinni wo'ma woyite diaffinannie. 8Tini mancho wolqase uyitu geeshsha assitino; bisi'yara waammate albaanni balaxxe shitto buurtinoe. 9Halaale yeemmo'ne: Dagate konne Dancha Duduwo dudumbanniwa baala, ise qaaggora kuni assitinori kullanna hee'ranno» yiinsa.

YIHUDI YESUUSA SAYISE AARA SUMUU YII

(Mat 26:14-16; Luq 22:3-6)

10Tonaalame rosaanosi giddonni mittu, Asiqorootichu Yihudi, Yesuusi sayise aara qeesootu roorrootiwa ha'ri. 11Insano konne coye macciishshite, lowo geeshsha hagiidhite, woxeno uyitannosi gede coyidhu. Isino Yesuusa sayise aate, injo hasi'ranni keeshshi.

YESUUSI AGURE SA"ATE AYYAANI HURBAATE ROSAANOSI LEDO ITI

(Mat 26:17-25; Luq 22:7-14,21-23; Yoh 13:21-30)

12Agure Sa"ate Ayyaani ge'recho gorri'nannihura Timu Ayyaanira umi barra, rosaanosi Yesuusiwa shiqqi yite, «Agure Sa"ate Ayyaaniha hashshi hurbaate hiikkiicho qixxeessinummohero woyyate?» yite xa'mitusi.

13Isino rosaanosi giddonni lame, «Katama hadhine, hakko wayi gambayicho duhe noo mancho affinannina, isi faana hadhe. 14Isi eanno minira martine minu anna, ‹Rosiisaanchinke, «Rosaano'ya ledo Agure Sa"ate Ayyaaniha hashshi hurbaate iteemmo mini hiikkiichooti yiino» yiiyye. 15Isino minu aana minnoonnihura layinki minira karre qixxeessinoonniha hala'lado darga leellishanno'nena, hakko qixxeessenke› » yee soyi.

16Lamunku rosaano katama marte, Yesuusi yiinonsa gede ikke nooha affu. Agure Sa"ate Ayyaani hurbaateno hakko qixxeessitu.

17Yesuusi hawarrita tonaa lamunku rosaanosi ledo dayi. 18Hurbaate ittanni heedheenna Yesuusi, «Halaale kuleemmo'ne: Ki'ne giddonni mittu, xa ledo'ya hurbaate itanni noohu, ane sayise aannoe» yii. 19Insa kunni coyira dadillite mittu mittunku, «Aneeti ikka?» yitu. 20Yesuusi qole, «Xa kune ki'ne tonaa lamunku giddonni mittu, ane ledo gawatetenni tima qasi'ranni no. 21Manchi Beetti alba yine borreessinoonni garinni reyanno; Manchi Beetto sayise aannohura hakko manchira kayinni aanne'e! Hakku manchi ilama hoogoommero woyyate» yii.

MOOTICHU HURBAATE

(Mat 26:26-30; Luq 22:14-20; 1Qor 11:23-25)

22Ittanni heedheenna Yesuusi tima haa're, galatu huuccatto asse, hiiqqaqqe, rosaanosira, «Hii'e, kuni maala'yaati» yee uyinsa.

23Finiinchono haa're, galatu huuccatto asse kae eennansa, wo'munku finiinchunni aggu. 24Yesuusi, «Lowo manni daafira du'nantannoti tini, gondooru mundee'yaati. 25Halaale yeemmo'ne: Hakko barra Maganu Gashshootira haaro agammo geeshsha, tenne woyinete haqqicho laalonni qixxeessinoonniha layinkimeeshsho diageemmo» yiinsa.

26Hakkunni gedensaanni, galatu faarso faarsite ka'e, Ejedhete Ilaala gooddidhu.

PHEEXIROOSI BADHE WODHANNOSITA YESUUSI BALAXE HIMANI

(Mat 26:31-35; Luq 22:31-34; Yoh 13:36-38)

27Yesuusi rosaanosira, «‹Allaalaancho ganeemmo; ge'reewuno billaallanno› yine borreessinoonnina, ki'ne baalunku badhe wodhitinannie. 28Reyotenni kaummohu gedensaanni kayinni, ki'ne balaxe Galiila saeemmo» yiinsa.

