ମାତିସ୍ 27
27
ଯୀଶୁସିନ୍ ପିଲାତୁସ୍କି ଆଘ୍ଲି ଅନ୍ଦ୍ରାଲ୍ନାଏ
(ମାର୍କୁସ୍ ୧୫:୧; ଲୁକାସ୍ ୨୩:୧,୨; ଯୋହାନ୍ ୧୮:୨୮-୩୨)
1ଯେତ୍କବାକେନ୍ ଭୋର୍ ପାଇରି ମାନ୍ଚାତା, ଜାମା ମୁଖ୍ୟା ପୁରୋହିତ୍ର୍ ଆରୁ ଆଲାର୍ଘି ମୁଖ୍ୟାର୍ ଯୀଶୁସିନ୍ ପିଟାଗେ ଉପାୟ କାମ୍ଚାର୍। 2ଆବ୍ଡ଼ାର୍ ଆସିନ୍ ହିଁଇକିରି ଅଚ୍ଚାର୍ ଆରୁ ପିଲାତୁସ୍ ରାଜ୍ପାଲ୍ସ୍କି ହେଖ୍ଖାନୁ ସୋଁପ୍ଚେଇଚାର୍।
ଯୁଦାସ୍ ତାନ୍ ନିଜେ ଫାଶୀ ମାନାଲ୍ଦାସ୍
(ପ୍ରେରିତ୍ ୧:୧୮,୧୯)
3ଯେତ୍କବାକେନ୍ ଯୀଶୁସ୍କି ବିଶ୍ୱାସ୍ଘାତ୍ କାମୁ ଆଲାସ୍ ଯୁଦାସ୍ ଏରିୟାସ୍ କା ଯୀଶୁସ୍ ଦୋଷୀ ଠାହ୍ରାରା କେର୍କାଦାସ୍ ତା ଆସ୍ ପାସ୍ତାରାଚାସ୍ ଆରୁ ଆସ୍ ତିରିଶ୍ଟା ରୂପାଘି ସିକ୍କାନ୍ ମୁଖ୍ୟା ପୁରୋହିତ୍ର୍ ଆରୁ ମୁଖ୍ୟାର୍ଘି ଚାହାଗେ କିର୍ତାଚାସ୍ ଅନ୍ଦ୍ରାସ୍ 4ଆରୁ ତେଙ୍ଗିୟାସ୍, “ଏନ୍ ବିନା ଦୋଷୀସିନ୍ ପିଟାଗେ ଧାର୍ତିକିରି ପାପ୍ କାମ୍ଚ୍କାଦାନ୍!” ଲେକିନ୍ ଆବ୍ଡ଼ାର୍ ତେଙ୍ଗିୟାର୍, “ହୁନ୍ନୁ ଏହ୍ମାଏ ଏନ୍ଦେର୍ ରାଇ? ନିନିନ୍ ବୁଝ୍ରା।” 5ଆଙ୍ଗେନ୍ ଆସ୍ ଆ ରୂପାଘି ସିକ୍କାବନ୍ ପାର୍ମେଶ୍ୱାର୍ସ୍କି ମନ୍ଦିର୍ନୁ ଖେବ୍ଡ଼େଇଚାସ୍ ଆରୁ ବୁଙ୍ଗିୟାସ୍, ଆରୁ କାଇକିରି ତାନିନ୍ ଫାଶୀ ମାନ୍ଚାସ୍।
6ମୁଖ୍ୟା ପୁରୋହିତ୍ଜାମାର୍ ଆ ରୂପାଘି ସିକ୍କାନ୍ ହୋଇକିରି ତେଙ୍ଗିୟାର୍, ଇଦ୍ ହେଁସୁଘି ଦାମ୍ଦ୍ “ଇଦିନ୍, ଭାଣ୍ଡାର୍ ବାଖ୍ରାନୁ ଉଇନା ବାନେ ମାଲ୍ଲିଦ୍।” 7ଆନ୍ତିନ୍ ଆବ୍ଡ଼ାର୍ ବିଚାର୍ କାମିକିରି ଆ ରୂପାଘି ସିକ୍କାତି ପର୍ଦେଶୀୟାରିନ୍ ମାଁଣାଗେ କୁମ୍ଭରାସ୍କି ହାଲ୍ଲୁନ୍ ହେନ୍ଦିୟାର୍। 8ହୁଦ୍ଘିଲାଗାନ୍ ହୁ ହାଲ୍ଲୁଦ୍ ଇନ୍ନାଜୁଟି ହେଁସୁଘି ହାଲ୍ଲୁ ବୁଲି ତେଙ୍ଗାକାଇ। 