2 GARA WARRA QORONTOS 12

Wanta Gooftaan Yeroo Adda Addaatti Isatti Mul'ise

1Utuma dhimma anaaf kutu dhabaatee illee of jajuun anaaf in ta'a; amma immoo waa'ee isa gooftaan yeroo adda addaatti anatti argisiisee, waa'ee isa inni anatti mul'isees nan dubbadha*. 2Namni kristiiyaani tokko waggaa kudha afur dura bantii waaqaa keessaa gara tarree isa sadaffaatti akka ol butame nan beeka; namummaa isa fooniitiin ol butame yookiis namummaa isa hafuuraatiin ol butamee isaa Waaqayyotu beeka malee, ani hin beeku*. 3Namni kun gara jannata waaqa irraatti butamuu isaa ani beeka; namummaa isa fooniitiin ol butame yookiis namummaa foonii malee ol butamee isaa Waaqayyotu beeka malee, ani hin beeku. 4Inni dubbii dubbatamuu hin dandeenye, dubbii namatti himuunis hin taane dhaga'e*. 5Egaa ani waa'ee isaatiif of nan jaja; ofii kootii garuu dadhabaa ta'uu kootiin malee, waanan ittiin of jaju hin qabu*. 6Dubbii dhugaa waanan dubbadhuuf, of jajuu utuun barbaadee iyyuu gowwaa hin ta'un ture; ani garuu namni tokko illee waan ana irratti argeef waan ana irraa dhaga'e caalaatti akka ana hin ilaalleef, of jajuu nan dhiisa*.#1 HoE 26:16; Gal 2:2 2 HoE 22:17 4 Luq 23:43 5 11:30 6 10:8; 11:16

7Mul'ata hammas hin jedhamne sanaaf akkan ol of hin qabnetti, wanti dhagna koo keessa taa'ee na waraanu ergaan Seexanaa anaaf kennamee, na rukuta; na rukutuu isaatiinis ol of qabuu irraa na dhowwa. 8Kanas akka ana irraa fuudhuuf si'a sadii gooftaa kadhadheera*. 9Inni garuu, ?Ayyaanni koo si ga'a, humni koo dadhabaa keessaan akeeka isaa in raawwata? naan jedhe. Humni Kristos ana bira akka buufatuuf, dadhabaa ta'uu kootiin hundumaa irra caalchisee gammachuudhaan of nan jaja*. 10Egaa Kristosiif jedhee dadhabbiitti, salphinatti, rakkinatti, ari'atamuutti, gidiraattis anatti in tola; yeroon dadhabutti nan jabaadha*.#8 Mat 26:44 9 Filp 4:13; Isa 40:29 10 6:10; Filp 4:12-13

Warra Qorontosiif Yaaduu Isaa

11Isin itti na oofnaan of jajuu kootiin gowwaan ta'e; anaaf dubbachuun isiniif in ta'a ture. Ani waanuma tokko yoon ta'uu dhabaadhe iyyuu, karaa tokko illee ergamoota warra hundumaa irra caalan sanaa gad miti*. 12Ergamaa gooftaa ta'uu koo mul'isuudhaaf milikkinni, dinqiin, hojiin aangoos obsa guddaadhaan isin gidduutti godhameera*. 13Wanta waldoonni kristiiyaanaa warri kaan qaban keessaa kan isinitti hir'ate jiraa ree? Wanti isinitti hir'ate yoo jiraate immoo ani ba'aa utuu isinitti hin ta'in hafuu koo ti; balleessaa isa kanaaf immoo hadaraa anaaf dhiisaa*.#11 11:1,5,16 12 6:4-6; Rom 15:19; Ibr 2:4 13 11:7-11

14Si'a sadaffaa gara keessan dhufee isin dubbisuudhaaf qophaa'eera; garuu ba'aa isinitti hin ta'u. Anoo isinan barbaada malee, waa isin irraa hin barbaadu, warratu ijoollotaaf walitti qaba malee, ijoolleetu warra isaaniitiif walitti qaba miti*. 15Ani isiniif jedhee waanan qabu hundumaa, ofii koo illee taanaan isiniif dabarsee kennuudhaaf nan gammada; egaa ani baay'isee waanan isin jaalladheef, isin immoo xinneessitanii na jaallattuu ree*? 16Egaa akkan ba'aa isin irratti hin ta'in beekamaa dha, garuu ani haxxee ta'ee, haxxummaadhaan akka waanan harka koo keessa isin galfadhetti hin yaadu. 17Namoota warra ani isinitti erge keessaa karaa isaa gowwoomsee kanan waa isin irraa nyaadhe isa kami ree? 18Tiitoos gara keessan akka dhufu gorsee, obboleessa sanaa wajjin ergeera; Tiitoos isin gowwoomsee waa isin irraa nyaateeraa ree? Nuyi hafuuruma tokkoon deddeebi'aa jirra mitii ree? Faanuma tokko irra adeemnas mitii ree*?#14 13:1; HoE 20:33 15 1Tas 2:8; Filp 2:17 18 8:6,16-18; 1Qor 16:10

19Michoota ko! Hamma ammaatti nuyi waan itti-qabata barbaaddachaa turre isinitti fakkaataa? Kana miti! Nuyi isin cimsuudhaaf karaa Kristos fuula Waaqayyoo duratti waan hundumaa in dubbanna*. 20Yommuun dhufu akka ani itti isin arguu barbaadutti isin hin argu ta'a; isinis akka itti na arguu barbaaddanitti ana hin argitan ta'a. Qoccolloon, hinaaffaan, dheekkamsi, ofittummaan, maqaa namaa balleessuun, dhoksanii nama hamachuun, of bokoksuun, gara-dhabuun isin gidduu jira ta'a jedheen sodaadha*. 21Deebi'ee gara keessan yommuun dhufu Waaqayyo waa'ee keessaniif gad na deebisee, namoota baay'ee warra kanaan dura xuraa'ummaa, halalummaa, jireenya gad-dhiisii isa itti jiraachaa turan irraa yaada garaa isaanii hin geddaratiniif na boossisuuf jira jedheen sodaadha*.#19 3:1; 11:16-17 20 10:2; 1Qor 1:11; 4:6; Gal 5:19-21 21 2:1; 13:2; 1Qor 6:15-20

Currently Selected:

2 GARA WARRA QORONTOS 12: MacQul

Highlight

Copy