YOHAANNISI 4

YESUUSANNA SAMAARITTE MANCHO

1Hatte yannara Farisootu, Yohaannisinni roore Yesuusi lowo manna rosaano assinotanna cuuinota macciishshitu. 2Ikkollana, rosaanosilla cuu'ino ikkinnina Yesuusi dicuuino. 3Yesuusi Farisootu yitinore macciishshe, Yihuda agure galagale Galiila ha'ri. 4Hakka ha'ri woyite Samaariyu widoonni hige sa"a hasiissinosi. 5Ha'ranni, Samaariyaho Yaiqoobi beettisi Yooseefira uyino gobba mule noo katama Siikaari yinanniwa dayi. 6Hakkiicho Yaiqoobi buicho no. Yesuusino seeda doogo ha'rinohura daafure buete mule ofolli; yannano barru taalooteeti.

7Hatte yannara, mitte Samaaritte mancho waa dirridhara hatte buewa daggu. Yesuusino, «Ageemmo waa uue» yiise. 8Hakka woyite rosaanosi sagale hidhitara katama hadhe no. 9Samaaritte Yesuusa, «Ati Ayihudicha ikkite heedhe, ane Samaaritte, ‹Ageemmo waa uyie› hiitto yaatto?» yitu. Hatto yitinohu Ayihudenna Samaarootu xaado afidhinokki daafiraati. 10Yesuusi qole, «Maganu eltonna, ‹Ageemmo waa uue› yaannohehu ayetiro afoottaha ikkoommero, iso huucci'ratta; isino atera heeshshote waa aannohehu baino» yiise. 11Manchono, «Mooticha'ya, dirri'nanni uduunnichi dinohe; buichono giddo diimete; heeshshote waa hiikkiinni afi'ratto? 12Ati tenne buicho uyinonkeha annanke Yaiqoobi roorattoni? Isi, oososinna saadasi tenne buicho aggino» yitusi. 13Yesuusi qole, «Tenne buicho waa agannohu baalu galagale goo'ranno. 14Ani eemmo waa agannohu kayinni hegere geeshsha digoo'ranno; ani eemmo waa agannohu, hegere heeshsho uyitanno buicho giddosinni fultannoha ikkanno» yii. 15Manchono, «Mooticha'ya, goo'reemmakki gedenna dirri'rammara layinkita kawa dayemmakki gede, hakkonne waa uue» yitu.

16Yesuusino, «Marte ayiddaannakki woshshite amo!» yiise.

17Manchono, «Ayiddaanni dinoe» yite qoltu.

Hakka woyite Yesuusi, «‹Ayiddaanni dinoe› yaakki danaho. 18Ontu ayiddaanni noohe; xa ledokki noohu kayinni ayiddaannakki di"ikkino; kunnira halaale coyi'rootta» yiise. 19Manchono, «Mooticha'ya, ati himanaancho ikkoottota xaalla afumma. 20Annuwanke kunni ilaali aana magansidhino; ki'ne kayinni, ‹Magano magansi'ra hasiisanno dargi Yerusaalamete› yitinanni» yitu.

21Yesuusi qole, «Tee mancho, Magano Anna kunni ilaali aana woy Yerusaalamete magansidhinannikki yanna daggannota ammanie. 22Ki'ne affinoonnikki magano magansidhinanni; ninke kayinni gato Yihudunni fultanno daafira, anfoommo Magano magansi'neemmo. 23Magano Anna ayyaanunninna halaalunni magansidhannorira yanna dagganni no; kune xaanni dagge no; Maganu Annu hasi'rannorino hattoonni magansidhannoreeti. 24Maganu Ayyaanaho; magansidhannosirino Ayyaanunninna halaalunni magansidhasira hasiisanno» yiise.

25Manchono, «Kiristoosa yinannihu buuraminohu daannota afoomma; isi dayiro, duuchankare kulannonke» yitu. 26Yesuusino, «Ani xa ate ledo hasaawanni noommonku isooti» yiise.