9-10ହୁଦ୍ଘିଲାଗାନ୍ ଏକା ବଚନ୍ଦ୍ ଯିରିମିୟା ନାବୀସ୍କି ଦ୍ୱାର୍ନୁ ତେଙ୍ଗାକେର୍କିଚା ଆଦ୍ ପୁରା ମାନ୍ଚା: “ଆବ୍ଡ଼ାର୍ ତିରିଶ୍ଟା ରୂପା ସିକ୍କାନ୍ ଅଚ୍ଚାର୍ ଏକା ସିକ୍କାନ୍ ଇସ୍ରାଏଲ୍ତା ଆଲାର୍ ଆସ୍କେ ଚିଚ୍ଚକା ଦାମ୍ ରାଚା ଆରୁ ପ୍ରାଭୁସ୍କି ଦ୍ୱାର୍ନୁ ଏଙ୍ଗା ଚିଚ୍ଚକା ହୁକୁମ୍ଘି ଲେଖା ଆତ୍ତି କୁମ୍ଭରାସ୍କି ହାଲ୍ଲୁନ୍ ହେନ୍ଦିୟାର୍।”
ପିଲାତୁସ୍ ଯୀଶୁସିନ୍ ପ୍ରଶ୍ନ ମେନାଲ୍ଦାସ୍
(ମାର୍କୁସ୍ ୧୫:୨-୫; ଲୁକାସ୍ ୨୩:୩-୫; ଯୋହାନ୍ ୧୮:୩୩-୩୮)
11ଯେତ୍କବାକେନ୍ ଯୀଶୁସ୍ ରାଜ୍ପାଲ୍ସ୍କି ଚାହାନୁ ଇଜ୍ଜକାଚାସ୍ ତା ରାଜ୍ପାଲ୍ସ୍ ଆସିନ୍ ମେନ୍ଚାସ୍, “ନିନ୍ ୟାହୁଦୀ ଜାମାର୍ଘି ରାଜାଏ କାଁଏ?” ଯୀଶୁସ୍ ଆସିନ୍ ତେଙ୍ଗିୟାସ୍, “ନିନିନ୍ ତେଙ୍ଗାଲ୍ଦାଏ।” 12ଯେତ୍କବାକେନ୍ ମୁଖ୍ୟା ପୁରୋହିତ୍ଜାମାର୍ ଆରୁ ମୁଖ୍ୟାଜାମାର୍ ଯୀଶୁସିନ୍ ଦୋଷ୍ ଚିଆଲିୟାର୍ ତା, ଆସ୍ ଏନ୍ଦେର୍ହି ଯାବାବ୍ ମା ଚିଚ୍ଚାସ୍। 13ଆନ୍ତିନ୍ ପିଲାତୁସ୍ ଯୀଶୁସିନ୍ ତେଙ୍ଗିୟାସ୍, “ନିନ୍ ମାଲ୍ଲା ମେନୁୟ କାଁଏ କା ଇବ୍ଡ଼ାର୍ ନିଙ୍ଘା ବିରୁଦ୍ଧ୍ନୁ କେତ୍କ ସାକ୍ଷୀ ଚିୟାଲ୍ନାଏ?” 14ଲେକିନ୍ ଯୀଶୁସ୍ ଆସିନ୍ ଅଣ୍ଟା କାତ୍ଥାଘିହି ଯାବାବ୍ ମା ଚିଚ୍ଚାସ୍, ଆଙ୍ଗେନ୍ ରାଜ୍ପାଲ୍ସ୍ ମୁରୁକ୍ ଆଚ୍ମିତ୍ ମାନ୍ଚାସ୍ କେରାସ୍।
ଯୀଶୁସ୍କେ ମରନ୍ ଦଣ୍ଡ୍ଘି ହୁକୁମ୍ ଚିୟାଲ୍ନାଏ
(ମାର୍କୁସ୍ ୧୫:୬-୧୫; ଲୁକାସ୍ ୨୩:୧୩-୨୫; ଯୋହାନ୍ ୧୮:୩୯—୧୯:୧୬)
15ଲେକିନ୍ ପରବ୍ ସାମାୟନୁ ଆଲାର୍ଘି ଇଚ୍ଛା ଲେଖା ଅଣ୍ଟା ବନ୍ଦୀସିନ୍ ଆବ୍ଡ଼ାର୍ଘି ଲାଗାନ୍ ଆମ୍ବାଚାଲିୟାସ୍ ଇଦ୍ ରାଜ୍ପାଲ୍ସ୍କି ରୀତି ରାଚା। 16ହୁ ସାମାୟନୁ ବାରାବ୍ବାସ୍ ନାମେଘି ଅଣ୍ଟା ଆଲାସ୍ସିନ୍ ଜେହେଲ୍ନୁ ଗୁଡ୍ଡକାଚାର୍ ଆସ୍ ଢେର୍ ଖାରାପ୍ ନାଲ୍ଖୁ କାମାଲିୟାସ୍। 