Macaafa Saamu'el Isa Duraa 14

Yonaataan Filisxeemota Rukutuu Isaa

1Yonaataan gaaf tokko Saa'ol abbaa isaatti utuu hin himin dargaggeessa isa mi'a lolaa isaaf baatuun,<<Kottu, gara kutata loltoota Filisxeemotaa warra iddoo qabatanii fuullee keenya jiranitti in ceena!>> jedhe. 2Saa'ol daarii Giibe'aa gubbaa iddoo <<Miigron>> jedhamutti muka rumaanii tokko jala taa'ee in eega ture; akki namoota dhibba ja'aas isaa wajjin turan. 3Ahiiyaan inni dirata fuula duraa dirate, isaan keessaa tokko ture; inni ilma Ahiixub obboleessa Ikaabood ilma Fiinehaas akaakayyuu Elii isa Shiilootti luba Waaqayyoo turee ti; Yonaataan akka adeeme garuu namni tokko iyyuu hin beekne. 4Karaa Yonaataan ittiin gara kutata loltoota Filisxeemotaa warra iddoo qabatanii fuullee isaanii jiraniitti ce'uudhaaf barbaade garanaa fi garasiin kattaa fofottoqaa qaban lamatu ture; maqaan fottoqaa isa tokkoo <<Bozez>> maqaan isa kaanii immoo <<Seenee dha?. 5Fottoqaan inni tokko karaa sana irraa gara harka bitaa fuullee Miikmaashitti, inni kaan immoo gara harka mirgaa fuullee Gebaatti in argama.

6Yonaataan yommus dargaggeessicha isa mi'a lolaa isaaf baatu sanaan,<<Waaqayyo namoota baay'eedhaan yookiis muraasaan nama oolchuu waan danda'uuf, inni nu gargaara ta'aatii, kottuu gara kutata loltoota warra dhagna hin qabatin, warra iddoo qabatanii jiran sanaatti in ceenaa!>> jedhe*. 7Inni mi'a lolaa baatuufis Yonaataaniin,<<Wanta yaada kee keessa jiru hundumaa godhi malee, gara booddee hin deebi'in! Ani kunoo, akkuma ati barbaaddetti sii wajjinan jira>> jedhe. 8Kana irratti Yonaataan,<<Yoos akka isaan nu arganitti kottuu gara namoota kanaatti in ceena! 9Yoo isaan,<<Hamma nuyi dhufnutti achuma turaa!>> nun jedhan, gara isaaniitti ol ba'uu dhiifnee iddoodhuma jirru in dhaabanna. 10Isaan,<<Gara keenyatti ol kottaa!>> yoo nuun jedhan garuu, kun milikkita Waaqayyo harka keenya keessa isaan buusuu isaatii waan ta'eef, gara isaaniitti ol in baana>> jedhe.#6 Abo 7:2-7

11Isaan lamaanuu kutata loltoota Filisxeemotaa warra iddoo qabatan sanatti yommuu of mul'isan, Filisxeemonni,<<Ilaa! Warri Ibrootaa boolla keessa dhokatanii turan keessaa ol ba'aa jiru>> jedhan*. 12Loltoota isaanii keessaas jarreen tokko Yonaataanii fi isa mi'a lolaa baatuuf sanaan,<<Wanta tokko isin barsiifnaatii mee gara keenyatti ol kottaa!>> jedhan; Yonaataanis isa mi'a lolaa isaaf baatuun,<<Jara kana Waaqayyo harka Israa'elootaa keessa buuseeraatii kottuu na duukaa ol ba'i!>> jedhe. 13Yonaataan daa'imee ol itti in yaabbate; inni mi'a lolaa isaaf baatus booddee isaatiin ol in ba'e; yommus Filisxeemonni fuula Yonaataan duratti in kukkufan; inni mi'a lolaa baatuuf immoo isa duukaa bu'ee isaan in ajjeese. 14Rukuttaa isa jalqabaa keessatti Yonaataanii fi dargaggeessichi mi'a lolaa baatuuf sun, lafa walakkaa meesaa tokko keessatti namoota digdama ajjeesan. 15Yommus iddoo buufataatti, bakkeettis naasuutu ture; kutanni loltoota iddoo qabatanii turanii fi saamtonni in rom'an, laftis in tocho'e; rom'uun kun immoo Waaqayyo biraa isaanitti in dhufe*.#11 13:6 15 7:10

