മത്തായി 24
24
എര്‌സലേമ് അളിരാദ്‌ണ പറ്റി സൊല്ലുറാ്
1സാമികൂരേലിര്‌ന്ത് ഏസു പോഗാട്ടി തന്ന് സൊല്ലുപഡി ണഡാക്കവാര് സാമികൂരേന കെ്ട്ടിര്‌ക്കാദ്‌ണ കാട്ട്യ ബേ്ണ്ടി ഏസു പട്ട്‌ക്ക് ബന്താര്. 2അക്കുളെ ഏസു അവാര്‌ക്കെ: <<ണിമ്മ ഇദ്‌ഗണെല്ല കാണ്‌റാദില്ലേഗ? ഈ കെ്ട്ടിര്‌ക്ക കല്ല്‌ഗ, കല്ല്‌ക്കുദ്ദാക്ക് ഒരു കല്ല് ബീസാക്ക് ഇര്‌ക്കാദെ ഇ്ഡിന്ത് പൊളിന്തെക്കു എന്ത് ണേര്‌മായിമ് ണാന് ണിമാക്കെ സൊല്ലുറെ>> എന്ത് സൊന്നാ്.
കഡേസി ണാള്‌ണ പറ്റി സൊല്ലുറാ്
3ഏസു ഒലിവ് മലേലി കുക്കാന്ത് ഇര്‌ക്കാട്ടി തന്ന് സൊല്ലുപഡി ണഡാക്കവാര് മാട്ട് ബന്ത്: <<ഇദ് എപ്പ് ണഡാക്കു എന്ത്‌മ് ണിന്ന് ബരാവുദ്‌മ്, ഉലഗ കഡേസി ണാള്‌ദ്‌മ്, അഡ്യാള എന്തെല്ല എന്ത്‌മ് സൊല്ലി തരുഡോമെ>> എന്ത് ഏസുണ ബേ്ണ്ടിനാര്.
4അക്കുളെ ഏസു ഇച്ചെ സൊന്നാ്: <<ആര്‌മ് ണിമാണ ഏമാത്താദെ ഇര്‌ക്ക്യ ണിമ്മ സൊക്കാന സൂസാരിത്ത് കൊള്ളുഡൊ. 5എന്ത്‌ക്കെന്റ എത്തിന്യൊ ആള്‌ഗ <ണാന്‌ത്തെ ക്‌റ്‌സ്‌ത്ത്> എന്ത് സൊല്ലി എന്ന് പേരിലി ബരുവാര്. അച്ചെ അവാര് എത്തിന്യൊ ആള്‌ഗണ ഏമാത്തുവാര്. 6ണിമ്മ ജുദ്ദഗണാമ്, ജുദ്ദ ണഡാക്ക സേദിഗണാമ് കേ്ക്കുവേര്. അച്ചെ ണഡാക്കാദ്‌ണ ണെനേത്ത് അര്‌ക്കപഡാദെ ഇര്‌ക്ക്യ സൂസാരിത്ത്‌കൊള്ളിരി. അച്ചെല്ല ണഡാക്കുഡൊ. ആനാല്‌മ് അദ് എല്ലാദ്‌ക്ക്‌മ് കഡേസി എന്ത് ണിമ്മ ണെനേക്ക ബേ്ഡ. 7ഒരൊരു ജാദിഗ ആങ്കീങ്ക് ജുദ്ദ സെയ്‌വാര്. ഒരൊരു റാജ്യഗ ആങ്കീങ്ക് ജുദ്ദ സെയ്‌വാര്. പഞ്ചാമ് ബൂമിക്കുലുക്കഗാമ് പല എ്ഡേക്ക്‌റാഗ ണഡാക്കു. 8എന്താല്‌മ് ഇദ്‌ഗെല്ല പ്‌ള്ളെ ഉറുസ്‌ളാഗ്‌റ ബിജാണ പാസെത്തെ.