17ଆନ୍ତିନ୍ ଯେତ୍କବାକେନ୍ ଆଲାର୍ଘି ଭିଡ଼୍ ଅନ୍ଠାଣ୍ ଠୁଡ଼ିୟା ରାଚ୍କାଚାର୍ ତା, ପିଲାତୁସ୍ ଆବ୍ଡ଼ାରିନ୍ ମେନ୍ଚାସ୍, “ନିମ୍ ନେକାନ୍ ଚାହାଁଲ୍ଦାର୍ କା ଏନ୍ ନିହ୍ମା ଲାଗାନ୍ ଆମ୍ବନ୍ଚନ୍? ବାରାବ୍ବାସ୍ସିନ୍ କା, ଯୀଶୁସିନ୍ ନେକାନ୍ କା ଖ୍ରୀସ୍ତ୍ ବାନାଏ?” 18ଏନ୍ଦେର୍ଗେକା ପିଲାତୁସ୍ ଆହାଲିୟାସ୍ କା ଆବ୍ଡ଼ାର୍ ଯୀଶୁସିନ୍ ହିସ୍ଙ୍ଗାତି ଧାର୍ତାଚ୍କାଚାର୍। 19ଯେତ୍କବାକେନ୍ ଆସ୍ ନ୍ୟାୟଘି ରାଜ୍ଗାଦୀନୁ ଅକ୍କାଚାସ୍ତା ତାଙ୍ଘା ମାଏକିନିଆଁ ତାଙ୍ଘା ଚାହାଗେ ତେଙ୍ଗା ତାଇୟା କା, “ନିନ୍ ଇ ଧାର୍ମିକ୍ ଆଲାସ୍କି ମାମ୍ଲାନୁ ଆମ୍କେ କରା, ଏନ୍ଦେର୍ଗେକା ଏନ୍ ଇନ୍ନା ସାପାନ୍ନୁ ଆସ୍କି କାରଣ୍ତି ମୁରୁକ୍ ଦୁଃଖୁ ହାକ୍କିରେନ୍।”
20ଲେକିନ୍ ମୁଖ୍ୟା ପୁରୋହିତ୍ର୍ ଆରୁ ମୁଖ୍ୟା ଆଲାର୍ ବାରାବ୍ବାସ୍ସିନ୍ ନିଆଁଗେ ଆରୁ ଯୀଶୁସିନ୍ ପିଟାଗେ ଆଲାରିନ୍ ଚାଢ଼ାବାଚାର୍। 21ଲେକିନ୍ ରାଜ୍ପାଲ୍ସ୍ ଆବ୍ଡ଼ାରିନ୍ ମେନ୍ଚାସ୍, “ଇ ଦୁଇ ଲୋକ୍ସ୍ତି ନେକାନ୍ ଚାହ୍ଦାର୍ କା ଏନ୍ ନିମାଗେ ଆମ୍ବନ୍ଚନ୍?” ଆବ୍ଡ଼ାର୍ ତେଙ୍ଗିୟାର୍, “ବାରାବ୍ବାସ୍ସିନ୍।” 22ପିଲାତୁସ୍ ଆବ୍ଡ଼ାରିନ୍ ମେନ୍ଚାସ୍, “ତା ଯୀଶୁସିନ୍ ଏକାସ୍ କା ଖ୍ରୀସ୍ତ୍ସ୍ ବୁଲି ତେଙ୍ଗ୍ର୍ନାଏ, ଆସ୍କି ଏନ୍ଦେର୍ କାମନ୍?” ଜାମାର୍ ଆସିନ୍ ତେଙ୍ଗିୟାର୍, “ଆସିନ୍ କ୍ରୁଶ୍ନୁ ଠୋକାକୋ!” 23ରାଜ୍ପାଲ୍ସ୍ ତେଙ୍ଗିୟାସ୍, “ଏନ୍ଦେର୍ଗେ, ଇସ୍ ଏନ୍ଦେର୍ ଦୋଷ୍ କାମ୍ଚ୍କାଦାସ୍?” ଲେକିନ୍ ଆବ୍ଡ଼ାର୍ ଆରୁହି ଚିର୍ରାରାକିରି ତେଙ୍ଗାଗେ ଲାଗ୍ଗିୟାର୍, “ଇସିନ୍ କ୍ରୁଶ୍ ମିଆଁ ଠୋକାକୋ।” 