YOHAANNISI 6

YESUUSI ONTE KUME MANNA ITISE DUUSHSHI

(Mat 14:13-21; Maq 6:30-44; Luq 9:10-17)

1Hakkunni gedensaanni Yesuusi Xibiriyadoosi yinanniha Galiilu Baara widoonni fuli. 2Lowo manni Yesuusi dhiwamaasine hursatenni loosino maalale lae hoodesi ha'ri. 3Yesuusino rosaanosi ledo ilaala fule hakko ofolli. 4Ayihudennihu Agure Sa"ate Ayyaanino gamba yee no. 5Hakka woyite Yesuusi haxo gotti yee la"anno woyite lowo manni isiwa hige daanna afe, Filiphoosi woshshe, «Kageeshshi mannira sagale maminni anfanni?» yii. 6Yesuusi assannore afe no; hatto yiinohu jife la"asira yeeti. 7Filiphoosino, «Mitto mittoho shiima shiima iillishate lamu xibbi birrinni#6:7 lamu xibbi birrinni yaannohumittu manchira barrunni loosino daafurira uyinanni womaashshaati yaate. hirroonni timma nafa di"ikkitanno» yee qoli. 8Rosaanosi giddonni mittu Simiooni Pheexiroosi rodii Indiriyaasi, 9«Onte hayixu timmanna lame qulxu'me anga haa're noo beetti konne no; ikkollana kuni kageeshshi mannira ma assanno?» yii. 10Yesuusino rosaanosi, «Manna gaamo gaamo assitine daffitino hayisso aana ofollanno gede asse» yee rosaanosi hajaji. Kiiro onte kume ikkanno manni hayissote aana ofolli. 11Hakkunni gedensaanni tima haa're kayise, Magano galate, ofollino mannira beehi. Qulxu'meno beehinsa. Baalunku hasiisannonsa geeshsha adhitu. 12Wo'munku itte duubbuhu gedensaanni Yesuusi rosaanosi, «Shiimuno baikkinni intanna gatino hambaa gamba asse!» yii. 13Insano mannu itanna gantoha hayixu timma hambaa gamba assite tonaa lame soro wo'ma kayissu. 14Mannuno Yesuusi loosino dhagge lae, «Halaalintanni kuni tenne gobba daanno himanaanchooti» yii. 15Mannu Yesuusa wolqatenni amade moote assasira hedinota afe, callisi fule gaaru widira hige ha'ri.

YESUUSI BAARU AANAANNI HA'RI

(Mat 14:22-33; Maq 6:45-52)

16Yanna hawarrituta rosaanosi baaru gamira dirritu. 17Yowolote ofolte Qifirinahoomi hadhu. Hatte yannara tunse no; Yesuusino insawa dayinokki woyiteeti. 18Jawaata bubbe dagge baaru aana dambala kayissu. 19Rosaanosi shoolenna onte kume qaafo ikkanno geeshshiwa baaru aana laaqidhanni hadhu. Hakko mereero Yesuusi baaru aana ha'ranni yowolonniwa iilla rahita waajjitu. 20Isi kayinni, «Aneetina waajjitinoonte!» yii. 21Insano yowolote giddora haadhasira hasidhu. Hakkawoyintenni yowolo hadhanni noo gobba iillitu.

MANNU YESUUSA HASI'RANNI HA'RI

22Layinki soodo baara widoonni gatino manni, mitte yowolo calla noota afe, Yesuusi rosaano calluwinsa hadhinotanna Yesuusi ledonsa yowolote giddo nookkita buuxi. 23Ikkirono, wole yowolla Xibiriyadoosi Kataminni ka'e Yesuusi Magano galate mannaho timma beehiwa martu. 24Mannuno Yesuusi woy rosaanosi hakko nookkita afe, hatte yowollara ofolle Yesuusa hasi'ranni Qifirinahoomi ha'ri.

YESUUSI HEESHSHOTE SAGALEETI

25Yesuusa baara widoonni affe, «Rosiisaancho, kawa mamoote dayitto?» yite xa'mitusi. 26Yesuusi qole, «Halaale yeemmo'nena, hassinanni heedhinoonniehu sagale ittine duubbinoonnihuraati ikkinnina maalale la'inoonni daafira di"ikkino. 27Ba'anno sagalera loosidhinoonte! Maganu Annu konne coye buuxisate Beettisi aana sumude worino daafira, Maganu Beetti aanno'netera hegere heeshshotera loosidhe» yiinsa. 28Insano, «Maganu looso loosate ma assino?» yitu. 29Yesuusino, «Maganu loosi isi soyinoha amma'nate» yiinsa. 30Insano, «Loosoottore la'ne ate ammanneemmohe gede ma malaate leellishattonke? Ma loosatto? 31‹Ittanno gede gordunni sagale uyinonsa› yine borreessinoonninte gede, annuwanke halalla mennaho yinanni sagale ittino» yitusi. 32Hatte yannara Yesuusi, «Halaalaancho sagale gordunni uyino'nehu Anna'yaati ikkinnina, Muse di"ikkino. 33Maganu sagale gordunni dirrannohonna mannaho heeshsho aannoho» yii.

