YOHAANNISI 1

HEESHSHOTE QAALE

1Umo Qaalu no. Qaaluno Maganu ledo no. Hakku Qaalino Maganoho. 2Qaalu umonni Maganu ledo no. 3Baalunkuri isinni ikkino. Kalaqaminori giddo, isiweello kalaqaminori mitturino dino. 4Isi giddo heeshsho no; hatti heeshshono mannu xawaabbaati. 5Xawaabbu tunsichoho xawanno; tunsichuno horontanni diqeelinosi.

6Maganu soyinohu mittu Yohaannisi yinanni manchi dayi. 7Isi xawaabbaho naqaashshe ikkaranna mannu baalu isi widoonni hige ammananno gede farci'rara dayino. 8Isi xawaabbu daafira farci'rannoho ikkinnina isi umisi xawaabba di"ikkino. 9Manna baalaho xawannohu halaalaanchu xawaabbi tenne alame daanni hee'rino.

10Isi alamete aana no; alameno isinni kalaqantino. Alame kayinni diegentinosi. 11Isi isiriwa dayino; isiri kayinni dihaadhinosi. 12Haadhinosiriranna su'misinni amma'nitinorira kayinni, Maganu ooso ikkitanno gede roorre uyinsa. 13Insa Maganu ilaati ikkinnina, ronsoonni garinni woy mannu hedonni woy mannunni ilantinore di"ikkitino.

14Qaalu manna ikki; eltonna halaale haraqi're ninke giddo gali. Mittichu ilamino Beetti Annuwiinni adhinohu gedeeha ayirrinyesi la'noommo.

15Yohaannisino, «‹Ane gedensaanni daannohu ane rooreho; ani ilamummo waronni nooho› yee kulummo'nehu isooti» yee farci'ri. 16Wo'ma eltosi aaninni ninke baalunkura eltote aana elto uyinonke. 17Seera Muse widoonni qolle uyinoonni; eltonna halaalu kayinni Yesuusi Kiristoosi widoonni hige dayino. 18Magano lae egenninohu ayino dino; ikkollana Magano ikkinohu Annu qote noohu mittu Beettisi egensiisinosi.

CUUAANCHU YOHAANNISI FARCI'RA

(Mat 3:1-12; Maq 1:2-8; Luq 3:1-18)

19Ayihudete mootoolla Yerusaalametenni qeesootanna Lewaawoota Yohaannisiwa sokke, «Ati ayiti?» yite xa'mitusi. 20Yohaannisi qole, «Ani Kiristoosa di"ikkoommo» yee farci'rinota ikkinnina «Diafoommo» diyiino.

21Insano, «Ati ayetiyya? Eeliyaasiitini?» yite xa'mitusi.

Isino, «Dee'ni» yii.

Xaano ledde, «‹Daanno› yinanni himanaanchi ateetini?» yitu.

Isi qole, «Dee'ni» yii.

22«Soyinonke mannira qolleemmona, ati ayetiro kulinke; ati umikki daafira ma yaatto?» yite xa'mitusi.

23Yohaannisi qole, «Himanaanchu Isayaasi yiinonte gede,

ani, ‹Maganu doogo maxarre!› yaanni,

halalla lallawanno manchi huurooti»

yii. 24Soqqame dayino manni Farisootuwiinniiti. 25Qolteno, «Ati Kiristoosa woy Eeliyaasi woy, ‹Daanno› yinanni himanaancho ikka hoogittona, manna mayira cuuattoyya?» yitu. 26Yohaannisino, «Ani cuueemmohu wayinniiti; ki'ne egentinoonnikkihu kayinni mereero'ne uurre no. 27Isi anera gedensaanni daanno. Ani koattesi suncho nafa tira didandeemmo» yee dawarinsa. 28Kuni coyi ikkinohu, Yohaannisi cuuanni noowa, Yordaanoosi Wayira widoonni Biitaaniyu Katamiraati.