24ଯେତ୍କବାକେନ୍ ପିଲାତୁସ୍ ଏରିୟାସ୍ କା ଆସ୍ ଏନ୍ଦେର୍ହି କାମା ପଲ୍ଲାଲ୍ଦାସ୍ ଆରୁ ଜୋର୍ସେ ଆଲାର୍ଘି ଚିର୍ରାରାନାଦ୍ ଆରୁ ବାଢ଼୍ରାଗେ ଲାଗ୍ଗିୟାତା, ଆସ୍ ଆମ୍ମୁ ଅନ୍ଦ୍ରିକିରି ଭିଡ଼୍ଘି ମାଝାନୁ ତାଙ୍ଘା ହେଖ୍ଖାନ୍ ନୋଣ୍ଡ୍ରାସ୍ ଆରୁ ତେଙ୍ଗିୟାସ୍, “ଏନ୍ ଇ ଧାର୍ମିକ୍ ଆଲାସ୍କି ହେଁସୁନ୍ତି ବିନାଦୋଷୀ ରାଦାନ୍; ଇବ୍ଡ଼ା ଜାମାଦ୍ ନିହ୍ମାଏ ଜିମାବାରୀଦ୍।” 25ଜାମା ଆଲାର୍ ଯାବାବ୍ ଚିଚ୍ଚାର୍, “ଇସ୍କି ହେଁସୁଦ୍ ନାହ୍ମା ମିଆଁ ଆରୁ ନାହ୍ମା ହାଦ୍ଦୁର୍ଘି ମିଆଁ ମାନ୍ନାଦ୍!” 26ଆଙ୍ଗେନ୍ ଆସ୍ ବାରାବ୍ବାସ୍ସିନ୍ ଆବ୍ଡ଼ାର୍ଗେ ଆମ୍ବେଇଚାସ୍, ଆରୁ ଯୀଶୁସିନ୍ କୋଡ୍ରାତି ଡେମ୍ତିକିରି କ୍ରୁଶ୍ନୁ ଠୋକାଗେ ସୋଁପ୍ଚେଇଚାସ୍।
ସିପାହୀଜାମାର୍ ଯୀଶୁସ୍କି ଆପ୍ମାନ୍ କାମାଲ୍ନାଏ
(ମାର୍କୁସ୍ ୧୫:୧୬-୨୦; ଯୋହାନ୍ ୧୯:୨,୩)
27ହୁଦ୍ଘିପାଛ୍ଲି ରାଜ୍ପାଲ୍ସ୍କି ପଲ୍ଟନ୍ଜାମାର୍ ଯୀଶୁସିନ୍ ମହଲ୍ନୁ ହୋଇକିରି ଜାମା ପଲ୍ଟନ୍ରିନ୍ ଆସ୍କି ଚାହାନୁ ଠୁଡ଼ିୟାଚାର୍, 28ଆରୁ ଯୀଶୁସ୍କି ଚିଢ଼ାନ୍ ଏତ୍ତିକିରି ଆସିନ୍ ଲାଲ୍ ରଙ୍ଗ୍ଘି ଚିଢ଼ା ଆତ୍ତ୍ତାଚାର୍, 29ଆରୁ ଆଚ୍ଚୁଘି ମୁକୁଟ୍ ଗଥିକିରି ଆସ୍କି କୁକ୍କୁନୁ ଆତ୍ତ୍ତାଚାର୍, ଆରୁ ତାଙ୍ଘାଏ ତିନା ହେଖ୍ଖାନୁ ଅଣ୍ଟା ଠେଙ୍ଗା ଧାର୍ତାଚାର୍ ଆରୁ ଆବ୍ଡ଼ାର୍ ତାଙ୍ଘା ଆଘ୍ଲି ହାଁଠୁୱାରାଇକିରି, “ହେ ୟାହୁଦୀ ଜାମାର୍ଘି ରାଜା, ଯୋହାର୍!” ଏନ୍ନେ ତେଙ୍ଗିକିରି ଆସ୍କି ମାଜାକ୍ ଉଡ଼ାବାଗେ ଲାଗ୍ଗିୟାର୍, 30ଆରୁ ଆସ୍କି ମିଆଁ ତୁପ୍ଫିୟାର୍; ଆରୁ ଆ ଠେଙ୍ଗାନ୍ ହୋଇକିରି ଆସ୍କି କୁକ୍କୁନ୍ ଡେମାଗେ ଲାଗ୍ଗିୟାର୍। 31ଯେତ୍କବାକେନ୍ ଆବ୍ଡ଼ାର୍ ଆସ୍କି ମାଜାକ୍ ଉଡ଼ାବା ମୁଞ୍ଜିୟାର୍ ତା, ଆ ଚିଢ଼ାନ୍ ଆସ୍ତି ଏତ୍ତ୍ତାଚାର୍ ଆରୁ ଆରୁଅହନ୍ ତାଙ୍ଘା ଚିଢ଼ାନ୍ ଆତ୍ତତାଚାର୍; ଆରୁ କ୍ରୁଶ୍ନୁ ଠୋକାଗେ ଅଚ୍ଚାର୍ କେରାର୍।