34Insano, «Mootichanke, hattootiro wo'manka woyite hakko gari sagale uyinke» yitu. 35Yesuusino, «Ani heeshshote sagaleeti; anewa daannohu horonta dihudi'ranno; ane ammanannohu horonta digoo'ranno. 36Yuummo'nente gede, ane affinoonnie; kayinnilla diammantinoonnie. 37Anni'ya aannoehu baalu anewa daanno. Anewa daannoha horonta fushshe dihuneemmo. 38Ani gordunni dayommohu soyinoehu hedinore wonshammoraati ikkinnina, umi'ya hedo wonshate di"ikkino. 39Soyinoehu hedono, uyinoeha mittono hunummokkinni goofimarchu barra reyotenni kayiseemmo gedeeti. 40Anni'ya hedo, Beettisi widira la"annohunna Beettosi ammanannohu baalu hegere heeshsho afi'ranno gedeeti. Anino goofimarchu barra kayiseemmosi» yii.

41Yesuusi, «Gordunni dirroommo sagale aneeti» yiino daafira Ayihude gunguntu. 42Insano qolte, «Kuni Yooseefi beetto Yesuusa di"ikkino? Annasinna amasi dianfoommo? Hiitto ikke ‹Gordunni dirroommo› yaanno?» yitu. 43Yesuusi, «Ki'ne ki'neneewa gunguma agurre. 44Soyinoehu Anni'ya daanno gede assikkinni anewa daa dandaannohu dino. Anewa daannoha goofimarchu barra reyotenni kayiseemmosi. 45Himanaanote maxaaffa giddo, ‹Mannu baalu Maganuwiinni rosanno›#Isa 54:13 lai. yine borreessinoonni. Kunnira, Anni'yawiinni macciishshe rosinohu baalu anewa daanno. 46Maganuwiinni dayinoha agurranna Anna afinohu ayino dino. Anna afinohu iso callaati. 47Halaale kuleemmo'ne; ammanannohura hegere heeshsho noosi. 48Ani heeshshote sagaleeti. 49Annuwa'ne halalla menna ittino; ikkollana reyitino. 50Gordunni dirritino sagale tenneeti; tenne sagale itannohu horontanni direyanno. 51Gordunni dirroommohu heeshshote sagale aneeti. Tenne sagale itannohu baalu hegere geeshsha hee'ranno. Mannaho heeshsho ikkanno gede ani eemmo sagale maala'yaati» yii.

52Hatte yannara Ayihude, «Kuni manchi maalasi intammora hiitto asse aannonke?» yite insa insanaawa xa'mantu. 53Kunnira Yesuusi, «Halaale kuleemmo'nena, Manchi Beetti maala ita hoogginiro, mundeesino aga hoogginiro heeshsho dino'ne. 54Maala'ya itannohuranna mundee'ya agannohura hegere heeshsho noosi. Anino goofimarchu barra reyotenni kayiseemmosi. 55Maali'ya halaali sagaleeti; mundee'yano halaali agooti. 56Maala'ya itannohunna mundee'ya agannohu baalu anenni hee'ranno; anino isinni hee'reemmo. 57Heeshshonnihu Annu soyinoe garinni, anino isinni heeshshonniha ikkoommonte gede, maala'ya itannohu baalu anenni heeshshonniha ikkanno. 58Kunnira gordunni dirritino sagale tenneeti; tini sagale annuwa'ne ittute gedeeta di"ikkitino. Hatte sagale itturi reyitino. Tenne sagale ittannori kayinni hegerera heedhanno» yii. 59Yesuusi konne coye coyi'rinohu Qifirinahoomi xaadu mine rosiisanniiti.

LOWO ROSAANO YESUUSI HOODE HA'RA AGURTU

60Rosaanosi giddonni haammatu konne coye macciishshite, «Kuni coyi kaajjadoho; ayi dandee macciishshanno?» yitu. 61Yesuusi rosaanosi kunni coyira gunguntinota afe, «Kuni coyi gufidhinanni gede assanno'nehoni? 62Manchi Beetti alba hee'rannowa ha'ranna affinanni yannara ma yitinaraatiyya? 63Heeshsho aannohu Ayyaanaho; mannu wolqa mittoreno dikaa'litanno. Ani kuloommo'ne qaali ayyaanaho; qoleno heeshshote. 64Ki'ne giddo kayinni mitu mitu amma'nitinokkiri no» yii. Yesuusi konne coyi'rinohu amma'nitinokkiri ayeootironna iso reyote sayise aannohu ayetiro balaxe afino daafiraati. 65Yesuusi lede, «Anni'ya fajjinoha agurranna anewa daa dandaannohu dino yoommohu kunniraati» yii.

66Kunni daafira rosaanosi giddonni batinyu badhera higgu. Hatte yannanni kayisse Yesuusi hoode dihadhino. 67Kunnira Yesuusi tonaa lamenka rosaanosi, «Ki'neno ha'ra hasidhinannini?» yiinsa. 68Simiooni Pheexiroosi, «Mooticha'ya, ayenkewa ha'neemmo? Atera hegere heeshsho qaali noohe. 69Ninkeno ati Qullaawu Magani Beetto ikkoottota anfoommo; ammannoommo» yii. 70Yesuusino, «Ani ki'ne ditonaa lame doorummo'ne? Ki'ne giddonni kayinni mittu Daawuloosiiti» yiinsa. 71Konne coyi'rinohuno, Asiqorootichu Simiooni beetti Yihudire kulateeti. Yihudu tonaa lamu ledoha ikkirono, Yesuusa reyote sayise aannohu iso ikkino daafiraati.

Currently Selected:

YOHAANNISI 6: QulMax

Highlight

Copy