മറ്‌ക്കോസ് 9
9
1ഏസു അവാര്‌ക്കെ: <<ണേര്‌മായിമ് ണാന് ണിമാക്കെ സൊല്ലുറെ, ഇദിലി ണിന്റിര്‌ക്കവാരിലി ലേസ ആള്‌ഗ സാമി സക്‌ദ്യോഡെ ആള്‌റാദ്‌ണ കാണമാട്ട്‌ക്ക് സാഗമാട്ടാര്>> എന്ത് സൊന്നാ്.
ഏസു ഉരുവ മാറ്‌റാ്
2ആറ് ണാള് പോന പ്‌റ ഏസു പത്ത്‌റോസ്‌ണാമ് ആക്കോവുണാമ് ഓഗന്നാനാമ് കൂട്ടി ഒരു ഉജാന്ത ഗുഡ്ഡേക്കെ പോനാ്. അദിലി അവാര് തന്യെ ഇര്‌ന്താര്. അവാര് ണോഡിര്‌ക്കാട്ടി താനെ ഇര്‌ക്ക ഏസുദ് ഉരുവ മാറിറ്റ്. 3ബൂമിലി ഒരുത്താന്‌ക്ക്‌മ് ബെ്ള്‌സ്യ മുഡ്യാത്ത പാസെ ഏസുദ് ഉഡുപ്പ് ബെ്ള്ളെ ബെ്ള്ള്യ പാല് പാസെ ബെ്ഡിന്ത്‌ദ്. 4ഏല്യാവുമ്, മോസേമ് ബെ്ളിപട്ട് ഏസോഡെ ണായ പേസ്‌റാദ്‌ണ ഏസുദ് സൊല്ലുപഡി ണഡാക്ക മൂണ് ആള്‌മ് കണ്ടാര്.
5<<ഗുരുവെ ണമ്മ ഇദിലി ഇര്‌ന്താദ് എത്തറാഗൊ ണല്ലാദാറ്റ്! എമ്മ മൂണ് സാളെ ബെത്ത് തരേര്. ഒന്റു ണിനാക്ക്‌മ്, ഒന്റു മോസേക്ക്‌മ്, ഒന്റു ഏല്യാവുക്ക്‌മ്>> എന്ത് പത്ത്‌റോസ് ഏസുക്കെ സൊന്നാ്. 6താന് എന്ത സൊല്ലുഡൊ എന്ത് പത്ത്‌റോസ്‌ക്ക് താനെ തെര്യാദെ ഇര്‌ന്ത്‌ദ്. എന്ത്‌ക്കെന്റ താന്‌മ് ഒപ്പ ഇര്‌ന്ത റണ്ട് ആള്‌മ് അത്തറാക്ക്‌മ് കോവെപട്ട് മരത്തട്ടി എക്കിര്‌ന്താര്.
7അക്കുളെല്ല ഒരു മഞ്ച് ബന്ത് അവാര്‌ണ മുച്ചി അദിലിര്‌ന്ത് ഒരു ജദ്ദ ബന്ത്‌ദ്: <<ഇവാ്ത്തെ എനാക്ക് മെച്ച്‌പ്‌ഡിത്ത മഗാ്. ഇവാന്‌ദ് ണായണ കേ്ളിരി.>>
8അവാര് അപ്പ്‌താനെ സുറ്റുമുറ്റ് ണോഡിനാര്. അക്കുളെ തമ്മ് അര്‌ഗെ ഏസുണ അല്ലാദെ ബേ്റെ ആര്‌ണാമ് കാണാലെ.
9അവാര് മലേലിര്‌ന്ത് ഇ്റാങ്കി ബര്‌ഗാട്ടി ഏസു തന്ന് സൊല്ലുപഡി ണഡാക്കവാര്‌ക്കെ ഇച്ചെ സൊന്നാ്: <<മന്‌സാനായി പ്‌റാന്ത ണാന് സത്തവാര് പട്ടിലിര്‌ന്ത് ഉജുറെ്ന്ത് ബരമാട്ട്‌ക്ക് ണിമ്മ ഇപ്പ് കണ്ടാദ്‌ണ കണ്ടിപ്പായി ആര്‌ക്ക്‌മ് സൊല്ല ബേ്ഡ.>> 10അച്ചെ ണഡാന്താദ്‌ണെല്ല അവാര് ഒളിസി ബെത്താര്. ആന സത്തവാര് പട്ടിലിര്‌ന്ത് ഉജുറെ്ന്തുവെ എന്ത് അയാള് സൊന്നാദ്‌ദ് പൊറുള് എന്ത ആയിര്‌ക്കു എന്ത് അവാര് തമ്മ തമ്മ പേസിനാര്.
