മത്തായി 28
28
ഏസു ഉജുറേ്റാ്
1ഒയിവു ണാള് കളിന്ത്, ബാരാത്തില്യ മുദ ണാള് ബെ്ഡ്യാകാല ജാമാത്തിലി താനെ മദ്ദള പട്ടണക്കാറിസി മറിയാമ് ആക്കോവുദ്‌മ് ഓസേപ്‌ദ്‌മ് അവ്വെ മറിയാമ് കല്ലളേന ണോഡ്യ പോനാര്.
2അക്കുളെ സട്ടന ബൂമി ബെല്ല്യാദ്‌ക്ക് അദ്‌റിറ്റ്. എന്ത്‌ക്കെന്റ ആണ്ടവാന്‌ദ് ദൂദാ് മേലോഗാത്തിലിര്‌ന്ത് ബന്ത് കല്ലളേന അഡേത്തിര്‌ന്ത കല്ല്‌ണ ഉന്തി ജറേത്തിര്‌ന്ത് അയ്യി കല്ല്‌ക്കെ കുക്കാന്താ്. 3അയ്യി ദൂദാ് മിച്ചണ പാസെ കത്തികൊണ്ടിര്‌ന്താ്. അവാന്‌ദ് ഉഡുപ്പ് പാല് പാസേമ് ബെ്ഡിന്തെക്കിര്‌ന്ത്‌ദ്. 4കാവ കാത്തിര്‌ന്തവാര്‌ഗ അയ്യി ദൂദാന കണ്ട് കോവെ പ്‌ഡിത്ത് സദ്‌റബെ്ട്ടി മരത്തട്ടി എക്കിനാര്.
5ദൂദാ് അയ്യി പെ്ണ്ണ്‌മക്കാക്കെ: <<അഞ്ചാദി, കുരുസ്‌ക്കെ സേത്തി ആണി അഡിത്ത് കൊന്റ ഏസുണാത്തെ ണിമ്മ പരാക്കേര് എന്ത് എനാക്ക് തെര്യു. 6അയാള് ഇദിലി ഇല്ലെ. താന് സൊല്ലിര്‌ന്ത പാസെ അയാള് ഉജുറെ്ന്താ്. ണിമ്മ ബന്ത് അവാന ക്‌ഡാത്തി ബെത്ത പട്ട്‌ണ ണോഡിരി. 7ണിമ്മ സട്ടന പോയി ഏസുദ് സൊല്ലുപഡി ണഡാക്കവാര്‌ക്കെ: <അവാ് സത്തവാരിലിര്‌ന്ത് ഉജുറെ്ന്തിര്‌ക്കാ്. അവാ് ണിമാക്ക് മുദ ഗെലീലേക്കെ പോരാ്. അദിലി ബെത്ത് ണിമ്മ അവാന കാണുവേര്> എന്ത് ണിമ്മ അവാര്‌ക്കെ സൊല്ലിരി. ണാന് സൊന്നാദ്‌ണ ണിമ്മ ണെനേവു ബെത്ത് കൊള്ളിരി>> എന്ത് സൊന്നാ്.
8അച്ചെ അയ്യി പെ്ണ്ണ്‌മക്കഗ കോവെപട്ട്‌കൊണ്ട്‌മ് റമ്പ പിര്യപട്ട്‌കൊണ്ട്‌മ് അവാന്‌ദ് സൊല്ലുപഡി ണഡാക്കവാര്‌ക്കെ സൊല്ല്യ സട്ടന അയ്യി കല്ലളേലിര്‌ന്ത് ഓഡി പോനാര്. 9അക്കുളെ ഏസു അവാര്‌ദ് മുന്തുക്ക് ബന്ത് ണിന്റ്: <<ണിമ്മ ണലമായിരിരി>> എന്ത് സൊന്നാ്. അയ്യി പെ്ണ്ണ്‌മക്ക ഏസുദ് പട്ട്‌ക്കെ പോയി കാല്‌ണ പ്‌ഡിത്ത് അയാള്‌ണ കുമ്മുഡിനാര്. 10ഏസു അവാര്‌ക്കെ: <<ണിമ്മ അഞ്ചാദി, എനാക്ക് അണ്ണതമ്പിലണ പാസെ ഇര്‌ക്കവാര്‌ണ ഗെലീലേക്കെ പോയ ണിമ്മ സൊല്ലിരി. അവാര് എനാണ അദിലി ബെത്ത് കാണുവാര്>> എന്ത് സൊന്നാ്.
