Luk 6

Luum Gwøk Cäŋ Jwömö

(Mathiew 12:1-8; Maak 2:23-28)

1'Ba na tïme na cäŋ jwömö ni Jecu cäädha dï pwöth beel, bääge atïmö ni ge tøya wïth beel ni ŋiinyge ge ki ceŋge, ni nyamge ge. 2'Ba jø Paricith møøk aköö, na «?Aŋø ni tïïyu gïn mo ba doo tïïö ki cäŋ jwömö en?»

3Ni løgi ya Jecu, na «?Aŋø, gïna tïïc Deebiti#1 Camiel 21:6 käru kwaanø, kanya 'nägi ya käci, ki jøøa cäädhö ki eni? 4Eni, ena døny Øt Jwøk ni lwør muuga näk nyuuthe ni cam geni, na näk ba doo beer jï dhaanhø jaak ki man cam gø, 'ba beege dïlämme keerge ni wø cam gø, ni ö eni ni mooc jøøa cäädhö ki eni thuwø.» 5Køøre Jecu aköö jïge, ni «Wär Dhaanhø beeye Kwääy cäŋ jwömö.»

Kanya Ö Jecu Na Køny Dhaanhø Mo Cere Obäp

(Mathiew 12:9-14; Maak 3:1-6)

6'Ba na tïme na cäŋ jwömö mør, kanya ö Jecu na døny øt acooŋ lam ni pöö, da nyen mør kaace mo cer cwïïe obäp. 7Ni ö dïpööye mo ciik Jwøk ki jø Paricith ni neetge gø døc, nee jootge ki man näk mo eni kunyö ki cäŋ jwömö, kiper nee jïtge ki luubö mo kïthge bääte. 8'Ba eni moa caarge ki cwïnyge ŋääe, ni kööe jï ŋata näk cere obäp, ni «Ööi, ni cuŋŋï nyïm kany.» Ni ö maal ni cuŋŋe kaaca. 9Ni kö Jecu jïge, na «?A pëënynya uuni, agïnaŋø no orømø ki køør ciik Jwøk ki man tïïi ki cäŋ jwömö, beeye gïn mo beer wala gïn mo raac? ?Beeye ki man piem jwïëy wala ki man raanynyi?» 10Ni neen nyeŋge bëët, ni kööe jï nyenøgø, ni «Rwiec cerï.» Ni put gø rwiec, ni ö cere ni døø kare. 11'Ba gena gootø døc, ni cäänge yïthakicge keerge kiper gïno rømi ki man tïïcge gø dëër Jecu.

Kanya Ö Jecu Na Jier Bääŋi Apaar Kurriiø

(Mathiew 10:1-4; Maak 3:13-19)

12'Ba yïth nïrögøøni, Jecu aeth maal bäät kïdi kuna läme. Ni thöör wäär bäre ni lama Jwøk. 13'Ba na tïme na amöölla, bääge acwøle, ni jëëde dïge ki jiy apaar kurriiø, jøøa tïïe na nyïïatwieli. 14Ni beeye Cayman, ŋata caae ni Piter, ki coki ma Andaru, ki Jeemeth, ki Jøøn, ki Pilip, ki Barthølömu, 15ki Mathiew, ki Tøma, ki Jeemeth wär Alpia, ki Cayman na cwøl ni Dhelat,#6:15 Dhelat nyootha dhaanhø mo cwïnye lïëth ki man gwøk ciik Jwøk. 16ki Juudac o Jeemeth, ki Juudac Ickarïët, ŋata cïp eni ceŋ nyïïmän.