11<<മുദ ഏല്യാവു ബരുഡൊ എന്ത് ബേദ ബാത്ത്യല സൊല്ലുറാദ് എന്ത്‌ക്ക്?>> എന്ത് ഏസുദ് സൊല്ലുപഡി ണഡാക്കവാര് ഏസുണ കേ്ട്ടാര്.
12അദ്‌ക്ക് ഏസു സൊന്നാ്: <<കണ്ടിപ്പായിമ് എല്ല കാര്യഗണാമ് മറ്‌ദെ ണലമായി സെയ്‌ദ് മുഡിക്ക്യ മുദ ഏല്യാവു ബരുഡൊ. ആന മന്‌സാനായി പ്‌റാന്ത ണാന് എത്തിന്യൊ കൊഡിമെപട്ട്‌മ് ആള്‌ഗ എനാണ ണാണഗെ്ഡ്‌സാമ് സെയ്‌വാര് എന്ത് എ്ള്‌ദി ഇര്‌ക്കാദ് എന്ത്‌ക്ക്? 13ആന ണാന് ണിമാക്കെ സൊല്ലുറെ, ഏല്യാവു ബന്താ്. സാമി ബുക്കിലി അയാള്‌ണ പറ്റി എ്ള്‌ദിര്‌ക്ക പാസെ അവാര് തമാക്ക് ണെനേത്ത പാസെ അയാള്‌ണ സെയ്‌ദാര്.>>
ഏസു ഒരുത്താന്‌ദ് മ്‌ഗാക്ക് തട്ടിര്‌ക്ക ജാദിന ഒയിപ്പിസ്‌റാ്
14ഏസുമ് ഏസുദ് സൊല്ലുപഡി ണഡാക്ക മൂണാള്‌മ് സേന്ത് ഏസുദ് സൊല്ലുപഡി ണഡാക്ക ബാക്കി ആള്‌ഗ പട്ട്‌ക്ക് പോനാര്. അദിലി അക്കുളെ അവാര് സുറ്റുമ് ബെല്ല്യ ഒരു ആള്‌കൂട്ട തുമ്പിര്‌ന്താര്. അവാരോഡെ ബേദ ബാത്ത്യല തറ്‌ക്ക്‌റാദ്‌ണ ഏസുമ് ഏസുദ് സൊല്ലുപഡി ണഡാക്ക മൂണാള്‌ഗാമ് കണ്ടാര്. 15അക്കുളെ ഏസുണ ആള്‌ഗ കണ്ടാദ്‌മ് അദിസ്യപട്ട് ഓഡി ബന്ത് അവാന ബിനാത്തിനാര്.
16<<ണിമ്മ അവാരോഡെ എന്തണ തറ്‌ക്കിനാദ്?>> എന്ത് ഏസു അവാര്‌ണ കേ്ട്ടാ്.
17അദിലി ഇര്‌ന്ത് ഒരുത്താ് സൊന്നാ്: <<ഗുരുവെ, എന്ന് മഗാന ണിന്ന് പട്ട്‌ക്ക് എ്ഡ്‌ത്ത് ബന്തെ. അവാന ഒരു കെ്ട്ടജാദി ണമ്പി ഊമെ ബീ്ത്തി ബെത്തിര്‌ക്ക്‌ദ്. 18അയ്യി ജാദി ഏദ് ഗള്യേക്കെല്ല ഇ്ളാഗുദൊ അയ്യി ഗള്യേക്കെല്ല അവാന മണ്ണ്‌ക്ക് ഉറുട്ടി ബീ്ത്ത്‌ദ്. ബ്‌ന്ത പ്‌റ അവാ് ബായിലിര്‌ന്ത് ജൊല്ലുമ് ണൊരേമ് ബര്‌ദ്. അവാ് പല്ല്‌ണാമ് കഡിക്കാ്. അച്ചെ ആരാദോഡെ അവാ് ബെ്റേ്ട്ടി എക്ക്‌റാ്. അദ്‌ണ ഒയിപ്പിസ്യ ണിന്ന് സൊല്ലുപഡി ണഡാക്കവാര്‌ക്കെ ണാന് സൊന്നെ. ആന അവാര്‌ക്ക് മുഡ്യാലെ>>.
