KALAQAMA 35

MAGANU YAIQOOBI BEETELI MAASSI'RISI

1Maganu Yaiqoobira, «Ka'e Beeteli hadhe hakkiicho hee'ri; rodiikki Eesawuwiinni xooqqe ha'ritto yannara leellummohe Maganira kakkalote darga seekkie» yiisi.

2Yaiqoobino maatesiranna ledosi noorira baalaho, «Wole gosa maganna mereeri'nenni hoolle; biso'neno hayishshidhe; imaana'neno soorridhe. 3Qarri'ya yannara macciishshinoehura, ha'rummo doogorano ledo'ya ha'rihura Maganoho kakkalote darga seekkeemmona, ka'e Beeteli ha'nona» yiinsa. 4Insawa noota wole gosa maganna duuchantanna maccansara noo buticha#35:4 butichu hatte gobba manni quraamu gede asse wodhannoho yaate. fushshite Yaiqoobira uyitu; isino Sekeemi mule noo haqqicho qullaawate hunda waami.

5Hakkiinni ka'e hadhuta, Maganu qooxeessinsara noo manni wodanira waajjille naqino daafira kisinonsahu dino. 6Yaiqoobi ledosi noo manni ledo Kana"aani noohuwa Beeteli yinanni katama Looza iilli. 7Yaiqoobi hakkiicho kakkalote darga seekke, «Eeli Beeteli»#35:7 Eeli Beeteli yaa Ibiraawootu afiinni Beeteli Magano yaate. yee su'ma fushshi; hatto yiinohuno, rodiisiwiinni xooqe ha'ranna Maganu leellinosi darga ikkinohuraati. 8Ribiqa awuuto Deboora reyiteenna, Beetelira wodiidoonni qilxote mule madaarrise; hakko dargira su'ma Alonbaakuuti#35:8 Alonbaakuuti yaa Ibiraawootu afiinni wi'late qilxo yaate. yine fushshini.

9Yaiqoobi Mesiphexoomiyunni higi yannara, Maganu layinkimeeshsho leelle maassi'risi. 10Qoleno, «Su'mikki Yaiqoobiiti; kunni ka'a su'makki Yaiqoobi yaa agurre, Israeeli yinona» yii. Kunnira Maganu Israeeli yee woshshisi. 11Qoleno Maganu, «Wo'manka Dandeemmo Magani aneeti; ili, ilami; lowo manni anna ikki; mootoolla atewiinni fultanno. 12Abirihaamiranna Yisihaaqira oommo baatto aterano eemmo; ate gedensaannino sirchikkira eemmo» yiisi. 13Maganu isi ledo hasaawa gudihu gedensaanni agure ha'ri. 14Yaiqoobino Maganu ledosi hasaawi darga sooddicha uurrisi; Kaaliiqira baxxinoha assate agattote fushshaatenna zayite aanaho duni. 15Hakkonne Maganu ledosi hasaawi darga Beeteli yii.

RAAHEELI REYITU

16Yaiqoobinna maatesi Beetelinni ka'e, Efiraata iillitara shiimuri gate hee'reenna, Raaheeli ilate game amadduse; gameno lowo geeshsha kaajjituse. 17Game shetisse heedheennase ilshiishshannoti, «Wole labbaa beetto iltanni noottana jawaati» yituse. 18Iseno reyitara haafattanni heedhe, qaaqqoho su'ma, «Beeniooni»#35:18 Beeniooni yaa Ibiraawootu afiinni dadilli'ya beetto yaate. yite fushshitusi; annu kayinni, «Biiniyaami»#35:18 Biiniyaami yaa Ibiraawootu afiinni kaayyote beetto yaate. yiisi.

19Raaheeli reyiteenna, Efiraata massitanno doogo qaccera xa Beeteliheme yinanni katamira madaarrise. 20Yaiqoobino waammase aana sooddicha uurrisi; hakko sooddichi techo geeshsha Raaheeli waamma leellishanno. 21Israeelino hakkiinni kae, dukkanasi Edeeri Shaera ka'aanni masse qasi'ri.

YAIQOOBI OOSO

(1Dud 2:1-2)

22Israeeli hattenne gobbara hee'ri yannara, Roobeeli mare annisira irkote galte Biliha ledo goxi; Israeelino konne coye macciishshi.

Yaiqoobi ooso kiiro tonaa lameho. 23Liya ooso giddonni Yaiqoobira bayiru beetti Roobeeliiti; maa'nuullisi Simiooni, Leewi, Yihudu, Yisaakooriitinna Zaabilooniiti. 24Raaheeli ooso Yooseefiitinna Biniyaamiiti. 25Raaheeli borojjicho Biliha iltino ooso Daaniitinna Nifitaalemiiti. 26Liya borojjicho Zilfa iltino ooso Gaadiitinna Aseeriiti. Tini ooso Yaiqoobira Mesiphexoomiyaho ilantinote.

YISIHAAQI REYI

27Yaiqoobi Kebirooni yinanniwa Qiriyaati Arbai mule Memire noohuwa annisi Yisihaaqiwa dayi; kuni dargino alba annisi Yisihaaqinna ahaahisi Abirihaami heedhinowaati. 28Yisihaaqi 180 diro hee'ri. 29Geedhe dirono duuwe mannu aalo ikkeenna, oososi Eesawunna Yaiqoobi madaartusi.

Currently Selected:

KALAQAMA 35: QulMax

Highlight

Copy