27Hakko mereero, Yesuusi rosaano hadhinowiinni daggu. Yesuusi meyate ledo hasaawanna affe lowo geeshsha dhaggeeffattu. Ikkollana, «Ma hasi'rootto?» woy, «Ise ledo mayira hasaawatto?» yiinosihu dino. 28Hakkunni gedensaanni mancho gambayichose hakko agurte katama hadhe, 29«Loosoommare baala kulinoe mancho la'inannina amme! Isi Kiristoosa#4:29 Kiristoosa woy Buuraminoha yaa dandiinanni. ikka ikka?» yitu. 30Mannuno katamunni kae Yesuusiwa mari.

31Konne mereero rosaano Yesuusa, «Rosiisaancho, mitore afooho wodhi!» yitusi.

32Isi kayinni, «Ani iteemmoti ki'ne affinoonnikki sagale nooe» yii. 33Kunnira rosaanosi, «Sagale abbinosihu no ikka?» yite mimmitonsa xa'mitu. 34Yesuusi qole, «Ane sagale soyinoehu haja wonshatenna loososi guutate. 35Ki'ne kayinni, ‹Shoolu agani gedensaanni gide gamba assi'nanni yanna iillitanno› diyitinanni? Ani kuleemmo'nena ille'nenni la'e! Gidu laalino; gamba assateno iillino. 36Gide mixxannohu hunkiisi guma gudhanno; hegere heeshshora ikkanno laalcho gamba assi'ranno. Wixi'rannohunna mixxannohu mitteenni hagiidhanno. 37Kunnira, ‹Mitu wixanno; mitu midanno› yinanni maammaashshi halaaleho. 38Anino daafurtinoonnikkiha middinara soommo'ne; wolootu daafurte loossino; ki'ne kayinni insa daafurinni laalcho afidhinoonni» yiinsa.

39Mancho, «Loosoommare baala kulinoe» yite coyidhino qaalire Samaariyu manni baalu ammani. 40Samaariyu manni Yesuusiwa mari yannara, insa ledo keeshshanno gede huuccidhusi. Isino insa ledo lame barra keeshshi. 41Qaalesi macciishshe lowo manni lexxe ammanisi. 42Manchoteno, «Xa ninke iso amma'ninoommohu, ati kuloottankehura ikkikkinni, ninke uminke macciishshinoommo daafiranna isi addinta alamete gatisaancho ikkinota buunxoommo daafiraati» yitu.

YESUUSI GASHSHAANCHU BEETTO HURSI

(Mat 8:5-13; Luq 7:1-10)

43Yesuusi Samaariyaho lame barra hosihu gedensaanni Galiila ha'ri. 44Isi umisinni alba balaxe, «Himanaanchu umisi gobbara diayirranno» yee coyi'rino. 45Ikkirono, Galiila ha'ri yannara Galiilu manni danchu albinni haa'rinosi. Hatto assitinohu, Agure Sa"ate Ayyaana ayirrisate Yerusaalame martinowa assinore affino daafiraati.

46Hakkunni gedensaanni, Yesuusi waa woyinete xajjera soorriwa Galiila Qaana mari. Hatte yannara Qifirinahoomi mittu gashshaanchira beettu dhiwame no. 47Isino Yesuusi Yihudu gobbanni Galiila dayinota macciishshe kae Yesuusiwa dayi. Hakku manchi Yesuusi Qifirinahoomi mare foolu fulara rahe nooha beettosi hursannosi gede huucci'ri. 48Yesuusi qole, «Ki'ne malaatenna maalale la'inikkinni diammanitinanni» yiisi. 49Beettu anni Yesuusa, «Mooticha'ya ballo, beetti'ya reyikkinni rakke iillie» yii.

50Yesuusi qole, «Beettikki hurinona ha'ri!» yiisi. 51Manchu minira ha'ranni hee'reenna soqqamaanosi doogo xaadde, «Beettikki hurino» yitusi.

52Manchuno beettisira woyya ikkinohu ma yannaatiro xa'mi.

Insano, «Iibbabbo higginosihu be'ro lamala saatenniiti» yitu. 53Beettu annino hatti yanna Yesuusi, «Beettikki hurino!» yiisita ikkitinota qaagi. Kunnira hatte yannanni kayisse isinna minisi manni baalu Yesuusa ammani. 54Tini maalale Yesuusi Yihudunni Galiila daye layinkimeeshsho loosinote.

Currently Selected:

YOHAANNISI 4: QulMax

Highlight

Copy