19അക്കുളെ ഏസു: <<ണമ്പിക്കില്ലാത്ത ഇപ്പേത്ത കാലാത്തില്യ ആള്‌ഗാളെ, ണിമ്മോഡെ ണാന് എത്തിനി ണാള് ഇര്‌ക്കുവെ? എത്തിനി എന്ത് ണിമ്മ് ണമ്പിക്കെ കൊറേന ണാന് താങ്കുവെ? അയ്യി മ്‌ഗാണ ഈങ്ക് എ്ഡ്‌ത്ത് ബായി>> എന്ത് സൊന്നാ്.
20അവാര് അയ്യി മ്‌ഗാണ ഏസു പട്ട്‌ക്ക് എ്ഡ്‌ത്ത് ബന്താര്. അക്കുളെ അയ്യി ജാദി ഏസുണ കണ്ടാദ്‌മ് മ്‌ഗാണ ഗൊലേത്ത് മണ്ണ്‌ക്ക് ബീ്ത്തി അവാന്‌ദ് ബായിലിര്‌ന്ത് ണൊരെ ബര്‌സി കൊണ്ട് ഗഡഗഡാത്ത് ഉറുട്ടിറ്റ്.
21<<ഈ ണോയി ബന്ത് എത്തിനി ണാള് ആറ്റ്?>> എന്ത് ഏസു അയ്യി മ്‌ഗാദ് അപ്പനച്ചന കേ്ട്ടാ്.
അക്കുളെ <<സിന്നാദി ഇര്‌ന്തെ ഇര്‌ക്ക്‌ദ്. 22ഇവാന അദ് എത്തിന്യൊ ജമ്പ് തീക്കേമ് തണ്ണിക്കേമ് ഉന്തി ബീ്ത്തി കൊല്ല്യ ണോഡിറ്റ്. ആന ണിനാക്ക് മുഡിരദാനാക്കി എമ്മോഡെ ബേ്റ്‌വായി ബെന്ത് എമാണ സെറ്റെ കാപാറ്റുഡോമെ>> എന്ത് അയാള് സൊന്നാ്.
23ഏസു അയ്യി മ്‌ഗാദ് അപ്പാന്‌ക്കെ: <<എനാക്ക് മുഡ്യു എന്ത? ണമ്പിക്കെ ഇര്‌ക്കവാന്‌ക്ക് എല്ലാമെ മുഡ്യു>> എന്ത് സൊന്നാ്.
24അക്കുളെ അയ്യി മ്‌ഗാദ് അപ്പാ്: <<അയ്യ, ണാന് ണമ്പ്‌റേലപ്പ; എന്ന് ണമ്പിക്കെ കൊറേന ണീ തീത്ത് തരുഡോമെ>> എന്ത് ബെല്ല്യാദ്‌ക്ക് സൊന്നാ്.
25ആള്‌ഗ അദ്‌ക്കെ ബന്ത് തുമ്പിനാര്. അദ്‌ണ കണ്ട് ഏസു: <<ഊമേമ് സെ്ഗ്‌ഡ്‌മാന ജാദ്യെ ഈ മ്‌ഗാണ ബ്‌ട്ട് ബെ്ള്യെ കഡ! ഇനി ഒരു ണാള്‌മ് ഇവാന്‌ക്കെ കഡാക്കക്കില്ലെ എന്ത് ണാന് ണിനാക്കെ സൊല്ലുറെ!>> എന്ത് സൊല്ലി അയ്യി ജാദിന കെഞ്ചി എ്ഡ്‌ത്ത് ബ്‌ട്ടാ്.