ଯୀଶୁସିନ୍ କ୍ରୁଶ୍ନୁ ଠୋକାଲ୍ନାଏ
(ମାର୍କୁସ୍ ୧୫:୨୧-୩୨; ଲୁକାସ୍ ୨୩:୨୬-୪୩; ଯୋହାନ୍ ୧୯:୧୭-୨୭)
32ଆବ୍ଡ଼ାର୍ ବାହ୍ରି ଉର୍ଖ୍ନା ବାକେନ୍ କୂରୀଣୀ ସହର୍ତା ଶିମୋନ୍ ନାମେଘି ଅଣ୍ଟା ଆଲାସିନ୍ ଏରିୟାର୍ ଆରୁ ଯୀଶୁସ୍କି କ୍ରୁଶ୍ବନ୍ ଚେଡ଼ାଗେ ଆସିନ୍ ଯବର୍ଜସ୍ତି କାମ୍ଚାର୍। 33ଆ ଆଡ୍ଡାନୁ ଏକାଦ୍ କା ଗୋଲ୍ଗାଥା ମାନେ ଖୋପ୍ଡ଼ି ଆଡ୍ଡା ତେଙ୍ଗାକାଇ, ଆଣସିକିରି, 34ଆବ୍ଡ଼ାର୍ ପିତ୍ ମେଶାବାଚ୍କା ଦାଖ୍ରାସ୍ବନ୍ ଯୀଶୁସ୍କେ ହାପ୍ପାଗେ ଚିଚ୍ଚାର୍, ଲେକିନ୍ ଆସ୍ ଟାଟ୍ଟେ ଏରିକିରି ହାପ୍ପାଗେ ମା ବେଦ୍ଦିୟାସ୍। 35ଆନ୍ତିନ୍ ଆବ୍ଡ଼ାର୍ ଯୀଶୁସ୍ସିନ୍ କ୍ରୁଶ୍ନୁ ଠୋକ୍ଚେଇଚାର୍ ଆରୁ ଚିଠା ଅଥ୍ରିକିରି ଆସ୍କି ଚିଢ଼ାନ୍ ହାଟ୍ଟରାର୍, 36ଆରୁ ଆସାନ୍ ଅକ୍କିକିରି ଆସିନ୍ ଜାଗାଗେ ଲାଗ୍ଗିୟାର୍। 37ଆରୁ ଆବ୍ଡ଼ାର୍ ଯୀଶୁସ୍କି କ୍ରୁଶ୍ ମିଆଁ ଦୋଷୀବାଲା ଅଣ୍ଟା ପାଟା ଲାଗାବାଚାର୍ ଆରୁ ଆନ୍ନୁ ଲେଖ୍ଚ୍କାଚାର୍, “ଇସ୍ ୟାହୁଦୀ ଜାମାର୍ଘି ରାଜା ଯୀଶୁସ୍”। 38ଆନ୍ତିନ୍ ଯୀଶୁସ୍ଗାନେ ଆରୁ ଦୁଇ ଲୋକ୍ ଡାକୁରିନ୍ ଅଣ୍ଟାସିନ୍ ତିନାତାରା, ଆରୁ ଆରୁ ଅଣ୍ଟାସିନ୍ ଡେବ୍ବାତାରା କ୍ରୁଶ୍ ମିଆଁ ଠୋକାକେରା। 39କାଲୁ ବାରୁ ଆଲାର୍ କୁକ୍କୁ ନୁକା-ନୁକା ଆସ୍କି ନିନ୍ଦା କାମାଲିୟାର୍, 40ଆରୁ ଏନ୍ନେ ତେଙ୍ଗାଲିୟାର୍, “ହେ ମନ୍ଦିର୍ବନ୍ ଧାସ୍କାନାବାଲା ଆରୁ ତିନ୍ ଦିନ୍ନୁ କାମ୍ନାବାଲା! ଯଦି ନିନ୍ ପାର୍ମେଶ୍ଵାର୍ସ୍କି ହାଦ୍ଦୁୟ ତା ନିଜ୍କେନିଜ୍ ବାଛାବା ଆରୁ କ୍ରୁଶ୍ତି ଏତ୍ତାବାରା।” 