KALAQAMA 37

YOOSEEFINNA RODUUWISI

1Yaiqoobino annisi wosinchimma hee'rino gobbara Kana"aani hee'ri. 2Yaiqoobi ilamano aante noote: Yooseefi 17 diri beetto ikke noo yannara, annisi meenti Bilihanna Zilfa iltinori roduuwisi ledo ge'reewonna me"e allaalanni hee're roduuwisi assitanno bunshe abbe annisira kulanno.

3Geedhimmasinni ilinoha ikkino daafira, Yaiqoobi Yooseefi wole ooso baalantenni roorse baxannosi. Kunni daafira addi addi dani kuulinni seeda seesallitte shamise gansiisisi. 4Roduuwisi anninsa insanni roorse baxannosita affe gibbusi; garunnino dicoyidhannosi.

5Mitto hashsha Yooseefi haaqee haaqii'ri; haaqee kulinsata roduuwisi albinni roore gibbusi. 6Isino, «Haaqii'roommo haaqee kuleemmo'nena macciishshe: 7Ninke gate qamade minde nadala nadala assine usurranni hee'neenna, ane nadala hossi yite uurritu; ki'neri kayinni aneta ayirrise doyisse uurre umo heeshshi yee kumbuulino» yiinsa.

8Roduuwisino, «Ninkera roorricha ikkite aananke moohattora hedootto?» yitusi. Haaqeesinninna coyisinni kainohunni ledde gibbusi.

9Qoleno wole haaqee haaqii're roduuwisira, «Kuneeti wole haaqeeno haaqii'roommo; arrishsho, aganunna 11 beeddahe umonsa heeshshi assite ayirrissannae afoommo» yee kulinsa.

10Roduuwisira kulino haaqee annisirano kulisi. Annisino, «Tini haaqii'rootto haaqee mayinnite? Halaalinta aninna amakki roduuwikkino umonke heeshshi assine ate ayirrinsammohera hedootto?» yee rufisi. 11Roduuwisi hinaassusi. Annisi kayinni konne coye wodanisinni agaranni no.

RODUUWISI YOOSEEFI HIRTUSI

12Mitto barra roduuwisi anninsa ge'reewonna me"e allaaltara Sekeemi hadhu. 13Israeeli Yooseefira, «Roduuwikki Sekeemi ge'reewonna me"e allaaltanni no; insawa soyemmohena amo ha'ri» yiisi. Yooseefino, «Maahoyye ha'reemmo» yii.

14Annuno, «Hadhe roduuwikkinna saada keere noo gedeenni la'e, duduwonsano haadhe abbie» yiisi. Yooseefino Kebirooni Lagichinni fushshe soyi. Yooseefino mare Sekeemi iilli.

15Yooseefi halalli baattora raataawanni hee're mittu manchinni xaadi; manchuno, «Maricho hasi'ratto?» yee xa'misi.

16Isino, «Roduuwa'ya hasi'ranni noommo; ge'reewonna me"e hiikkiicho allaa'lite nooro ballo eeggatena kulie» yiisi.

17Manchuno, «Insa kawiinni hadhino; ‹Dootaani ha'no› yitanna macciishshoommo» yiisi. Yooseefino roduuwasi faana gananni mare Dootaani afinsa.

18Insano fafowa hee'reenna affe, insawa iillikkinni shitasira ma'litu. 19Mimmitinsara, «Hakku haaqii'raanchu kune dayino; 20xa amme shine mitte balera tunge, ‹Moyichu itino› yineemmona; haaqeesino marte fultannowa anfeemmona» yitu.

21Roobeeli konne coye macciishshe angansanni gatisasira hasi're, «Lubbo shinoonke; 22mundee duntinoonte; shitinantenni konne halalla balete giddo tuggine agurre» yiinsa. Hatto yiinohuno angansanni gatise annisiwa qole soyara hedeeti. 23Yooseefi roduuwisiwa iillita, uddi'rinota addi addi dani kuulinni gannoonnita seeda seesallitte shamise aanisinni mulqitu; 24isono massite wayi nookkitera moola balera tuggusi.

25Hakkunni gedensaanni sagale ittara ofoltu; ittanni heedhe xeertote Ismaeelete daddalaasine Gibitse hadhara Geleaadinni dagganna affu; insano gaallansara shitto, hixaananna kaarbe hogophite no.

26Yihudi roduuwisira, «Rodoonke shine maanxummoro maricho lexxineemmo? 27Maalankeetina shaa agurre amme Ismaeelootaho hirrona» yiinsa. Roduuwisino isi yiino coye baxxu. 28#Eje 8:22-24. Yooseefino baletenni fushshite hakkaanni higge sa'anni noorira Midiyaamete daddalaasinera 20 kinchu birrira hirtusi; Ismaeelootuno Yooseefi Gibitse haadhe hadhusi.

29Roobeeli mare la"anno woyite, Yooseefi balete giddo dino; kunnira dadille uddanosi dari. 30Galagale roduuwisiwa daye, «Beettu hakko dinona, hanni ani hiikkummoro woyyanno?» yii.

31Yooseefi shamise haadhe, meichu goco gorrite mundeete giddo cuu'u. 32Addi addi dani kuulinni seesiinse gannoonnita seeda shamisesi haadhe anninsawa massite, «Tenne shamise ba'inota anfoommona, hanni beettikkiteronna woletero lai» yitusi.

33Isino buuxe laihu gedensaanni, «Tini beetti'ya shamiseeti! Hunsha bayisibao beetto'ya moyichu itisi? Halaaleho beetto'ya moyichu bibbide itino!» yii. 34Yaiqoobino dadillunni uddanosi dare, xiddu uddano uddi're beettisira lowo barra wi'li. 35Oososinna seennisi baalunku sheshifachishshasira daggu. Isi kayinni «Manchite hee'renni beetti'yawa jeennaate dirreemmo» yee sheshifata giwi. Kunnira manchitanni hee'ri.

36Hakkuri Midiyaamete daddalaasine kayinni Yooseefi massite Gibitsete Feriooni agaraasine roorrichira Phoxifaarira hirtusi.

Currently Selected:

KALAQAMA 37: QulMax

Highlight

Copy