26അക്കുളെ അയ്യി ജാദി ബെല്ല്യാദ്‌ക്ക് അഗാറി മ്‌ഗാണ ലേസ അക്കോസ തൂക്കി എ്ഡ്‌ത്ത് എ്റിന്ത് അവാന ബ്‌ട്ട് പോറ്റു. മ്‌ഗ സത്തപാസെ ആയെക്കിനാ്. <<അയ്യി അയിദാ് സത്തെക്കിനാ്>> എന്ത് എത്തിന്യൊ ആള്‌ഗ സൊന്നാര്. 27ആന ഏസു അവാന്‌ദ് കയ്യിന പ്‌ഡിത്ത് ഏ്ത്തി ണില്ലിസിനാ്. അവാ് ണിന്റാ്.
28അദ്‌ക്ക് പ്‌റ താന് ഇര്‌ന്ത കൂരേക്കെ ഏസു പോനാ്. അദിലി തമ്മ താനെ ഇര്‌ക്കാട്ടി ഏസുണ തന്ന് സൊല്ലുപഡി ണഡാക്കവാര് കേ്ട്ടാര്: <<എമാക്ക് എന്ത്‌ക്ക് അയ്യി കെ്ട്ടജാദിന ഒയിപ്പിസ്യ മുഡ്യാലെ?>>
29അക്കുളെ ഏസു സൊന്നാ്: <<പരേസണാലെത്തെ ഇച്ച്‌ള ജാദിഗണെല്ല തുറാത്ത്യ മുഡ്യു. അല്ലാദെ മുഡ്യമാട്ട.>>
താന് സാരാദ്‌ണ പറ്റി ഏസു പിന്നേമ് സൊല്ലുറാ്
30അവാര് അദിലി ഇര്‌ന്ത് ഗെലീലെ ഊര്‌മേലേ കഡാന്ത് പോനാര്. താന് ഏദിലി എന്ത് ആര്‌ക്ക്‌മ് തെരിരാക്കില്ലെ എന്ത് ഏസു ആസെപട്ടാ്. 31അദ് എന്ത്‌ക്കെന്റ, <<മന്‌സാനായി പ്‌റാന്തവാന മന്‌സാര് കയ്യിക്ക് ഒപ്പഡിക്ക്യ പക്കാറ്റ്. അവാര് അവാന കൊല്ലാമ് സെയ്‌വാര്; അദ്‌ക്ക് പ്‌റ സാമി അവാന മൂണാവദ് ണാള് എങ്കാട്ടി ഉജുറേ്ത്താമ് സെയ്‌വാ്>> എന്ത് ഏസുദ് സൊല്ലുപഡി ണഡാക്കവാര്‌ക്ക് പഡിസ്യാത്തെ. 32ആന ഏസു സൊന്ന കാര്യ എന്തായെന്റ് തന്ന് സൊല്ലുപഡി ണഡാക്കവാര്‌ക്ക് തെര്യാലെ. അദ്‌ണ കേ്ക്ക്യാമ് അവാര് അഞ്ചിനാര്.
ഇദിലി ഏവാ് ബെല്ല്യവാ്?
33അച്ചെ ഏസുമ് ഏസുദ് സൊല്ലുപഡി ണഡാക്കവാര്‌മ് കവറ്‌ണഗൂമുക്ക് പോനാര്. അദിലി ഒരു കൂരേക്ക് പോയി പുക്കിനാര്. <<ണിമ്മ എ്ഡെ ബയ്യിലി ആങ്ക് ഈങ്ക് എന്തണ സൊല്ലി തറ്‌ക്കിര്‌ന്താദ്?>> എന്ത് ഏസു തന്ന് സൊല്ലുപഡി ണഡാക്കവാര്‌ണ കേ്ട്ടാ്. 34ആന തമ്മ് കൂട്ടാത്തിലി ആര് ബെല്ല്യവാ് എന്ത് അവാര് എ്ഡെ ബയ്യിലി തറ്‌ക്കിര്‌ന്താദ്‌ണാലെ അവാര് ബായിലിര്‌ന്ത് സുഗി ബ്‌ഡാലെ.
