Macaafa Saamu'el Isa Lammaffaa 12

Daawit Ifatamuu Isaa

1Waaqayyo yommus Naataan raajicha gara Daawititti in erge; Naataanis dhaqee Daawitiin,<<Namoonni lama mandara tokko keessa turan; isaan keessaa inni tokko sooressa, inni kaan immoo hiyyeessa*. 2Inni sooressi hoolota baay'ee fi saawwa baay'ee qaba; 3inni hiyyeessi garuu ilmoo hoolaa guddifachuuf bitate tokko malee, homaa tokko iyyuu hin qabu; isheen harka isaatiin ilmaan isaa wajjin in guddatte, midhaan inni nyaatu irraa in nyaatti, qodaa inni keessaa dhugu keessaas in dhugdi turte; inni gudeeda isaa irratti ishee in baata, isheenis isa irra in rafti; inni akka intalaatti ishee in ilaala ture.

4Gaaf tokko keessummaan namicha sooressa sanatti in dhufe; namichi hoolaa fi saawwa baay'ee qabu sana keessaa tokko fuudhee, keessummaa isatti dhufe sanaaf nyaata qopheessuu mararsiifatee, iddoo isaa ilmoo hoolaa namicha hiyyeessaa sana fuudhee qalee keessummichaaf nyaata in qopheesse>> jedhe.#1 Far 51

5Daawit namicha sanatti aaree boba'ee, Naataan raajichaan,<<Dhugaa Waaqayyo isa jiraataa ti! Namicha akkas godhe sanaaf du'atu ta'a! 6Inni sababii garaan isa jibbuu dhiisee wanta akkasii godheef, iddoo ilmoo hoolaa sanaa hoolaa afur haa baasu!>> jedhe*.#6 Bau 21:37

7Naataan kana irratti Daawitiin,<<Namni kana godhe si! Waaqayyo gooftaan Israa'el,<<Israa'el irratti mootii akka taatuuf anatu dibee si moosise, harka Saa'olis si oolche; 8mana mootummaa gooftaa keetii, dubartoota isaas akka ati fudhattuuf siif kenneera; namoota Israa'elii fi namoota Yihudaa akka mootuuf siif kenneera; yoo kun sitti xinnaate immoo, kana caalaa iyyuu siif nan kennan ture. 9Ati garuu Uriiyaa Heetichi billaa Amoonotaatiin rukutamee akka ajjeefamu gootee, haadha manaa isaa haadha manaa kee godhatte; ija koo duratti wanta hamaa sana hojjechuudhaan maaliif dubbii koo tuffatte>> 10Egaa sababii ati ana tuffatteef, sababii haadha manaa Uriiyaa Heetichaa haadha manaa kee godhatteef, billaan namoota sanyii kee irraa bara baraan hin deebi'u!>> jedhe. 11Waaqayyo itti dabalee,<<Kunoo, ani maatiidhuma keetiin wanta hamaa sitti nan kaasa; ijuma kee duratti dubartoota kee fuudhee, nama ollaa kee jiruuf nan kenna; innis guyyuma saafaadhaan dubartoota kee wajjin in ciisa. 12Ati wanta akkasii dhoksaatti goote, ani garuu, wanti kun Israa'eloota hundumaa duratti guyyaa saafaa si irratti akka raawwatamu nan godha>> jedha>> jedhe*.#11-12 16:21-22

Ilmi Baat-Sheebaan Daawitiif Deesse Du'uu Isaa

13Daawit yommus Naataan raajichaan,<<Ani Waaqayyoon yakkeera>> jedhe.

Naataan immoo deebiseefii,<<Egaawoo, Waaqayyo yakka kee siif dhiiseera; ati yakka kanaaf jettee hin duutu. 14Haa ta'u iyyuu malee, kana hojjechuu keetiin diinonni Waaqayyoo akka isa arrabsan waan gooteef, ilmi inni siif dhalate sun dhuguma in du'a>> jedhe.