16Yeroo sanatti eegdonni Saa'ol warri Giibe'aa Benyaamiin jiran loltoota Filisxeemotaa ilaalanii, utuu isaan na'anii gargar tatamsa'anii in argan. 17Saa'olis namoota isa bira turaniin,<<Mee, loltoota keenya lakkaa'aatii eenyufaa akka hin jirre ilaalaa!>> jedhe; yeroo lakkaa'anitti immoo Yonaataanii fi inni mi'a lolaa isaaf baatu akka hin jirre in argan. 18Gaafas sanduuqi kakuu Waaqayyoo saba Israa'el bira waan tureef, Saa'ol mootichi Ahiiyaadhaan,<<Sanduuqa kakuu Waaqayyoo as fidi!>> jedhe*. 19Saa'ol lubichatti dubbachaa utuu jiruu, sagaleen iyyaa iddoo buufata Filisxeemotaa keessatti baay'achaa, jabaachaas in adeeme; Saa'ol achumaan lubichaan,<<Harka kee deebifadhu!>> jedhe. 20Achumaanis Saa'ol namoota isaa wajjin turan hundumaa walitti qabatee gara iddoo waraanaa in dhaqe; yommuu achi ga'an immoo diinonni isaanii hamma malee walii wallaalanii billaadhaan waliidhuma isaanii utuu rukutanii in argan*. 21Ibroonni warri duraan Filisxeemotatti galanii isaanii wajjin iddoo buufata isaanii keessa turan, amma immoo deebi'anii Israa'eloota Saa'olii fi Yonaataan duukaa jiranitti in dabalaman. 22Israa'eloonni biyya gaaraa isa kan Efreem keessa dhokatanii turan hundinuu Filisxeemonni akka baqatan in dhaga'an; yommus isaanis immoo lolaaf duukaa bu'anii Filisxeemota in ari'an*. 23Gaafas Waaqayyo saba Israa'el waan oolcheef, lolli mandara Bet-Aween darbee in adeeme.#18 4:3-4 20 Abo 7:22; 2Sen 20:23 22 13:6

24Saa'ol gaafas,<<Hamma galgalaatti, hamma ani diina koo ijaa baafadhutti, namni waa nyaate abaaramaa haa ta'u!>> jedhee, namoota Israa'el kakaa jala in galche; kanaaf namni tokko illee midhaan waan afaaniin hin qabiniif dadhabanii turan. 25Kana irratti hundumti isaanii caakkaatti nam'anii achitti damma in argatan. 26Caakkaa keessa yommuu adeemanitti nadhii dammaa lafa irra yaa'u in argan; haa ta'u iyyuu malee, sababii abaarsa Saa'ol sodaataniif jarri afaan isaaniitiin hin qabne. 27Yonaataan garuu, abbaan isaa jara kakuu jala akka galche hin dhageenye waan ta'eef, ulee qabatee ture fiixee isaa nadhii dammaa sanatti cuuphee in muuxate; achumaanis dammichi ija isaa in ibseef. 28Jara keessaa immoo namni tokko, << <Namni har'a midhaan nyaatu abaaramaa haa ta'u!>> jedhee, abbaan kee saba kana kakuu jala galcheera; sabni kun kanaaf dadhabe>> jedheen. 29Yonaataan immoo,<<Yoos abbaan koo saba kana rakkiseera; ani illee ergan damma kana irraa xinnoo ishee afaaniin qabe iji koo akka ife ilaalaa! 30Jarri kun har'a wanta diinota isaanii irraa booji'an keessaa kan argatan ba'eessa godhanii nyaataniiru utuu ta'ee, kana irra in wayya hin turree ree>> Filisxeemota keessaas caalaa in fixu hin turree ree?>> jedhe.

31Gaafas Israa'eloonni warra Filisxeemotaa mandara Miikmaashii kaasanii hamma Ayalonitti erga rukutanii booddee baay'ee in dadhaban. 32Isaan wanta booji'atan irratti lafa dhadha'anii, hoolota, sangootaa fi jabboota fudhatanii lafatti in qalatan; foonichas dhiiguma isaatii wajjin in nyaatan. 33Yommus jarreen tokko,<<Kunoo, namoonni foon dhiiguma isaatii wajjin nyaachuu isaaniitiin Waaqayyo duratti cubbuu hojjetaniiru>> jedhanii Saa'olitti in himan; kana irratti Saa'ol,<<Isin hin amanamtan; amma dhagaa guddaa isaa tokko konkolaachisaatii gara koo fidaa!>> jedhe*. 34Itti fufees,<<Gara namootaa dhaqaatii,<<Tokkon tokkon keessan sangaa keessanii fi hoolaa keessan gara kootti fidaa! Asittis qalaatii nyaadhaa! Waaqayyo duratti cubbuu akka hin hojjenneef immoo amma illee dhiigni isaa utuu keessa jiruu foon hin nyaatinaa!>> jedhaatii itti himaa!>> jedhe; hundumti isaaniis mata-mataatti sangaa tokko tokko fidatanii halkanuma sana achitti in qalatan. 35Yeroo sanatti Saa'ol iddoo aarsaa Waaqayyoof in ijaare; iddoon aarsaa sunis isa inni jalqaba ijaare ture.#32-33 Lew 17:10-14

