Macaafa Abboota Firdii 17

Miikaan Galma Waaqayyo Tolfamaa Isaatiif Qopheessuu Isaa

1Biyya gaaraa isa kan Efreem keessa namni maqaan isaa <<Miikaa>> jedhamu tokko ture. 2Yommus inni haadha isaatiin,<<Meetiin kumni tokkoo fi dhibbi tokko si duraa hatamnaan, nama si duraa hate abaaruu kee si irraa dhaga'eera; kunoo, meetii kana anatu fuudhe, amma iyyuu ana bira jira>> jedhe; haati isaas,<<Yaa ilma ko, Waaqayyo si haa eebbisu!>> jetteen*. 3Achumaan inni meetii kuma tokkoo fi dhibba tokkon sana deebisee haadha isaatti in fide; haati isaa immoo,<<Abaarsi koo si mucaa koo irra akka hin geenyetti meetii kana maqaa keetiin Waaqayyoof addaan nan baasa; meeticha siif deebisee bifa fakkeenyaas muka irraa soofsisee, meetii isa irratti nan uffisiisa>> jette*. 4Miikaan meeticha deebisee haadha isaatti kenninaan, isheen meeticha irraa dhibba lama fuutee nama meetii baqsutti in kennite; namichis bifa fakkeenyaa muka irraa qirixee meetii irratti uffise; bifni fakkeenyaa sunis mana Miikaa keessa in kaa'ame. 5Akkasitti Miikaan waaqayyolii isaatiif galma godhatee dirata fuula duraaf bifa waaqayyolii qopheessisee, ilmaan isaa keessaa tokko luba akka isaaf ta'uuf hojii irra isa in dhaabe*. 6Yeroo sana sabni Israa'el mootii waan hin qabneef, namni hundinuu waanuma qajeelaa isatti fakkaatu in hojjeta ture*.#2 Lew 5:1; Fak 29:24 3 Kes 27:15 5 8:27; Uma 31:19 6 18:1; 19:1; 21:25

Miikaan Nama Sanyii Lewwii Tokko Luba Godhachuu Isaa

7Yommus dargaggeessi sanyii Lewwii tokko Betlihem biyya Yihudaa keessa Yihudoota gidduu galaa ta'ee in jiraata ture*. 8Inni iddoo itti galaa ta'ee hojjetu barbaaddachuudhaaf mandara Betlihem biyya Yihudaatii ba'ee, gara biyya gaaraa isa kan Efreem keessaa gara mana Miikaa in dhufe. 9Yommus Miikaan,<<Eessaa dhufte?>> jedhee isa gaafate; inni immoo,<<Ani nama sanyii Lewwii ti; iddoon itti galaa ta'ee jiraadhu barbaaddachuudhaafan Betlihem Yihudaatii dhufe>> jedhe. 10Miikaan deebisee,<<Ana bira taa'i! Abbaadhaa fi luba anaaf ta'i! Ani immoo nyaataa fi uffata, waggaattis meetii kudhan siif nan kenna>> jedheen; innis kanatti in gale. 11Dargaggeessichi sanyii Lewwii sun Miikaa bira taa'uu in jaallate; namichis ilmaan isaa keessaa akka isa tokkootti isa in ilaale. 12Miikaan akkasitti dargaggeessicha Lewwii sana hojii lubummaa irra in dhaabe; inni immoo luba ta'ee mana Miikaa in taa'e*. 13Yommus Miikaan,<<Namni Lewwii luba erga anaaf ta'ee, Waaqayyo amma waan gaarii akka anaaf godhu nan beeka>> jedhe.#7 18:3; Kes 18:6-8 12 Bau 28:41

Currently Selected:

Macaafa Abboota Firdii 17: MacQul

Highlight

Copy