41ଏନ୍ନେନିନ୍ ମୁଖ୍ୟା ପୁରୋହିତ୍ଜାମାର୍, ପଣ୍ତିତ୍ ଆରୁ ମୁଖ୍ୟାର୍ଗାନେ ମାଜାକ୍ ଉଡ଼ାବାଇକିରି ତେଙ୍ଗାଗେ ଲାଗ୍ଗିୟାର୍, 42“ଇସ୍ ଦୁସ୍ରାରିନ୍ ତା ବାଛାବାଚାସ୍, ଲେକିନ୍ ନିଜ୍କେନିଜ୍ ବାଛାବା ପଲ୍ଲାଲ୍ଦାସ୍। ଇସ୍ତା ଇସ୍ରାଏଲ୍ତା ରାଜାସ୍। ଆକ୍କୁନ୍ କ୍ରୁଶ୍ତି ଏତ୍ତନାସ୍ ବାର୍ନାସ୍ ତା ଏମ୍ ତାଙ୍ଘା ମିଆଁ ବିଶ୍ଵାସ୍ କାମମ୍। 43ଆସ୍ ପାର୍ମେଶ୍ଵାର୍ସ୍କି ମିଆଁ ଭାର୍ଷା ଉଇକାଦାସ୍; ଯଦି ଆସ୍ ଇସିନ୍ ଚାହଁଦାସ୍ ତା ଆକ୍କୁନ୍ନିନ୍ ଇସିନ୍ ବାଛାବାନାସ୍ ଏନ୍ଦେର୍ଗେକା ଇସ୍ ତେଙ୍ଗାଚାସ୍, ‘ଏନ୍ ପାର୍ମେଶ୍ଵାର୍ସ୍କି ହାଦ୍ଦୁନ୍’।” 44ଏନ୍ନେନ୍ ଡାକୁର୍ହି ଏକାର୍ କା ଆସ୍ଗାନେ କ୍ରୁଶ୍ନୁ ଠୋକା କେର୍କାଚାର୍, ଆସ୍କି ନିନ୍ଦା କାମାଲିୟାର୍।
ଯୀଶୁସ୍କି ମରନ୍
(ମାର୍କୁସ୍ ୧୫:୩୩-୪୧; ଲୁକାସ୍ ୨୩:୪୪-୪୯; ଯୋହାନ୍ ୧୯:୨୮-୩୦)
45ଆନ୍ତିନ୍ ବାର ବାଜେନ୍ନ୍ତି ତିନ୍ବାଜେତକ୍ ଜାମା ଦେଶ୍ନୁ ଉହା ମାନ୍ଚାକେରା। 46ଆରୁ ଲାଗ୍ଭାଗ୍ ତିନ୍ବାଜେଗେ ଯୀଶୁସ୍ ଜୋର୍ସେ ଚିର୍ରା ରାଇକିରି ତେଙ୍ଗିୟାସ୍, “ଏଲୋଇ, ଏଲୋଇ, ଲାମା ସବାଖ୍ତାନୀ?” ଇଦ୍ଘି ମାନେ “ହେ ଏଙ୍ଘାଏ ପାର୍ମେଶ୍ୱାର୍, ହେ ଏଙ୍ଘାଏ ପାର୍ମେଶ୍ୱାର୍! ନିମ୍ ଏଙ୍ଗାନ୍ ଏନ୍ଦେର୍ଗେ ଆମ୍ବେଚ୍କାର୍?” 47ଇବନ୍ ମେନିକିରି ଆସ୍ତା ଇଜ୍ଜକା ଆଲାର୍ଘି ଭିତର୍ନୁ ନେଦ୍-ନେଦ୍ ତେଙ୍ଗିୟାର୍, “ଇ ଆଲାସ୍ ଏଲିୟାସ୍ସିନ୍ ମେହାଁଲ୍ଦାସ୍।” 48ଆରୁ ହୁଙ୍ଗେନିନ୍ ଆବ୍ଡ଼ାର୍ଘି ମାଝାନ୍ନ୍ତି ଅର୍ତୁସ୍ କୁଦିୟାରାତେ କାଇକିରି ଅଣ୍ଟା ସ୍ପଞ୍ଜ ଧାରିକିରି ଆବନ୍ ହାଡ଼୍ଖା ରାସେନୁ ମୁହ୍ଲଥାଚାସ୍, ଆରୁ ଆଦିନ୍ ଅଣ୍ଟା ଠେଙ୍ଗାନୁ ଲାଗାବିକିରି ଯୀଶୁସ୍କେ ହାପ୍ପାଗେ ଚିଚ୍ଚାସ୍। 49ଲେକିନ୍ ଦୁସ୍ରାର୍ ତେଙ୍ଗିୟାର୍, “ରା ତା, ଏରୋତ୍, ଏଲିୟାସ୍ ଇସିନ୍ ବାଛାବାଗେ ବାରାଲ୍ଦାସ୍ କା ମାଲ୍ଲା।” 