MAGANU WILII'LICHO

29Layinki soodo Yohaannisi Yesuusi isiwa hige daanna afe, «Kune alamete cubbo haa're hoolannohu Maganu Wilii'lichi isooti» yii. 30Ledeno, «‹Ane gedensaanni daannohu ane rooreho; isi ani ilamummo waronni nooho› yuummo'nehu isooti. 31Kunni albaanni iso aninni diegennoommo. Ikkollana Israeelete mannira egensiisate yee, ani wayinni cuuanni dayommo» yii. 32Qoleno Yohaannisi, «Qullaawu Ayyaani lembooli gede ikke gordunni dirre aanasi ofollanna afummo. 33Ani iso afummokkinni hee'roommo; ikkollana wayinni cuuammora soyinoehu, ‹Qullaawu Ayyaani dirre aanasi ofollanna afattohu isi Qullaawu Ayyaaninni cuuanno› yee kulinoe. 34Konne coye anino afoommo; kunni daafira, isi Maganu Beetto ikkinota farci'reemmo» yee coyi'ri.

YESUUSIRE UMI ROSAANO

35Layinki soodono Yohaannisi lame rosaanosi ledo hakko uurre no. 36Yohaannisi, Yesuusi hakkaanni hige sa"anna afe, «Maganu Wilii'lichi kuneeti» yii. 37Lamunku rosaano, Yohaannisi yiinota macciishshite Yesuusi hoode hadhu. 38Yesuusino caaqqi yee lae hoodesi noota afe, «Ma hasidhinanni?» yee xa'minsa.

Insa qolte, «Rabii,#1:38 Rabii yaa rosiisaancho yaate. ati hiikko hee'ratto?» yitu. 39Isino, «Amme daggine la'e!» yiinsa. Insano hee'rannowa marte la'e, hakko barra isi ledo hossu. Yannano tonne saate ikkitanno hedooti.

40Yohaannisi yiinota macciishshite Yesuusi hoode hadhu rosaano giddo mittu Pheexiroosi rodii Indiriyaasiiti. 41Indiriyaasi alba ikke rodiisiwa Simiooni Pheexiroosiwa mare, «Kiristoosa anfummowe» yii. 42Hakkunni gedensaanni Indiriyaasi, Simiooni Yesuusiwa haa're massi. Yesuusino Simiooni seekke lae, «Ati Yoona beetti Simiooniiti. Kunni ka'a, ‹Keefa›#1:42 Keefa yaa Pheexiroosi woy kincho yaate. yinannihe» yiisi.

YESUUSI FILIPHOOSINNA NAATINAEELI WOSHSHI

43Layinki soodo Yesuusi Galiila ha'rara kai. Filiphoosinni xaade, «Hoode'ya amo!» yiisi. 44Filiphoosino Indiriyaasinna Pheexiroosi gede Beetesayidu Katamiho. 45Filiphoosi Naatinaeeli afe, «Muse Seerunnihura, himanaanono himanu maxaaffara isi daafira borreessituhawe anfummo. Isi Yooseefi beetti, Naaziretete Yesuusaati» yii. 46Naatinaeeli kayinni, «Naaziretetenni danchu coyi fulannoni?» yii.

Filiphoosino, «Amo dagge lai!» yiisi. 47Yesuusi Naatinaeeli isiwa hige daanna afe, «Kuni xagarro afi'rinokkihu halaalaancho Israeelete manchooti» yee coyi'ri. 48Naatinaeelino, «Hiikko egennoottoe?» yii.

Yesuusino, «Filiphoosi woshshahera albaanni balasete haqqicho hunda heedheenna afoommohe» yiisi. 49Hatto yiita Naatinaeeli, «Rosiisaancho'ya, ati Maganu Beettooti! Ati Israeelete Mooteeti!» yii. 50Yesuusi daware, «Ati ammanittohu, ‹Balasete haqqicho hunda heedheenna afoommohe› yoommohuraatini? Kunni ka'a roore coye la"atto. 51Halaale kuleemmo'ne; gordu fa'nameenna Maganu sokkaasine Manchi Beetti aanira gidditannanna dirritanna la'inanni» yii.

Currently Selected:

YOHAANNISI 1: QulMax

Highlight

Copy