9അയ്യി ഗള്യേക്ക് അവാര് ണിമാണ കൊഡിമെപഡ്‌സ്യ കൊഡുക്കാമ് സെയ്‌വാര് കൊല്ലാമ് സെയ്‌വാര്. ണിമ്മ എനാണ പറ്റി സൊല്ലുറാദ്‌ണാലെ എല്ല ജാദിഗാമ് ണിമാണ തൊറേന്തെക്കുവാര്. 10എത്തിന്യൊ ആള്‌ഗ ണമ്പിക്കേനെല്ല ബ്‌ട്ട് തള്ളി ആങ്കീങ്ക് കാട്ടി കൊഡുക്കാമ് സെയ്‌വാര്, ആങ്കീങ്ക് തൊറേന്തെക്കാമ് സെയ്‌വാര്. 11സാമിണിഗാല് സൊല്ലുദ് എന്ത് ഉറുട്ടു സൊല്ലുറ പല സാമിദാസ്‌ഗാമ് ബന്ത് എത്തിന്യൊ ആള്‌ഗണ ഏമാത്തുവാര്. 12കെ്ട്ടാദ് സെയ്‌രാദ് റമ്പ ആയികൊണ്ടിര്‌ക്കാദ്‌ണാലെ എത്തിന്യൊ ആള്‌ഗാദ് സീവാ് ഇല്ലാദായെക്കു. 13ആന കഡേസി മാട്ട്‌മ് ണമ്പിക്കേലി ഒറേത്ത് ണില്ല്‌റവാ് ദെങ്കുവാ്. 14സാമി ആള്‌റാദ്‌ണ പറ്റി സൊല്ലുറ ഈ ണല്ല സേദിന ഉലഗാത്തിലിര്‌ക്ക എല്ല ജാദിഗാമ് തെര്യ ബേ്ണ്ടി ബൂമി മുച്ചുഡ സൊല്ലുവാര്. അക്കുളെത്തെ ഉലഗാദ് കഡേസി ണാള് ആവു.>>
റമ്പ കൊഡിമെ കാല
15<<ആന സാമിദാസാന ദാനീയേല് <എല്ലാദ്‌ണാമ് അളിത്ത് തള്ള്‌റ റമ്പ കെ്ട്ട കാര്യണ>#ദാനീയേല് 9:27; 11:31; 12:11 പറ്റി സൊല്ലിര്‌ക്കാ്. അയ്യി കെ്ട്ട കാര്യണ സുത്താപ്പ് ഇര്‌ക്ക എ്ഡേലി ണിമ്മ കാണുവേര്. (പഡിക്കവാ് ഇദ്‌ദ് പൊറുള് എന്തായെന്റ് ണെപ്പ്‌കെ്ഡേസി കൊള്ളുഡൊ)#24:15പഡിക്കവാ് ഇദ്‌ദ് പൊറുള് എന്തായെന്റ് ണെപ്പ്‌കെ്ഡേസി കൊള്ളുഡൊ ഇദ് ഏസു സൊന്ന കാര്യ അല്ല ഈ എ്ള്‌ത്ത് എ്ള്‌ദിന മത്തായി സൊന്ന കാര്യാത്തെ. 16അക്കുളെ എഗുദേലി ഇര്‌ക്കവാര് മലേക്ക്‌റാഗ ഓഡി പോഡൊ. 17കൂരെ മ്‌ഗാള്‌ക്കുദ്ദാക്ക് ഇര്‌ക്കവാ് കൂരേലിര്‌ക്ക എന്താറ്റൊന്റു എ്ഡ്‌ക്ക്യ അഡി ഇ്റാങ്ക ബേ്ഡ. 18ഗദ്ദേലി ബേലെ എ്ഡ്‌ക്കവാ് തന്ന് ണല്ല സീലെന എ്ഡ്‌ക്ക്യ കൂരേക്കെ തിലിമ്പി പോഗ ബേ്ഡ. 19അയ്യി കാലാത്തിലി ബേ്റ്‌ക്കാറാര്‌ക്ക്‌മ് പച്ചെ പ്‌ള്ളെക്കാറാര്‌ക്ക്‌മ് സെറ്റെ കജട്ട കജട്ടത്തെ. 20ആന ണിമ്മ ഓഡി പോരാദ് സളി ഗള്യേക്കൊ, ഒയിവു ണാളൊ ബരാദിര്‌ക്ക്യ പരേസിരി. 