50ଲେକିନ୍ ଯୀଶୁସ୍ ଆରୁଅହନ୍ ଜୋର୍ସେ ଚିର୍ରା ରାଇକିରି କେଚ୍ଚାସ୍କେରାସ୍। 51ଆରୁ ଏରା, ପାର୍ମେଶ୍ୱାର୍ସ୍କି ମନ୍ଦିର୍ତା ପାର୍ଦାଦ୍ ମିଁତି କିୟାଁଜୁଟି ଏଟ୍ରିକିରି ଦୁଇଖଣ୍ ମାନ୍ଚାକେରା: ଆରୁ ଭୁଇଁଡୋଲ୍ ମାନ୍ଚା ଆରୁ ଚାଟ୍ଣୀଗୁଠିଦ୍ ଫାଡ଼ା ମାନ୍ଚାକେରା, 52ଆରୁ ମାସ୍ଣାଗୁଠିଦ୍ ଖୋଲ୍ରା କେରାଦ୍, ଆରୁ ଢେର୍ କେଚ୍ଚକା ପାବିତାର୍ ଆଲାର୍ ଉଜ୍ଜିୟାର୍, 53ଆରୁ ଯୀଶୁସ୍ ଉଜ୍ଜକା ପାଛ୍ଲି ମାସ୍ଣାସ୍ତି ଉର୍ଖିକିରି ପାବିତାର୍ ସହର୍ଗେ କେରାସ୍ ଆରୁ ଢେର୍ ଆଲାରିନ୍ ଦର୍ଶନ୍ ଚିଚ୍ଚାସ୍। 54ଆଙ୍ଗେନ୍ ପଲ୍ଟନ୍ଜାମାର୍ଘି ମୁଖ୍ୟାସ୍ ଆରୁ ଏକାର୍ ଆସ୍ଗାନେ ଯୀଶୁସିନ୍ ଜାଗାଲିୟାର୍, ଭୁଇଁଡୋଲ୍ ଆରୁ ଏନ୍ଦ୍ରିନ୍ହି ମାନ୍ଚ୍କିଚା ଆବନ୍ ଏରିକିରି ମୁରୁକ୍ ଏଲ୍ଚିୟାର୍ କେରାର୍ ଆରୁ ତେଙ୍ଗିୟାର୍, “ସତ୍ତୁନିନ୍ ଇସ୍ ପାର୍ମେଶ୍ଵାର୍ସ୍କି ହାଦ୍ଦୁସ୍ ରାଚାସ୍!” 55ଢେର୍ ମାଏକିନିଆଁର୍ ଆସାନ୍ ରାଚାର୍ ଏକାର୍ କା ଗେଚ୍ଛାନ୍ନ୍ତି ଏରାଲିୟାର୍। ଆବ୍ଡ଼ାର୍ ଗାଲିଲୀନ୍ନ୍ତି ଯୀଶୁସ୍କି ସେବା କାମ୍ତେ-କାମ୍ତେ ଆସ୍ଗାନେ ବାର୍ଚ୍କାଚାର୍। 56ଆବ୍ଡ଼ାର୍ଘି ଭିତର୍ନୁ, ମାରିୟାମ୍ ମାଗ୍ଦାଲୀନୀ, ଆରୁ ୟାକୁବ୍ ଆରୁ ଯୋଷେଫ୍ସ୍କି ଆୟାଙ୍ଗ୍ ମାରିୟାମ୍, ଆରୁ ଜେବେଦୀସ୍କି ଦାଦ୍ଦୁର୍ଘି ଆୟାଙ୍ଗ୍ ରାଚା।
ଯୀଶୁସିନ୍ ମାଡ଼୍ନା
(ମାର୍କୁସ୍ ୧୫:୪୨-୪୭; ଲୁକାସ୍ ୨୩:୫୦-୫୬; ଯୋହାନ୍ ୧୯:୩୮-୪୨)
57ଯେତ୍କବାକେନ୍ ବିଡ଼ି ଅକ୍କିୟାତା ଯୋଷେଫ୍ ନାମେଘି ହାରାମାଥିୟାନ୍ତା ଅଣ୍ଟା ଧନୀ ଆଲାସ୍ ବାର୍ଚାସ୍, ଏକାସ୍ କା ଯୀଶୁସ୍କି ଚେଲା ମାନ୍ଚାସ୍ କେର୍କାଚାସ୍। 