കാവ കാത്തിര്‌ന്തവാര് സേദി ബ്‌ഡ്‌റാര്
11അയ്യി പെ്ണ്ണ്‌മക്ക പോഗാട്ടി കാവ കാത്തിര്‌ന്തവാര് കൂട്ടാത്തിലിര്‌ന്ത് ലേസ ആള്‌ഗ പട്ടണാക്കെ പോയി ണഡാന്താദ്‌ണ മുച്ചുഡ എഗുദ പൂസാരി തലെവലാക്കെ സൊന്നാര്. 12അവാര് മൂപ്പലോഡെ ഒന്റായി കൂഡി ഓസണെ എ്ഡ്‌ത്ത് പഡെയാളിഗാക്ക് മൊത്തന പണ കൊഡുത്തിര്‌ന്ത്: 13<< <എമ്മ ഉറാങ്കിര്‌ക്കാട്ടി ഏസുദ് സൊല്ലുപഡി ണഡാക്കവാര് ജാമാത്തിലി ബന്ത് സാവുണ ത്‌റ്‌ഡി എ്ഡ്‌ത്ത് പോനാര്> എന്ത് സൊല്ലിരി. 14ഈ സേദി ണാഡ് അദിഗാരിദ് കാദ്‌ക്കെ എജ്ജിനാക്കി ണിമാക്ക് ബുദ്ദിമുട്ടു ബരാദെ അയാള്‌ണ ജമ്മാള്‌സ്‌റ കാര്യ എമ്മ ണോഡികൊള്ളുറേര്>> എന്ത് സൊന്നാര്. 15അച്ചെ അവാര് പണാണ ബാങ്കി എഗുദ പൂസാരി തലെവല സൊന്ന പാസെ സെയ്‌ദാര്. ഈ കദെ ഇന്റളാവുക്ക് എഗുദാര്‌ദ് പട്ടിലി സൊല്ലികൊണ്ട് ഇര്‌ക്കാര്.
ഏസു തന്ന് സൊല്ലുപഡി ണഡാക്കവാര്‌ക്ക് കൊഡുക്ക പൊറുപ്പ്
16ആന ഏസുദ് സൊല്ലുപഡി ണഡാക്ക പദിണൊണ്ണ് ആള്‌മ് ഗെലീലെ ണാഡിലി ഏസു പോയ സൊല്ലിര്‌ന്ത മലേക്കെ പോനാര്. 17അവാര് ഏസുണ കണ്ട് കുമ്മുഡിനാര്. ആന അവാര് കൂട്ടാത്തിലി ലേസ ആള്‌ഗ ഇദ് ഏസുത്തേഗൊ എന്ത് സൊല്ലി സന്തേഗപട്ടാര്. 18അക്കുളെ ഏസു അവാര്‌ദ് പട്ട്‌ക്കെ ബന്ത്: <<മേലോഗണാമ് ബൂമിനാമ് ആള്‌റാദ്‌ക്കുള്ള എല്ല അദിഗാരണാമ് എന്ന് കയ്യിക്കെ തന്തിര്‌ക്കാ്. 19അദ്‌ണാലെ ണിമ്മ എല്ല സാരിമ് പോയി എല്ല ജാദിഗണാമ് എന്ന് സൊല്ലുപഡി ണഡാക്കവാര് ആക്കിരി. അച്ചെ അപ്പാന്‌ദ്‌മ്, മഗാന്‌ദ്‌മ്, സാമിണിഗാല്‌ദ്‌മ് പേരിലി തണ്ണിക്കെ മുളുഗിസിരി. 20ണാന് ണിമാക്കെ സൊല്ലിര്‌ക്ക കാര്യഗാക്ക് കെ്ട്ട്‌പട്ട് ണഡാക്ക്യ ണിമ്മ അവാര്‌ക്ക് പഡിസിരി. ആന ണാനൊ, ഉലഗ കഡേസി മാട്ട്‌മ് ണിമ്മ്‌ദൊപ്പ ഇര്‌ക്കുവെ>> എന്ത് സൊന്നാ്.
Currently Selected:
മത്തായി 28: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