29Pheexiroosi, «Wolu baalu nafa badhe wodhihero, ani diagudheemmohe» yee coyi'ri. 30Yesuusi qole, «Halaale yeemmohe: Techo hashsha lukkichu lame hige ganikkinni, ati sase higge, ‹Iso diegennoommo› yaattoe» yiisi. 31Pheexiroosi kayinni, «Reyano hasiissannoha ikkiro, ate ledo reemmo ikkinnina, horontanni badhe diwodheemmohe!» yee kaajjishe coyi'ri. Wole rosaano baalano hatto yitu.

YESUUSI GEETESEMAANETE MAGANO HUUCCI'RI

(Mat 26:36-46; Luq 22:39-46)

32Hakkunni gedensaanni, Geetesemaane yinanniwa ka'e hadhu. Yesuusi rosaanosi, «Ani Magano huucci'rammo geeshsha, ki'ne konne ofolle» yiinsa. 33Pheexiroosi, Yaiqoobinna Yohaannisi ledosi haa're ha'rinsa. Hakkiicho hee'reenna lowo yaaddonna dadillu amadisi. 34«Lubbo'ya reyote geeshsha dadillitino. Ki'ne kayinni goxxinikkinni konniicho agarre!» yiinsa. 35Insawiinni alba hige shiqqi yee, uulla uwe, dandaamannoha ikkiro, hatti qarru saate isiwiinni sa'anno gede huucci'ri. 36«Anna, annaanna'ya, ati baalankare dandaatto. Konne qarru finiincho anewiinni hoolie. Kayinnilla, ate hedo gede ikko ikkinnina, ane hedo gede ikkoonke» yii.

37Sasente rosaanosiwa higanno woyite, goxxe noore afi. Kunnira Pheexiroosi, «Simiooni, goxoottoni? Mitte saate nafa geleela didandaatto? 38Jifamate giddora e'inannikki gede jaattine huuccidhe! Ayyaanu qixxaawaho; maalu kayinni daafuraamoho» yii.

39Galagale ha're alba yaanni huucci'ri garinni huucci'ri. 40Layinkimeeshsho rosaanosiwa daanno woyite, goxano amaddeennansa mugganni noore afi; insano isira haadhe dawartannore hooggu.

41Sayikkimeeshshono galagale hige, «Xaano goxxinenna fooliishshidhinella heedhinoonni? Xaate ikkino; yanna iillitinona, Manchi Beetto cubbaataammu angara sayinse uyinanni. 42Ka'e ha'nona, sayise aannoehu kuneeti dayinona» yiinsa.

YESUUSI AMADAMA

(Mat 26:47-56; Luq 22:47-53; Yoh 18:3-12)

43Hakkawoyintenni Yesuusi tenne coyi'ranni hee'reenna, tonaa lame rosaanosi giddohu mittu Yihudi kae dayi. Isi ledo bisenna dulla anga adhinohu lowo manni no. Kuni manni qeesootu roorrooti, Muse Seeri rosiisaanonna geerru sokkeenna dagginoreeti. 44Sayise aannohu Yihudi, «Ani keere haa're sunqeemmohu isootina amadde. Seekkitine amaddine haadhine hadhe!» yee malaate uyinsa.

45Yihudi Yesuusiwa daanni hee'renni, «Rosiisaancho'ya» yee sunqisi. 46Hatte yannara Yesuusa amadde usurtusi. 47Yesuusi mule uurrite noori giddonni mittichu bise fushshe, qeesootu qari soqqamaanchira macca gane tayisi. 48Yesuusi qole, «Mulqi'rannoha amandannihu gede ane amadate bisenna dulla duqqitine daggini? 49Barra baala Qullaawa Mine rosiisanni hee'rummo geeshsha, diamaddinoonnie. Kuni ikkinohu kayinni, Qullaawa Borro yitinohu wo'manno gedeeti» yii. 50Hatte yannara rosaanosi baala Yesuusa agurte xooqqu.