Kanya Ö Jecu Na Pööe Ni Kunyö Ki Jø Täwe

(Mathiew 4:23-25)

17Køøre Jecu aduu piny ki bääge moa jiere, ni cuŋŋe kany mo ree päärö. 'Ba da lwaa bääŋi moe mo thööth, ki lwaa dhaanhø mo päl mana öö ki yi Judia bäre, ki Jerucalem, ki moa öö ki Tayar ki Caydan, mïëya en bäät naama dwøŋ, 18jøøa ö kuna wïnyge luumme, nee täwe moge køny thuwø. Ni ö jøøa näk oööl juuwi mo reyø ni jöön dëëtge. 19Ni ö lwaaøgø bäre ni tïmge ni ge manynya man gutge gø, kiper da teek mo wø öö ki baŋe ni køny ge bëët.

Luum Gwïëth Ki Luum Gïïo Reyø Moo Tägi

(Mathiew 5:1-12)

20Kanyøgø Jecu alwïthö ni neen jï bääge, ni kööe,

«Gwïëth en jïïu, u ni can, kiper buc Jwøk a maru.

21Gwïëth en jïïu, u no onäk käci ennø, kiper uuno jäŋ.

Gwïëth en jïïu, u ni jwöŋi ennø, kiper uuno ŋïëri.

22Gwïëth en jïïu kanyo ö jiyi noo mänge ki uuni ni kwierge uuni ni janyge uuni, ni jøøŋge nyeŋŋu kiper mana näk mo uuna bääk Wär Dhaanhø.

23«Wär yïthu mïnge dïcäŋöca, ni kanynyu ki met ec, kiper gïno mëëk uuni maal dwøŋ. Kiper manøgø beeye gïna tïïc kwäcge røk nyïïkuk Jwøk thuwø.

24«'Ba otïmö ni raac jïïu, u no okwär ennø, kiper gïï wø mïn yïthu ki ge anø wëëk u.

25Otïmö ni raac jïïu, u no ojäŋ ennø, kiper uuno 'näk käci.

Otïmö ni raac jïïu, u ni ŋïëri ennø, kiper uuno kïmmi ni jwöŋu.

26Otïmö ni raac jïïu, kanyo ö jiyi noo pwøcge uuni, kiper manøgø beeye gïna tïïc kwäcge røk nyïïkuk Jwøk moa näk patha adïëri thuwø.

Luum Mëër Man Mëër Dhaanhe Ki Nyïïmänne

(Mathiew 5:38-48)

27«'Ba a caana gø jïïu, u ni wïny gø en, mëërru ki nyïïmännu, ni tïïyu gïï mo beyø jï jø wø män ki uuni. 28Ni gwïëthu jø wø cien uuni, ni lämu kiper jø wø jany uuni. 29'Ba ŋato dhööŋ ï ki thääŋŋï, wär thääŋŋï maya løgï jïre thuwø. 'Ba ŋato käl koonhnhï, kär abïïno en tiere mänï ki eni thuwø. 30Ni mooyï jø wø kwac ïïni bëët. 'Ba ŋat mo japï ee kälö, kär cäŋ pëënynyö. 31'Ba gïn wäro manynyu nee tïïc jiyi jïïu, wär wø tïïyu jïge thuwø.

32«?'Ba ni näk mou mëër ka jø wø mëër ki uuni keerge, agïnaŋø ni beer noo pwøc uuni kipere? Kiper këëlla jø raay kiree wø mëër ka jø wø mëër ki geni. 33?'Ba ni näk gïï mo beyø wø tïïyu jï jø wø tïïc gïï mo beyø jïïu, agïnaŋø ni beer noo pwøc uuni kipere? Kiper këëlla jø raay wø tïïö na enønø. 34?'Ba ni näk mou wëëga jøø ni you ŋäädhö yøø mäyö baŋu nee duuge jïïu, agïnaŋø ni beer noo pwøc uuni kipere? Kiper këëlla jø raay wø wëëga jø raay møga mäyö baŋge, nee cäŋge duuö na kare. 35'Ba mëërru ki nyïïmännu ni tïïyu gïï mo beyø jïge, ni wëëgu ge mäyö baŋu, ni bäŋ gïn mo ŋääthu ni duua baŋu. 'Ba uuno jïti ki gïn mo dwøŋ maalø, ni tïmu na wäät Jwøa Dwøŋ ni en Maal. Kiper eni ki dëëre mëëye wø nyuthe jø wø kuc dwøk met ec, ki jø raay. 36Bëëdu ni cwïnynyu lïëth ki køny keda mar Wääu na cwïnye lïëth ki køny.