35ഏസു കുക്കാന്ത പ്‌റ തന്ന് സൊല്ലുപഡി ണഡാക്ക പന്നന്റ് ആള്‌ഗണ ഒളേത്ത് ബര്‌സിര്‌ന്ത് സൊന്നാ്: <<ഒരുത്താ് മുന്തിനവാ് ആയ ആസെപട്ട തനാണ ബ്‌ഡ ബേ്റെ ആള്‌ഗണ മുന്തിനവാ് എന്ത് അവാ് ണെനേക്കുഡൊ. അവാ് എല്ലാര്‌ണാമ് ഓരാഡാമ് ബേ്ഡു.>>
36പ്‌റ ഒരു മ്‌ഗാണ എ്ഡ്‌ത്ത് അവാര്‌ദ് ണഡ്‌ക്കെ ണില്ലിസിനാ്. അയ്യി മ്‌ഗാണ ണെഞ്ച്‌ക്കെ സേത്തി പ്‌ഡിത്തിര്‌ന്ത് അവാര്‌ക്കെ സൊന്നാ്: 37<<ഇദാ, ഇദേപാസെ ഇര്‌ക്ക മക്കഗാളിലി ഒരു മ്‌ഗാണ എന്ന് പേരിലി തങ്കാരിക്കവാ് എനാണ തങ്കാരിക്കാ്. എനാണ തങ്കാരിക്കവാ് എനാണ താനെ അല്ല എനാണ സൊല്ലിബ്‌ട്ടവാനാമ് തങ്കാരിക്കാ്.>>
ണമ്മോഡെ എദ്‌റ് ഇല്ലാത്തവാ് ണമ്മ് ആള്
38ഓഗന്നാ് ഏസുക്കെ ഇച്ചെ സൊന്നാ്: <<ഗുരുവെ, ണിന്ന് പേര്‌ക്കിര്‌ക്ക അദിഗാരത്തിലി ഒരുത്താ് കെ്ട്ടജാദിഗണ ഒയിപ്പിസ്‌റാദ്‌ണ എമ്മ കണ്ടേര്. അവാ് ണമ്മ് കൂട്ടാക്ക് പഡാത്തവാ് ആനാദ്‌ണാലെ എമ്മ അയാള്‌ണ തഡ്‌ത്തേര്.>>
39അക്കുളെ ഓഗന്നാന്‌ക്കെ ഏസു സൊന്നാ്: <<അയാള്‌ണ ണിമ്മ തഡ്‌ക്ക ബേ്ഡ; എന്ന് പേരിലി അദിസ്യ സെയ്‌രവാ് എനാണ സട്ടന കുറ്റ സൊല്ല്യ മുഡ്യമാട്ട. 40ണമ്മോഡെ പോട്ടി പ്‌ഡിക്കാത്തവാ് ണമ്മ് പച്ച്യക്കാറാ്ത്തെ. 41ണേര്‌മായിമ് ണാന് ണിമാക്കെ സൊല്ലുറെ: ണിമ്മാഗ ക്‌റ്‌സ്‌ത്ത്‌ക്ക് പട്ടവാര് ആനാദ്‌ണാലെ ഏവരാറ്റ് ണിമാക്ക് ഒരു തൊട്ടി തണ്ണി കുഡിക്ക്യ തന്ത അദ്‌ക്കുള്ള കൂലി അവാന്‌ക്ക് കെ്ഡേക്കാദെ പോഗമാട്ട.>>
തെറ്റ് സെയ്‌രാദ്‌ക്കുള്ള ദണ്ടണെ
42<<എനാണ ണമ്പിര്‌ക്ക ഈ സിന്നവാരിലി ഒരുത്താന പാവ സെയ്യ ബെത്താക്കി അവാന്‌ക്ക് മ്‌ഗ്‌ന്ത ദണ്ടണെ കെ്ഡേക്കു. അദ്‌ണ ബ്‌ഡ അവാ് കവുത്ത്‌ക്കെ ബെല്ല്യ ബീസ്‌കല്ല്‌ണ കെ്ട്ടി അവാന കഡാല്‌ക്ക് എ്റിറാദ്‌ത്തെ ണല്ലാദ്. 