51Darbata calla uddi'rinohu mittu wedellichi Yesuusi hoode ha'ri. Amaddasira hasidhuta, 52darbata hune mullichu xooqi.

YESUUSI YOOTE DARGIRA SHIQI

(Mat 26:57-68; Luq 22:54-55,63-71; Yoh 18:13-14,19-24)

53Hakkunni gedensaanni, Yesuusa qeesootu qari minira haadhe massitusi. Hakkiicho qeesootu roorrooti baalu, gobbate geerrinna Muse Seeri rosiisaano gamba yite no. 54Pheexiroosi qeesootu qari hoowe geeshsha Yesuusiwiinni xeerti're badheenni ha'ranni mari. Hakkiicho agaraasinete ledo ofolle giira giwaa'ranni no. 55Qeesootu roorrootinna Aliidi Yoo Mine ofolle noo manni baalu Yesuusa shinanni gede, taje ikkanno coye hasidhu; ikkollana diafidhino. 56Lowo manni kaphunni naqqasino; coyinsa kayinni dixaadino. 57Mitu mitu kaphunni ka'e, 58«‹Ani konne mannu mininoha Maganu mine diige, sasu barri giddo wole angatenni minnoonnikkiha mineemmo› yaanna macciishshinoommo» yitu. 59Hatto yiteennano coyinsa horontanni dixaadino.

60Qeesootu Roorrichi gotti yee mereeronsa uurre, «Qolattori dinoheni? Kuni manni ate aana coyi'ranni noo coyi maati?» yee Yesuusa xa'mi. 61Yesuusi kayinni mittoreno qolikkinni sammi yii. Qeesootu Roorrichi lede, «Maassamino Magani Beetti, Kiristoosi ateetini?» yee xa'misi. 62Yesuusino, «Ee, aneeti. Manchi Beetti Wo'manka Dandaanno Maganira qiniiteenni ofollannanna, gordu gomichinni daanna la'inanni» yii. 63Qeesootu Roorrichi hanqunni uddanosi dare, «Wole naqaashshe mayira hasi'neemmo? 64Kuneeti, Magano xonanna macciishshitinoonni; xa ma lawanno'ne?» yii. Duuchunku, «Reyona!» yitu.

65Mitu anja tuffanni, alba guggushshite gantanni, «Hanni masaali! Ganihehu ayeti?» yitusi. Agaraasineno qawaaddanni haadhe hadhusi.

PHEEXIROOSI YESUUSIRA BADHE WODHISI

(Mat 26:69-75; Luq 22:56-62; Yoh 18:15-18,25-27)

66Pheexiroosi Qeesootu Roorrichi minira eelaanni hoowete giddo hee'reenna, mitte Qeesootu Roorrichi borojjicho ka'e daggu. 67Ise Pheexiroosi giira giwaa'ranna xunsite la'e, «Atino Naaziretete Yesuusi ledoho» yitusi. 68Isi kayinni, «Ani diegennoommo; ati yaattare diafoommo» yee moromi. Hatto yiihu gedensaanni nafarira fuli; hakka woyite lukkichu gani. 69Beetto Pheexiroosi la'e, hakko uurritinorira, «Kunino insa widooti» yite ledde coyidhu. 70Isi kayinni lede moromi. Shiima yanna gedensaanni, hakko uurre noo manni Pheexiroosi, «Galiilu mancho ikkootto daafira, addaho atino insa widiho» yitusi. 71Isi kayinni, umosi xo'nanni, «Konne yitinanni mancho ani diegennoommo!» yee xaari. 72Hakkawoyintenni lukkichu layinkimeeshsho gani. Pheexiroosi, «Lukkichu layinkimeeshsho ganikkinni sase higge ‹diegennoommosi› yaattoe» yee Yesuusi coyi'rino qaali qulli yeennasi heqqifate wi'li.

Currently Selected:

MAARQOOSI 14: QulMax

Highlight

Copy