21എന്ത്‌ക്കെന്റ അയ്യി കാലാക്ക് ബര കജട്ട സാമി ഉലഗണ ദ്‌ട്ടിസിനാദിലിര്‌ന്ത് ഇന്നാരമാട്ട്‌ക്ക്‌മ് ഇര്‌ക്ക കജട്ടഗണ ബ്‌ഡ എത്തറാഗൊ കഡ്‌പ്പത്തെ. ഇദേപാസെ ഒരു കജട്ട ഇനി ബരാഗെമാട്ട. 22ആന അയ്യി ണാള്‌ഗണ സാമി കമ്മി ആക്കാദെ ഇര്‌ന്ത ആര്‌ക്ക്‌മ് താങ്ക്യ മുഡ്യമാട്ട. എന്താല്‌മ് താന് തെരിന്തെ്ഡ്‌ത്തവാര്‌ണ ണെനേത്ത് സാമി അയ്യി ണാള്‌ഗണ കമ്മി ആക്കിര്‌ക്കാ്. 23അയ്യി ഗള്യേക്ക് ണിമാണ ആരാറ്റ് <ഇദാ, ഇദിലിത്തെ ക്‌റ്‌സ്‌ത്ത്> എന്തൊ <അദാ, അദിലിത്തെ ക്‌റ്‌സ്‌ത്ത്> എന്തൊ സൊന്നാക്കി ണിമ്മ ണമ്പ ബേ്ഡ. 24പഗ്‌ദി ആള്‌ഗ തമ്മാത്തെ ക്‌റ്‌സ്‌ത്ത് എന്ത്‌മ് പഗ്‌ദി ആള്‌ഗ തമ്മാത്തെ സാമിദാസ്‌ഗ എന്ത്‌മ് ഉറുട്ടു സൊല്ലി ബരുവാര്. അവാര് സാമി പട്ടിലിര്‌ന്ത് ബന്തവാര് എന്ത് കാട്ട്യ ബേ്ണ്ടി ബെല്ല്യ ബെല്ല്യ അദിസ്യഗാമ് അഡ്യാളഗാമ് സെയ്‌വാര്. മുഡിരദാനാക്കി സാമി തെരിന്തെ്ഡ്‌ത്ത് ഇര്‌ക്കവാര്‌ണ ഗൂഡി ഏമാത്ത്യ ഇദ്‌ഗെല്ല അവാര് സെയ്‌വാര്. 25ണാന് ഇദ്‌ണ ണിമാക്കെ മുദതാനെ സൊല്ലിര്‌ക്കെ എങ്കാദ്‌ണ ണിമ്മ ണെനേവോഡെ ബെത്ത്‌കൊള്ളിരി.
26അദ്‌ണാലെ ആരാറ്റ് ണിമാക്കെ, <അദാ ആങ്ക്, ക്‌റ്‌സ്‌ത്ത് ബെ്ട്ടെകാഡ് സാരി ബന്തിര്‌ക്കാ്> എന്ത് സൊന്നാക്കി അദ്‌ണ കേ്ട്ട് ആങ്കെ പോഗ ബേ്ഡ. <ഇദാവെ ഈങ്ക്, കുച്ചുക്കുള്ളുക്ക്> എന്ത് സൊന്നാക്കി ണിമ്മ ണമ്പ്‌റാക്കില്ലെ. 27ഇ്ഡിമിന്ന്‌ഗാട്ടി ക്‌ളാക്കിര്‌ന്ത് മേക്ക്‌മാട്ട് കാട്ട്‌റ പാസെത്തെ മന്‌സാനായി പ്‌റാന്തവാന്‌ദ് ബരാവു. 28സാവു ഏദിലിര്‌ക്ക്‌ദൊ അദ്‌ക്കെ സാവു തീനി പാറ്‌ഗാമ് ബന്ത് എജ്ജു.>>
മന്‌സാനായി പ്‌റാന്തവാ് ബരാദ്‌ണ പറ്റി
29<<അയ്യി ഗള്യേക്കുള്ള കജട്ട തീന്താദ്‌മ് അപ്പ്‌താനെ,
<ണേര ഇ്റ്‌ണ്ടെക്കു,
ണിലാവുദ് ബെ്ള്‌സ ഇല്ലാദായി ബരു,
ബാനാത്തിലിര്‌ന്ത് ബെ്ള്ളിഗ അലേന്ത് കൊണ്ട് ഇര്‌ക്കു,
ബാനാത്തിലി ഇര്‌ക്ക എല്ലാദ്‌ണാമ് അദ്‌റ്‌സി എ്ഡ്‌ത്തെക്കു.>#എസയ്യാ് 13:10; 34:4
30അക്കുളെ മന്‌സാനായി പ്‌റാന്തവാ് ബര അഡ്യാള ബാനാത്തിലി കാട്ടു. അപ്പ് ബൂമിലിര്‌ക്ക എല്ല ജാദിഗാമ് ണെഞ്ച്‌ണ മാര്‌ണ അഡിത്ത് അഗുവാര്. അച്ചെ സക്‌ദ്യോഡേമ്, ണോഡ്യ മുഡ്യാത്ത ബെ്ള്‌സത്തോഡേമ് ബാന മഞ്ചിലി മന്‌സാനായി പ്‌റാന്തവാ് ബരാദ്‌ണ അവാര് കാണുവാര്. 31അവാ് തന്ന് ദൂദലണ ബെല്ല്യ ജദ്ദത്തോഡുള്ള കൊമ്പൂത്തോഡെ ബ്‌ഡുവാ്. അവാര് താന് തെരിന്തെ്ഡ്‌ത്തവാര്‌ണ ബൂമിദ് ണാല് സാരിര്‌ന്ത്‌മ്, എല്ല സാരിര്‌ന്ത്‌മ് ഒന്റായി സേത്തുവാ്.>>