43ണിന്ന് കയ്യി ണിനാണ പാവ സെയ്യ ബയ്യി ബെത്താക്കി അദ്‌ണ ബെ്ട്ടി എക്ക്. റണ്ട് കയ്യോഡെ ണരഗാത്തിലി എപ്പ്‌മ് കത്തികൊണ്ടിര്‌ക്ക തീക്കെ ബീ്റാദ്‌ണ ബ്‌ഡ ഒറ്റെ കയ്യനായി എപ്പേക്ക്‌മ് ഇര്‌ക്ക പെ്ളേപ്പ് കെ്ഡേസ്‌റാദ്‌ത്തെ ണിനാക്ക് ണല്ലാദ്#9:43മുദ എ്ള്‌ദി ബെത്തിര്‌ന്താദ്‌ണ ണോഡി എ്ള്‌ദിന പഗ്‌ദി കായിദാത്തിലി <<ണരഗാത്തിലി ആള്‌ഗണ തിന്തരിക്ക പൂ സാഗമാട്ട; അദിലി കത്ത്‌റ തീ കെ്ട്ടെക്ക മാട്ട>> എന്ത ണാപ്പത്തിണാലാവദ് സുലാക്ക സേത്തി എ്ള്‌ദി ഇര്‌ക്ക്‌ദ്. . 45ണിന്ന് കാല് ണിനാണ പാവ സെയ്യ ബയ്യി ബെത്താക്കി അദ്‌ണ ബെ്ട്ടി എക്ക്. റണ്ട് കാലോഡെ ണരഗാക്കെ ബീ്റാദ്‌ണ ബ്‌ഡ ഒറ്റെ കാലനായി എപ്പേക്ക്‌മ് ഇര്‌ക്ക പെ്ളേപ്പ് കെ്ഡേസ്‌റാദ്‌ത്തെ ണിനാക്ക് ണല്ലാദ്#9:45മുദ എ്ള്‌ദി ബെത്തിര്‌ന്താദ്‌ണ ണോഡി എ്ള്‌ദിന പഗ്‌ദി കായിദാത്തിലി <<ണരഗാത്തിലി ആള്‌ഗണ തിന്തരിക്ക പൂ സാഗമാട്ട; അദിലി കത്ത്‌റ തീ കെ്ട്ടെക്ക മാട്ട>> എന്ത ണാപ്പത്ത്യാറാവദ് സുലാക്ക സേത്തി എ്ള്‌ദി ഇര്‌ക്ക്‌ദ്.. 47ണിന്ന് കണ്ണ് ണിനാണ പാവ സെയ്യ ബയ്യി ബെത്താക്കി അദ്‌ണ സൊളോണ്ടി എ്ഡ്‌ത്തെക്ക്. റണ്ട് കണ്ണോഡെ ണരഗാക്കെ ബീ്റാദ്‌ണ ബ്‌ഡ ഒറ്റെ കണ്ണാനായി സാമി ആള്‌റ ണാഡ്‌ക്കെ പോരാദ്‌ത്തെ ണിനാക്ക് ണല്ലാദ്.
48<ണരഗാത്തിലി ആള്‌ഗണ തിന്തരിക്ക പൂ സാഗമാട്ട;
അദിലി കത്ത്‌റ തീ കെ്ട്ടെക്ക മാട്ട.>#എസയ്യാ് 66:24
49പലി കൊഡുത്താദ്‌ണ ഉപ്പിലി സുത്താപ്പ് സെയ്‌ര പാസെ എല്ലാര്‌ണാമ് തീലി സുത്താപ്പ്#9:49ഉപ്പിലി സുത്താപ്പ് സെയ്‌ര പാസെപലി കൊഡുക്ക ബേ്ണ്ട് കറിന സുത്താപ്പ് സെയ്യ അദ്‌ക്കെ ഉപ്പു ഇക്കുവാര്. ആക്കുവാ്. 50ഉപ്പു ണല്ലാദ്‌ത്തെ. ആന ഉപ്പുക്കിര്‌ക്ക രുജി ഇല്ലാദെ പോന ണിമ്മാലെ പിന്നേമ് ഉപ്പുക്കിര്‌ക്ക രുജിന ബര്‌സ്യ മുഡ്യമാട്ട. അദ്‌ണാലെ ണിമ്മ ആങ്കീങ്ക് ഉപ്പുക്കിര്‌ക്ക രുജിന പാസെ ണലമായി പിര്യ അരിമ്യോഡെ പെ്ളേക്കുഡൊ.>>
Currently Selected:
മറ്‌ക്കോസ് 9: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