Kär Mo Jø Møøk Ŋøl Piny

(Mathiew 7:1-5)

37«Kär dee ŋat mo ŋølu wøk, nou ba ŋøl wøk, ni bäŋe ŋat mo jäällu, nou ba jääl thuwø. Ni weyu gïï wø bayi dëëtu, 'ba gïï wø bayu owec thuwø. 38Muu, 'ba ocäŋ mëëk uuni, ni cïp ka rumi mo othielø no oŋenø, ni øya piny, ni kïthi yïth aleeŋŋe mou. Kiper rumi man wø cïpu beeye rumi mano duu baŋu.»

39'Ba luubö mør acäŋ caannø jïge kaamar leer, ni kööe, ni «?Ŋat ma cwør, cwør mør a dee gø pieyø nidïï? ?Aŋø, ge ba päth yi buur karge riet? 40Ŋat mo di pwönynyö ba dwøŋŋa eni ki dïpööy mare. 'Ba ŋati man nø, kany wø nø pwönynyi døøc, tïmö ni caala dïpööy mare. 41?Aŋø ni neetï ŋöömö man wø en waŋ cöögu, ni wïl wïïï ki cuudhö manø ni en waŋï enø? 42?Na aŋø na diï köö ki cöögu, ni ‹Coka, ööï nee ŋöömmo en waŋï enø käla wøk,› ni ïïni ki dëërï cuudhö manø en waŋï enø kärï joodø? Ï na ŋat atade, kwøŋ cuunhnho en waŋï enø käl wøk, køøre ïïno nëënö ni beer nee ŋöömö manø en waŋ cöögu enø kälï wøk.

Jaadhi Nø Wø Ŋec Ka Nyïïe

(Mathiew 7:16-20; 12:33-35)

43«Bäŋ jaath mo beer mo nywøla nyïëdi mo reyø. Ni bäŋe jaath mo raac mo nywøla nyïëdi mo beyø. 44'Ba jaadhi nø, wø ŋec ka nyïïe. Kiper nyïï olämmi bäŋ wø pønna dëët jer koodhi, ni nyïïomøki bäŋ wø pønna dëët buŋŋe mo da koodhi. 45'Ba ŋata beer wø käla gïn mo beer wøk ki røk japa beyø na en cwïnye. 'Ba ŋata raac wø käla gïn mo raac wøk ki røk japa reyø na en cwïnye. Ni gïï wø thööth ni wø en cwïny dhaanhø beege ni wø caane ki dhee.

Luum Dïgëëte Ariiø

(Mathiew 7:24-27)

46«?Aŋø ni wø cøøru aani, ni ‹Kwäärö, Kwäärö,› ni ba tïïyu gïï wø caana jïïu? 47'Ba ŋato wäro ö baŋa ni wïny luupa, ni tïïc geni, teeŋ ŋatøgø caana caanø jïïu ennø. 48Eni caala dhaanhø mo ogëëdö ki øtø, mo tier gø ee koonyø ni thur piny, ni cwää tier gø bäät kïdi. 'Ba na ö jwïëe, pïï akwöt dëër ødøgø, ni käre løny ki man nëëk gø, kiper mana näk mo ogeerø ni teek. 49'Ba ŋat mo owïny luupa ni ba tïïc geni, caala ŋat mo øtø ee geer dï ŋøøm jaak, ni tier gø käre koonyø, ni ö jwïëö ni kwöt dëër gø, ni laar pädhö. Ni räny ødøgøøni okadhø døc.»

Currently Selected:

Luk 6: AnyuB

Highlight

Copy