അത്തി മര പഡ്‌സ്‌റ ഒരു കാര്യ
32<<അത്തി മര ണിമാണ ഒരു കാര്യ പഡ്‌സ്‌ദ്. അത്തി മര താറ്‌ഗ സില്ല് പൊട്ടി തള്‌ക്കാട്ടി ബേസഗെ പ്‌റാക്ക്യ പോദ് എന്ത് ണിമാക്ക് തെര്യു. 33ഇദേപാസെ ണാന് സൊന്ന കാര്യഗെല്ല ണഡാക്കാദ് ണിമ്മ കാണ്‌ഗാട്ടി അവാ് ബരാദ്‌ക്കുള്ള ണേര എജ്ജിറ്റ് എന്ത് ണിമാക്ക് തെര്യു. 34ഈ കാര്യഗെല്ല ണഡാന്ത് തീരമാട്ട്‌ക്ക് ഇപ്പേത്ത കാലാത്തില്യവാര് ഇല്ലാദാഗമാട്ടാര് എന്ത് ണേര്‌മായിമ് ണാന് ണിമാക്കെ സൊല്ലുറെ. 35ബാന്‌മ് ബൂമിമ് അളിന്തെക്കു. ആന എന്ന്‌ദ് സൊല്ലുസുലാക്ക ഒരു ണാള്‌മ് അളിന്തെക്കമാട്ട.>>
ണാള്‌മ് ഗള്യേമ് ആര്‌ക്ക്‌മ് തെര്യ
36<<അയ്യി ബര്യ പോര ണാള്‌മ് ഗള്യേമ് എപ്പെന്ത് ആര്‌ക്ക്‌മ് തെര്യമാട്ട. മേലോഗാത്തിലിര്‌ക്ക ദൂദലാക്കൊ സാമിമഗാന്‌ക്കൊ അദ് തെര്യമാട്ട. അദെല്ല അപ്പനാന സാമി ഒരുത്താന്‌ക്ക്‌ത്തെ തെര്യു. 37ണോഗെ പെ്ളേത്തിര്‌ന്ത ഗള്യേലി ണഡാന്താദ്‌ണ പാസെ ആയിര്‌ക്കു മന്‌സാനായി പ്‌റാന്തവാ് ബര ബരാവു. 38മാമാങ്ക പൊങ്കുറാദ്‌ക്ക് മുദ ഉള്ള കാലാത്തിലി, ണോഗെ പെ്ട്ടിപേ്ളേക്കുള്ളുക്ക് പുക്കിന ണാള്‌മാട്ട്‌മ് ഉലഗാത്തില്യ ആള്‌ഗ തിന്ത് കുഡിത്ത്‌കൊണ്ട്‌മ്, പെ്ണ്ണ് എ്ഡ്‌ത്ത്‌കൊണ്ട്‌മ്, പെ്ണ്ണ് കൊഡുത്ത്‌കൊണ്ട്‌മ് ഇര്‌ന്താര്. 39ആന മാമാങ്ക പൊങ്കി ആള്‌ഗണ മുച്ചുഡാമ് ഇല്ലാദാക്കി എക്ക്‌റമാട്ട് അവാര്‌ഗാക്ക് ആര്‌ക്ക്‌മ് എന്ത ണഡാക്ക്യ പോദ് എന്ത് തെര്യാമില്ലെ. അദേപാസെ ആയിര്‌ക്കു മന്‌സാനായി പ്‌റാന്തവാന്‌ദ് ബരാവുമ്. 40അയ്യി ണാള് റണ്ട് ആണ്‌മക്ക ഗദ്ദേലി ബേലെ എ്ഡ്‌ത്ത് കൊണ്ടിര്‌ക്കുവാര്. അദിലി എനാണ ണമ്പിന ഒരുത്താന എ്ഡ്‌ക്കുവാര്. എനാണ ണമ്പാത്ത ഒരുത്താന എ്ഡ്‌ക്കമാട്ടാര്. 41റണ്ട് പെ്ണ്ണ്‌മക്കഗ ഒരു ബീസ്‌കല്ലിലി ബീസികൊണ്ടിര്‌ക്കുവാര്. എനാണ ണമ്പിന ഒരുത്തിന എ്ഡ്‌ക്കുവാര്. എനാണ ണമ്പാത്ത ഒരുത്തിന തള്ളുവാര്.