15Kana booddee Naataan gara mana isaatti deebi'ee in gale; Waaqayyo immoo mucaa isa haati manaa Uriiyaa Daawitiif deesse in dha'e; mucichis in dhukkubsate. 16Daawit waa'ee mucichaatiif jabeessee Waaqayyoon in kadhate; inni in soome, mana isaa keessa uffata isaa lafa buufatee in bubbule. 17Maanguddoonni mana isaa jiran ka'anii, lafaa isa kaasuuf gara isaa in dhaqan; inni garuu ka'uu in dide, isaanii wajjinis nyaata hin nyaanne. 18Torban tokko booddees mucichi in du'e; hojjetoonni Daawit,<<Utuma mucichi jiruu iyyuu yeroo nuyi gooftaatti dubbannu nuuf hin dhaga'u; amma immoo mucichi akka du'e attamitti isatti himuu dandeenya ree>> Waa of godhinnaa laataa!>> jedhanii mucichi akka du'e Daawititti himuu in sodaatan.

19Daawit garuu hojjetoonni isaa akka walitti hasaasan yommuu arge, mucichi akka du'e baree,<<Mucichi in du'ee?>> jedhee hojjetoota isaa in gaafate; isaanis,<<Eyyee in du'e>> jedhanii deebisaniif.

20Daawit yommus lafaa ka'ee dhiqatee dibatee, uffata isaas erga geddaratee booddee, gara mana qulqullummaa dhaqee, in sagade; kana booddee gara mana isaa dhaqee, buddeena akka isaaf dhi'eessaniif in abboome; kana irratti isaan in dhi'eessaniif, innis in nyaate.

21Hojjetoonni isaa,<<Mucichi utuu jiruu, soomtee isaaf in boosse; mucichi erga du'ee immoo kaatee nyaata in nyaatte; kana gochuun kee maal jechuu kee ti?>> jedhanii isa in gaafatan. 22Kana irratti Daawit, << <Maaltu beeka, Waaqayyo anaaf in oo'a, mucichas in maara ta'a>> jedhee, utuu lubbuun mucicha keessa jiruu nan soome, nan boo'es. 23Amma garuu mucichi erga du'ee, maaliifan sooma ree>> Si'achi mucicha deebisuu nan danda'aa>> Anatu gara isaa dhaqa malee, inni gara kootti hin deebi'u>> jedhee deebiseef.

Solomoon Dhalachuu Isaa

24Daawit yommus Baat-Sheebaa haadha manaa isaa in jajjabeesse; ergasii inni gara ishee dhaqee ishee bira in ga'e; isheen ilma isaaf in deesse, inni immoo maqaa mucichaa Solomoonitti moggaase; Waaqayyo mucicha in jaallate. 25Waaqayyo mucicha sababii jaallateef, maqaa mucichaa <<Yidiidiyaatti>> akka moggaasuuf Naataan raajicha in erge. [<<Yidiidiyaa>> jechuun <<Waaqayyo biratti kan jaallatame>> jechuu dha.]

Daawit Mandara Amoonotaa Qabachuu Isaa

(1Sen 20:1-3)

26Yo'aab ittuma fufee Raabaa mandara Amoonotaa rukutee, naannoo mootiin keessa taa'u in qabate*. 27Yo'aab yommus Daawititti nama ergee,<<Ani mandara Raabaa rukuteera, lafa mandarattiin bishaan argatus qabadheera. 28Ani mandarattii qabadhee, ittiin maqaa akka hin godhannetti, amma ati loltoota warra hafan walitti qabi, mandarattiitti marsiitii ishee qabadhu!>> jedhee itti in hime. 29Kana irratti Daawit loltoota hundumaa walitti qabatee, mandara Raabaatti duulee rukutee ishee in qabate. 30Daawit gonfoo Miilkom#2Sam 12:30 <<Miilkom>> yookiis <<Moleek?. Waaqayyo tolfamaa isaanii isa warqee dhagaa gati-jabeessa of keessaa qabu irraa hojjetamee, kiilo graamii soddomii afur kan miijanu fudhatee, mataa isaa irra in kaa'ate; akkasumas mandarattii keessaa wanta sonaan baay'ee in booji'e. 31Namoota mandarattii sana keessa turan immoo gad yaasee, haamtuu mukaatiin, billaa fi qottoodhaan hojii ulfaataa in hojjechiise, xuuphiis akka hojjetan in godhe; Daawit wanta akkasii kana warra mandaroota Amoonotaa keessa jiraatan hundumaa irratti erga hojjechiise booddee, guutummaa loltoota isaa wajjin gara Yerusaalemitti in deebi'e.#26 11:1

Currently Selected:

Macaafa Saamu'el Isa Lammaffaa 12: MacQul

Highlight

Copy