መጽሐፈ ኢዮብ 33
33
ኤልዩስ ኢዮብን እንደ ገሠጸው
1“ነገር ግን፥ ኢዮብ ሆይ፥ ቃሌን ስማ፥
ነገሬንም አድምጥ።
2እነሆ፥ አፌን ከፍቻለሁ፥
አንደበቴም ይናገራል።
3ልቤም ንጹሕ ነገርን ያስባል፥
የከንፈሮችም ማስተዋል ንጹሕ ነገርን ይመረምራል።
4የእግዚአብሔር መንፈስ ፈጠረኝ፥
ሁሉንም የሚችል የአምላክ እስትንፋስ ያስተምረኛል።
5በዚህ ነገር ልትመልስልኝ ትችል እንደ ሆነ ታገሠኝ፥
እኔም እነግርሃለሁ፤ አንተም መልስልኝ።
6አንተ እንደ እኔ ከጭቃ የተፈጠርህ ነህ፥
የሁላችንም ተፈጥሮ ከዚያው ነው።#በዕብራይስጥ ልዩነት አለው።
7እነሆ፥ ግርማዬ አታስፈራህም፥
እጄም አትከብድብህም።
8ግፍህን ተናግረሃል፥
የቃልህንም ድምፅ ሰምቻለሁ፥ እንዲህም ብለሃል፦
9እኔ ንጹሕ ነኝ፥ አልበደልሁምና፤
እኔ ጻድቅ ነኝ፥ ኀጢአትንም አልሠራሁም።
10እነሆ፥ ምክንያት አግኝቶብኛል፥
እንደ ጠላትም ቈጥሮኛል፤
11እግሬን በግንድ አጣበቀ፥
መንገዴንም ሁሉ ጠበቀ።
12እነሆ፥ እኔ ጻድቅ ነኝ፥ ቃሌንም አይሰማኝም እንዴት ትላለህ?
ከሟች ሰው በላይ ያለ እርሱ ዘለዓለማዊ ነውና።
13አንተ፦ ‘ቃሌን ሁሉ ለምን አይሰማኝም?’ ትላለህ።
14እግዚአብሔር በሕልም ወይም በሌሊት ራእይ፥
አንድ ጊዜ ወይም ሁለት ጊዜ የተናገረ እንደሆነ፥
15በአልጋ ላይ ተኝተው ሳሉ፥
በሰዎች ላይ ታላቅ ድንጋጤን ያመጣል።
16በዚያን ጊዜ የሰዎችን ማስተዋል ይከፍታል፥
ግርማ ባለው ራእይም ያስደነግጣቸዋል፤
17ሰውን ከኀጢአቱ ይመልሰው ዘንድ፥
ሥጋውንም ከውድቀት ያድነው ዘንድ፥
18ነፍሱን ከሞት ያድናታል፤
በሰይፍም እንዳይጠፋ ይጠብቀዋል።
19“ደግሞ በአልጋ ላይ በደዌ ይገሥጸዋል፥
አጥንቱም ሁሉ ይንቋቋል።
20ማንኛውንም መብል መቅመስ አይችልም።
ሰውነቱ ግን መብልን ትበላ ዘንድ ትመኛለች።
21ሥጋው እስከሚያልቅ ድረስ፥
አጥንቱም ባዶውን እስከሚታይ ድረስ፥
22ሰውነቱ ለሞት፥
ሕይወቱም ወደ ሲኦል ቀርባለች።
23የሞት መላእክት ምንም ሺህ ቢሆኑ፥#በዕብራይስጥ ልዩነት አለው።
በልቡ ወደ እግዚአብሔር ሊመለስ ቢያስብ፥
ኀጢአቱን ለሰው ቢናገር፥
በደሉንም ቢገልጥ፥
ከእነርሱ አንዱ እንኳ አይገድለውም፤
24በሞት እንዳይጠፋ ይጠብቀዋል፥
ሰውነቱንም እንደ ግድግዳ ምርግ ያድሳታል።
አጥንቶቹንም በመቅን ይሞላል።
25ሥጋውን እንደ ሕፃን ሥጋ ያለመልማል፤
ከሰዎችም ይልቅ ወደ ጕብዝናው ዘመን ይመልሰዋል።
26ወደ እግዚአብሔር ይጸልያል፥
ጸሎቱም ተቀባይነትን ያገኛል።
በደስተኛም ፊት እያመሰገነ ይገባል፥
ለሰውም ጽድቁን ይመልስለታል።
27ያንጊዜም ሰው ራሱን ይነቅፋል፤ እንዲህም ይላል፦
‘እኔ ምን አድርጌአለሁ?
እንደ ኀጢአቶችም መጠን አልቀጣኝም፤
28ነፍሴ ወደ ጥፋት እንዳትወርድ አድኖአታል፥
ሕይወቴም ብርሃንን ታያለች።’
29“እነሆ፦ ሁሉን የሚችል እርሱ፥
ይህን ሁሉ ሦስት ጊዜ ከሰው ጋር ያደርጋል፤
30ሕይወቴም በብርሃን ውስጥ ታመሰግን ዘንድ፥
እርሱ ነፍሴን ከሞት አድኖአታል።
31ኢዮብ ሆይ፥ አድምጥ፥ እኔንም ስማ፤
ዝም በል፥ እኔም እናገራለሁ።
32ነገር ቢኖርህ ተናገር፤
ትጸድቅ ዘንድ እወድዳለሁና ተናገር።
33ያለዚያም እኔን ስማ፤
ዝም በል፥ እኔም ጥበብን አስተምርሃለሁ።”
Currently Selected:
መጽሐፈ ኢዮብ 33: አማ2000
Highlight
Share
Copy
Want to have your highlights saved across all your devices? Sign up or sign in