42ണിമ്മ്‌ദ് ആണ്ടവാ് ബരാദ് ഏദ് ഗള്യെ എന്ത് ണിമാക്ക് തെര്യാത്താദ്‌ണാലെ ണിമ്മ എപ്പ്‌മ് ഒരുക്കത്തോഡെ ഇര്‌ന്ത് കൊള്ളിരി. 43ആന ണിമ്മ ഈ കാര്യ തെരിന്തിര്‌ക്കുഡൊ. ത്‌റ്‌ട്ടാ് ഏദ് ഗള്യേക്ക് ബരുവാ് എന്ത് കൂരെക്കാറാ് തെരിന്തിര്‌ന്താക്കി അവാ് ഉറാങ്കാദിര്‌ന്ത് തന്ന് കൂരേന തുറാക്ക്യ ബ്‌ഡ മാട്ടാ്. 44അദേപാസെ ണിമാക്ക് ണെനേവു ഇല്ലാത്ത ഗള്യേക്ക് മന്‌സാനായി പ്‌റാന്തവാ് ബരാദ്‌ണാലെ ണിമ്മാമ് ഒരുങ്കിര്‌ക്കുഡൊ.>>
ണമ്പ്യമുഡിര പണ്ണ്യക്കാറാന്‌മ് ണമ്പ്യമുഡ്യാത്ത പണ്ണ്യക്കാറാന്‌മ്
45<<തന്ന് കൂരേല്യ ബേലെക്കാറാര്‌ക്ക് അദാദ് ഗള്യേക്ക് തീനി കൊഡുക്ക്യ ബേ്ണ്ടി പണ്ണാഡിക്ക് ണമ്പ്യമുഡിരവാനായി എ്ഡ്‌ത്ത് ബെത്തിര്‌ക്ക ബുദ്ദ്യുള്ള ബേലെക്കാറാ് ആര്? 46പണ്ണാഡി ബര്‌ഗാട്ടി തനാക്ക് കൊഡുത്ത ബേലെന അദേപഡി അയ്യി ബേലെക്കാറാ് സെയ്‌ദിര്‌ക്കാദ്‌ണ കണ്ട അയ്യി ബേലെക്കാറാ് ബാഗ്യക്കാറാ്. 47അച്ചെ സെയ്‌രവാന അയ്യി പണ്ണാഡി തന്ന് മുച്ചുഡ സൊത്തുഗണാമ് ണോഡി ണഡാത്ത്‌റവാ് ആക്കി ബെക്കുവാ് എന്ത് ണേര്‌മായിമ് ണാന് ണിമാക്കെ സൊല്ലുറെ. 48ആന അവാ് കെ്ട്ടവാ് ആനാലൊ, <എന്ന് പണ്ണാഡി ബര്യ ഗള്യാവു> എന്ത് മനേസ്സിലി ണെനേത്ത് കൊണ്ട്, 49അവാ് തന്ന്‌ദൊപ്പ ബേലെ സെയ്‌രവാര്‌ണ അഡിത്ത്‌പ്‌ഡിത്ത് കൊണ്ട്‌മ്, കുഡ്യാര്‌ദൊപ്പ തിന്ത് കുഡിത്ത്‌കൊണ്ട്‌മ് ഇര്‌ക്ക്യ പ്‌ഡിക്കാ്. 50അക്കുളെ അയ്യി ബേലെക്കാറാ് ണെനേക്കാത്ത ണാള്‌ക്ക്‌മ് അവാന്‌ക്ക് തെര്യാത്ത ഗള്യേക്ക്‌മ് അവാന്‌ദ് പണ്ണാഡി ബന്ത്, 51അവാന്‌ക്ക് ദണ്ടണെ കൊഡുത്ത്#24:51ദണ്ടണെ കൊഡുത്ത് ഗ്‌റീക്ക് ണായാത്തിലി റണ്ട് തുണ്ടു ആയി തുണ്ടിസി എക്കുവാര് എന്ത്‌ത്തെ എ്ള്‌ദിര്‌ക്കാദ്. ബക്‌ദിക്കാറാരായി ണഡിക്കവാര് കൂട്ടാക്കെ എജേക്കുവാ്. അദിലി അഗാറ്റ്‌മ് പല്ല്‌ണ കെ്റ്‌സ്‌കെ്റ്‌സ കഡിക്കാദ്‌മ് ഇര്‌ക്കു.>>
Currently Selected:
മത്തായി 24: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