58ଆସ୍ ପିଲାତୁସ୍କି ଚାହାଗେ କାଇକିରି ଯୀଶୁସ୍କି ମାଁଣାନ୍ ନିଚାସ୍। ଆଙ୍ଗେନ୍ ପିଲାତୁସ୍ ଚିୟାଲାଗାଗେ ହୁକୁମ୍ ଚିଚ୍ଚାସ୍। 59ଯୋଷେଫ୍ସ୍ ମାଁଣାନ୍ ଅଚ୍ଚାସ୍, ଆରୁ ଆବନ୍ ପାଣ୍ତ୍ରୁ ଚାଦର୍ନୁ ଗୁଢ଼ିୟାଚାସ୍, 60ଆରୁ ଆସିନ୍ ତାଙ୍ଘା ପୁନା ମାସ୍ଣାନୁ ଉଇୟାସ୍, ଏକାଦ୍ କା ଚାଟ୍ଣୀନୁ ଖୋଲ୍କା ରାଚା, ଆରୁ ମାସ୍ଣାଘି ଘୁମାନୁ ବାଡ଼୍କା ଚାଁଚା ଢୁଲ୍ଇକିରି ବୁଙ୍ଗିୟାସ୍। 61ମାରିୟାମ୍ ମାଗ୍ଦାଲୀନୀ ଆରୁ ଦୁସ୍ରା ମାରିୟାମ୍ ଆସାନ୍ ମାସ୍ଣା ଆଘ୍ଲି ଅକ୍କାଚାର୍।
ଯୀଶୁସ୍କି ମାସ୍ଣାବନ୍ ଜାଗ୍ନା
62ନାନ୍ନୁ ଉଲ୍ଲା ଏକାଦ୍ କା ପାବିତାର୍ ଉଲ୍ଲା ରାଚା, ମୁଖ୍ୟା ପୁରୋହିତ୍ର୍ ଆରୁ ଫାରିସୀଜାମାର୍ ପିଲାତୁସ୍କି ଚାହାନୁ ଠୁଡ଼ିୟା ରାଇକିରି ତେଙ୍ଗିୟାର୍, 63“ହେ ମାହାରାଜ୍, ଏହ୍ମାଏ ମନେ ରାଇ କା ଆ ଠାକୁୱା ଆଲାସ୍ ଯେତ୍କବାକେନ୍ ଉଜ୍ଜାଲିୟାସ୍ ତା, ତେଙ୍କାଚାସ୍ କା, ‘ଏନ୍ ତିନ୍ ଦିନ୍ନୁ ଉଜ୍ଜନ୍।’ 64ହାଲେ ହୁକୁମ୍ ଚିଆ କା ତିନ୍ ଦିନ୍ତକ୍ ମାସ୍ଣାନ୍ହି ଜାଗାକୋ, ଏନ୍ନେ ମା ମାନ୍ନାଦ୍ କା ଆସ୍କି କେଚ୍ଚକା ଶରୀର୍ବନ୍ ଚେଲାର୍ ବାରିକିରି ଆସିନ୍ ହାଡ଼ର୍ ହର୍କର୍, ଆରୁ ଆଲାରିନ୍ ତେଙ୍ଗାଗେ ଲାଗ୍ଗର୍ କା, ‘ଆସ୍ କେଚ୍ଚକାର୍ସ୍ତି ଉଜ୍ଜକାଦାସ୍।’ ତା ଆଘ୍ଲିନ୍ତା ଧୋଖାନ୍ତି ପାଛ୍ଲିନ୍ତା ଧୋଖାଦ୍ ବହୁତ୍ ଖାରାପ୍ ମାନ।” 65ପିଲାତୁସ୍ ଆବ୍ଡ଼ାରିନ୍ ତେଙ୍ଗିୟାସ୍, “ନିହ୍ମା ଚାହାନୁ ଜାଗୁୱାର୍ ତା ରାନାଏ କାଲା, ନିମ୍ ଯେତ୍କ କାମା ଅଙ୍ଗର୍ ଆତ୍କ କାମା।” 66ଆନ୍ତିନ୍ ଆବ୍ଡ଼ାର୍ ଜାଗୁୱାର୍ଗାନେ କାଇକିରି, ଆରୁ ଚାଁଚାନୁ ମହଁର୍ ଲାଗାବାଇକିରି ମାସ୍ଣାନ୍ ଜାଗ୍ଚାର୍।
Currently Selected:
ମାତିସ୍ 27: xis
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