36Saa'ol yommus namoota Israa'eliin,<<Kottaa, halkaniin warra Filisxeemotaa duukaa buunee hamma lafti bari'ee ifutti in saamna! Isaan keessaas nama tokko illee fayyaatti hin hambifnu>> jedhe; isaanis,<<Waanuma ija keetti tole hundumaa hojjedhu!>> jedhaniin; lubichi garuu,<<Mee, dura Waaqayyoon itti gaafanna>> jedhe. 37Kana irratti Saa'ol,<<Warra Filisxeemotaa kana duukaa bu'ee rukutuu>> Harka Israa'el keessas isaan in buuftaa?>> jedhee Waaqayyoon in gaafate; Waaqayyo garuu gaafas deebii hin kennineef*. 38Kana booddee Saa'ol,<<Isin yaa geggeessitoota sabaa! Hundumti keessan as dhi'aadhaatii har'a cubbuun attamitti akka hojjetame baraatii ilaalaa! 39Dhugaa Waaqayyoo isa saba Israa'el oolchuu ti! Namni cubbuu kana hojjete Yonaataan ilma koo yoo ta'e iyyuu ajjeefamuutu isaaf ta'a!>> jedhe; garuu jara hundumaa keessaa namni tokko illee deebii hin kennineef*. 40Yommus Saa'ol namoota Israa'el hundumaan,<<Isin fuula tokko dhaabadhaa! Anii fi Yonaataan ilmi koo immoo fuula tokko in dhaabanna!>> jedhe; jarris,<<Waanuma ija keetti tole hundumaa hojjedhu!>> jedhaniin. 41Kana booddee Saa'ol, Waaqayyo goofticha Israa'eliin,<<Ati dhugaa kana baasi!>> jedhe; kana irratti buufanni mukaa Yonaataanii fi Saa'olitti in ba'e, namoonni warri kaan garuu kana jalaa in ba'an*. 42Saa'ol itti fufee,<<Anaaf Yonaataan ilma kootiif immoo buufata mukaa buusaa!>> jedhe; buufanni mukaa sunis Yonaataanitti in ba'e.#37 28:5-6 38-39 Iya 7:11-15 41 Bau 28:30; Lak 27:21

43Yommus Saa'ol Yonaataaniin,<<Waan hojjette anatti himi!>> jedhe; Yonaataan kana irratti,<<Fiixee ulee kootiinan damma xinnoo ishee muuxadhe; kanaaf ajjeefamuun anaaf in ta'aa ree?>> jedhe*. 44Kana irratti Saa'ol,<<Yaa Yonaataan! Yoo ati ajjeefamuu dhabaatte, Waaqayyo ana haa ajjeesu!>> jedhe. 45Israa'eloonni garuu Saa'oliin,<<Yonaataan isa oolchaa guddaa akkasii Israa'el keessatti hojjetetu ajjeefamaa>> Wanti akkasii kun hin ta'u; har'a inni gargaarsa Waaqayyootiin oolchaa kana waan hojjeteef, dhugaa Waaqayyo isa jiraataa ti! Rifeensi mataa isaatii tokko illee duraa lafa hin bu'u!>> jedhan; jarri akkasitti Yonaataan akka hin ajjeefamne in godhan*. 46Filisxeemonni gara biyya isaaniitti waan deebi'aniif, Saa'ol isaan duukaa bu'ee ari'uu dhiisee in deebi'e.#43 Iya 7:19 45 11:13

Mootummaan Saa'ol Jabaachaa Adeemuu Isaa

47Saa'ol Israa'el irratti mootii erga ta'ee jalqabee diinota isaa karaa hundumaa in lola ture; isaanis Mo'aabota, ilmaan Amoon, Edoomota, mootota Zobaa fi Filisxeemota turan; Saa'ol iddoo dhaqu hundumaatti iyyuu diinota isaa in rakkisa ture. 48Innis humnaan Amaaleqoota rukutee, Israa'eloota harka warra isaan saamanii jalaa in baase.

49Maqaan ilmaan Saa'ol, Yonaataan, Yishwii fi Malkiishuwaa dha; maqaan intaloota isaa lamaanii immoo, kan ishee angafaa Meraab, kan ishee quxisuus Mikaal ture*. 50Maqaan haadha manaa Saa'ol Ahiino'aam; isheen intala Ahiimaaz; maqaan ajajaa humna waraanaa isaatii Abneer; inni ilma Neer wasiila Saa'ol ture*. 51Qiish abbaan Saa'olii fi Neer abbaan Abneer ilmaan Abii'el turan*. 52Saa'ol guutummaa bara isaatiitti Filisxeemotaa wajjin jabeessee wal lolaa ture; nama jabaa yookiis jagna yeroo argatu immoo ofitti fuudhee in hojjechiifata ture.#49 18:17-20; 19:11-17 50 17:55 51 1Sen 9:36,39

Currently Selected:

Macaafa Saamu'el Isa Duraa 14: MacQul

Highlight

Copy