Macaafa Hose'a Raajichaa 2

Abdii Gara Fuula Duraa

1Si'achi garuu lakkoobsi namoota Israa'el akka cirracha galaanaa isa hin safaramnee, isa hin lakkaa'amnees in ta'a; qooda,<<Isin saba koo miti>> ittiin jedhame immoo,<<Ijoollee Waaqayyo isa jiraataa>> jedhamuuf jiru*.

2Ijoolleen Yihudaa fi ijoolleen Israa'el

tokkummaatti walitti in qabamu;

walumattis nama isaan geggeessu

tokko in kaafatu;

guyyaan Yizre'el guddaa

waan ta'uuf,

isaanis biyyicha keessaa

ol in dhufu*.

3Egaa obboloota keessan,<<Amii>>

obboleettota keessanis <<Ruhaamaa>>

jedhaa waamaa!

[<<Amii>> jechuun <<Saba koo?,

<<Ruhaamaa>> jechuun <<Oo'a argate>> jechuu dha*].#1 Uma 22:17; Rom 9:29 2 Er 3:18; Hos 1:4; 2:23-24 3 1:6,9

Amanamuu Dhabuu Irraa Kan Ka'e Adabamuu

4Haadha keessan hadheessaa!

Isheen haadha manaa koo ta'uu

waan dhiifteef,

anis abbaa manaa ishee ta'uu waanan dhiiseef,

ishee hadheessaa! Isheen

halalummaa fuula ishee irraa mul'atu,

milikkita ejjummaas

harma ishee gidduudhaa haa baaftu*!

5Yoo kun ta'uu dhabaate garuu,

wayyaa ishee irraa baasee

akkuma gaafa dhalatteetti

qullaa nan hambisa;

ishees akka lafa onaa,

akka lafa isa gogaa nan godha,

dheebuudhaan akka isheen duutu nan godha*.

6Ijoolleen ishee ejjummaadhaan

waan dhalataniif,

ani oo'a isaan hin argisiisu.

7Haati isaanii in ejjite,

isheen garaatti isaan baattes

waan yeellaasisaa hojjette;

isheenoo,<<Jaalalleen koo buddeena, bishaan,

uffata rifeensa hiddamaa

kan quncee talbaas,

dhadhaa ejersaa, dhugaatiis

anaaf in kennu;

kanaaf isaan duukaa nan adeema>> jetteetti*.#4 1:2; His 16:23-26 5 His 16:4-5; 23:29 7 Er 44:17-18

8Erga akkas ta'ee

ani immoo akka isheen karaa hin argannetti,

qoraattiidhaan karaa isheetti nan cufa,

dallaa dhagaas ishee duratti nan ijaara.

9Yoos isheen jaalallee ishee duukaa fiigdee

isaan hin qaqqabdu,

barbaaddees isaan hin argattu;

yommus,<<Ammaa mannaa,

dur abbaa manaa koo isa duraa wajjin

yommuun jiru anaaf wayya ture;

kanaafis ka'ee gara isaatti nan deebi'a>> in jetti*.

10Garuu midhaan, waynii, dhadhaa ejersaas

akka ani kenneef,

meetii fi warqee isa ittiin

waaqayyolii tolfamoo isaanii

Ba'aalin tolfatanis

akka ani isheetti baay'ise

isheen hin hubanne*.

11<<Kanaaf ani midhaan koo

yeroo inni bilchaatutti,

cuunfaa waynii koos yeroo inni ga'utti irraa nan deebifadha;

rifeensa hiddamaa fi

quncee talbaa isa isheen

ittiin qullaa ishee dhokfachuuf jirtus

ishee duraa nan fudhadha.

12Jaalallee ishee durattis saala ishee

bakkeetti nan baasa;

harka koo keessaa buutees

namni ishee oolchu hin jiru*.

13Gammachuu ishee hundumaa, dalaga ishee,

baatii ji'a ji'aan isheen ayyaaneffattu,

guyyoota Sanbata ishee, guyyaa ayyaana beekamaa

isheen qabdu hundumaas nan hambisa*.#9 Luq 15:17-19 10 Kes 7:12-13; Hos 8:4; His 16:17,19 12 His 16:36-37; Er 13:22 13 Amo 8:10

14<<Mukkeetii waynii fi mukkeetii harbuu

warra isheen <<Jaalallee kootu

gatii anaaf kenne>>

jettu sana nan gad-dhiisisa;

isaanis caakkaa ta'anii

bineensonni akka irraa nyaatan nan godha.

15Guyyoota isheen Ba'aal

waaqayyolii tolfamoo isheetiif

ayyaana godhatte,

ixaana aarsiteef sanaaf,

ishee nan adaba;

isheen amartii ishee kaa'attee

mi'a ishees naqattee,

jaalallee ishee duukaa adeemtee,

ana immoo irraanfatte>>

jedhee dubbateera Waaqayyo.

Amanamummaa Waaqayyo Saba Isaa Argisiisu

16Kanaafis kunoo ani ishee

tole nan jechisiifadha,

gara lafa onaatti ishee geessee

dubbii garaa ishee rukutu nan dubbadha*.

17Achi utuu jirruu

iddoo dhaabaa waynii isheetii

isheedhaaf nan deebisa,

dachaa Aakor isa lixuuf

abdii hin qabnes

lafa abdiidhaan

ol itti lixan nan godha;

achitti immoo akkuma

bara ijoollummaa isheetii

akkuma yeroo biyya Gibxii baateettis

anaaf in owwaatti*.#16 Isa 40:2; Er 31:2 17 Iya 7:24-26

18<<Ati gaafas <<Abbaa manaa koo>> jettee na waamta malee,

deebitee akka Ba'aal

isa Waaqayyo tolfamaatti

ana hin waamtu>>

jedhee dubbateera Waaqayyo*.

19Maqaan Ba'aal

waaqayyolii tolfamoo kanaas

afaan isheetti akka hin dhufne nan godha;

maqaa isaanii namni yaadatus hin jiru.#18 Isa 54:5

20Gaafas bineensota daggalaa,

simbirroota qilleensa

keessa balali'an,

warra lafa irra munyuuqanii wajjinis

kakuu isiniif nan gala;

iddaa fi billaa, mi'a lolaas

caccabsee lafa irraa nan balleessa,

akka isin nagaatti,

gabiitti teessanis nan godha*.

21Ani yeroo hundumaaf

kan koo sin godhadha;

qajeelina, dhugaa, jaalala,

oo'as argisiisuudhaan

kan koo sin godhadha*.

22Amanamummaa argisiisuudhaanis

kan koo sin godhadha,

atis ana Waaqayyo kee

bartee in hubatta.

23Waaqayyo dubbateera kunis in ta'a,

<<Gaafas ani nan owwaadha,

bantiiwwan waaqaaf nan owwaadha,

isaanis lafaaf in owwaatu;

24lafti in owwaata;

midhaanii fi daadhii waynii

dhadhaa ejersaas in baasa,

isaanis Yizre'eliif in owwaatu*;

25biyyicha keessa jabeessee ishee nan dhaaba,

warra oo'a hin argannettis

oo'a nan argisiisa,

saba koo isa hin ta'iniinis

<<Saba koo>> nan jedha;

innis <<Waaqayyo koo>> naan jedha>> jedhe*.#20 Isa 11:6-9; Hos 1:7; Isa 2:4 21 Isa 54:5-6; Mul 19:7 23-24 1:4; 2:2; 14:4-8; Zak 8:12 25 1:6,9; Rom 9:25; 1Phe 2:10

Currently Selected:

Macaafa Hose'a Raajichaa 2: MacQul

Highlight

Copy