Wïlöölö 9
9
Luumma Tuut Jwøki Ki Nöa
1Køøre Jwøk Nöa agwïëdhe ki wääte, ni kööe jïge, ni «Nyöödu ni nyaayu ni pääŋŋu piny. 2Ni ö lääyi mo bäät piny bëët ki wec maal bëët këël gïï wø muuli bäät ŋøøm bëët ki rec naam bëët ni bëëtge ni lwäär ki uuni, ni tïmge ni ge böö ki uuni. Geno bëëdö ni ena ceŋŋu. 3Gïï wø cäädhi na kwøw bëët otïmö na cam jïïu. Gena cïba jïïu kaawat mana cïba gïïa näk otuy na marr bëët jïïu.
4«'Ba rïŋö mo remø mare poot ena dëëre kär cammu, kiper remø beeye jwïëy moe. 5Ka adïëri møn, kwör rem kwøw maru coola coolø dëët lääy bëët. Ni coola gø thuwø dëët jiy bëët. Kwör rem kwøw mar dhaanhø coola coolø dëër ŋati man nø.
6«Ŋat mo kønynya rem dhaanhø piny jaak,
remme okøny dhaanhe mørri piny thuwø;
kiper Jwøk dhaanhø acwääe ki kïdö mo caala mare.
7'Ba uuni, jïtu ki nyïëdi ni nyaayu,
ni pääŋŋu piny nou thööth døc ni nyaayu yie.»
8Køøre Jwøk acäänö ki Nöa ki wääte na en buute, ni kööe, 9ni «Ennø, aani a tudö ki luubö ki uuni ki nyïïkwaayu moo ööi køøru. 10Ni tuuda gø thuwø ki gïïa kwøw bëët na en buutu, ni beege weny ki lääc paac ki lääc paap bëët na en buutu, na näk gïïa ö wøk bëët ki yi jääy ki uuni na aciel, këël mana këët ri lääc bäät piny bëët. 11Luubö mara tuuda tuudö ki uuni. Køør man en nø gïïa kwøw bëët bäät piny ba doo ränynyö këët ki jwïïö, ni doo bäŋ jwïïö mo duui këët mo caala man mo raanynya piny bäre.»
12Ni kö Jwøki, ni «Man beeye nyuudhi mar luumma tuuda yaakiyø ki uuni ki gïïa näk kwøw bëët na en buutu, kiper beenhnhø bäre thuwø mano ööi yi nyïme. 13Aani daanø mara acïba yi pöölö maal, nee tïme na nyuudhi mar luumma tuuda yaakicwa ki piny. 14Køøre kany wäro käla pøøl bäät piny, daanø puta nëënnö yïth pøøl. 15Ni ö aani ni para wïïa ki luumma tuuda na en yïthakiyø ki uuni ki gïïa kwøw bëët, ni pïï ba cäŋ duuö këët na jwïïö kuna raany gïïa kwøw bëët. 16Kany wäro tïme ni daanø ena yi pöölö maal, eni neena neenø, ni puta wïïa par ki luumma tuut na näk bäŋ cuŋŋe na en yïthakicwa, a na Jwøk, ki gïïa näk kwøw bëët na en bäät piny.»
17Ni kö Jwøki jï Nöa, ni «Man beeye nyuudhi mar luumma tuuda na tïïa nee bëëde yïthakicwa ki gïïa näk kwøw bëët na en bäät piny.»
Gïïa Car Nöa Kiper Wääte
18'Ba wäät Nöa na ö wøk ki yi jääy kar kaaca beege Cëm ki Kaam ki Jaapeth. Ni ö Kaammi ni tïme na wää Keenanni. 19Ni jøøgø na adäk yøø beege jøøa näk wäät Nöa, ni jiy moa nyaay bäät piny bëët käla rege.
20Køøre Nöa na näk ŋat puur atägö ki man piith pwöth omøki. 21Kanyøgø ena mädhö ki køøŋ nyïïomøki ni meere, ni käl abïïe wøk dëëre, ni dööŋe ki dëëre yo oduŋkaara mare. 22Ni ö Kaammi na näk wää Keenanni ni raŋ jï wänni jaak ni bëëdö ka dëëre, ni døø wøk ni caan gø jï nyïïmenni riet. 23'Ba Cëm ki Jaapeth alwötö ka abïï ni kïthge gø göökge, ni cääthge ni ŋäthge ege løø, ni cige ni rïëpge wääge na näk bëëdö ka dëëre; ni løøge nyïmge wøk kiper nee wääge na näk bëëdö ka dëëre nee ba neenge.
24Kanya ö Nöa na pääe ni lëëny wïïe ki meec køøŋø, gïna tïïc wääde mana thiinh dëëre awïnynye. 25Køøre ena köö,
na «Acïëni oen bäät Keenan,
ni tïme ni kadha laŋ mare dï laaŋe mo nyïïmenni.»
26Ni cäŋ köö thuwø,
ni «Pwøc oen jï Wuuö Jwøk,
na näk Jwø Cëm;
beerra man tïm Keenanni na laŋŋø mare.
27Beerra man ö Jwøki ni wëëk Jaapeth nyaay,
ni bëëde yïth oduŋkaare mo Cëm,
ni tïm Keenanni na laŋŋø marge.»
28'Ba Nöa abëëdö ki cwiiri ma dïpe adäk ki pïërabïïc køør jwïïö. 29Ni cwiiri moa beet Nöa bëët beege cwiiri ma dïpe abïŋween ki pïërabïïc. Køøre ena thøw.
Currently Selected:
Wïlöölö 9: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia
